Guutip piumasaqaataanik ilinniartitsinermi sakku nutaaq
„ATUAGASSIAARAQ ersarissumik, toqqaannartumik inussiarnersumillu allataagami ilimagisinnaasatsinnit annerungaartumik kinguneqarumaarpoq. Paasiuminartumik tusarnersumillu allagaagami inuit ilumoortut imminullu misissoqqissaartut ima oqarnissaannut killissinnaavaa: ’Guuti ilumut ilussinniippoq’“. (1 Korintumiut 14:25) Thailandimi Jehovap nalunaajaasuisa ilaat taama oqarsimavoq atuagassiaaraq nutaaq Guutip sumik piumaffigaatigut? eqqartoramiuk. 1996/97-imi ataatsimeersuarnerni „Eqqissinermik Guutip pianik tusarliisut“-mik qulequtalinni Napasuliaq Alapernaarsuiffiup Peqatigiiffianit saqqummersinneqarpoq.
Atuagassiaaraq qalipaatilik 32-nik quppernilik Biibilimik atuaqqissaarnermi atortussatut sanaajuvoq. Biibilimi ajoqersuutit tunngaviusut sammivai. Oqaaseqatigiit paasiuminartuupput naatsuullutillu, Guutip sumik piumaffigineraatigut ersarissumik nassuiarpaa. Atuartut paasiuminaatsissanngilaat. Atuagassiaaraq nutaaq taanna atorlugu qanoq ilillutit Biibilimik atuaqqissaaqateqartassavit?
Apeqqutit atortakkit. Ilinniagassat aallartinneranni apeqquteqarpoq. Apeqqutit kingorna immikkoortut normui ungaluusikkat nassaarisinnaavatit. Apeqqutit taakkua ilinniartitsinerup siorna kingornalu atorneqassapput. Assersuutigalugu angerlarsimaffimmi Biibilimik atuaqqissaarnerup aallartinnerani apeqqut apeqqutigisinnaavat ilinniartoq oqaaseqartinniarlugu. Kukkusumik akissuteqarpat ingerlaannaq naqqinnagu atuaqqissaarneq ingerlatiinnaruk. Ilinniagassap naanerani apeqqut uterfigiuk ilinniartup Biibilimut naapertuuttumik akisinnaalersimaneraa paasiniarlugu.
Allassimaffiit quppertakkit. Ilinniagassat tamarmik Biibilip sallusuissutaanik naatsunik allassimaffinnik taperserneqartunik imaqarput. Allassimaffiit issuarneqartut amerlanersaat ungaluuserneqanngimmata pingaaruteqarpoq ilinniartoq kajumissaassallugu nammineq Biibilimini quppertassagai. Guutip oqaasia atuassallugu eqqarsaatigeqqissaassallugulu pisariaqartippaa inuunermini atulissagunigit. — Josva 1:8.
Assilissat pingaartittakkit. Atuagassiaaraq assilissanik qalipakkanillu assiliartalersorluarsimavoq — 50-it sinnerlugit assiliartaqarpoq. Taakkua takujuminarsaataaginngillat aammali ilinniartitsinerup siumukarsarnissaanut iluaqutaassapput. Ilinniagassat kingulliit marluk (quppernerni tulleriittuni marlunniittut) ima qulequtallit assersuutigeriartigik: „Allat Guutip piumasaatut iliornissaannik ikiukkit“ aamma „Guuti kiffartorfiginiarlugu aalajangerneq“. Assilissat quppernerni taakkunani marlunni inuup ataatsip anersaakkut siumukarnera ersersippaat, torrutiinnarlugu oqaluussisoq, illumiit-illumut oqaluusseqataasoq, tunniulluinnartoq kiisalu kuisittoq takutinneqarpoq. Assilissat ilinniartumut innersuunnerisigut Guuti kiffartussagaanni suut pisariaqarnersut paasitissinnaavat.
Soqutiginnittormi atuffarissuunngippat atuarsinnaanngippalluunniit? Atuagassiaaqqap nutaap taassuma oqaatsini arlalinni kasettebåndimut immiunneqarnissaa Peqatigiiffiup isumagaa. Atuagassiaaqqap imarisaa allassimaffiillu issuarneqartut amerlasuut kasettebåndip imarissavai. Imatut tulleriinnilerlugu immiunneqassaaq: Siullermik apeqqut atuarneqassaaq, taava immikkoortoq (immikkoortulluunniit) apeqqummik akisisoq allassimaffiillu ilaat issuarneqarsimasut. Taava apeqqut tulleq atuarneqassaaq, taava immikkoortoq apeqqummik akisisoq allassimaffiillu, ilaalu ilanngullugit. Ilinniartup atuaqqissaarnissamut piareersarnermini båndi tusarnaarsinnaavaa. Atuaqqissaaqatigiinnermi båndi aamma atorneqarsinnaavoq.
Ataatsimeersuarnermi atuagassiaaqqamik nutaamik taassuminnga takunnittut oqaluussinerminni atussallugu qilanaraat. Assersuutigalugu pioneerit marluk (piffissaq tamaat oqaluussisartut) USA-meersut atuagassiaaqqamik pigamik ullualuit qaangiuttut aappariit inuusuttut pulaarfigisatik tamatuminnga tunivaat. Aappariit taakkua imai misissoramikkik qulequtaq „Iliuutsit Guutip uumigisai“ malugaat. „Guuti uumiginninneq ajortoq — asannittuaannartoq — ilinniartitaajuaannarsimavugut,“ arnaq inuusuttoq oqarpoq. „Immikkoortoq taanna atuaqqaassavara.“ Pioneerit taakku marluk sapaatip-akunnerata tulliani utermata arnap inuusuttup oqarfigai: „Atuagassiaaraq atuarpara. Iliuusersariaqakkavut maleruaruminaaqaat. Jehovap iluarisinnaanngilaatigut — katissimanngilagut. Aalajangerpugulli. Tallimanngorpat tulliani katissaagut.“ Pioneerit eqiitigalugit nangillutik oqarput: „Utoqqatserpugut suli atuaqqissaartalinnginnatta, eqqissiallaqaagulli.“
Aap, sapinngisannik atuagassiaaraq nutaaq atortaruk. Tassaavoq Guutip piumasaqaataanik ilinniartitsinermi sakku pitsaasoq. (wE 15/1 97)
[Qupp. 9-mi assiliartaq]
Atuagassiaaraq nutaaq, „Guutip sumik piumaffigaatigut?“ qanoq atussaviuk?