Inatsisit Qulit
TULUIT NUNAANNI biskoppip Gloucesterimeersup paasisimavaa biskoppiuffimmini palasit affaannit amerlanerusut Inatsisit Qulit alanngaarsinnaanngikkaat, 10 procentiisalu Biibilimi sumi allassimanersut nalugaat. Tamannali pisimavoq ukiut 450-it matuma siorna. Taamanernilli siuariartoqarsimava? Naamerluinnaq — soorlu qanittukkut Sunday Times-ip anglikanerit palasiisa akornanni misissuisimanerata takutikkaa.
Palasit apersorneqartut 200-t 34 procentiinnaasa Inatsisit Qulit issuarsinnaavaat. Sinnerisa ilaat ataaseq isumaqarpoq inatsisit tamakkua killilersuivallaartut, allallu atorsinnaannginnerarpai isumaqarluni ullumikkut ileqqussatigut ajornartorsiutinut naleqqutinngitsut.
Illit Inatsisit Qulit nalunngiligit, nalunngiliullu sumi nassaassaasut? Biibilimi atuakkat siulliit tullianni, Mosesimik allakkat aappaat-ni, kapitali 20-mi versini siullerni 17-ini allattorneqarsimapput. Atuarusunngiligit? Imatut ajornanngitsunnguamik eqqaamajuminarsarneqarsinnaapput: Siulliit sisamat Guutimik pallorfiginninnitsinnut tunngapput, tallimaat ilaqutariittut inuunermut tunngavoq, arfernanit qulingiluaannut inoqatitsinnut attaveqarnitsinnut tunngapput, qulingallu immikkut ittuuvoq, nammineq uummatitsinnik misissuinissamut, pissutiginiakkatsinnik paasiniaanissamut pissutissikkamisigut. Kristumiut najoqqutassianik qanoq ilillutik atuisinnaanerat kinguliani eqqartorneqarpoq.
Siulleq: Pinngortitsiserput tamakkiisumik tunniusimaffigiuk. Aappaat: Pallorfiginninnermi inuusaliat assilissallu atussanngilatit. Pingajuat: Guutip aqqa tamatigut ataqqiuk qutsissisillugulu. Sisamaat: Akornusersorneqarnak anersaamut tunngasunik sammisaqarnissannut piffissaqartarit. Tallimaat: Meeqqat, angajoqqaasi ataqqisigik. Arfernat: Inuassanngilatit. Arfineq-aappaat: Allasiussanngilatit. Arfineq-pingajuat: Tillissanngilatit. Qulingiluaat: Ilumoortumik oqaluttarit. Qulingat: Piumatussuseq nigoruk.
Inatsisit Qulit inatsisinut katitikkanut Mosesimut tunniunneqarsimasunut ilaapput. Najoqqutassialli tamakkua imarisaat tamatigut atuuttuupput. (Rûmamiut 6:14; Kulorsamiut 2:13, 14) Taamaattumik Jesusip ajoqersugaasa Inatsisit Qulit issuartarsimavaat innersuussutigisarsimallugillu. (Rûmamiut 13:8-10) Ullumikkut inuusut tamarmik najoqqutassiat Guutimit isumassarsiarititaasut tamakku ataqqillugillu maleruartuuppatigik pilluarnerungaarlutillu toqqissisimanerungaassagaluarput! (wE 1/12 97)