Qanoq iliorlutit meeqqatit sernissorsinnaavigit?

UKIORPASSUARNI meeqqat atuarfianneereersimalluni Wernera inuusuttut allat 3000-it missaanniittut peqatigalugit São Paulomi Brasiliamiittumi ilinniaqqippoq. Tamaani ilinniartunik ikiaroornartunik tuniniaallutillu atuisunik aatsaat takusaqarpoq. Werner timikkut mikisunnguummat sivitsunngitsoq ilinniartut allat annerusut imminnut ilanngutsinniarlugu nikanarsaataasunik ulorianartunillu iliuuseqarnissaanut pinngitsaalivaat.

Wernerip qatanngutaa, Eva, aamma ajornartorsiorpoq. Taanna pitsaanerpaamik angusaqarniarluni ilinniagassaminik ilungersuussingaarami nukissaaruttoorpoq sianiutilulerlunilu. Inuusuttorpassuit allat assigalugit Werner Evalu timikkut misigissutsikkullu sernissorneqarnissaminnik pisariaqartitsipput. Illit meeqqatit sunik pisariaqartitsippat? Qanoq iliorlutit inersimasunngornissaannut piareersartissinnaavigit? Meeqqavit qanoq siunissaqarnissaat kissaatigaajuk?

Meeqqat timikkuinnaanngitsoq pisariaqartitaqarput

Unamminiarnartut ullumikkut angajoqqaat meeqqaminnik sernissuiniarnerminni atortagaat eqqarsaatigilaariakkit. Ilaqutariittut inuunerup nakkaakkiartornera piitsuussutsillu annertusiartornera pissutigalugit nunat ilarpassuini meeqqat aqqusiniinnarmi inuusut amerliartuinnarput. Meeqqat sulisorineqartarnerat taakku atornerlunneqatsaalineqannginnerata kinguneraa. Ikiaroornartumittaaq atornerluineq inuusuttorpassuit inuunerannik aseruisarpoq. Assersuutigalugu, taama pisoqarsimavoq inuusuttuaraq Brasiliamiu ikiaroornartumik atornerluisunngormat, angerlarsimaffianni eqqissiviilliorneqartualerluni. Angajoqqaavisa misigissutsikkut annertuumik artorsaatissinneqarnermik saniatigut aamma ernermik katsorsarneqarneranut aningaasartuutit ilungersuutissarilerpaat, ikiaroornartuerniartartunillu naakkittaatsunit akileeqqusisunit orninneqartarput.

Ulluinnarni inuunermi tatineqaraluarlutik angajoqqaarpassuit ilungersortuarsinnarput meeqqatik nerisassanik, atisassanik inissamillu pilersorniarlugit kiisalu nakuusernermut, ikiaroornartumik atornerluinermut ajornartorsiutinullu allanut sernissorniarlugit. Tamanna assut nersornartuuvoq, naammappali? Aamma misigissutsikkut anersaakkullu ajoquserneqatsaalineqartariaqannginnerpat? Inuppassuit paasisimavaat angajoqqaajulluartuussagaanni aamma meeqqat ikinngutissarsiortarnerat aliikkutassarsiortarnerallu malinnaaffigisariaqartut. Qanorli ilillutik angajoqqaat oqimaaqatigiissaarisinnaappat meeqqaminnik sernissuinerminni ingasaassisooqqunatik imaluunniit akerlianik maleruutiavallaaqqunatik? Tamakku allaaserisami tulliuttumi sammineqarput.

[Quppernerup ataani ilanngussaq]