Pilliutigisariaqakkatit naatsorsoreerpigit?

„QANOQ? Neqeroorummut taamaattumut naaggaarpit?“ Sulisut nakkutilliisuata tusakkani uppererpasinngilluinnarpaa. Suleqataa arnaq, pikkorissutsini pissuserissuuninilu pissutigalugit ataqqisaasoq, nunamut allamukarluni ukiuni marlunni ilinniaqqinnissaminik suliffimmi neeqeroorutaanut naaggaaqqammerpoq. Sooq?

Arnap taassuma nammineq oqarneratut taamaaliussagaluaruni ukiuni marlunni uini meeqqanilu marluk qimassimasariaqassagamigit. Maqaasigisorujussuussagaluarpaami. Sulilu ajornerusumik, nuliatut anaanatullu Guutip pisussaaffigititai sumiginnassagaluarpai. Misigissutsikkut anersaakkullu pilliutigisariaqagassai annertuallaarujussuassaqaat. Taamaattumik pilliutigisariaqagassani naatsorsoreerlugit aalajangerpoq neqeroorummut naaggaarniarluni.

Illit taannaagaluaruit qanoq iliorsimassagaluarpit? Qularnanngilluinnarpoq kikkut tamakkeratik arnaq aalajangerneratigut isumaqatigissagaat. Ilaat, assersuutigalugu suleqatai, immaqa isumaqarput qaffakkiartornissamut periarfissatsialassuaq asuliinnartikkaa. Immaqalu allaat ilaasa assuarissavaat oqarlutik ilaquttami siunissaat eqqarsaatiginngippallaaraa, ukiummi taama sukkatigisut ukiut marluinnaat suunngikkaluaqimmata. Aalajangernerali eqqarsaqqaarani misigissutsilluunniit maliinnarlugit pinngilaq. Najoqqutassat siunissaminut attuumassuteqartut malillugit inersimasutut eqqarsarluaqqaareerluni aalajangersimavoq. Najoqqutassat suut?

Silaqassusiinnaanngitsoq

Inuit nunami inuusimasut silatunerpaartaat, Jesus Kristus, assersuusiami ilaanni tamatumunnga atatillugu pitsaasumik unnersuussuteqarpoq. ’Kinami ilarsi qaqiffiliorumaguni ingikkallassannginnerpa akissaa naatsorsorlugu, inernissaanut atortussat piginerini?’ Jesus aperaaq. ’Tunngavilersimallugu inerneq ajuleraluaruniuk takunnittunut tamanut mitaatigileqqunani, oqaqqunagit: „Inuk una illuliuleraluarami inerneq ajuleqaa.“’ — Lúkarse 14:28-30.

Kialuunniit nalunngilaa pingaaruteqartumik aalajangiilersinnani naatsorsueqqissaaqqaarnissaq silatusaarnerusoq. Assersuutigalugu, illusiniartup illu qanoq akeqarnersoq paaseqqaarnagu aningaasatigullu artukkerneqannginnissani qulakkeeqqaarnagu isumaqatigiissummut uppernarsaat atsiornavianngilaa. Arlaannik aallartitsiniaraanni naatsorsueqqaarnissaq silatusaarneruvoq.

Jesusilli assersuusiaata suna pingaarnersaraa? Assersuusiortinnani ima oqarpoq: ’Sanningasulimminik ersunngitsoq malinnangalu taanna uannut ajoqersugaasinnaanngilaq.’ (Lúkarse 14:27) Ataqatigisaasa taamaalillutik ersersippaat Jesus ulluinnarni iliuutsinut atatillugu sianisuumik siunnersuiinnanngitsoq. Aap, imminut ajoqersuganngorniarluni pilliutissaajunnartunik naatsorsuinissaq tassani eqqartorpaa.

Assersuut tamanna ikiortigalugu Jesusip erseqqissarpaa imminut ajoqersuganngorniaraanni allannguinissaq pilliuteqarnissarlu qanoq pingaaruteqartigisut. Sooq? Pissutsit aaqqissuussaanerat inuuffigisarput pigisanik pingaartitsiffioqalunilu namminissarsiorfioqimmat. Inuit amerlanerpaartaasa timikkut kissaatigisatik pingaarnerpaatillugit ulapputigaat, anersaakkullu pisariaqartitatik Guutimullu attaveqarnertik immannguaannaq sammisarlugit imaluunniit soqutiginngivillugit. (2 Timûtiuse 3:1-4) Taamatulli isumaqarneq imaluunniit taamatut anersaaqarneq Jesus Kristusip maligassiaanut akerliulluinnarpoq: ’Soorlu inuup ernera tikiutinngitsoq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ Anersaamut tunngasut pigisanit salliutinnerungaarnissaat erseqqissarpaa ima oqarluni: ’Anersaaq tassa uummartitsisoq, uinik iluaqutaanngilaq.’ — Matîuse 20:28; Juánase 6:63.

Tassa Jesusip imminut ajoqersuganngorusuttut siunnersoramigit anersaamut tunngasut sallerpaasussatut eqqartorpai, timimut tunngasut pinnagit. Jesusip ajoqersugaanut suna pingaarnerpaava: pigisatigut iluaqutissat silarsuup neqeroorutigisinnaasai, imaluunniit anersaamut tunngasut ajoqersuganngortitsiortornerup nassatarisai? Assersuusiap tamatuma kinguliatalu naggataani ima oqarluni Jesusip tamanna akivaa: ’Taamattaaq ilarsi kinaluunniit pigisaminik tamanik isumakkiinngitsoq ajoqersugarisinnaanngilara.’ (Lúkarse 14:33) Taava apeqqutaalerpoq Jesusimut ajoqersuganngorusuttoq taamatut pilliuteqarnissaminut piumassuseqarnersoq, imaluunniit pilliutissani angigalugu uniinnarnersoq.

Pigisanut oqimaaqatigiissumik isiginninneq

Naak timimut tunngasut ersitsumik pilertortumillu iluaqutissarsiffiusinnaasutut isikkoqarsinnaagaluartut, taamaattoq anersaamut tunngasunik suliaqarnikkut iluanaarutissat sivisunerungaartumik atasinnaallutillu nalerisimaanarnerungaarput. Jesus ima kajumissaarisimavoq: ’Pequutinik nunami katersuiniassanngilasi, oquillu manngertornerullu aserugassaannik tillikkajuttullu ammarteriffigissanngisaannik tillissanngisaannillu. Pequutinilli qilammi katersuiniaritsi, oquillu manngertornerullu aserussanngisaannik tillikkajuttullu ammarteriffigissanngisaannik tillissanngisaannillu.’ (Matîuse 6:19, 20) Ullutsinni aningaasat nioqqutissallu naleerukkiartornerata, aningaaseriviit nakkaattoornerata assigisaatalu inuppassuit pisuussutinut isumalluarfiginnittut suutaarutivittarsimavaat. Paulusilli kajumissaarpaatigut ’takussaasut pinnagit takussaanngitsut isigissagivut, takussaasut naassaammata takussaanngitsulli naassaanngitsuullutik’. (2 Korintumiut 4:18) Qanoq ililluta taamaaliorsinnaavugut?

Taamaaliorsinnaavugut maligassiuisorsuatta, Jesus Kristusip, malinneratigut. Taanna nunamiikkallarami imminut naaggaarfigilluinnartutut inuusimanngikkaluarpoq, tamannami takuneqarsinnaavoq katittorsiortuniittarlunilu nerersuaqataasarsimaneratigut. Ersarilluarporli anersaamut tunngasut tamanit salliutissimagai. Ataatami piumasaanik iliornissani kissaatigigamiuk inuit allat pisariaqavissutut isigisaasa tunullinngortinnissaannut piumassuseqarsimavoq. Ilaannilu ima oqarsimavoq: ’Terianniat siseqartarput, timmissallu qilaap ataaniittut ineqartarput; Inuulli Ernera niaqquminut iigarfissaqanngilarluunniit.’ (Lúkarse 9:58) Ataatami piumasaanik iliorneq ima pingaarluinnartigisutut nuannaarutissarsinartigisutullu isigigamiuk ilumoorluni ima oqarsinnaasimavoq: ’Neqissara tassa aallartitsisima peqqusaa malillugu suliareqqusaalu naammassillugu.’ — Juánase 4:34.

Satanip ussiiniarnerinik akiuiniarnermini Jesusip ersersippaa naleqartut suut salliutinnerpaagini. Jesus pissaanerminik Guutimeersumik nammineq iluaqutissaminut, timikkut pisariaqartitaminik matusinissaminut silarsuarmilu ataqqisaanermik nuannarisaanermillu angusiniarnissaminut atuinissaanik Diaavulup usserniaraluarpaa. Jesusilli nalunngilluinnarpaa tamakku iluanaarnarpasikkaluartut akisoorujussuarmik akilerlugit aatsaat pineqarsinnaasut — Guutip iluarinninneranik annaasaqarnermik — akiliutigerusunngisaminik. Ataataminut pitsaasumik attaveqarnini tamanit pingaarnerpaatikkamiuk Satanip neqeroorutaa nangaanngivilluni paatsuugassaanngitsumik itigartippaa. — Matîuse 4:1-10.

Kristusip ajoqersugaasut soorunami kissaatigaarput Ajoqersuisutsitut Mesteritsitullu nalilinnut isiginnittaaseqarnissarput. Pissutsit aaqqissuussaaneranni maanna atuuttumi, Satan Diaavulumit naalagaaffigineqartumi, iluanaarnartutut isikkulippassuaqarpoq iluamilli oqaatigalugu Guutimut attaveqarnitsinnut aseruutaasinnaasunik. Assersuutigalugu, inuiaqatigiinni nuimanerujartuinnarusussuseq, immaqa atorfik aqqutigalugu, uppinngitsumik peeraqarneq, imaluunniit peqqusersuippallaanngitsumik niueqatigiinnermut peqataaneq — tamakkulu tamarmik uppissuseerunnermik naggataatigullu Jehovamit iluarisaajunnaarnermik kinguneqarsinnaapput. Taamaattumik tamakkuninnga ussernartorsiortinneqaleraangatta pilliutigisariaqagassat naatsorsoqqissaartariaqarpavut.

Ilisimassuseq piviusoq sernissortiuvoq

Ukiualuit matuma siorna kristumiu angut inuusuttoq Kangiani illoqarfissuit ilaanni najugalik nunami allami ilinniagaqaqqinnisaminut periarfissarsivoq. Naak silamiutut atorfigissaareeraluarluni akissarsiagissaaraluaqalunilu misigivoq suli tamakkua naammanngitsut; inuunermini atukkani suli pitsaanerulersikkusuppai. Kristumioqataasa Biibilimi najoqqutassiat eqqartoriikkavut tunngavigalugit oqaloqatigeqqissaaraluarpaat, malartitassaanngilarli pilersaarutinilu aallartillugu. Naak aallaqqaataani uppernini aalajangiusimaniarsariagaluarlugu sallusuissummik Biibilimiittumik pingaartitsinini katakkiartuaarpaa qulalerlunilu. Ukiup ataasiinnaap sinnerluguluunniit ingerlanerani uppissuseerulluinnarpoq agnosterikeriuneralerlunilu (aalajangersimasumik upperisaqarani tamanik qulartoq). Immaqami qaffasinnerusumik atorfittaani nalerisimaassutigigaluarpaa, naassaasumilli ataqqisaalerniaannarluni akiliutip ila angissusia — uppissuseerunneq inuunermillu naassaanngitsumik angusinngitsoornissamik navianartorsiorneq! — 1 Timûtiuse 1:19.

Akerlianilli Jehova Guutimut attaveqarnerminnik navianartorsiortitsiumanngitsut taassuma assaanit pilluaqqussutissarpassuarnik tuniorarneqartarput.

Angutip inuusuttup illulianik iluarsaaqqittarfiutillip illoqarfimmi aamma tassani najugallip tamanna misigisimavaa. Jehovap nalunaajaasuinik Biibilimik atuaqqissaaqateqartalernerminit qaammatialuit qaangiutiinnartut ussernartorsiornartumik neqeroorfigineqarpoq: Iluarsaaqqinnissamik suliassaq 200.000 koruunit missaannik akissarsiassartalik. Taamaaliussagunili sanaartornermut ileqqoreqqusat sanioqquttariaqassavai unioqqutitsisumillu allanngortitsinerinermigut malittarisassanik unioqqutitsissalluni. Nalunngilaa kristumiut inatsisinik eqqortitsisussaasut suliarlu tamanna suliarilissagaluaruniuk Guutimit iluarisaanini annaasinnaallugu. (Rûmamiut 13:1, 2) Eqqarsarluaqqaareerluni itigartitsivoq. Qanoq kingunilimmik? Aalajangernera tamanna, upperneranit aallaaveqartoq, anersaakkut ineriartorneranut iluaqutaasorujussuuvoq. Ukiup ataatsip ingerlani tunniulluinnarlunilu kuisippoq. Suliffiutini tunivaa suliffittaarlunilu anersaamut tunngasunik sammisaqarnerunissaminut piffissaqalerluni. Maanna nuannaarluni kajumillunilu Jehova kiffartuuppaa.

Angutit inuusuttut taakkua marluk tamarmik pilliutissat naatsorsorsimavaat. Assigiinngitsunilli aalajangernerannut suna pissutaava? Ilisimassuseq Guutimeersoq. Tamanna qanoq paasisariaqarpa? Ilisimassuseq tassaavoq ilisimasamik, ajunngitsorsiassanik ataavartumik kinguneqartussatut naatsorsuutigalugu, atuineq; Guutimeersumik ilisimassuseqartoq tassaavoq ilisimasaminik Guutip siunertaanut naapertuuttumik atuisoq. Angutit inuusuttut taakku tamarmik Biibilimut tunngasunik ilisimasaqarput, assigiinngitsunilli kingunilimmik atorpaat. Ussatit 2:10-12-imi ima allassimavoq: „Tassa ilisimassut uummatinni pigilissagakku ilisimasaqarnerullu nuannaalersissammatit. Isumatusaarnerup paarissavaatit, siuneqarnerullu sernigissavaatit. Annaatissavaatsit aqqummit ajortumit.“

Guutip oqaasia, Biibili, ilisimassutip piviusup aallaavigaa. Pingaarutilimmik aalajangiissagaanni tamatigut ikiortigineqarsinnaavoq. Nammineq ilisimatuuniarnissamut taarsiullugu Jehovap oqaassutaa maleruartariaqarpoq: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatiguartaruk sumiikkaluaraangavilluunniit, taava ingerlavissatit nalimmatsissavai.“ (Ussatit 3:5, 6) Maniguullutalu ilinniartikkuminartuusariaqarpugut ullumikkullu silarsuarmi namminissarsiussuseq siulersorneqarumanngissuserlu nalinginnaaqisut malinnaveersaartariaqarlugit.

Nammineq siaruartikkavut katersunngitsoorsinnaangilavut, aalajangiisarnittalu kingunerisaasa nammineq nammannissaat pissusissamisoorpoq. (Galâsiamiut 6:7, 8) Taamaattumik aalajangiinnginnitsinni tamatigut pilliutigiumaakkavut naatsorsoqqaartariaqarpavut. Iluanaarnarsorisarput sunaluunniit anersaamut tunngasunik pingaartitsinitsinnut Guutimulluunniit attaveqarnitsinnut annaassutaatinnaveertigu. Eqqortumik aalajangiisinnaaqqulluta ilisimassutsimik immikkoortitsisinnaassutsimillu qinusariaqarpugut, aalajangiinivummi inuunermik toqumilluunniit kinguneqarsinnaapput — naassaanngitsumik! — Naleqqiuguk 5 Moses 30:19, 20. (wD 15/8 92)

[Qupp. 24-mi assiliartaq]

Inuunermini suut sallerpaatippai — anersaakkut iliuutsit silamiorpaluttumilluunniit qaffakkiartorneq?