’Inunnik inuiannit tamaneersunik ajoqersuganngortitsigitsi’
„TAAMAATTUMIK aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit.“ Jesusip peqqussutaa Matîuse 28:19-imi allassimasoq Ny Verden-nutsikkami taamatut nutserneqarsimavoq. Taamatulli nutserneqarsimanera isornartorsiorneqarsimavoq. Assersuutigalugu, quppersagannguami upperisarsiornermut tunngasumi ima allassimasoqarpoq: „Nutsigaq griikerisuuanut naapertuuttutuaq aana: ’Inuiaqatigiit tamaasa ajoqersuganngortissigik!’“ Tamanna ilumoorpa?
Biibilimik nutsikkat ilarpassuini griikerisuua toqqaannartumik nutserlugu taamatut nutserisoqarsimavoq: ’Inuiaqatigiit tamaasa ajoqersuganngortissigik.’ Taamaattumik ima nutserineq, „inunnillu inuiaqatigiinnit tamaneersunik ajoqersuganngortitsigitsi“, sumik tunngaveqarpa? Ataqatigisai tunngaviupput. Oqaaseq ’kuillugillu’ (taakku) ersarissumik inunnut ataasiakkaanut tunngavoq, inuiannut tunnganani. Tyskeq ilisimatooq Hans Bruns ima oqarsimavoq: „[Oqaaseq] ’taakku’ (’kuisigik’) inuiannut tunnganngilaq (griikerisuumi tamanna ersarilluarpoq), inuiannili inunnut ataasiakkaanut tunngavoq.“
Aammattaaq Jesusip peqqussutaata naammassineqarnera eqqaaneqarsinnaavoq. Paulusip Barnabasillu Derbemi, illoqarfimmi Asiaaqqamiittumi, oqaluussinerat pillugu ima allassimasoqarpoq: ’Illoqarfimmilu tamatumani iivangkiiliu oqaluutigigamikku ikinngitsullu ajoqersuganngortikkamikkik Lystramut Ikoniumimullu Antiokiamullu uterput.’ (apustilit suliait 14:21) Malugiuk Paulus Barnabasilu ajoqersuganngortitsisimasut, imaanngitsoq Derbemiut tamaasa ajoqersuganngortissimagaat, kisianni Derbemiut ilaat.
Taamatuttaaq naggatissaq pillugu sarĸúmersitat-ni siulittuummi oqaatigineqanngilaq inuiaat tamarmiusukkuutaarlutik Guutimut kiffartussasut, kisianni ’amerlangaartut . . . inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’ taamaaliussasut. (sarĸúmersitat 7:9) Taamaattumik ’Allakkanik tamanik Guutip anersaarneranik ilalinnik’ Ny Verden-nutsigaq tatigisassaalluarpoq. — 2 Timûtiuse 3:16. (wE 1/1 98)