Assiaqutit tamakku piiarsinnaavatit!

TIMMISARTORSUAQ jumbojet hundrelikkuutaanik ilaasoqarsinnaavoq tonsikkuutaanillu usisinnaalluni. Timmisartoq taama oqimaatsigisoq qanoq ililluni qangattarsinnaava? Qullarsaat iluaqutigalugu.

Timmisartoq mittarfikkut sukkalisaaraangat suluisa najunganerisa qulaagut ataagullu anori supisarpoq. Tamanna nukinik qummut noqitsisunik pilersitsisarpoq qullarsaammik taaneqartartumik. Qullarsaat naammattoq pilersinneqareeraangat, timmisartoq qangattarsinnaasarpoq tingillunilu. Timmisartorli useqarpallaartoq soorunami tinginissamut qullarsaammik naammattumik pisinnaanngilaq.

Uaguttaaq artorsinneqarsinnaavugut. Ukiut hundredelikkuutaat matuma siornagut kunngi David oqarsimavoq ’ajortuliami artorsikkaani nammakkatut imminut oqimaappallaartutut’. (Tussiaat 38:5) Jesus Kristusip inuunerup piinik isumakulunnermik taamatut artorsinneqarnissamut mianersoqqusivoq. (Lúkarse 21:34) Eqqarsaatit misigissutsillu nikallornartut ima artukkertigisinnaavaatigut „qangattarsinnaanngingajatsilluta“. Arlaannik artorsaateqarpit? Misigisimavilluunniit anersaakkut siumukarnissaraluannut akornuteqarlutit? Taamaappat suna iluaqutigisinnaaviuk?

Sunik tamanik qatsussivit?

Sunik tamanik qatsussineq — ullumikkut amerlasuut kappialassutigisartagaat — sianissutsikkut assiaqutaalersinnaavoq, aamma Jehovap kiffaanut. Ingammik inuusuttut pikkunaagisaqaraangamik itigartitsiumasarput. Kristumiut ataatsimiinneri ilaannikkut pikkunaagisarpigit? Ataatsimiinnernut ilaaneq pissanganarnerulersinniarlugu qanoq iliorsinnaavit?

Aaqqiissutissaq iliuuseqarnermiippoq. Paulus angummut inuusuttumut Timoteusimut allappoq: ’Imminut sungiusarniarit Guutimut-tunniusimaneq anguniarlugu. Timitsigummi sungiusarnerput imma iluaqutaavoq, Guutimut-tunniusimanerli sunut tamanut iluaqutaavoq inuunermut matumunnga piumaartussamullu atasumik unnersuummik ilaqarami.’ (1 Timûtiuse 4:7, 8, NV) Nukittorsarnermut atuagaq pikkunassaaq pingaaruteqarpiaranilu siungiusaatit siunnersuutigineqartut malinneqanngippata. Kristumiut ataatsimiittarneri isumatsinnik nukittorsaanissaq siunertaraat, piareersartaruttalu peqataasarlutalu nukittorsaatigissavavut. Aammattaaq ataatsimiinnerit pissarsiffiuminarnerulissapput soqutiginarnerulerlutillu.

Tassunga tunngatillu inuusuttoq kristumiu arnaq Maramik atilik oqarpoq: „Piareersarsimanngikkaangama ataatsimmiinnerit pisarsiffigineq ajorpakka. Pisassalli siumut misissorsimagaangakkit, isumaga uummatigalu killitsianerusarput. Ataatsimiinnerit pissarsiffiginerusarpakka, akinissaralu qilanaarisarlugu.“

Tusarnaarsinnaanermik sungiusarneq aamma iluaqutaassaaq. Nipilersuutinut nuannersunut tusarnaarneq oqitsuuvoq nuannersuullunilu. Sunerilli tamarmik imminni imaaliallaannaq nalerisimaalersitsisanngillat. Ataatsimiinnernut najuunnerput nalerisimaarutigilissavarput aatsaat saqqummiunneqartunut tusarnaqqissaarutta. Arnaq kristumiu Rachelimik atilik oqarpoq: „Saqqumiussaqartoq uummaarissuunngikkaangat, tusarnaaqqisaarniartariaqartarpunga. Oqalugiaatip soqutiginarnera milliartortillugu, tusarnaarnera tamaviaaruttariaqartarpara. . . . Ingammik allassimaffiit maluginiartarpakka pissarsiffiginerpaaniarlugillu.“ Rachelitulli tusarnaarnissamut immitsinnut perorsartariaqarpugut. Ussatit Atuagartaanni allassimavoq: „Ernera, ilisimassut pigisara maluginiarluarniaruk siutitillu manillugit siuneqarnermut uanga pigisannut.“ — Ussatit 5:1.

Ataatsimiinnerni tusartakkavut immaqa tusareersimavavut. Taamaattariaqarpoq. Guutip kiffai tamarmik eqqaasinneqarnissamik pisariaqartitsipput. Timi naammalluinnanngitsoq ajortulioqqajaasoq puiutuujusoq ikiortarialeerujussuuvoq. Apustili Peter ’uppeqatiminut eqqaasitsissuteqartuaannarniartarsimavoq, naak ilisimagaluartut sallusuissullu aalajangerfigisimagaluaraat’. (2 Pîtruse 1:12) Jesus oqarsimavortaaq ’allakkanik ilisimasup kialuunniit assigigaa inuk illumi nalagaasoq, nutaanillu pisoqqanillu pequusivimminit annitsisartoq’. (Matîuse 13:52) Ataatsimiinnitsinni eqqarsaatit Biibilimut tunngasut nalunngeriikkavut tusartarpavut, imaluunniit ’pisoqqat’, aammattaarli tamatigut ’nutaat’ nuannaarutigisinnaasarpavut.

Ataatsimiinnerit tamakkiisumik pissarsiffiginissaat aalajangiusimagutsigu anersaakkut qullarsaatigisinnaavavut. ’Pilluarput anersaakkut pisariaqartitaqarnerminnik miserratiginninngitsut [anersaap tungaatigut qinusartut],’ Jesus oqarsimavoq. (Matîuse 5:3 NV) Anersaakkut nerisassanut peqqinnartunut ataatsimiinnerni sassaalliutigineqartunut taamatut isumaqarnerup qatsussineq peersissavaa. — Matîuse 24:45-47.

Allat maligassiuinerlunnerat nikallortippaatit?

Ilagiinniittut iliuuserisimasaannik pakatsissuteqarsimavit? Immaqa eqqarsarsimavutit: ’Qatanngut taama iliortoq qanoq ililluni suli ataqqineqarsinnaava?’ Eqqarsaatit taamaattut sianissutsikkut assiaqutaalersinnaapput Guutillu innuttaasa ineriartornartumik peqatigiissinnaanerannut tappiillisilluta. — Tussiaat 133:1.

Immaqa Kulorsamiut ilagiiviniittut ilaat assingusumik ajornartorsiuteqarsimapput. Paulusip oqaappai: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi.’ (Kulorsamiut 3:13) Paulusip paasilluarsimavaa Kulossami eqqunngitsuliortoqarsimasoq taamaattumillu ilaat unnerlunnissaannut pissutissaqarluartut. Tupaallaatigivallaassanngilarput qatanngutivut ilaatigut kristumiutut pissutsinik eqqortunik nittaanngitsooraangata. Isumaqatigiinngissutit sualuttut qanoq aaqqinneqarsinnaanerinik Jesus siunnersuuteqarluarsimavoq. (Matîuse 5:23, 24; 18:15-17) Amerlanertigullu kristumioqatitta naammalluinnangitsuuneri naammagalugit atuunnarsinnaavavut isumakkeerfigalugillu. (1 Pîtruse 4:8) Taamatut isumaqarneq nammineq allallu iluaqutigiinnassavaat. Qanoq ililluni?

„Inuk silatussusiata kamajaatsunngortittarpaa, iluaatsuliorfigineqaraluaruni akiniaannginneq inummut ataqqinaataavoq,“ Ussatit 19:11-mi allassimavoq. Isumakkeerfiginninneq kamannermit ajuallassimarnermillu pitsaaneroqaaq. Salvador, utoqqaanertaq asannittuunermigut ilisimaneqartoq, oqarpoq: „Qatanngutip ajortumik pippanga inussiarniitsumilluunniit oqarfigippanga, imminut aperisarpunga: ’Qatanngutiga qanoq ikiorsinnaavara? Qanoq ilillunga tassunga ajunngitsumik attaveqarnera pigiinnarsinnaavara?’ Imminut eqqaasittuarpunga eqqunngitsumik oqartoornissaq qanoq ajornanngitsigisartoq. Isumaatsuliorluni oqartoqarpat, taassumunnga pitsaanerussagaluarpoq oqaatsini utertikkunigit aallaqqaataanillu aallartilluni. Taamaaliortoqarsinnaanngilarli, taamaammat aaqqiissutissap pitsaanerup tullia toqqartarpara, tassa oqaasii tusaanngitsuusaarlugit. Qatanngutima naammalluinnanngitsuuneranut ersiutaasutut isigiinnarpara, pissusivianut ilaanngitsutut.“

Immaqa oqaannarneq iliuuseqarnissamit ajornannginnerusutut misigaat. Eqqarsaatilli ajunngitsumut aqunnissaat annertunertigut apeqqutaaginnartarpoq. ’Asanartut suulluunniit . . . tamakku eqqarsaatiginiarsigik.’ (Filípimiut 4:8) ’Asanartut suulluunniit’ isumaqavippoq ’tunniusimassutsimik eqeersaasut suulluunniit’. Jehovap piumasaraa allat pissusii ajunngitsut isiginiartassagivut, tunniusimanermik eqeersaasinnaasut maluginiassagivut kamalersitsisinnaasut pinnagit. Jehova tamatuma tungaatigut maligassiulluarnerpaasimavoq. Tussiaasiortup eqqaasippaatigut ima oqarluni: „Illit [Jehova] ajortuliat naatsorsuutigisaraluarukkit kina atassagaluarpa taava, [Jehova]?“ — Tussiaat 103:12; 130:3.

Ilumooraluarpoq ilaatigut qatanngutitta pakatsisittarsinnaagaatigut, uppeqatittali amerlanerpaartaat kristumiutut inuunermi maligassiuilluartuupput. Tamanna eqqaamagutsigu, Daviditulli, ’Jehova nipituumik qutsavigissavarput, inuppassuillu akornanni unnersiutigalugu’. — Tussiaat 109:30.

Jehovamut nalunaajaasunngornissaq artornartuutippiuk?

Ajoraluartumik ilaat suli Jehovamik unnersiutiginnilinngillat sianissusikkut assiaqut alla pissutigalugu. Uiusut amerlasuut Jehovamut nalunaajaasuunngitsut akisussaaffimmik eqqortitsillutik ilaquttatik isumagisarpaat allaallu nuliamik kristumiutut sulinerat tapersersorlugu. Inussiarnersuupput immaqalu ilagiinnut aggertarnertik nuannaralugu, Guutimulli kiffatut tunniulluinnarnissamut tunuarsimaarput. Sunaana tunuarsimaarutigigaat?

Ajornartorsiutit ilagisinnaavaat nuliamik teokratiimut tunngasunik ulapputeqarnerat malugisimagamikku misigalutillu Jehovap nalunaajaasui piumaffigineqarpallaartut. Immaqaluunniit illumiit illumut angalaarnissaq ersissutigaat. Isumaqarput pisussaaffiit pilluaqqussutinit amerlanerusut. Sooq sianissutsikkut taanna assiaqutaava? Biibilimik ilinniartinneqartut amerlanerit paasinnikkiartuaalersarput sallusuissullu naapertorlugu inuulerlutik. Uiusulli uppinngitsut kristumiutut akisussaaffinnik tigusinissaminnut suli piareersimanatik misigigajuttarput.

Manuel, taamatut misigisimasoq, nassuiaavoq: „Ukiut qulit missaanni ataatsimiinnernut ataatsimeersuarnernullu nuliara ilagisarpara. Jehovap nalunaajaasui silamiunit ilagerusunnerusimavakka, ikiuutaasinnaagaangamalu nuannaarutigisarpara. Akunnerminnilu asaninnerat orniginartissimavara. Illumiilli illumut angalaarnissamik eqqarsaat artornartutut isigisimavaa, suleqatinnillu mitaatigineqarnissara ersigalugu.

Nuliara naammagittarsimaqaaq, Biibilimik atuaqqissaaqqullunga pinngitsaaliniarsimanngisaannarpaanga. Taanna meeqqallu ingammik maligassiuilluarnermikkut ’nalunaajaasimapput’. Josép, ilagiinni utoqqaanertap, immikkut isumagilluarsimavaanga. Naggataatigut pimoorullugu atuaqqissaartalerninnut taassuma kaammattuisarnera pisuugunarpoq. Kuisereerama, paasisimavara nammineq isumaga annerpaamik assiaqutaasimasoq. Jehova kiffartuukkumallugu aalajangerniariartunga ersinerma ajugaaffiginissaanik taassuma ikiorpaanga.“

Nuliaasut kristumiullu utoqqaanertat uiusut Manuelitut ittut sianissutsikkut assiaqutaminnut ajugaanissaannik qanoq ilillutik ikiorsinnaavaat? Biibilimik atuaqqissaarneq pingaartitsinermik ineriartortitsisinnaavoq Guutillu piumasaanik iliornissamut kissaateqalersitsilluni. Biibilimik ilisimasanik naammattunik pigisaqaleraanni aatsaat uppertoqalertarpoq siunissamullu neriugisamut tatiginnittoqalerluni. — Rûmamiut 15:13.

Uiusut taamaattut Biibilimik atuaqqissaartarnissaannik suup kajumissisissinnaavaat? Ilagiinittumik qatanngummik angummik paasinnittumik ikinnguteqarneq iluaqutaagajuttarsimavoq. Immaqa utoqqaanertap qatanngutilluunniit misilittagaqartuup allap uiusup ilinniarnissaa piffissaqarfigisinnaavaa. Ikinngutigiilerunik, atuaqqissaaqatigiinnermik neqeruuginnarsinnaavoq. (1 Korintumiut 9:19-23) Nuliatalu kristumiup ilaannikkut mianersortumik soqutiginartunik anersaamut tunngasunik oqaloqatiginiartarsinnaavaa, arlaatigulluunniilli pinngitsaaliniarnagu. — Ussatit 19:14.

Soorluttaaq Manuelip misigisimagaa, ajornartorsiutit qaqqarsuartut ittut avinngap qassoragaatut ilisarput anersaakkut nukittoriartorneq ilutigalugu. Jehovap imminut kiffartorusuttut pissatsittarpai. (Jesaja 40:29-31) Guutip nakussatsitsineragut Jehovalu nalunaajaasuisa anersaakkut inersimasut tapersersuinerisigut assiaqutaasut peerneqarsinnaapput. Uummammik iluunngarmik Guuti kiffartuukkusukkiartortillugu, illumiit illumut oqaluussinissaq suleqatillu ersinarunnaaminerussapput. — Jesaja 51:12; Rûmamiut 10:10.

Siumut ingerlajuarit

Assiaqutit qaangerneqarsinnaapput, soorlu taasavut pingasut qaangiisimasut. Timmisartoq tingileraangat, motorii tamakkersortariaqartarput inuttaasullu tinginissaq tamakkiisumik eqqarsaatigisariaqartarpaat. Timmisartup tinginiarnerani motorii orsutornerujussuusarput timminerup sinneranit tamanit. Taamatuttaaq eqqarsaatit nikallornartut qaangerniarlugit sulissuteqangaartariaqarpoq pimoorussillunilu. Aallartinneq immaqa ajornarnerpaajuvoq, siumukalereeraannili ajornannginnerulersarluni. — Naleqqiuguk 2 Pîtruse 1:10.

Siumukartuarniarluni Biibilip kajumissaarutai maleruaqqissaartariaqarput. (Tussiaat 119:60) Qularutiginngiviguk ilagiit ikiuiniarlutik piareersimammata. (Galâsiamiut 6:2) Pingaarnerpaavorli Jehova Guutip tunaartarinera. Soorlu David oqarsimasoq: „Unnersiutigineqarli [Jehova] ullut tamaasa, Guuti kissumiarterput.“ (Tussiaat 68:20) Nanertuutigisavut Jehovamut tunniukkutsigit, nammineq nammatassavut ikinnerulissapput.

Ilaannikkut timmisartoq silarsuarmit nuanniitsumit siallersumillu tingisarpoq nuissatigullu qullarsarluni, qummut seqinnarimmut pilluni. Uaguttaaq eqqarsaatit nikallornartut qimassinnaavavut. Jehovap ikiuineratigut nuissatigut qummukarsinnaavugut qaamanerlu avatangiisillu nuannersut Jehovap silarsuaq tamakkerlugu ilaqutariittut pallorfiginnitaasa akornaniittoq iluaqutigisinnaallugu. (wE 15/7 95)

[Qupp. 31-mi assiliartat]

Jehovap ikiuineratigut sianissutsikkut assiaqutit anigorsinnaavavut