Eliasitut uppissuseqarpit?

UPPERNEQ ukiuni atugartuuffiusuni makkunani nungukkaluattuinnarpoq. Ilinniarluarsimasut Guuteqarnera mitallerpalullutik assortortarpaat. Upperisarsiortut ilumoortuusaarniartut Guuti quiassuaatissanngortittarpaat. Silarsuarmiullu iliuutsiminni Guuti apeqqutaatikkunnaariartuinnarpaat. Oqaatsit tamakku qanorluunniit annilaajummernarlutillu nikalluallannarlutillu nukillaajummernartigigaluarpata taamaattoq inernera ataasiuvoq: Upperneq milliartuinnarpoq. Tupinnarpallaanngilaq apustili Paulusip uppernermik amigaateqarneq taasimammagu ’ajorti uatsinnik ninniorteqqajaaginnartoq’! — Eprîarit 12:1.

Tamannalu pissutigigunarlugu angutit arnallu nukittuumik uppissuseqartut uagutsinnut immikkut innersuussutigisimavai. (Eprîarit, kapitali 11) Taakkua uppissusiat kaammattuutigisinnaavarput uppernitsigullu nakussatsissutigisinnaallugu. Atagu pruffiiti Elias sammeriartigu, pruffiititut sulisimanerata sivisuup affaannaa siulleq pingaarnerutillugu. Taanna kunngip Akabip nuliatalu dronning Jesabelip naalakkersuinerata nalaani inuusimavoq. Taamanikkut ullumikkutut Guutimut ilumoortumut upperneq annertugisassaanngilaq.

Naggueqatigiit qulit naalagaaffiat ajortunngorsimasoq

Aappariit suunuku! Akab naggueqatigiit qulit naalagaaffianni, Israelimi, kunngit arfineq-marlussaraat. Kunngit siulii arfinillit tamarmik ajorsimaqaat, Akabili suli ajorneruvoq. Naalagaaffimmini nersussuarmik pallorfiginninneq siuarsarsimavaa, aammali prinsesse allamioq Jesabel katissimallugu, taamaalillunilu guutipilussiorneq nunami tamarmi siornatigut ilisimaneqartumit ajorneroqisoq, tassa guutipilummik Ba’alimik pallorfiginninneq, eqqussimallugu. — 1 Kunngit 16:30-33.

Jesabel Ba’alisiortut akornanni alliartorsimavoq. Ataataa Etba’al, Asjoretimut (Ba’alip nulianut) palasiusoq toqoraaneq aqqutigalugu imminut Zidonip issiavissaarsuanut, kunngeqarfimmut Israelip avannannguaniittumut, ivertissimavoq. Jesabelip uini ileqqussatigut sanngiitsuusoq Israelimi Ba’alisiortoqalernissaanut sunnerpaa. Erniinnaq Israelimi guutipilummut taassumunnga pruffiitit 450-inngorsimapput saniatigullu guutipilummut arnamut pruffiitit 400-nngorsimallutik, tamarmillu kunngikkunnut nereqataasarsimapput. Pallorfiginneriaasiat Guutip ilumoortup Jehovap isaani maajunnarsimassaqaaq! Fallosimut ilisarnaatit, naggorissuseq pillugu ileqqulersuutit, naalaffimmi atortittartuuneq (angutit arnallu), aap allaat meeqqanik pilliisarneq upperisarsiornermut maajunnartumut tamatumunnga, Akabimit akuersaarneqarnermigut naalagaaffimmi tamarmi siaruartumut, ilaapput.

Israelikkut amerlaqisut Jehova, nunamik ermillu kaaviiaarnerannik pinngortitsisoq, puiorpaat. Isumaqalerput ukiup sialoqanngiffiata naalernerani siallersitsisartoq tassaasoq Ba’al. Ukiut tamaasa ’nuissat qaavanni qimussersoq’, naggorissutsimut sialummullu guutiutitaq, isumalluarfigisarpaat panernersuup perloqqussutaanik peersitsinissaanik. Ukiut tamarluinnaasa siallerfeqartarpoq, ukiullu tamarluinnaasa ataqqinaat Ba’alimut pigititaasarpoq.

Panernersuaqarnissaa Eliasip siulittuutigaa

Qularnanngitsumik aasap takisuup sialoqanngitsup qaangiutilernerani — inuit Ba’alip inuunartumik siallersitsinissaanik neriuleruttortut — Elias saqqummersimavoq.a Oqaluttuami Biibilimiittumi Elias allaaqqilluinnartumi kallileriataartutut tassanngaannartigisumik eqqartorneqaleriataarpoq. Tunuliaqutaa eqqartorneqarpallaanngilaq, allaallu siuaasai eqqartorneqanngilluinnarlutik. Kallilernissaanilli siallilernissaanilluunniit Elias siulittuuteqanngilaq. Akabili ima oqaluussiffigaa: „Ilumut uumammat [Jehova] Israelikkut Guutiat kiffartorfigisara, ukiuni tulliusuni isugutaqassanngilaq sialoqassananiluunniit uanga peqquseqqaartinnanga.“ — 1 Kunngit 17:1.

Takorlooriaruk Elias uumasup meqquinit atisaliamik nikanarpasissumik atorluni qeqartoq. Qularnanngitsumik Gileadip qattornginit inngigissunik ujaralimmeersuuvoq savanillu paarsisut nuimanngitsut akornanni alliartorsimalluni. Maanna kunngip pissaanilissuup Akabip saavani qeqarpoq, immaqa illussaarsuata kusassagaaqisup, allamiorpalaartumik ilusilersugaasup guutipilunnullu eqqaassutissartallip qeqqinnaani. Taavani, illoqarfimmi pallittaalisalimmi Samariami, Jehovamik pallorfiginninnerup puiorneqarluinnarfigisaani, Elias qeqarpoq Akabilu oqaluttuullugu guutia Ba’al pissaaneqanngitsuusoq piunngilluinnarlunilu. Aamma nalunaarfigaa ukiumi tamatumani ukiunilu aggersuni sialummik isugutammilluunniit nakkartoqarnavianngitsoq!

Qanoq ililluni Elias taama nukittutigisumik uppissuseqarsinnaasimava? Kunngip pingaakujuttup tunussisimasullu saavani qeqarnissani qunuginngilluinnarsimagamiuk? Immaqa. Ukiut tuusintinit amerlanerusut tamatuma kingorna Jesusip affarmik qatanngutaata, Jakobip, uppernarsaaffigaatigut ’Elias inuusimasoq uatsitut misigisaqartartoq’, tassa uatsitulli sanngiittartoq. (Jâko 5:17) Eliasilli oqaasii Ny Verden-nutsikkami malugikkit: „Ilumut uumammat Jehova Israelikkut Guutiat, kiinaata saavani qeqartunga.“ Eliasip eqqaamajuaannarsimavaa Jehovap kiffai Akabip issiavissaarsuanit annerungaartup saavaniimmata — qilammi nunamilu kisimi Naalagaasup issiavissaarsuata saavani! Issiavissaarsuarmit tamatumannga aallartitaavoq. Tamanna eqqarsaatigissagaanni Akabimut, kunngimut inuinnakulunnguamut Jehovap pilluaqqusineranik annaasaqarsimasumut, Elias ersissutissaqassanerpa?

Eliasip Jehovamik piviulluinnartutut isiginninnera nalaatsornerinnaanngilaq. Qularnanngitsumik qanoq Guutip innuttaminik iliorfiginnittarsimanerinik oqaluttuat atuarsimavai. Jehovap juutit mianersoqqoreersimavai guutipilunnik pallorfiginnileraluarpata panernersuarmik kaannersuarmillu pillarumaarlugit. (5 Moses 11:16, 17) Jehovap oqaatsiminik eqquutitsiuaannarnera tatigalugu ’Elias qinnummik qinuvoq sialleqqunagu’. — Jâko 5:17.

Guutip unnersuussutaanik maleruaanissamut upperneq

Sivisungaatsiartumik Elias tusarliussinermi kingunerisaanik navianartorsiortinneqarpoq. Taamaammallu uppernerata ilaa alla saqqummertariaqalerpoq. Inuuinnarumalluni Jehovap unnersuussutai aalajaalluni maleruaqqissaartariaqarpai: „Maannga aallarit, kangimullu ingerlagit kuunnguullu Kritip Jordanip kangianiittup killingani isertorlutit. Kuunnguamit imertassaatit, tulukkallu peqquakka tassaniinninni nerisassannik isumageqqullutit.“ — 1 Kunngit 17:3, 4.

Peqqussut ingerlaannaq Eliasip naalappaa. Panernersuaq kaannersuarlu nunamik eqquisussaq anigorumaguniuk Jehovap imminik isumaginninnissaa tatigisariaqarpaa. Tamanna oqitsuinnaanngilaq. Tassami toqqortariaqarpoq qaammaterpasssuarnilu avinngarusimalluinnarluni inuusariaqarluni. Taamaaliussagunilu neqit iffiallu tulukkat — timmissat silunik nerisaqartartut Mosesip inatsisai naapertorlugit minguttuujusut — aggiuttagaat inuussutigisariaqarpai, tatigalugulu Jehovap isumagissagaa neqit tamakku siluneersuunnginnissaat Mosesillu inatsisaani peqqussutigineqartutut aaversimanissaat. Tupinnartuliap tamatuma ilumoornera Biibilimik nassuiaasartut ilaasa ilimaginngingaaramikku isumaqarput allassimasussaagaluartoq „araberit“ imaanngitsoq „tulukkat“. Guutilli tulukkanik atuisimanera pisariunnginnerusimassaaq. Kialuunniit pasitsaannavianngilaa timmissat minguttuut nikagisaasullu tamakku nerisassanik inoqajuitsumukaassisartut Elias, Akabimit Jesabelimillu nunami tamarmi ujarneqartoq, pajullugu! — 1 Kunngit 18:3, 4, 10.

Panernersuaq ingerlajuarsinnarmat immaqa Eliasip Kritip qooruini kuunni imermik pilersornini ernumassutigiartuinnarsimassavaa. Israelimi qooqqut kuullit amerlanersaat panernersuaqarnerani paqqertarput, kuullu Eliasip imermik pilersorfigisaa ’ullut qassiit qaangiummata’ aamma paqqerpoq. Takorloorsinnaaviuk Elias qanoq misigisimassasoq ullut tamaasa kuup kuunnera sakkukilliartuinnarluni paqqeriartuinnarmat? Qularnanngitsumik eqqarsaatigisimassavaa kuuk paqqerpat qanoq pisoqassasoq. Taamaakkaluartorli Elias aalajaalluni naammagittartuarpoq. Aatsaallu kuuk paqqermat Jehovap nutaamik unnersuuppaa. Prufiiti nalunaarfigineqarpoq Zareptamukassasoq, taavani uillarnermit isumassorneqassammat. — 1 Kunngit 17:7-9.

Illoqarfik Zarepta illoqarfiup Zidonip, Jesabelip aggerfigisaata ataataalu kunngiuffigisimasaata, ilaaniippoq. Immaqa Elias imminut aperisimassaaq taavaniinnissaq aarlerinannginnersoq. Taamaakkaluartorli ’Zareptamukarpoq’. — 1 Kunngit 17:10.

Jehova nerisassaqartitsisuullunilu inuussutaavoq

Eliasip naalannera erniinnaq pilluaqqusaavoq. Uillarneq ornippaa, paasillugulu nunaqqatimisut innani nukittuumik uppissuseqartoq. Uillarneq piitsoq taanna taamaallaat qajuusaateqarlunilu uuliaateqarpoq imminut ernerminullu ataasiaannarlutik nerinissaminnut naammattunik. Naalli piitsuugaluaqaluni Eliasip iffialiuteqqaarnissaanut piumassuseqarpoq taassuma neriorsuutaa tatigalugu, tassa qajuusaataasa qummuattaataanilu uuliaataata panernersuaqarunnaarnissaata tungaanut nungunnginnissaat Jehovap isumagiumaaraa. Paasinarluarpoq Jesus Kristusip nalimini israelikkut uppissuseqanngitsut appisaluukkamigit uillarnerup aalajaalluni maligassiaa erseqqissarmagu! — 1 Kunngit 17:13-16; Lúkarse 4:25, 26.

Tupinnartulialli tamatuma kingorna uillarnerup Eliasillu uppernerat sakkortuumik misilinneqarpoq. Uillarnerup ernera tassanngaannartumik toquvoq. Uillarneq aliasuttorujussuulluni allatut isumaqanngilaq taamaallaat ernermi toqunera Eliasimut, ’Guutip ilumoortup kiffaanut’, attuumassuteqartoq. Immaqa isumaqarpoq qangali ajortuliarisimasaminut pillarneqarluni. Ernerali toqungasoq anaanaata kissumiaa Eliasip tiguaa qalianukaallugulu. Taassuma nalunngilaa Jehova timikkuinnaanngitsoq isumassuisinnaasoq. Jehovami tassarpiaavoq inuunerup pilerfia! Taamaattumik Elias ilungersorluni qinusaqattaarpoq meeraq uummarteqqullugu.

Elias toqusunit makissinnaanermut upperinnittut siullersarinngilaat, Biibilimili oqaluttuami toqusunit makititsisut siullersaraat. Nukappiaraq ’uummarpoq’! Eliasip ima oqaatigaluni: „Takuuk, ernerit uumavoq,“ ernini tunniummagu uillarnerup nuannaangaarnera takullugu nalissaqarsimanavianngilaq. Qularnanngitsumik qulliliitigaluni uillarneq oqarpoq: „Maanna nalujunnaarpara Guutip kiffarigaatit [Jehovallu] illit aqqutigalutit oqaasii upperisassaasut.“ — 1 Kunngit 17:17-24.

„Guutiga tassa Jehova“

Kakkaak Eliasip aqqata isumaa, „Guutiga tassa Jehova“, naleqqummat! Panernersuup kaannersuullu nalaanni nerisassaanik imissaanillu Jehovap isumagaa; ileqqussatigut ajortunngorsimanerup qeqqani Jehovap peqqinnartumik unnersuuttarpaa; toqusoqarnerani uummartitseqqinnissamut Jehovap atorpaa. Tamakkunanilu tamani Elias Guutimut uppernerminik ersersitsisariaqartarsimavoq — imminik isumassuinissaanik tatigineratigut, unnersuussutaasa maleruarnerisigut, Aterminik illernarsisitsinissaanik tatigineratigut — akissarsiatullu Jehovamik tatiginninnissamut suli amerlanerusunik pissutissarsivoq. Suliassanillu ajornakusoornerusunik allaallu annilaarnartunik Guutiminit, Jehovamit, suliassinneqarami tatiginninnera sanngiillinngilaq. Aap, suli tupinnarnerusunik tupinnartuliortassaaq. — Naleqqiuguk Kunnginik allakkat siulliit, kapitali 18.

Jehovap ullumikkut kiffai Eliasitulli inissisimapput. Immaqa tupinnartuliornikkut isumassorneqanngikkaluarpugut, makititsinermullu atorneqartanngikkaluarpugut. Ullumikkummi tupinnartuliat tamakku pineq ajorput. Eliasilli nalaaniilli Jehova allanngorsimanngilaq. — 1 Korintumiut 13:8; Jâko 1:17.

Uaguttaaq annilaammernartunik suliassinneqarsinnaavugut, soorlu tusagassamik Guutimeersumik sumiiffinni mersernartuni oqaluussinissamik. Immaqa malersorneqalersinnaavugut, immaqaluunniit allaat nerisassaaleqinermik naalliuuteqalersinnaalluta. Jehovalli takuteqattaartuarsimavaa aalajaatsut peqatigiissortanilu ataatsimut siulersorlugillu sernissortarini. Suliassiissutiminik sumilluunniit kiffani naammassinninnissaannut nukissaannik suli tunisarpai. Silarsuarmilu eqqissiviilliorfiusumi maani misilinneqarnerminnik naammagittarlutik atuinissaannik suli ikiortarpai. — Tussiaat 55:23. (wD 1/4 92)

[Quppernerup ataani ilanngussaq]

[Qupp. 30-mi assiliartaq]

Eliasitut upperaajuk Jehovap kiffami pisariaqartitaannik isumassuinissaa?