Sallusuissummit kiffaajunnaarsitaaneq

USA-mi inuit millioninit amerlanerit parnaarussivinniipput. Taakkua ilaat 3000-ingajaat toqumut pillagaasimapput. Toqumut pillagaasimallutit takorloorsinnaaviuk. Qanoq misigissagaluarpit? Eqqarsaat tujorminarpoq, ilaa. Inuilli tarmarmik sukkut arlaatigut taama ittunik atugaqarput. Biibilimi allassimavoq: ’Tamarmik ajortuliorput Guutimi nersornaammik ajorsarlutik.’ (Rûmamiut 3:23) Aap, Adamip kinguaavisut ajortimi ’parnaarussaaqqavugut’. (Rûmamiut 5:12) Nagguitta sunniutaa ullut tamaasa malugisarparput, apustili Paulusitut ippugut, taanna ima allassimavoq: ’Inatsisit allat avatinniittut misigisaraakka eqqarsaatima inatsisaanut akerartortuusut, tigusatullu taakkua kiffartortippaannga ajortip inatsisaanut avatinniittunut.’ — Rûmamiut 7:23.

Inunnguuseralugu ajortiliunerput pissutigalugu tamatta toqusussaavugut, tamanna pillugu Biibilimi ima allassimavoq: ’Ajortip akissarsiarititaa tassa toqu.’ (Rûmamiut 6:23) Tussiaasiortup Mosesip pissutsit ima allaaserisimavai: „Ukiummi inuuffigisassavut tassa ukiut 70-it, imaluunniit 80-it, nukissaqassagutta, ukiutta ajunnginnersaat allaat sulipiloornermik ulikkaarput. Ukiummi ingerlalertoqaat timmisugut soorlu.“ — Tussiaat 90:10; naleqqiuguk Jâko 4:14.

Inuit ajortimut toqumullu inussiaataanerat eqqarsaatigalugu Jesus malitsiminut ima oqarsimavoq: ’Sallusuissutsip inussiaajunnaarsissavaasi.’ (Juánase 8:32) Oqaatsinik taakkuninnga Jesusip malitsini Romamiut naalakkersuinerannit anigusinneqarnissaannik annerungaartumik neriuutissaqalersippai — ajortaannik isumakkeerfigineqarsinnaanngortippai toqumillu anigusissinnaanngortillugit! Qanoq ilillutik tamanna pisinnaavaat? Jesus oqarpoq: ’Ernerup inussiaajunnaarsippasi inussiaajunnaarluassaasi.’ (Juánase 8:36) Aap, inuunini pilliutigigamiuk, ’Ernerup’, Jesusip, pilliut saammaannartitsisoq Adamip annaasimasaanik utertitsisoq tunniuppaa. (1 Juánase 4:10) Tamatuma inuit naalattut ajortip toqullu inussiaasitsinerannit iperarneqarnissaannik periarfissippai. Guutip ernitua toquvoq ’kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. — Juánase 3:16.

Sallusuissut kiffaanngissuseqalersitsisinnaasoq Jesus Kristusimut tunngavoq. Taassuma malittai Guutip naalagaaffia nunamut tunngasunut aqutsilerpat ajortimit toqumillu anigusinneqarnissamik neriugisaqarput. Sallusuissummik Guutip oqaasianiittumik ilassinnittut allaat maanna kiffaanngissusermik piviusumik misigisaqarsinnaapput. Qanoq ilillutik?

Toqusimasunut sioorannginneq

Ullumikkut millionilippassuit toqusimasut siooragalugit inuupput. Sooq? Upperisaminni toqusut tarnaasa timi qimallugu anersaat silarsuaanukartarnerannik ajoqersorneqaramik. Tamanna pissutigalugu nunat ilaanni nalinginnaavoq toqusup ilaqutaminit ullut unnuallu arlallit pigganeqartarneranut. Tamatumunnga ilaagajuppoq nipituumik erinarsorneq tumerparpaarnerlu. Qimagaasut isumaqarput taamaaliornertik toqusumit nuannarineqassasoq inuusunillu kalupitsitsiartorlutik anersaat silarsuaannit utinngitsoortissinnaallugit. Toqu pillugu kristumiuuneraqatigiit ajoqersuinerlunnerisa ileqqoq tamanna ataavartiinnarpaat.

Toqungasulli pillugit ilumoortoq Biibilip qulaarpaa. Ersarissumik allassimavoq tarnit tassaasoq illit, toqup kingorna ilinnit aninngitsoq paasissaanngitsoq. (1 Moses 2:7; Hesekiel 18:4) Aammattaaq toqungasut anniarfimmi innerinnarmi anniartitaanngillat anersaalluunniit silarsuaaniinnatik inuusunit sunniisinnaallutik. Biibilimi allassimavoq: ’Toqungasut sunnguamilluunniit ilisimasaqanngillat . . . toqusut inaanni ornikkanni suliassaqanngilaq pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.’ — Nalunaajaasup oqaasii 9:5, 10.

Ilumoortut Biibilimeersut tamakkua inuppassuarnut toqumik sioorajunnaarsitsisimapput. Siuaasaminnik saammarsaaniarlutik akisuunik pilliuteqartariaarupput asasamilluunniit ajortaat pillugit naakkittaatsumik anniartitaanissaat annilaangassutigisariaarullugit. Ilikkarsimavaat Biibili toqungasunut neriuutissaqartitsisoq, oqaluttuuppaatigummi Guutip piffissaa nalliuppat ’toqusut makikkumaartut iluartullu iluaatsullu’. (apustilit suliait 24:15; Juánase 5:28, 29) Toqungasut maanna qasuerserput soorlu peqqinnartumik sinittut. — Naleqqiuguk Juánase 11:11-14.

Toqungasut pillugit ilumoortup makititaanissamillu neriugisap toqup nassatarisaanik isumatsangaarneq peersinnaavaa. Neriuutip taamaattup USA-mi aappariit ernerminnik sisamanik ukiulimmik ajunaarnikkut annaasaqartut annertoqqusersimavai. „Makititaaffimmi ernitta takunissaata tungaanut matuneqarsinnaanngitsumik maqaasisaqassaagut,“ arnaa oqarpoq. „Nalunngilarpulli anniaateqarnerput utaqqiisaannaasoq Jehovami neriorsuisimavoq qullivut isitsinnik allarterumaarlugit.“ — sarĸúmersitat 21:3, 4.

Siunissaq pillugu siooragisaqannginneq

Siunissaq qanoq issava? Atomip nukinganik sorsunnermi nunarsuarput aserugaassava? Avatangiisit ajorsinerat pissutaalluni nunarsuaq inuuffissaajunnaassava? Ileqqut tungaatigut inatsisaatsunngortoqassava paatsiveerunneqarlunilu? Amerlasuut tamakkua sioorassutigaat.

Biibilili siooranermut ajortumut tamatumunnga kiffaanngissutsimik neqeroorpoq. Neriorsorpaatigut ’nunarsuaq ataannassasoq’. (Nalunaajaasup oqaasii 1:4) Jehovap nunarsuaq pinngortinngilaa inunnit akisussaassuseqanngitsunit aserortussanngorlugu. (Jesaja 45:18) Naagga, Jehovap nunarsuaq pinngortippaa inuiaat ataasiussuseqartut angerlarsimaffissaattut paratiisiusutut. ( 1 Moses 1:27, 28) Siunertaa allanngorsimanngilaq. Biibilimi allassimavoq Guutip ’nunamik aseruisut aserussagai’. (sarĸúmersitat 11:18) Tamatuma kingorna „qanilaartut nuna kingornutissavaat,“ Biibilimi allassimavoq, „pilluangaarlutillu inuussapput.“ — Tussiaat 37:11.

Neriorsuut tamanna uppernarpoq, Guutimi sallusinnaanngilaq. Jehova pruffiitini Esajas aqqutigalugu ima oqarpoq: „Taama ippoq oqaasera qaninnit anisoq: susaarluni uannut utissannigilaq, kisianni suliareqqusakka suliarissavai naammasseqqusakkalu naammassissallugit.“ (Jesaja 55:11; Títuse 1:2) Taamaattumik tatigisinnaavarput Guutip neriorsuutaasa Biibilimi 2 Pîtruse 3:13-mi allassimasut eqquunnissaat: ’Unnersuutaali naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’

Inunnut sioorajunnaarneq

Angutinik arnanillu Guutimut tunniusimanerminni sioorannginnermik ersersitsinermikkut maligassiuilluinnartunik Biibilip tunisimavaatigut. Taakkua ilagaat Gideon, Barak, Debora, Daniel, Ester, Jeremias, Abigail Jaelilu — ilaminiinnanngui taassagaanni. Angutit arnallu aalajaatsut taakkua tussiaasiortup isumaata assinganik ersersitsipput: „Guuti tunaarigakku siooranngilanga. Inuit soriarsinnaanngilaannga.“ — Tussiaat 56:12.

Ukiuni hundredelinni siullerni apustili Peter Johannesilu oqartussaasunit silamiunit oqaluussiunnaaqquneqaramik sioorannginnermik taamaattumik ersersitsipput. ’Massami,’ oqarput, ’takusavut tusakkavullu oqaatiginnginneq saperpavut.’ Taamatut aalajangiusimasaqarnerup kinguneranik kingusinnerusukkut Peter Johannesilu parnaarussaapput. Tupinnartuliornikkut iperagaagamik, ingerlaannaq ’Guutip oqaasia siooranatik oqaluutigeqqilerpaat’. Peter apustilillu allat juutit killisiuisoqatigiivinut sassartinneqarput. ’Ilungersorluta inerteraluarpassi atikkut tamatumuuna ajoqersueqqunasi,’ palasiunerup oqarfigai, ’tassalu Jerusalem ajoqersuutissinnik tamakkerparsi.’ Peter apustilillu allat ima akipput: ’Guuti inunnit naalattariaqarneruvoq.’ — apustilit suliait 4:16, 17, 19, 20, 31; 5:18-20, 27-29.

Jehovap nalunaajaasuisa Guutip naalagaaffia pillugu nutaarsiassamik nuannersumik oqaluussinerminni ukiuni hundredelinni siullerni kristumiut aallussilluarnerat malinniartarpaat. Allaat inuusuttortaasa ilarpassui upperisartik pillugu siooranatik allanut oqaluussigajupput. Assersuutit ilaat takoriartigik.

Stacie inuusuttuaraavoq inunnguutsiminillu ittuutuujulluni. Taamaattumik upperisani pillugu allanut oqalunnissani aallaqqaammut unamminiarnartuutissimavaa. Ittoortarnini qaangerniarlugu qanoq iliorsimava? „Biibili atuaqqissaartarsimavara eqqartukkamalu paasilluarsimanissaat qulakkeertarlugu,“ oqarpoq. „Tamatuma oqinnerulersippaa imminullu tatiginerulersillunga.“ Staciep tusaamasaalluarnera najugarisaata aviisiani allaatigineqarpoq. Ilanngutassiaq ilinniartitsisuisa ilaannit allanneqarsimavoq, imalu ilaqarluni: „Inuusuttuaqqat amerlanersaasa tatineqaatigisartagaannut [Staciep] akiuunnissaanut upperisaata nukissaqalersissimagunarpaa. . . . Isumaqarpoq Guutip kiffartuunnera isummamini siulliuttariaqarlugu.“

Tommy tallimanik ukioqarluni angajoqqaaminit Biibili ilinnialersimavaa. Ukiukikkaluarluni pallorfiginninneq ilumoortoq aalajangiulluinnarsimavaa. Atuaqatini nalliuttut pillugit titartaagaangata, Tommy Guutip Paratiisimik neriorsuutaa pillugu titartaasarpoq. Inuusuttuaraalluni Tommyp malugisimavaa atuartut amerlasuut Jehovap nalunaajaasuisa upperisaat pillugu ilisimasaqarpianngitsut. Siooraneq tunuarsimaarutiginagu ilinniartitsisumi ilaat aperaa nalunaaquttap-akunnerani ataatsimi atuaqatimi apeqqutissaasa akinissaannut periarfissinneqarsinnaanerluni. Akuerineqarpoq nalunaajaalluarporlu.

Markietta 17-inik ukioqarluni upperisani pillugu atuaqatimi oqaloqatiginissaanut periarfissarsisimavoq. „Oqalugiartussatut pisassinneqarpugut,“ oqarpoq. „Atuagaq Unge spørger — svar der duera pillugu oqalugiaatissatut qinerpara. Atuakkap kapitaliisa tallimat qulequtaat allattarfissuarmut allappakka. Atuaqatikka qinnuigaakka pingaarnerusorisatik siulliullugit tulleriiaaqqullugit.“ Taava atuaqatinnik peqataaffigineqartumik oqaloqatigiinneqarpoq. „Atuaqatinnut atuagaq takutippara,“ Markietta naggasiivoq, „atuartullu arlallit atuakkamik piumapput. Ilinniartitsisora aamma piumavoq.“

Sallusuissutsip kiffaajunnaarsissinnaavaatit

Soorlu takoreeripput sallusuissut Biibilimiittoq qanorluunniit ukiulinnut taassuminnga atuaqqissaartunut oqariartuutaanullu uummammiuliussisunut kiffaajunnaarsitsisinnaavoq. Toqu, siunissaq inuillu siooragiunnaartarpaat. Naggataatigut Jesusip utertitsissutaata inuiaat naalattut ajortimit toqumillu aniguisissavai. Ajortimit kingornussatsinnik paarnaarussaajunnaarluta, nunarsuarmi paratiisimi naassaanngitsumik inuulerutta nuannissaqaaq. — Tussiaat 37:29.

Pilluaqqussutissat Guutip neriorsuutigisimasai pillugit ilinniagaqarnerorusuppit? Taamaappat qanoq iliussavit? Jesus oqarpoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Kiffaanngissuseq Jesusip ajoqersukkaminut neriorsuutigisaa misigiumagukku, Jehova Guuti erneralu pillugit ilinniartariaqarputit. Guutip piumasaa suunersoq paasisariaqarpat naammassillugulu, Biibilimimi ima allassimavoq: ’Silarsuaq pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’ — 1 Juánase 2:17. (wE 1/2 97)

[Quppernerup ataani ilanngussaq]

[Qupp. 7-imi assiliartaq]

Guutip naalagaaffiata ataani inuiaat kiisami ajortimit toqumillu aniguisinneqassapput