Isumakuluutit akiornissaat ilikkarneqarsinnaavoq
ANGUT inuusuttoq 23-nik ukiulik ajornartooqqasorujussuuvoq. Immikkut ilinniagaqarsimanngilaq akissarsiakitsuararsuullunilu. Qaquguluunniit katissinnaanissani pilluarlunilu inuulernissani takorlooruminaatsittorujussuuaa. Tupinnarpallaanngilaq anaanaa oqarmat: „Nikallungaqaaq isumakuloqalunilu.“ Inuit millionilippassuit angutitut inuusuttutut taassumatut misigipput. Inuiaqatigiinni inuit inissisimaffiini tamani inunnik isumakuluttunik nassaassaqarpoq.
Isumakulunneq oqaatsinik ujarlerfissiami tassaanerarneqarpoq „pisariaqartitanik pinngitsoortarneq, ilukkut assortuunnerit imaluunniit ajornartorsiutit allat aaqqinneqarsimanngitsut pissutigalugit qamuuna nalornisutut misiguarneq, nikallungajuarneq naammagisaqanngitsutullu misigiuarneq“. Anguniakkamik allaat ilungersorujussuareeraluarluni angunngitsuuineq isumakululersitsisarpoq. Soorlulusooq aqqutissaq asseqqaneqartuartartoq qarmamullu aportuarluni. Taamatut misigineq tamatta nalunngilarput.
Inuit naammagisimaanngisaminnik suliffeqartut naleqanngitsutut misigisarput. Anaanat angerlarsimaannartut ilungersoqalutik suut tamaasa ingerlatinniartarpaat, misigisarlutilli suliartik pingaartinneqanngitsoq. Inuusuttut atuarfimmi ajornartorsiuteqartut ilinniagaqarniaraluarnerminni immaqa pakatsisinneqartarput. Naggueqatigiit ikinnerussuteqartut immaqa ernumatsalluinnartarput misigisaramik immikkoortinneqarlutik. Niuertut assuarnaatsumik pitsaasunik nioqqutissiorniaraluartut immaqa unammillertiminnit ilerasuuteqanngivissunit unneqqaserluttunillu ingiarneqartarput. Tamakku tamarmik isumakuluutinik neriutaarunnermillu kinguneqartarput.
Ilisimasup ukiut hundredelippassuit matuma siornagut inuusimasup isumakulunnini naleqqulluartumik allaatigisimavaa. Kunngi Salomon Israelimeersoq ima oqarsimavoq: „Taavali eqqarsaatigilerpakka nammineq assannik piliarisakka tamaasa qanorlu assoroortigalunga sulisimanera; paasilerparalu sunaaffa tamarmik nungujasuinnaasut anorillu tiguniarsarineratut suallaataanngitsigalutik. Seqernup ataani suut tamarmik anorip tiguniarsarineratut pissarsiviunngitsigipput. Inuummi suleruloornini ilungersorninilu tamaasa seqernup ataani imminut erloqissiuutini suallaatigissanerpai? Ulluimi tamarmik naalliuffiupput suliaalu aliasunnermik nassataqartarlutik; unnuakkulluunniimmi qasuerserfissaqanngilaq. Tamakku aamma asuliinnaapput suiallannerinnartut illutik.“ (Nalunaajaasup oqaasii 2:11, 22, 23) Ernumatsanneq inuppassuit inuunerminni isumakuluutiminnik aaqqiiniaraluarnerminni misigisartagaat Salomonip ersersippaa.
Isumakulunneq allaat ernumanersuannguussinnaavoq. Ilaasa akiuunnertik unitsiinnarsimavaat, inuiaqatigiit tunussimallugit nakkaassimasutullu inuulerlutik. Ilaat pinerluttuliortunngorsimapput angutaasertalersimallutillu piumasatik piniarlugit. Aappariit ilaqutariillu tatisimaneqartualersimapput.
Immaqa isumakuluutivut ajugaaffiginiarlugit ilungersorsimagaluaqaagut, isumakuluutivulli annertusiartuinnarlutik. Ussatit 13:12: „Utaqqivallaarneq tarnikkut anniaataalersarpoq.“ Timikkut anersaakkullu ingerlanerput immaqa navianartorsiortinneqarpoq. Neriuutaarulluinnarpali? Kukkuluttorsimanerit naammanngissutsillu pissutigiinnarlugit pillaatitut isumakuluttuaannarneq atortariaqarpa? Isumakulunneq akiorniarlugu arlaannik iliuuseqartoqarsinnaava inuunerlu nalerisimaarnarnerusoq angullugu? Misissoriartigu.
Isumakulunneq qanoq akiorneqarsinnaasoq
Ajornartorsiuteqaraanni siunnersorneqarnissamillu pisariaqartitsigaanni inuk sianisooq misilittaqarluartorlu tatigisinnaasaq orninneqartarpoq. Ussatit 3:5, 6-imi ima siunnersuuteqarpoq: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatiguartaruk sumiikkaluaraangavilluunniit, taava ingerlavissatit nalimmatsissavai.“ Guutip oqaasiani, Biibilimi, siunnersuutit atoriaannaallutillu silatuusut nassaarineqarsinnaapput. Assersuutit aamakku.
Inuussutissarsiorneq isumakuluutaasinnaasarpoq. Immaqa silamiutut suliffipput nuannaraarput akissarsiavulli amigaralugit. Ilaquttavut asavavut ajunnginnerpaamillu ingerlanissaat kissaatigalugu. Aningaasatigulli pisussaaffitta qanoq ililluta naammassiniarnissaat assut isumakuluutigaarput. Immaqa qaangiuttoorluta sulisarpugut allaallu saniatigut suliffeqarluta. Sivitsunngitsoq inuuneq qasunarilluinnalerparput, taamaallaat nerillutalu sinillutalu sulisaratta. Akiligassat qaleriiaaginnavipput, akiligassat alliartuinnarput taamatuttaarlu isumakulunnerput alliartuinnavilluni.
Silamiutut suliffeqarnerup siunertaraa inuussutissarsiornissaq. Qanorli annertutigisumik aningaasarsiornissaq pisariaqarpa? Apustili Paulus ima allassimavoq: ’Sunnguamimmi nassataqarnata silamut matumunnga pigatta, nalunanngilaq sunnguamik nassataqarnata kingumut qimassagipput. Nerisassaqarlutali atisassaqarutta tamakku naammagissavavut.’ Pisariaqartitavut sinneqalugit aningaasarsiorniarsarivugut inuillu allat atortorissaarutitigut naliginiarsaralugit? Taamaammat immaqa isumakuluuteqarpugut. Paulus ima mianersoqqusisimavoq: ’Pisuunngorumasulli usserneqarlutillu napititaasarput silaqanngitsorpallattunillu ajoqutaasunillu pilerigisarpassuaqalersarlutik; tamakkua inuit aserornermut tammarnermullu kiviartortittarpaat, aningaasanik piumatuunermit ajortut tamalaat naasarmata; tassungalu kajumissillutik ilaasa upperneq tammaavaat, erloqinartorpassuillu imminnut atortippaat.’ (1 Timûtiuse 6:7-10) Pigisatigut anguniakkatsinnik unneqqarissumik naliliinitta immaqa qulaassavaa ilaat pisariaqavissuunngitsuusut. Ileqqaarnerulerneq pilimannginnerusumillu inooriaaseqalerneq immaqa isumakuluutitsinnik millisitsissaaq.
Pissusissamisoortumik pisariaqartitanik naqisimanninneq aamma isumakulutsitsilersinnaavoq. Assersuutigalugu, arnamut inuusuttumut katikkusunneq ilaqutariittullu inuunerup iluani toqqissisimanermik tunniusimaqatigiinnermillu angusaqarusunneq pissusissamisoorpoq. Immaqa ajuutiginarnerujumalluni nutsami ilusii, qalipattarnini, atisani pinnersaatiniluunniit pingaartittorujussuuai. Immaqa arnanut atuagassiarpassuit atuartarpai katikkusuttunut siunnersuutinik ujarlerluni, immaqaluunniit festeriaqattaartarpoq angummik naleqquttumik nassaarnissani kissaatigigaluarlugu — iluatsitsissananili. Ukiut ingerlapput, saperluinnalerporlu. Neriuutaarulluinnarami pitsaanngitsumik uininnissaminut ussernartorsiuinnalerpoq. Imaluunniit ajornerusumik, kissalaarfigineqarnissaminik qiisaqaluni kiisa kanngunartuliorpoq.
Naammagittassuseq pitsaasumillu naliliisinnaassuseq pisariaqarput. Kukkusumut katinneq, ingammik Jehovamut uppissuseqanngitsumut, kukkuluttorneruvoq ilungersornartoq. (1 Korintumiut 7:39; 2 Korintumiut 6:14, 15) Kanngunartuliorneq nikallunganermik kinguneqartarpoq. (Ussatit 6:32, 33) Unneqqarissumik imminut misissorneq silaqassutsimik ilalik iluaqutaasaqaaq. Ilimanaateqarnerujussuuvoq aappassap eqqortup ’anersaaq piuaatsoq sallaatsoq’ kajumiginerussagaa, mutinik atisalik qalipassimaqisorlu pinnagu. (1 Pîtruse 3:3, 4) Silamiut ilisimasakkaartaasa siunnersuutaat ataavarsinnaanngitsut qarsupittullu sussa malinnagit, asaneqarluni pingaartinneqarlunilu nuliaanerup qanoq anguneqarsinnaanera paasiniarlugu aappariinnerup Pilersitsisuanukarnissaq pingaartorujussuuvoq. (Ussatit, kapitali 31) Angutit arnallu suli katissimanngitsut pissutsit aappassariumaagassaminnut pissuseritikkusutatik namminneq pissuseriniarsariaqarpaat. Inunnik Biibilip najoqqutassiaanik ataqqinnittunik katerisimaaqateqartarnissaq silatusaarneruvoq. Biibilip najoqqutassiai inuunitsinni atorutsigik, aappariinnerup pilluarnartup angunissaanut periarfissarissaassaqaagut. Allaallu katinngitsooraluaraanniluunniit Allakkat naapertorlugit iliuuseqarneq aappaqanngitsutut inuunermi nuannaarutissarsisitsisarpoq inuunerlu pisuunngortittarlugu.
Aamma pisussaaffinnik oqimaatsunik nammanniarneq isumakululersitsisinnaavoq. Immaqa sammivinnit tamanit tatineqartutut misiginartarpoq. Ilaqutariit pisariaqartitaat pisariaqavissut matuneqartariaqarput, immaqalu sulisitsisoq naammagisimaartikkuminaappoq. Immaqa qanigisat ajornartorsiuteqalaalerlutillu ikiorneqarnissartik naatsorsuutigisarpaat. Allat ajornartorsiutaannik ulapputeqangaaravit kiisa nammineq sammisassatit puiorpatit. Soorlumi kikkut tamarmik ataatsikkut piumaffigigaatsit. Isumakulunneq nikallorninngorpoq, immaqalu suut tamaasa sussakkeerusunnerulerpatit. Qanoq iliorsinnaavit?
Qanoq tulleriiaarinerput misissulaassallugu pitsaassaaq. Soorunami pisinnaasavut killeqarmata allat piumasaat tamaasa naammassisinnaanngilluinnarpavut. Pingaarnerit salliutittariaqarpavut. (Filípimiut 1:10) Soorlu oqaatigineqartoq, „qimmeq uumasoq iluanaarneruvoq løvemit toqungasumit“. (Nalunaajaasup oqaasii 9:4) Pisussaaffiit ilaat nukinginnarput kinguartinneqarsinnaanatillu, pingaannginnerusulli kinguartinneqarsinnaapput. Immaqa arlaatigut ikiorneqartariaqaraluarluta kisitta nammappugut. Akisussaaffiit ilaat pisariaqavissuunngippata immaqa uninngatiinnartariaqarpavut. Naak tamakku immaqa aallaqqaammut allanut pakatsinartortaqassagaluartut uagut nammineq timikkut misigissutsikkut nammassinnaasatta killeqarnerat eqqarsaatigisariaqarparput.
Nappaat sanngiillinartoq assut isumakuluutaasinnaavoq, ullorpassuarnimi imaluunniit sapaatit-akunnerpassuini innangasariaqassutigisinnaagatsigu. Timikkut anniarujussuarnerup nikallortissinnaavaatigut. Immaqa nakorsanut assigiinngitsunut nakorsiaqattaartarpugut, imaluunniit vitaminerpassuarnik iisartagarpassuarnilluunniit iioraasarluta, peqqissiumagaluarnermit. Taamaattorli iluarsineq ajorpugut isumaliulersarlutalu inuujuaannarnissarput pisariaqarnersoq.
Imaassinnaavorluunniit ajornartorsiuteqartugut aatsaat Guutip silarsuassaani nutaami aaqqinneqarsinnaasumik. (2 Pîtruse 3:13; naleqqiuguk Jesaja 33:24.) Inuit naammalluinnanngitsuummata nakorsat pisinnaasaat killeqarput. Immaqa anniaaterput naammagalugu atuinnartariaqarparput. Apustili Paulus ’qisummik uinimminut kapputtumik peqarsimavoq’, immaqa isiluut innarluulluunniit alla, anniaatigingaaramiuk qinoqattaassutigisartakkani. (2 Korintumiut 12:7-10) Guutilli Paulus ajorunnaarsissimanngilaa, apustilillu anniaatini toqunissani tikivillugu naammagalugu atortariaqarsimavaa. Ajornartorsiutini naammagalugit atorsimavai naakkigineqarnissanilu qinnutigisarnagu. Nuannaarninili katanngisaannarsimavaa. (2 Korintumiut 7:4) Naak Jobip assuarnaatsup nappaassuarnik eqqorneqaraluarluni Jehovamut uppernini pigiuaannarsimavaa, tamannalu pilluaqqussutissarpassuarnik kinguneqarsimavoq. (Job 42:12, 13) Guutimut kiffaagutta maligassiat tamakku eqqarsaatigineratigut Jehovamullu ikioqqunitsigut nakussatsittarsinnaavugut. — Tussiaat 41:2-4.
Isumakuluuteqaraluarluni nukittooq
Jehovap innuttai isumakuluuteqartaraluarlutik anersaakkut nukittuujupput. Naak nappaammik atugaqassagaluarutta Guutip anersaakkut aaqqissuussaanik tamakkiisumik iluaqutiginninniarnitsigut ’uppernitsigut peqqittuaannarsinnaavugut’. (Títuse 2:1, 2) Naak allaat pigisatigut ernumanaannartumik piitsuugaluarlutta anersaakkut pisuujusinnaavugut.
Ilisimassutsikkut nakuussutsikkullu Guutip isumalluarfigineratigut ilaqutariinni isumakuluutigilersinnaasavut nammassinnaasassavavut. Abigajil, Nabalip nulia, eqqaamaniaruk. Nabal ’kamajaqalunilu inupiluusimavoq’. Aqqa isumaqarpoq „silaatsoq“. Angummik taama ittumik inooqateqarneq assut isumakuluuteqarnartuusimassaaq! Abigajili ’silassorsissuujuaannarsimavoq’ nikallornanilu. Aap, ajornartoorfimmi oqaasii iliuusiilu ima silatusaartigisimapput Davidip naalaannarsimallugu Nabalip kamassaarineri qujasuissusialu aammik kuisinikkut Jehovamillu tatiginnikkunnaarnikkut akiniaanissaminik inertermani. — 1 Samuel 25:2-38.
Allaat ilagiit kristumiut iluanni isumakuluutissarsisinneqarsinnaavugut, qujanartumilli Jehovap nakussatsitsinera iluaqutigalugu naammagalugit atorsinnaavavut. Diotrefesimik Gajusimillu pisimasukkut tamanna paasineqarsinnaavoq. Diotrefesip ileqqua isumakulunnartoq Gajusip Guutimik mianerinnittup ajunngitsuliortuaannarnissaminut taamaalillunilu pillualernissaminut anersaakkullu pilluaqqusaangaarnissaminut akimmiffigisimanngilaa. — apustilit suliait 20:35; 3 Juánase 1-10.
Assersuutigalugu, ilagiinni uppeqatitta kiffartuunnissaannik kissaateqaraluarluta utoqqaanertanik ilagiinnilu kiffartuuteqartunik nutaanik toqqaasoqaraangat qaangiinnarneqarangatta nikallorsinnaavugut. Pakatsinermilli nakkaannarnissamut taarsiullugu anersaakkut imminut suli nukittorsarniartariaqarpugut Guutillu anersaava uagutsinni ajunngitsumik annertunerujartuinnartumik inerititaqartinniartariaqarlugu. (Galâsiamiut 5:22, 23) Ukiuni 40-ni Mosesip Midjanimiinnermini qanilaarnerujartuinnarnissaa, naammagittarnerujartuinnarnissaa pissutsinillu allanik, Israelikkunnut siuttuunermini ajornartorsiutinik isumakuluutinillu naapitassariumaagassaminik nammassinnaanissaminut pisariaqartunik, ineriartortitsinissaa Guutip isumagisimavaa. Immaqa aamma uagut Jehovap suliassanik immikkut pisinnaatitaaffiusunik siunissami pissaqartippaatigut, anersaakkut nukittuujuaannarutta isumakuluutinullu nakkaannanngikkutta pisassatsinnik.
Isumakuluutit qanittukkut nungussapput!
Qaquguli isumakuluutit nungussappat? Arlaat neriutaarunnarluinnartutut isigisarput Pinngortitsisumut, Jehova Guutimut, taamaanngilaq. Taanna isumakuluutinik artorsaateqanngilaq. Pruffiiti Esajas aqqutigalugu Guuti ima oqarsimavoq: „Taama ippoq oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“ (Jesaja 55:11) Jehova allanit nallersimaneqanngitsumik pissaaneqarlunilu oqartussaassuseqarami suut tamarmik taassumunnga ajornanngillat. (Mákorse 10:27) Innuttami naassaanngitsunik pilluaqqusaanissaannik neriorsuutai pinngitsooratik eqquutissapput. — Josva 21:45.
Nalornineq qularnerlu isumakulunnermut pissutaasut annerpaat ilagaat. Akerlianilli allassimasoqarpoq ’upperneq tassaasoq neriugisani nakimassutiginaveerlugit’. (Eprîarit 11:1) Guutimut upperneq neriugisatta Biibilimik tunngaveqartut tamarmik eqquunnissaannut qulakkeerisuuvoq. Biibilip oqariartuutaata pingaarnersaa tassaavoq Jehovap naalagaaffimmi naalakkersuineranik atuutilersitsinissaanik neriorsuut. Naalakkersuinerup tamatuma atuunnerani nunarsuaq tassaalissaaq paratiisi naammalluinnartoq inuit naapertuilluartut nuannaarlutik naassaanngitsumik inuuffigisaat. (Tussiaat 37:11, 29) Ajortut tamarmik — ilaatigut isumakuluutit — peerutissapput, Guutimmi ’pinngortitat tamaasa ajunngitsuutiminik qaarsillartissammagit’. — Tussiaat 145:16.
Pilluaqqussutissat tamakkua piviusunngunnginneranni tamatta annerusumik minnerusumilluunniit isumakuluuteqartariaqartassaagut. Biibilimili neriuutip naammagittarnissatsinnut sapiissuseqalersillutalu nakussatsissavaatigut. Biibilimi unnersuussutit peqqinnartut ikiortigalugit eqqortumik naliliisinnaassuseqarsinnaassaagut, taamaalillunilu inuunerput aalajaatsuussaaq uummatsitsigullu eqqissineq pigisinnaassavarput. Naak pakatsissuteqartaraluarta ’eqqissineq Guutip pia sianinernit tamanit annerungaartoq’ angusinnaavarput. (Filípimiut 4:6, 7) Tassa isumakuluutinut akiuunneq neriuutissaqarpoq. Jehova ikiortigalugu isumakuluutit nammassinnavavut siunissamilu ajugaaffigalugit. (wD 15/9 92)
[Qupp. 30-mi assiliartaq]
Isumakuluutinnik nammannissannut Guutip ikiorsinnaavaatit, soorlu Job, Moses, Abigajil Paulusilu ikiorsimagai.