Naalagaaffimmik oqaluussissutiginninnermit nutaarsiassat

Kalaallit Nunaata avinngarusimanerpaartai tikinneqartut

Ukiorpassuarni Jehovap nalunaajaasuisa nutaarsiassamik nuannersumik oqaluussissutiginninnerminni atuagassiat Napasuliaq Alapernaarsuiffik aamma Iteritsi! atortarsimavaat. Atuagassiani taakkunani Jehovap ilisimassusia oqaasiani, Biibilimi, ersertoq unnersiutigineqartarpoq. Silarsuarmi pisut Biibilimi siulittuutinut attuumassuteqartut eqqumaffigaat, Biibilimilu unnersuussutit pitsaasut ullumikkut ajornartorsiutinut tunngatillugu innersuussutigisarpaat. — Jâko 3:17.

1994-imi Kalaallit Nunaanni Jehovap nalunaajaasui immikkut suliniuteqarput atuagassiat Napasuliaq Alapernaarsuiffik aamma Iteritsi! sapinngisamik inunnut amerlanerpaanut siuaruarterniarlugit. Aasap ingerlanerani allaat Kalaallit Nunaanni inoqarfiit avinngarusimanerpaat angullugit immikkut ittumik angalasoqarpoq. Oqaluussisartorpaaluit umiatsiamik kitaata sineriaatigut kilometerit 4000-it angalaffigaat Qaanaaq nunarsuarmilu inoqarfiit avannarpasinnerpaartaat tikivillugit. Angalanerat tamanna sapaatit-akunnerinik arfineq-marlunnik sivisussuseqarpoq. Kalaallit Nunaata kangiani, Tunumi, nalunaajaasut aappariit Illoqqortoormiuni oqaluussipput, taamaalilluni aatsaat tamanna nutaarsiassamik nuannersumik aaqqissuussaasumik oqaluussiffigineqarluni.

Ukiumi tamatumani siusinnerusukkut, apriilip qaammataani, Napasuliaq Alapernaarsuiffik-t aamma Iteritsi!-t 7513-it Kalaallit Nunaanni tamarmi agguaanneqarput. Tassa oqaluussisartut 127-usut agguaqatigiissillugu tamarmik atuagassianik 59-inik agguaassisimapput — inuit arfineq-marlussaannut tamanut atuagassiamik ataatsimik. Qaammammi tamatumani Iteritsi!-mi allaatigisaq saqqaani assiliartarineqartoq tassaavoq „Iviangikkut kræfterneq — Arnat tamarmik siooragisaat“. Nalunaajaasup ataatsip, atuagassianik 140-nik siuaruarterisup, tv-mi tusagassiortoq Iteritsi!-mik tunisimavaa. Ullut marlussuit qaangiuttut iviangikkut kræfterneq pillugu ilanngutassiaq tv-mi nutaarsiassatigut ilanngunneqarpoq. Tusagassiortup atuagassiaq qupperarlugu takutippaa, kalaallisut nutserluagaaneranik unnersiorluni. Aamma Iteritsi!-mi siunnersuutit atoriaannaasut nappaammik pinaveersaartitsinissamut tunngasut erseqqissaatigai.

Nalunaajaasoq tusagassiortumik atuagassiamik tunisisimasoq tv-kkut nutaarsiassani ilanngutassiami tamatumani apersorneqarpoq. Jehovap Nalunaajaasui pillugit apeqqutit akisarpai qaammammilu tassani atuagassianik siuaruarterineq annertooq eqqaallugu. Aamma ilisimassuseq atoriaannaasoq Biibilimiittoq innersuussutigaa tikkuarlugulu Biibilip unnersuussutai ullumikkut ajornartorsiutinik aaqqiiniarnermi iluaqutigilluarneqarsinnaasut.

Tv-kkut nutaarsiassani ilanngutassiami tassani aamma Kalaallit Nunaanni kræftimik akiuiniarnermik suliaqartoq apersorneqarpoq. Taanna oqarpoq kalaallisut kræfti pillugu allaaserisamik taama pitsaatigisumik paasissutissiilluartigisumillu aatsaat takulluni. Iteritsi!-milu kræfti pillugu allaaserisat atuarneqarnissaat tamanut kajumissaarutigaa. Oqarportaaq Jehovap Nalunaajaasuisa taamatut saqqummiussinerat qujamasuutigisariaqartoq.

Kalaallit Nunaanniinnaanngitsoq Jehovap Nalunaajaasuisa nunarsuaq tamakkerlugu nutaarsiassaq nuannersoq ’pinngortitani tamani qilaap ataaniittuni’ oqaluussissutigiuarsinnarpaat. (Kulorsamiut 1:23; apustilit suliait 1:8) Atuagassiat Biibililersaarutaasut, ilaatigut Napasuliaq Alapernaarsuiffik aamma Iteritsi!, ikiortigalugit inuit qanorluunniit ittut ullumikkut ajornartorsiutinik aaqqiiniarnissaannik ikiortarpaat siunissamillu pitsaanerusumik neriugisaqalersittarlugit. (wE 1/8 95)

[Qupp. 8-mi nunap assinga]

(Allassimasut qanoq inissisimanersut naqitami takuneqarsinnaavoq)

Qaanaaq (Thule)

Illoqqortoormiut (Scoresbysund)

Nuuk (Godthåb)