Jesusip tupinnartuliaanit ilinniutigisinnaasat
’Ullullu pingajussaanni Kanami Galilæamiittumi katittorsiortoqarpoq . . . Jesusili ajoqersugaalu katittorsiortunut neriartoqquneqarputtaaq. Viinnilu nungummat arnaata Jesus oqarfigaa: „Viinniutaarupput.“’ Pisumi tamatumani Jesusip tupinnartuliaasa siullersaat pisimavoq. — Juánase 2:1-3.
Ajornartorsiut tamanna pingaaruteqarpianngitsoq sooq Jesusimut eqqaaneqartariaqarsimava? Biibilimik ilisimatooq ima nassuiaavoq: „Inoroorsaarneq Kangiani Qiterlermi pisussaaffiusimavoq pingaaruteqartorujussuaq . . . Inoroorsaarumatuussagaanni, ingammik katittorsiornermi, nerisassarpassuaqartariaqarpoq. Katittorsiornermi nerisassat imigassallu nungukkaluarpata qaaqqusisut katittullu tamanna assut kanngusuutigissavaat.“
Taamaattumik Jesus iliuuseqarpoq. Takuai ’qattat ujaraasut arfinillit juutit asattarnerminnut ileqqorisaat naapertorlugit tassaniittut’. Juutit neritinnatik ileqqulersuutitut asattarput qaaqqusanullu tamanut sinnilimmik imissamaateqartariaqarpoq. ’Qattat imermik immersigik,’ Jesus taama peqqusivoq. Jesus tamatumani ’nerliiassalerisuunngikkaluarpoq’, oqartussaassuseqartutulli oqalulluni. Allassimavoq: ’Nerliiassalerisulli imeq viinninngorsimasoq ooqattaarpaa.’ — Juánase 2:6-9; Mákorse 7:3.
Immaqa Jesus pissutsini ulluinnarpaluttuni, tassa katittorsiornermi, tupinnartulioqqaarmat eqqumiiginarsinnaavoq, pisimasorli tamanna Jesus pillugu ersersitaqaqaaq. Jesus aappaqanngilaq kingusinnerusukkullu ajoqersukkani aappaqannginnerup iluaqutaasinnaassusianik oqaluttuullugit. (Matîuse 19:12) Kisianni katittorsiornermut najuunnerata takutippaa aappariinnermut akerliunngitsoq. Isumakkut aalajaatsuuvoq aappariinnerlu tapersersortarlugu; Guutip isaani ataqqinartutut isigaa. — Eprîarit 13:4.
Jesusip iliuusiata aamma takutippaa tassaanngitsoq aliasunniaq pinngernaveersaartoq, soorlu kingusinnerusukkut oqaluffeqarfinni eqqumiitsuliatigut ersersinneqartarsimasoq. Ersarippoq immikkoorniartuunngitsoq, najorteqartarnerlu nuannarigaa. (Naleqqiuguk Lúkarse 5:29.) Taamaalilluni iliuusia malinnittaanut maligassaavoq. Jesusip nammineq takutissimavaa taakku ilumoortuusaarniarpallaartuusariaqanngitsut — assuarnaassuseq tassaanngitsoq nuannaassuseqannginneq. Akerlianik kingusinnerusukkut kristumiut ima peqquneqarput: ’Naalakkami tipaatsuttuinnaritsi.’ (Filípimiut 4:4) Ullumikkut kristumiut paasivaat aliikkusersorneq silatusaartumik killeqartariaqartoq. Guutimut kiffartuussinertik nuannaarutigaat, Jesusili malillugu aamma ilaannikkut katerisimaaqatigiinnissaminnut piffissaqartarlutik.
Malugeriaruttaaq Jesusip misiginneqataassusia. Pinngitsoorani tupinnartuliortussaatitaanngikkaluarpoq. Tamatumunnga atatillugu siulittuuteqanngilaq eqquutittariaqagaanik. Jesusili anaanami isumakulunneranit katittullu nalornisoornerannit assut killinneqarpoq. Taakkua misigissusii soqutigai peqqusiileqinerallu pinngitsoortikkumallugu. Tamatuma tatiginnilersinnginnerpaatit Kristusip ilumut soqutigigaatit — allaat aamma ulluinnarni ajornartorsiutigisatit eqqarsaatigalugit? — Naleqqiuguk Eprîarit 4:14-16.
Qattat tamarmik immikkut ’nappartaaqqat marluk pingasulluunniit imaqqortoqatigimmatigik’ Jesus tupinnartuliorluni annertuumik viinniliorpoq — immaqa literit 390-t! (Juánase 2:6) Sooq taama annertutigisumik? Soorunami Jesusip aalakoortoqarnissaa kissaatiginngilaa, Guutimmi tamanna iluarinngimmagu. (Evfisumiut 5:18) Kisianni Guutitut tukkussuseqarpoq. Viinni imigassiaavoq nalinginnaasoq, taamaattumillu sinneqarpat kingusinnerusukkut atorneqarsinnaassaaq. — Naleqqiukkit Matîuse 14:14-20; 15:32-37.
Kristumiut siulliit Jesusip tunisiumatussusia malinniartarsimavaat. (Naleqqiuguk apustilit suliait 4:34, 35.) Ullumikkut Jehovap innuttai tamatumunnga assingusumik ’tunisinissaminnut’ kajumissaarneqartarput. (Lúkarse 6:38) Jesusilli tupinnartuliaasa siullersaat aamma siulittuutitut pingaaruteqarpoq. Takutippaa siunissami Guuti tunisiumatuulluni „neriartortitsissasoq sassarlugit nerisassat pikkunartut viinnilu kimittooq,“ taamaalillunilu inuiannut tamanut amigaateqarneq kaannerlu atorunnaarsilluinnassagai. — Jesaja 25:6.
Taavami Jesusip tupinnartuliorluni ajorunnaarsitsisimaneri? Tamakku qanoq ilinniutigisinnaavavut?
Sabbatimi ajunngitsuliortarpoq
’Makillutit innanngaviit tiguuk angalaarlutillu.’ Jesusip angut ukiuni 38-ni napparsimasoq taama oqarfigaa. Oqaluttuaq ima nangippoq: ’Taavaannarlu inuk taanna ajorunnaarpoq, innanngavinilu tigullugu angalaalerluni.’ Tupaallannartumilli kikkut tamarmiunngitsut tamanna nuannaarutigaat. Allassimavoq: ’Tamanna pillugu juutit Jesus qinugaat, sabbatimi taamaaliormat.’ — Juánase 5:1-9, 16.
Sabbat tassaasussaavoq tamanut ulloq qasuersaarfik nuannaarfillu. (2 Moses 20:8-11) Jesusilli nalaani tassaalersimavoq malittarisassarpassuarnik inuit sanasimasaannik erloqisitsiffik. Ilisimatooq Alfred Edersheim allassimavoq Talmudimi sabbat pillugu inatsisinik allattuiffissuarni „sumininnguit upperisarsiornikkut pingaaruteqartorujussuartut oqallissutigineqartartut, sumininnguit inuup silassorissutsikkut peqqissup qassiiliuutiginavianngisai.“ (The Life and Times of Jesus the Messiah [Jesusip inuunera nalaalu]) Rabbinerit maleruagassat pingaaruteqanngitsut pisariaqanngitsullu inuunermut pingaaruteqartutut isigisarpaat, maleruagassat juutit inuuneranni sunut tamanut aalajangiisuusut — amerlanertigullu inuit misigissusii soqutiginagit. Sabbat pillugu maleruagassat ilaat imaappoq: ’Inuk illumit uppittumit nanerneqarpat nalunarpallu inuk taanna tassaniinnersoq, suli inuunersoq imaluunniit juutiunersoq Guutimilluunniit nalusuunersoq, taava uppikaanikut piiarsinnaavaat. Inuutillugu nanigunikku assaallutik aniguisissinnaavaat; toqungappalli uninngatiinnassavaat.“ — Tractat Yoma 8:7, The Mishnah, Herbert Danby-mit tuluttut nutsigaq.
Inatsisitigut ingasattajaarineq taama ittoq Jesusip qanoq isumaqarfigaa? Sabbatimi ajorunnaartitsisimanerminik avoqqaarineqarami ima oqarpoq: ’Ataataga manna tikillugu sulimmat uangattaaq sulivunga.’ (Juánase 5:17) Jesus akissarsiorluni sulisimanngilaq. Guutip piumasaanik iliorpoq. Soorlu Levikkut sabbatimi illernartumik kiffartuussisinnaasut Jesusip eqqortumik Messiasitut Guutip suliareqqusai suliarisinnaavai Guutip inatsisai unioqqutinnagit. — Matîuse 12:5.
Jesusip sabbatimi ajorunnarsitsisarsimanerata ersersippaattaaq juutit allakkanik ilisimatuut farisiiarillu ’iluassuseqarneq ingasaanniartaraat’ — qeratasuumik oqimaaqatigiinngitsumillu ingasaassiniartumillu eqqarsariaaseqarlutik. (Nalunaajaasup oqaasii 7:16) Soorunami Guutip siunertarisimanngilaa ullut ilaannaat ajunngitsuliorfiusassasut; aamma sabbat isumaqanngitsumik maleruagassersuiffissuuginnassasoq siunertarisimanngilaa. Mákorse 2:27-mi Jesus ima oqarsimavoq: ’Sabbat pinngortitaavoq inuk pillugu, inuk pinngortitaanngilaq sabbat pillugu.’ Jesusip inuit asavai, inatsisit soqutigittaatsut pinnagit.
Ullumikkut kristumiut aamma eqqarsariaatsimikkut killissaannginnisartik maleruagassanillu ingassaassiniarnissartik mianersuutigisariaqarpaat. Ilagiinni oqartussaassusillit maleruagassarpassuarnik namminneq sanasimasaminnik allanik erloqisitsisariaqanngillat. Jesusip maligassiaata aamma ajunngitsuliornissamut periarfissanik eqqumaffiginninnissatsinnik kajumissaarpaatigut. Assersuutigalugu kristumiu isumaqassanngilaq aatsaat illumiit-illumut oqaluussigaangami imaluunniit ilagiinni oqalugiaraangami allat sallusuissummik Biibilimeersumik oqaluttuuttassallugit. Apustili Peter allassimavoq kristumiu ’piareertuinnartariaqartoq kikkunnulluunniit neriuutissaq pillugu imminik nassueqqusisunut illersuutissaqarniarluni’. (1 Pîtruse 3:15) Qaqugukkulluunniit ajunngitsuliortoqartussaavoq.
Misiginneqataanermik ilinniutissaq
Lúkarse 7:7-11-mi tupinnartuliaq immikkut ittoq alla eqqartorneqarpoq. Oqaluttuarineqarpoq Jesus ’illorpalimmut Nainimik atilimmut piartormat ajoqersugaasa qasseersuit inuppassuillu ingerlaqatigigaat’. Ullumikkut Arabiamiut nunaqarfiata Neinip kujataata kangiani ilerrit suli takuneqarsinnaapput. ’Illoqarfiullu isaaffia tikileramiuk’ nipiliortunik tusaasaqalerpoq. ’Ata, toqusoq taava akiarlugu annikkaat, arnaata taanna ernituarigaa uillarnerullunilu; inuillu qasseersuit illoqarfimmit ingerlaqatigaat.’ H. B. Tristram allassimavoq ’iliseriaaseq tamanna qangaaniilli allanngortinneqarsimanngitsoq’, imalu nangilluni: „Arnanik akiartut siornanniittunik arnanit uppussisartunik siulersorneqartunik takusaqarnikuuvunga. Tallitik qullaqattaartarpaat, imminnut nujaartorlutik, aliasunnermit tallitik aalatillugit nilliallutillu toqungasullu atia taaqattaarlugu.“ — Eastern Customs in Bible Lands (Biibilip nalaani kangiamiut ileqqui).
Uivertut akornanniippoq uillarneq aliasoqisoq; aliasunnera ersarippoq. Uini annaareersimavaa taamaattumillu, soorlu atuakkiortoq Herbert Lockyer allassimasoq, ernini „utoqqalinermini ikiortissatut, kiserliornermini tuppallersaasussatut — angerlarsimaffimmini isumalluutissatut isigalugu. Ernitui annaagamiuk neriuutissaaruppoq.“ (All the Miracles of the Bible) (Biibilimi tupinnartuliarpassuit) Jesus qanoq qisuariarpa? Lukasip ima allaatigisimavaa: ’Naalakkap takugamiuk nalligingaalerpaa oqarfigalugulu: „Qianak.“’ Griikerit oqaasiat tassani ’nalligingaalerpaa’-mik nutserneqarsimasoq ’erlaviit’-mik isumaqavippoq. Isumaqarpoq ’qamuuna ilumigut killinneqartoq’. (Vine’s Expository Dictionary of Old and New Testament Words) Aap, Jesus misigissutsimigut killinneqartorujussuuvoq.
Taamaalinerani Jesusip anaanani aamma uillarnerunnguatsiarmat nalunngilaa toqusoornermi aliasunneq qanoq issinnaasoq, angutisiani, Josef, annaasimagamiuk. (Naleqqiuguk Juánase 19:25-27.) Uillarnerup Jesus qinnuigisariaqanngilaa. Jesus misiginneqataalluni ingerlaannaq iliuuseqalerpoq. ’Taava ornigulluni akiutaat attorpaa,’ naak Mosesip inatsisai malillugit toqungasumik attuisoq minguttuunngussagaluartoq. (4 Moses 19:11) Jesus tupinnartuliorsinnaagami minguttuunngornissamut pissutaasoq peerluinnarsinnaavaa! ’Oqarpoq: „Inuusuttoq uumaa, oqarfigaakkit: Makigit!“ Toqusoq taava ingippoq oqalulerlunilu. Arnaanullu tunniuppaa.’
Ila, oqaluttuaq tamanna misiginneqataanermik ilinniutissaammat! Kristumiut ’ulluni kingullerni’ makkunani asanninnikinneq misiginneqataannginnerlu nalinginnaasut malinniassanngilaat. (2 Timûtiuse 3:1-5) Akerlianik 1 Pîtruse 3:8-mi ima kajumissaarneqarpugut: ’Kiisalu tamassi isumaqatigiigitsi ilasseqatigiillusilu qatanngutigiinnillu asannillusi nallittuillusilu qanilaarlusilu.’ Nalunngisatta ilaannik toqusoqarpat perululluniluunniit napparsimappat uagut makititsisinnaanatalu ajorunnaarsitsisinnaanngilagut. Kisianni misiginneqataagutta ikiuisinnaavugut tuppallersaasinnaallutalu, immaqa aggiinnarluta qiaqataallutalu. — Rûmamiut 12:15.
Makititsineq tamanna maluginiarnartoq Jesusip suliarisimasaa aamma siunissamut neriorsuutaavoq — taamanikkussaq ’iliverniittut tamarmik taassuma nipaa tusassammassuk anillutillu makillutik’! (Juánase 5:28, 29) Nunarsuaq tamakkerlugu aliasuttut tamarmik Jesusip misiginneqataanera misigiumaarpaat anaanaasut, ataataasut, meeqqat ikinngutillu toqusimasut ilivernit makippata!
Tupinnartulianit ilinniutissat
Ersarippoq Jesusip tupinnartuliai tassaaginnanngitsut pissaanermik pissanganartumik takutitsinerit. Guuti qutsissisippaat tamakkunatigullu kristumiut kajumissaarneqarput ’Guuti unnersiutigeqqullugu”. (Rûmamiut 15:6) Tupinnartuliat ajunngitsuliornermut, tunisiumatussutsimut misiginneqataanermullu kajumissaarutaapput. Pingaarnerusumillu Kristusip ukiuni tuusintini naalakkersuinissamini tupinnartuliortarnissaanut siumut assersuutaapput.
Nunamiikkallarami Jesus killilimmik tupinnartuliorsimavoq. (Matîuse 15:24) Kunngitulli naalannartutut nunarsuaq tamakkerlugu iliuuseqarfigissavaa! (Tussiaat 72:8) Jesusip nalaani ajorunnaarsinneqarsimasut makissimasullu tamarmik naggataatigut toqusimapput. Qilammili kunngiulluni ajorti toqulu peerluinnassavai, inuunermik naassaanngitsumik pilersitsilluni. (Rûmamiut 6:23; sarĸúmersitat 21:3, 4) Aap, Jesusip tupinnartuliai siunissamut nuanningaartumut tikkuussipput. Jehovap nalunaajaasuisa inuit millionilikkuutaat ikiorsimavaat taamanikkussamut inuunissamik neriuutissaqalersillugit. Tamanna nalliutserlugu Jesus Kristusip tupinnartuliortarsimanerata piumaartussanik nuannersunik qilanaartuutississinnaavaatigut! (wE 1/3 95)
[Qupp. 7-mi assiliartaq]
Jesusip imeq viinninngortikkaa