Anersaat silarsuaanni naalagaasut

KIA silarsuaq manna aquppaa? Inunnit pissaaneqarnerusumit nakkutigineqarpugut? Imaluunniit Guutip inuit ilaginnaannarsimavai? Apeqqutit tamakku akissutissarsiniarlugit Jesus Kristusip nunarsuarmi kiffartornerata nalaani pisimasoq siullermik sammeriartigu.

Kuisinnermi kingunitsianngua Jesus anersaamit takussaanngitsumit, Satan Diaavulumik taaneqartumit, usserniarneqarpoq. Usserniarneqarnerisa ilaat Biibilimi ima allaatigineqarpoq: ’Aamma [Diaavulup Jesus] aallaruppaa qaqqarsuarmut kingittorsuarmut, silamiullu naalagaaffii tamaasa pingaartorsuussutaallu taassumunnga qimerloortippai.’ (Matîuse 4:8) Taava Satanip Jesus ima oqarfigaa: ’Piginnaassut manna tamaat taakkualu pingaartorsuussutaat ilinnut tunniukkumaarpakka; uannut pigititaammata kimullu piumasannut tunniuttarakkit. Taamaattumik pallorfigiumagumma tamakku tamaasa pissavatit.’ — Lúkarse 4:6, 7.

Satanip silarsuarmi maani naalagaaffinnut naalakkersuisunullu tamanut oqartussaassuseq piginerarpaa. Taamatut oqarmat Jesusip akerlilerpaa? Naamik. Taamaannerali uppernarsarlugu pisumi allami Satan tassaanerarpaa ’silap matuma naalagaa’. — Juánase 14:30.

Biibilimi oqaatigineqarpoq Satan tassaasoq inngili ajortoq annertuumik pissaaneqartoq. Kristumiup apustilip Paulusip Satan ’anersaanut ajortunut pissaanilinnut’ ilaanerarpaa taakkulu tassaanerarlugit ’siulersuisut naalakkersuisullu taarsuullu matuma pissaanilissui’. (Evfisumiut 6:11, 12) Aammalu apustili Johannes Ny Verden-nutsigaq naapertorlugu ima oqarsimavoq: „Silarsuaq tamaat ajortup pissaaneqarfigaa.“ (1 Juánase 5:19) Biibilip atuagartaasa ilaanni sarĸúmersitat-ni oqaatigineqarpoq Satan ’inuit najugaanni nunalinnik tamanik tammartitsiniartoq’. (sarĸúmersitat 12:9) Aamma sarĸúmersitat-ni assersuutikkut Satan tassaanerarneqarpoq kuukkooriaasarsuaq silarsuarmi naalakkersuinikkut ingerlatsinermut ’pissaanerminik, issiavissaarsuarminik piginnaanersuarminillu’ tunniussisoq. — sarĸúmersitat 13:2.

Aamma silarsuarmi pisartut takutippaat pissaanileqartoq ajortumik inuit ajoquserniarlugit taakkuninnga aqutsisumik. Sunami alla pisuusinnaava inuit naalakkersuisuisa eqqissinermik pilersitsisinnaannginnerannut? Suna alla inuit uumissoqatigiillutillu toqoraateqatigiinnerannut pissutaasinnaava? Innuttaasut imminnut sorsuunneranni toqoraannersuarmut takunnittut ilaat amiilaarsimaqisoq ima oqarsimavoq: „Paasisinnaanngilara taamaattoqarsinnaammat. Uumissuinerinnaanngilaq. Anersaamuna ajortup inuit taakku aqullugit imminnut toqoraatsikkai.“

Kinaassusilivik Guutimik akerlilersuisoq

Ullumikkut Satan Diaavulup piunera inuppassuit upperinngilaat. Inuilli ilaasa isumaqarnerattut Satan Diaavulu tassaanngilaq ajussuseq inunniittoq. Biibilimi silarsuarmilu pisutigut takutinneqarpoq kinaassusiliviusoq. Aammalu Satan Jehova Guutimut akerliulluinnartuuvoq. Soorunami Satanip Guuti naliginngilaa. Jehova tassaagami Pinngortitsisoq ajugaqanngitsoq pinngortitaminut tamanut naalagaavoq. — sarĸúmersitat 4:11.

Guuti pinngortitamik anersaajusumik imminut akerlilersuisussamik pinngortitsinngilaq. Imali pisoqarsimavoq: ’Guutip ernerisa’ inngiliusut ilaata namminissarsiortumik kissaatigiartuaalersimavaa Jehovap pallorfigineqartussaanera nammineq piniarlugu. (Job 38:7; Jâko 1:14, 15) Taamatut kissaateqarnerata Guutimut pikitsitsisippaa. Pikitsitsinermigut pinngortitaq anersaajusoq taanna imminut Sataninngortippoq („akerlilersuisoq“) Diaavulunngortillunilu („mamarliisoq“). Tamakku tamaasa eqqarsaatigalugit immaqa tupigusuutigaat sooq Satan silarsuarmut aqutsinissaminik akuerineqarsimanersoq.

Sooq Satan aqutsinissaminut akuerisaasimasoq

Eqqaamaviuk nunarsuarmut naalagaassuseq pillugu Satan Jesusimut qanoq oqarsimasoq? ’Piginnaassut . . . tunniukkumaarpara . . . uannut pigititaammat.’ (Lúkarse 4:6) Tassuuna erserpoq Satan Diaavulu oqartussaassuseqartitaasoq aatsaat Guutip akuersineratigut. Soorli Satanip ataannarallarnissaa Guutip akuerisimavaa?

Apeqqummut tamatumunnga akissutissaq naatsiivimmi Edenimi pisimasumut, Satanip silarsuarmut naalagaatitaalerneranik kinguneqartumut, attuumassuteqarpoq. Tassani Satanip oqaatigimisaarpaa Guuti ajortumik aqutsisoq angut arnarlu siulliit, Adam Evalu, ajunngitsumik erliguullugit. Satanip inuit oqarfigai paarnamik Guutip nereqqunngisaanik nerigunik aniguissasut. Jehovamunngooq atasariaarutissapput inussiaajunnaarlutillu. Allaanngooq Guutitut ilissapput! — 1 Moses 2:16, 17; 3:1-5.

Taamatut salluliorluni Evap tammartinneratigut taannalu aqqutigalugu Adamip Guutip inatsisaanik unioqqutitsisinneratigut Satanip aappariit siulliit naalagaaffigilerpai. Taamaalilluni Diaavulu taakkua Guutigilerpaat, Jehovamut illua’tungiliuttoq. Kisianni Adamip Evallu paasilerpaat aniguisitaanatik Satanimullu, ajortimut toqumullu inussiaataalerlutik. — Rûmamiut 6:16; Eprîarit 2:14, 15.

Naapertuilluarluinnassutsi naapertorlugu Jehovap Satan malitsigiligaalu marluk ingerlaannaq pillarlugit toqussimasinnaagaluarpai. (5 Moses 32:4) Ileqqussatigulli apeqqummik pilersoqarsimavoq. Jehovap aqutsinerata eqqortuussusia Satanip apeqqusersimavaa. Ilisimassutsimini Guutip piffissaq aalajangersimasumik sivisussusilik ingerlatikkallarniarpaa imminut atanani ingerlanerup ajunaarnermik kinguneqartussaanera uppernarsineqaqqullugu. Pikitsitsisut Jehovap inuugallartippai, taamaalillunilu Adamip Evallu kinguaassiornissaat akueralugu. — 1 Moses 3:14-19.

Naak Adamikkut kinguaavisa amerlanersaat aqutsinerminut naalatsigitinngikkaluartut aqutsinermi pitsaanerulluinnassusia Jehovap pallorfiginnitsiminik iliuuseqarfiginninnermigut ersersissimavaa. Jehovap oqartussaassusianik eqqortumik akuerinninneq pilluarnermik toqqissisimanermillu piviusumik nassataqartarpoq. Akerlianilli atugarliorneq toqqisisimanngissuserlu inuit Satanimit sunnerneqarlutik aqutsinerata nassatarisimavai. Aap, inuit ajoqutaasumik imminnut naalagaaffigeqattaassimapput. (Nalunaajaasup oqaasii 8:9) Silarsuarmi Satanip pissaaneqarfigisaani maani inuit naalakkersuinerisigut toqqissisimaneq piviusoq pilluarnerlu ataavartoq anguneqarsimanngillat. Isumalluarnissamulli pissutissaqarluarpoq.

Satan piffissaarutilerpoq!

Satanip nunarsuarmi sunniinera atajuarnavianngilaq. Satanip silarsuarmut naalagaatitaanera Jehovap akueriinnaqqajuarnavianngilaa! Ungasinngitsukkut Satan susinnaajunnaarsinneqassaaq. Naalagaq nutaaq, kunngi naapertuilluartoq Guutimit namminermit toqqarneqarsimasoq, nunarsuarmik aqutsilissaaq. Kunngi taanna tassaavoq Jesus Kristus. Taassuma qilammi kunnginngortitaanera pillugu sarĸúmersitat-ni ima allassimasoqarpoq: ’Silamiut naalagaaffiat Naalakkatta [Jehovap] tanitaatalu [Kristusip] pigilerpaat.’ (sarĸúmersitat 11:15) Biibilip ukiunik naatsorsueriaasiata Biibilimilu siulittuutit eqquussornerisa uppernarsarpaat tamanna 1914-imi pisimasoq. — Matîuse 24:3, 6, 7.

Jesusip kunnginngortinneqarnerata kingunitsianngua qanoq pisoqarsimasoq aamma Biibilimi oqaluttuarineqarpoq. Ima allassimavoq: ’Qilammilu sorsuuttoqalerpoq: Mikaelip [Jesus Kristusip] inngiliisalu kuukkooriaasarsuaq sorsulerpaat, aammattaaq kuukkooriaasarsuaq taassumalu inngilii sorsupput. Artorsarpulli, qilammilu najugassarsisinneqarunnaarput. Igitaavorlu kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq; nunamut igitaavoq, inngiliilu taassumunnga ilanngullugit igitaapput.’ — sarĸúmersitat 12:7-9.

Satanip qilammit anisitaanera qanoq kinguneqarpa? Qilammiittut nuannaaqaat, nunarsuarmiittummi? sarĸúmersitat 12:12-imi allassimavoq: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnammiuk.’ Satanip qilammit igitaanera nunarsuarmut atugarliornermik nassataqarpoq. The Columbia History of the World-imi ima allassimasoqarpoq: „1914–1918-imi ukiuni sisamani sorsunneq ajunaarfioqisoq . . . silarsuup kitaanut takutitsivoq silarsuup kitaata atugartuussutsini nammineq sianiissutsiminit ajoriallaqqissutsiminillu sernissorsinnaanngikkaa. Silarsuup kitaata anersaava aseruinersuup tamatuma kingorna nakortivinngisaannarsimavoq.“

Kinguaariit nalitsinni inuusut atugarliuutaat tassaannaanngilaq anersaaq qajannarsisimasoq. Jesus ima siulittuisimavoq: ’Inuiaat pikitsitsiumaarput inuiaqatiminnut, naalagaaffillu naalagaaffeqatiminut; kaannersuarlu nalliuttarumaarpoq nunalu tamatigut tamaana sajuttarluni.’ Aamma nappaalanikkut toqorarnerit siulittuutigai. (Matîuse 24:7, 8; Lúkarse 21:11) Aamma Biibilimi oqaatigineqarpoq pissutsit aaqqissuussaanerata Satanimut atasup ’ullussaani kingullerni’ inuppassuit tassaajumaartut ’imminnik asasut, aningaaserituut, . . . angajoqqaaminnut naalanngitsut, . . . saammajuitsut’. Aammagooq inuit ’Guuti kajumiginagu nuannaarutinut’ kajuminnerujumaarput. — 2 Timûtiuse 3:1-5.

Sorsunnerit, nappaalanersuit toqoraataasut, kaannersuit, nunap sajunneri ileqqussatigullu ajortunngoraluttuinnarneq — tamakku tamarmik 1914-imiilli asseqanngitsumik annertussusilimmik pisarsimapput, Biibilimi siulittuutigineqartut naapertorluinnarlugit. Tamatuma takutippaa Guutip inuillu akeraat kamattorsuaq — Satan Diaavulu — qilammit igitaasimasoq kamanninilu nunarsuarmut saatissimagaa. Aammali Biibilimi takutinneqarpoq Satanip piumasaminik iliortitaanera sivisunavianngitsoq. Harmagedonip, silarsuarmik aaqqissuussap Satanip aqutaata Guutimit aserorneqarfissaata, tungaanut Satan ’piffissakippoq’.

Taava Satan qanoq pineqassava? Apustili Johannes ima allassimavoq: ’Inngililu takuara qilammit aqqartoq, taassuma itinersuarmut matuersaataasoq pigigaa, kalunnersuillu tigumiarigai. Kuukkooriaasarsuarlu tiguaa, taanna pulateriaarsutoqaq, tamassalu Diaavulu Satanilu; qilersorpaalu ukiut tuusintillit qilersugaaqqullugu; itinersuarmullu igippaa matullugulu qulaagullu naqissuserlugu.’ (sarĸúmersitat 20:1-3) Qanoq inuiaat eqqissiallatsigissappat!

Guutip naalagaaffiata aqutsinerani nuannaarneq

Satan akornusersuisinnaajunnaarsitaalluni peerneqarpat Guutip naalagaaffia Jesus Kristusimik siuttoqartoq nunarsuarmut tamakkiisumik aqutsilissaaq. Nunarsuarmi assigiinngitsunik naalakkersuisoqarnani naalakkersuisut ataatsit qilammiittut nunarsuarmut tamarmut aqutsissapput. Sorsunnerit qanganngussapput, eqqissinerlu sumi tamaani atuutissaaq. Guutip naalagaaffiata naalakkersuinerata ataani kikkut tamarmik qatanngutigiissuartut inooqatigiissapput. — Tussiaat 72:7, 8; 133:1; Daniel 2:44.

Jesus naalakkatut qanoq ittuussava? Nunarsuarmiikkallarami inunnut asannittorujussuusimavoq. Naakkinnilluni kaattut nerisassittarsimavai. Napparsimasut ajorunnaarsittarsimavai, tappiitsut tappissisillugit, oqalussinnaanngitsut oqaluttalersillugit tusiattullu iluarsisillugit. Allaat toqusut uummarteqqittarsimavai! (Matîuse 15:30-38; Mákorse 1:34; Lúkarse 7:11-17) Tupinnartuliarisarsimasai tamakku kunngitut aqutsileruni iliuusissaanut tupinnangaartunut qilanaartuutaannaapput. Taama ajunngitsuliorsinnaatigisumik naalakkersuisoqassalluni nuannissaqaaq!

Jehovap kisimi oqartussaassusianut naalatsigitittut pilluaqqusaanerpassuarnik misigisaqartuartassapput. Biibilimi ima neriorsuuteqarpoq: „Taava tappiitsut isaat uisitaassapput, tusilartut siutaat ammarneqassapput. Tusiattoq tuttutut pissigarumaarpoq, oqajuitsuugaluaq qiimmattarluni appikkumaarpoq.“ (Jesaja 35:5, 6) Taamanikkussaq nuannerunaqisoq pillugu apustili Johannes ima allassimavoq: ’Nipi angingaartoq tusarpara qilammit oqartoq: „Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.“’ — sarĸúmersitat 21:3, 4.

Nuannaarutissat Jehova Guutip ernini, Jesus Kristus, aqqutigalugu naalakkersuineratigut pisassatta ullumikkut pissutsit aaqqissuussaaneranni Satan Diaavulumit aqunneqartumi naalliuutigisavut tamaasa sinnilissuarmik matussutississavai. Silarsuassami nutaami Guutip neriorsuutigisaani inuit nalornillutik ima aperisarnavianngillat: ’Kinaana aqutsisoq?’ (2 Pîtruse 3:13) Inuiaat naalattut nunarsuarmi anersaat silarsuaannit naalakkersuisut asannittut, Jehovap Kristusillu, aqutaanniittut pilluarlutillu toqqissisimassapput. Taakkununnga naalatsigitittunut ilaalernissamik neqeroorut ilassiniaruk. (wE 15/7 95)

[Qupp. 7-mi assiliartaq]

Guutip naalagaaffiata aqutaani nunarsuarmiittut toqqissisimassapput

[Qupp. 4-mi suminngaanneernerat]

Asseq: NASA