’Jehovap Nalunaajaasuisa annaappaannga!’
ULLUSSANI kingullerni makkunani inuppassuit ’qiningasutut ajunngitsunillu uumissuisutut’ imminnut uppernarsartarput. (2 Timûtiuse 3:1, 3) Isaac, Afrikami killermi Napasuliaq Alapernaarsuiffiup Peqatigiiffiata immikkoortortaqarfiani kajumissutsiminik kiffartortoq, tamatuma ilumoorneranik takunnittuusimavoq. Ima oqaluttuarpoq:
„1992-imi januaarimi taxanik arlariilluni ilaaffigineqarsinnaasunik ilaasullu allat sisamat inuilaap aqqusinersuatigut ungasissumukarluta ingerlaarpugut. Sanilera arnaq oqaloqatigilerpara, nuannaarlunilu atuagassiaaraq Biibili tunngavigalugu allataasoq tunniunniagara tiguaa.
Taavali ualikkut sisamat missaanni biili normoqanngitsoq siunitsinnut periataarpoq, biilerpullu qiarsuttuinnarmik unittariaqarpoq. Angutit pillagunaqisut pingasut tamarmik aallaasillit biilimit pissiisaannaq anipput biilittalu matua mappipiloorlugu. ’Tamassi anigitsi,’ ilaata suanngappaatigut.
Angutip allap pooqattannik atuagassianik imalimmik arsaarpaanga. Takugamiuk atuagassianik Biibililersaarutaannarnik imaqartoq maangaannaq igippaa. ’Aamma suuteqarpit?’ aallaasiminik tikkuaqqaatigalunga aperaanga. Aningaasat aningaasivimma imarisai tunniutipallappakka. ’Tassa tamarmik?’ aperaanga. Oqarfigaara Jehovamut nalunaajaasuullunga Jehovallu nalunaajaasui salluneq ajortut. Aningaasivinnik arsaapiloorpaanga, kinaassutsinnillu allagartara Napasuliaq Alapernaarsuiffimmeersoq takugamiuk oqarfigaanga: ’Ajunngilaq, Napasuliaq Alapernaarsuiffik. Tamaani utaqqigit.’
Taava arnaq taxami oqaloqatigisimasara saappaa. Ujamini piipallakkamigit aningaasaatini pooqattaaqqaminiittut ilanngullugit angummut tunniuppai. Arnap assaani sajuttuni atuagassiaaraq angutip takugamiuk ilimagaa uanga ilagigaanga, ussersorfigaalu utaqqqeqatigeqqullunga.
Inupiluit sakkullit allat ilaaqatitsinnik allanik peqqarneeqisumik iliorfiginnipput. Aquttorput angutillu allat ilaaqativut unatarpaat piaaffigalugillu. Ataatsip allap arnap ujamii tigoriarpai, pinaasermalli peqqarniilluinnarlutik arnaq niaquatigut sakiaatigullu aallaasimik qisuttaannik anaalerpaat toqunissaa tikillugu. Arnat pingajuat uniarlugu biilimit anniseriarlugu sakiaatigut aallaavaat. Ajoraluartumik aamma taanna toquvoq. Uanga arnarlu inuusuttoq kisitta ajoquserneqanngivilluta aniguivugut.
Kingorna biilertumit sanioqqutilersumit ikitinneqaratta arnaq annilaarsimaqisoq ima oqaqattaartuarpoq: ’Jehovap nalunaajaasuisa annaappaanga!’“ (wD 15/5 94)