Atuartartut apeqqutaat
Jesus oqarsimavoq: ’Isertarfikkut nerukitsukkut iserumallusi assoruunniaritsi; oqarfigaassimi: amerlasuut iserniarumaarput, sapissallutilli.’ (Lúkarse 13:24) Tamanna qanoq paasisariaqarpa, ullumikkullu qanoq atorsinnaavarput?
Allassimaffik soqutiginartoq tamanna paasinerussavarput versit attavigisai misissorutsigik. Toqunissi qaammatit arfinillit missaannik sioqqullugu Jesus Jerusalemimiippoq naalaffiup atoqqeqqaarfiata nalliussineqarnerata nalaani. Guutip savaataanut paarsisuunini eqqartorpaa erseqqissarluguli juutit amerlanersaat tusarumannginnamik savaatinut taakkununnga ilaanngitsut. Oqarmat Ataatanilu ’ataasiullutik’ juutit ’ujaqqanik tigusipput milloorumallugu’. Peræamut Jordanip illua’tungaanut qimaavoq. — Juánase 10:1-40.
Tassani angutip aperaa: ’Naalagaq, annattussat ikippat?’ (Lúkarse 13:23) Apeqqut tamanna pingaartuuvoq, ingammik taamanikkut juutit isumaqarmata killilimmik amerlassusillit kisimik annakkumallutik iliuuseqarsinnaasut. Upperisarsiornikkut siuttuusut isumaat nalunngisavut naapertorlugit takorlooruminarpoq ikittut taakku kikkuusorineraat. Tamatumanili kukkulluinnarput, soorlu kingornatigut pisup takutikkaa.
Ukiut marluk missaanni Jesus juutit akornanniissimavoq. Ilinniartissimavai, tupinnartuliortarluni paasitillugillu qilammi naalagaaffimmik kingornussisinnaasut. Qanoq qisuariarpat? Amerlanersaasa ingammik siuttuisa Abrahamimut kinguaajunertik Guutillu inatsisaanik pigisaqarnertik tulluusimaarutigaat. (Matîuse 23:2; Juánase 8:31-44) Paarsisulli ilumoortup nipaa akueriumanngilaat malikkusunnaguluunniit. Matup ammasup sioraaniittutullusooq issimapput Naalagaaffimmut ilaalersinnaallutik, matukkulli iserusunngillat. Ikittuinnaat innuttaaqatigiinni akimannginnerusuneersut Jesusip tusarliussaa qisuariarfigaat najuinnarlugulu. — Lúkarse 22:28-30; Juánase 7:47-49.
Taakku ukiumi 33-mi piinsip ulluani anersaamik illernartumik taninneqarput. (apustilit suliait 2:1-38) Taakkua ’iluaatsuliorumatuunut’ Jesusimit eqqaaneqartunut, periarfissarigaluakkaminnik atuisimannginnertik pissutigalugu qiasunut qorsaqqortartunullu, ilaanngillat. — Lúkarse 13:27, 28.
Taamaattumik ukiuni hundredelinni siullerni ’amerlasuut’ tassaapput juutit, ingammillu juutit upperisarsiornikkut siuttui. Taakkua Guutimut iluarisaajumanerarput — namminnerli najoqqutassiatik iluarisatillu naapertorlugit, Guutip najoqqutassiai naapertornagit. Akerlianilli ilumoorussillutik Naalagaaffimmut ilaajumanerminnik ersersitsisut ’ikittut’ tassaalerput tanitat kristumiut ilagiissaannut ilaasortat.
Allassimaffiup annerusumik isumaa qanoq ullutsinni atorsinnaanersoq takoriartigu. Oqaluffeqarfinnut ilaasortat amerlasuut ajoqersorneqarsimapput qilaliarnissaminnik. Neriuulli tamanna Biibilimi ajoqersuutigineqartunik eqqortunik tunngaveqanngilaq. Itsaq juutit assigalugit Guutimut iluarisaarusupput, kisianni namminneq ilurisartik naapertorlugu.
Taamaattoq ullutsinni amerlanngitsut maniguullutik Guutip naalagaaffianik tusarliussaq ilassisimavaat Jehovamullu tunniulluinnarlutik, taassumunnga iluarisaallutik. Taamaalillutik tassaalersimapput ’naalagaaffimmi qitornaasut’. (Matîuse 13:38) ’Qitornat’ tanitaasut taakku ukiumi 33-mi u.n.k. piinsip ulluaniit qaaqquneqartalersimapput. Jehovap Nalunaajaasui sivisuumik isumaqarsimapput Guutip innuttaminut iliorfiginninnerata takutikkaa qilammi inuusussat tamangajammik qaaqqunneqareersimasut. Taamaattumik ukiuni kingulliunerusuni sallusuissummik ilikkarsimasut nunami paratiisimi naassaanngitsumik inuunissartik neriugisaraat. Taakku kristumiut tanitat sinnerinit qilaliarumaartunit ikiliartuinnartunit amerlanerungaarput. Lúkarse 13:24-mi allassimasut pingaarnerusumik qilammi neriugisalinnut tunngatinneqarpoq, kisianni allassimaffik aamma nunami neriugisalinnut unnersuussutinik pitsaasunik imaqarpoq.
Jesusip assoroornissatsinnut kajumissaarmatigut imaanngilaq nammineq Ataataataluunniit akornusersorniaraatigut. Lúkarse 13:24 tunngavigalugu paasivarput Guutip piumasaqaatigigaa matukkut isernissaminnut qinngaqqunnartut isissanngitsut. ’Assoruunniaritsi,’ Jesus oqarpoq. Assoroornerup nassatarivaa iliuuseqarneq, aap, tamanna isumaqarpoq sukataartoqartariaqartoq. Isumaqassanngilagut allat kisimik pineqartut. Tamatta immikkut sukataartariaqarpugut. Imminut aperigit: ’Assoruuppunga? Itsaq timersortartutut ajugaaniarlunga imminut tunniusimatigivunga? Taakkua affaannarmik tunniusimasimanngillat suusupaginninnatilluunniit. Eqqissillutik pisimanngillat. Uanga taamaappunga?’
Jesusip oqaatigimisaarpaa matukkut iserniartoqarumaartoq namminneq piumallerunik, eqqissivillutilluunniit nukingiunnagulu namminneq iluarisamittut. Taamatut isumaqarneq Jehovap nalunaajaasuinut ataasiakkanut tuniluussinnaavoq; imatut isumaqalersoortoqarsinnaavoq: ’Kristumiut tunniulluinnartut, amerlasuunik pilliuteqarsimallutik ukiorpassuarni assoruussimasut, nalunngilakka, taamaattoq aaqqissuussaanerup matuma ajortup naggatissaa suli nalliutsinnagu toqupput. Taamaattumik tamaviaarunnaaginnarlanga eqqissillungalu nalinginnaanerusumik inuuliinnarlunga.’
Taamatut eqqarsartoqalersinnaavoq, silatusaarnerussavali? Apustilit taamatut eqqarsarsimappat? Naamerluinnaq. Pallorfignninnermut ilumoortumut annertuumik iliuuseqartarsimapput toqunissartik tikivillugu. Assersuutigalugu Paulus ima oqarsinnaasimavoq: ’[Kristus] oqaatigaarput . . . Tamannami suliariniarpara taassuma sunniineragut pissaalluni uanni sunniisukkut assoruullunga.’ Kingusinnerusukkut allassimavoq: ’Tamannami siunertaralugu erloqisarpugut mitaatigineqartarlutalu Guuti uumasoq neriuffigigatsigu; taanna inuit tamarmik annaassisigaat, uppertulli pingaarlutik.’ — Kulorsamiut 1:28, 29; 1 Timûtiuse 4:10.
Nalunngilarput Paulus assoruukkami eqqortumik iliorsimasoq. Qanoq nalerisimaarnartigissannginnerpa tamatta immikkut Paulusitut oqarsinnaagaluarutta: ’Sorsunneq ajunngitsoq sorsunnerisimavara, arpaffissaq naavara, upperneq aalajangiuppara.’ (2 Timûtiuse 4:7) Jesusip oqaasii Lúkarse 13:24-miittut eqqarsaatigalugit immitsinnut aperisinnaavugut: ’Eqiasuippunga aallussilluarlungalu? Jesusip oqaaqqissaarilluni ’isertarfikkut nerukitsukkut iserniarluni assorooqqusinera’ paasisimaneriga tamanut ersarippa? (wE 15/6 98)