Naalagaaffimmik oqaluussissutiginninnermit nutaarsiassat
’Ullut tamaasa niueriartortarfimmi’
APUSTILI Paulusip Naalagaaffimmik tusagassamik siaruarterinissamut periarfissat tamaasa atortarsimavai. Eqqortumik isumallit nassaariniarlugit naalagiartarfimmi juutit oqaloqatigisarpai ullullu tamaasa niueriartortarfimmi naapitani oqaloqatigisarlugit. — apustilit suliait 17:17.
Ilungersuussineq taamaattoq ukiuni hundredelinni siullernili Jehovamik pallorfiginnittut ilumoortut ilisarnaatigisimavaat. (Matîuse 28:19, 20) Ullutsinni Jehovamut nalunaajaasut eqiasuillutik inuit eqqortumik isumallit sallusuissummik ilisarsileqqullugit periaatsit assigiinngitsut atortarpaat. (1 Timûtiuse 2:3, 4) Australiami misigisap tulliuttup tamanna takutippaa.
Sid Haroldilu Sydneymi qimuttuitsut unittarfiata eqqaani paarlakaallutik sapaatip-akunneranut ulluni tallimani atuagassianik Biibililersaarutinik qimerluugassiorfiliamik eqqaaniittarput. Taamaaliorlutik ukiuni tallimani Guutip naalagaaffia allanut oqaluttuarisarsimavaat. Sid 95-inik ukiulik nassuiaavoq: „87-inik ukioqalerama biilersinnaajunnaarpunga. Tamanna nikalluutigaara, kikkunnummi tamanut nalunaajaaneq nuannareqigakku. Ullut ilaanni takornarianit ornigarneqartorujussuarmi, Echo Pointimi, Katoombamiittumiitillunga, eqqumiitsuliortoq nunamik assilialianik qalipakkanik tuniniaarujoortoq takulerpara. Assilialiat qanillillugit isiginnaarpakka eqqarsalerlungalu assilissat nalunaajaallunga pooqattagisartakkama iluaniittut assilialianit taakkunannga kusanarnerullutillu akikinnerujussuusut. Taamaattumik isummerpunga qimerluugassiorfeerannguamik sananiarlunga amerlasuunillu takornariaqarfiusumut inissinniarlugu, atuagassiallu Biibililersaarutit kusanartunik assiliartalersukkat Jehovap Nalunaajaasuinit naqiterneqarsimasut saneqquttunut neqeroorutigisarniarlugit.
Ukiut sisamat matuma siorna qimerluugassiorfik Sydneymut nuuppara, Haroldillu ilaaqquffigaanga. Paarlakaalluta qimerluugassiorfik nakkutigisarparput ilagiillu ilaaffigisavut suleqatigalugit.“ Harold, massakkut 83-inik ukioqartoq, oqarpoq: „Ataasinngornermiit tallimanngornermut angerlarsimasoqarpiartanngilaq. Kisianni maani inuit ornigarfianni Guutip naalagaaffianik tusagassaq oqaluussissutigisarparput. Soorunami taamaaliorluta pitsaanerusunik angusaqartarpugut. Atuagassianik siaruartertakkatsitut amerlatigisunik siaruarterisarneq nunatsinni qaqutigoorluinnarpoq.“
Sid oqarpoq: „Naak ukiumut sumiiffinni assigiinngitsuni sisamani tallimaniluunniit inissittaraluartugut, piffissap sivikitsup ingerlanerani aqqusinermi ilisarisimaneqalertarpugut. Ilaat saaffiginnittarput atuagassianik perusullutik, ilaallu apeqqutissaqartarput akineqartikkusutaminnik. Allat minutsialunnguit oqaloqatiginnikkusuinnartarput. Piffissami tamatumaniinnaq soqutiginnittut uannut uteqqittarput, uanga taakkununnga uternanga,“ illarasaarpoq.
„Amerlasuut Biibilimik soqutiginnilluarput,“ Harold oqarpoq. „Qaammatip ataatsip ingerlanerani sisamat assigiinngitsut Jehovap nalunaajaasuinit Biibilimik atuaqqissaaqatigineqartalerput uatsinnit atuagassianik tunineqarsimagamik apeqqutaallu Biibili tunngavigalugu akisinnaasimagatsigik. Misigisanik taamaattunik assut qiimmassarneqartarpugut.“
Jehovap nalunaajaasuisa Sid, Harold apustili Paulusilu assigalugit tusagassamik inuunermut pingaarutilimmik siaruarterinissamut periarfissat tamaasa atortarpaat. Taamaalilluni ’nutaarsiassaq nuannersoq inuit najugaanni tamarsuarmi’ suli oqaluussissutigineqartarpoq. — Matîuse 24:14. (wE 1/7 98)