Atuartartut apeqqutaat

Saulip sakkutuui neqimik aattalimmik nerigamik sooq pillarneqarlutik toqunneqanngillat, tamannami Guutip inatsisaani piumasarineqarmat?

Angutit taakkua Guutip inatsisaanik unioqqutitsipput, qularnanngitsumik saammaanneqarput aammut ataqqinninnermik ersersitsigamik, naak taamatut ataqqinninnermik ersersitsinertik peqqissaarunnerusariaqarsimagaluaraat.

Manna eqqarsaatigeriassagit: Israelikkut kunngimit Saulimit erneranillu Jonathanimit siulersorneqarlutik filisterinut sorsussimapput. ’Israelikkut annikilliulermata’ Saul tuaviupilulluni uppernarsaavoq akeqqani suli akiniartinnagit sakkutuuni neqimik nerissanngitsut. (1 Samuel 14:24) Uppernarsaanera sivitsunngitsoq ajornartorsiutinik pilersitsivoq.

Sakkortuumik akersuunnermi Saulip sakkutuui ajugaapput, sukataarnerli tamanna annertuumik annaasaqarfiuvoq. Kaallutillu nukeerupput. Ajornartoorluinnarnerminni tamatumani qanoq iliorpat? „Taamaattumik unnulermat sakkutuut tiguakkatik savat nersutaatillu allat maaniinnaq toqorariarlugit [aattalimmik, NV] neqituupput.“ — 1 Samuel 14:32.

Tamanna Guutip aak pillugu inatsisaanik unioqqutitsineruvoq, soorlu Saulip innuttaasa ilaat ima oqartoq: „Sakkutuut [Jehovamut] ajortuliorput [aattalimmik, NV] neqitoramik.“ (1 Samuel 14:33) Aap, inatsimmi oqaatigineqarpoq uumasut toqunneqarunik neqaata nerinnginnerani aavat kuutsinneqassasoq. Guuti ingasattajaanngilaq piumasarigamiuk aak kuutsinneqartassasoq. Aap kuutsinneratigut kiffaasa aap pingaaruteqassusianik pingaartitsinertik ersersissinnaavaat. (5 Moses 12:15, 16, 21-25) Uumasup aava pilliivimmi illernartitatut atorneqarsinnaasimavoq, nerineqartussaananili. Piaaraluni unioqqutitsineq toqumik pillarneqaataasussaasimavoq, Guutimmi innuttai ima oqarfigineqarsimapput: „Pinngortitap suulluunniit aavanik nerissanngilasi, aak tassaammat pinngortitat tamarmik uumassutaat. Aammik nerisoq inuiaqatiminit piiagaassaaq.“ — 3 Moses 17:10-14.

Kunngip Saulip sakkutuuisa inatsit piaaralutik unioqqutippaat? Aak pillugu Guutip inatsisaanik ataqqinninngilluinnarnermik ersersitsippat? — Naleqqiuguk 4 Moses 15:30.

Taamatut isumaqartariaqanngilagut. Oqaatigineqarpoq pisaqaraangamik ’aava nerineq ajoraat imertullu nunamut kuisaraat’. Taamaattumik iliuuseqarsimassapput aava nunamut kuutsinniarlugu. (2 Moses 15:23) Qasugamik nukillaarluinnaramillu uumasut toqutatik aaverniarlugit nivinnganngilaat. Savat uumasullu allat ’nunami’ toqorarpaat, taamaalillunilu aavata kuutsinnera arriinnerusimassalluni. Taava uumasut toqungasut aap qeqqaniittut pilassimassavaat. Taamaattumik immaqa Guutip inatsisaa eqqaamagaluarlugu maleruarnissaa naammattumik peqqissaarussimanngilaat.

Tamatuma kinguneraa ’inuit aattalimmik neqitornerat’, tamannalu ajortuliorneruvoq. Saulip tamanna paasigamiuk peqqusivoq ujarassuarmik tungiminut assakartitsisoqassasoq. Sakkutuuni ima peqquai: „Tamassi ussiutissinnik savaatissinnillu aatsivigalunga maani toqutsissaasi; taava nerisinnaavusi. [Jehovali] ajortuliorfigeqinasiuk [aattalimmik, NV].“ (1 Samuel 14:33, 34) Sakkutuut ajortuliorsimasut naalapput, „Saulilu pernarluni [Jehovamut] pilliiviliorpoq“. — 1 Samuel 14:35.

Ujaqqap qaani uumasumik toqutsineq qularnanngitsumik aap kuulluarnissaanut iluaqutaasarpoq. Uumasoq toqunneqarniariartoq neqaa nerineqanngilaq. Aap, pilliivimmi kuisap ilaa Saulip atorsimassavaa ajortuliorsimasunik Guutimut saammaateqqusinermini. Jehova saammaassivoq, qularnanngitsumik nalunnginnamiuk sakkutuut naak qasugaluaqalutik kaakkaluaqalutillu qanoq iliorniarsarisimasut. Aamma Guutip eqqarsaatigisimassavaa Saulip tuaviupilulluni uppernarsaanera angutitaanik ajornartorsiortitsilersimasoq.

Pisukkut tassuunakkut erserpoq ajornartoorluinnarneq Guutip inatsisaanik unioqqutitsinissamut patsisiginiarneqarsinnaanngitsoq. Aamma tamanna iluaqutigalugu paasisariaqarparput tuaviupiluttumik uppernarsaanissaq mianersuutigisariaqaripput, neriorsuipilunnermi uagutsinnik inunnillu allanik ajornartorsiortitsilersinnaavoq. — Nalunaajaasup oqaasii 5:4-6. (wD 15/4 94)