Oqaluussinermit nutaarsiassat
Avinngarusimasuni Paraguayimiittuni oqaluussineq inerititaqarpoq
Jehovap Nalunaajaasuisa Paraguayimi immikkoortortaqarfianni ilisimaneqarluarpoq nunami tassani sumi tamaani Naalagaaffik pillugu tusagassamik nuannersumik oqaluussissutiginninnissaq pisariaqartinneqartoq. (apustilit suliait 1:8) Piffissanngorsimavoq kikkut tamarmik Naalagaaffik pillugu ilinniarnissaannut Jehovamullu kiffartulernissaannut, „annikilliornartumi angisuumi“ takkulluinnalersumi aaqqissuussaanermik ajortumik matuminnga Jehovap aseruinissaa pitinnagu. (Matîuse 24:21, 22, NV) Maanna oqaluttuarineqassaaq inuit avinngarusimasuni ilageeqarfeqanngitsuniittut ikiorniarlugit qanoq iliuuseqartoqartarsimasoq. Immikkoortortaqarfimmit ima oqaluttuartoqarpoq:
Specialpionerit utaqqiisaannaasumik maaniittut avinngarusimasuni tamani oqaluussisarnissaat aaqqissuussimavarput. Ukiumi oqaluussiffiusumi 1990-imi novemberimiit januari ilanngullugu qatanngutit angutit arnallu 39-t illoqarfinni nunaqarfinnilu katillugit hundredeni, suli Naalagaaffimmik oqaluusissutiginnittartoqanngitsuni, oqaluussisimapput. Atuakkat 6119-it, brochurit 4262-it atuagassiallu 5144-t siaruartersimavaat. Sulinerup tamatuma kingunerisaanik oqaluussisartoqatigiikkuutaat nutaat pilersiortorneqarput.
□ Pioneri arnaq avinngarusimasut ilaanni oqaluussimmat arnap atuagaq ’Paratiisimi nunami naassaanngitsumik inuusinnaavutit’ pisimavaa. Pionerip Biibilimik atuaqqissaaqatiseraa, taannalu arnaq nuannaarluni akuersivoq. Tulliani pioneri takkummat arnaq kisimiunngitsoq, aammali uia meeraallu qulit utaqqipput. Aammalu tulliani qanigisaat, ikinngutaat saniliilu Biibilimik atuaqqissaaqatigiinnermut najuupput. Arnammi oqaluttuussimavai nuannerluinnartunik ilikkagaqarsimalluni Jehovap neriuutissarititaa pilluaqqussutissaalu asseqanngilluinnartut pillugit. Siornatigut taamaattunik tusagaqarsimannginnami misigisimavoq sanilini ikinngutinilu atuaqqissaaqatigiinnermut najuunnissaannik qaaqqusariaqarlugit, tusagassaq nuannersoq aamma taakku tusarniassammassuk.
Atuaqqissaaqatigiinnerit tamaasa najuuttut amerlasangaarmata allaaneq ajorpoq ilagiit ataatsimiittut. Soqutiginnittorpassuit taakku apersortaqaat atuaqqissaaqatigiinnermilu oqalliseqataasarlutik. Pioneri oqaluttuarmat najugaat tamanna tamaat oqaluussisartoqatinilu oqaluussiffigereerunikku oqaluussiffissamut allamut oqaluussiartussallutik, arnaq assut isumatsappoq aperalunilu aallarpata soqutiginnittorpassuit qanoq iliussanersut. Oqaluussisartut ilagiinni najukkamut maanga qaninnerpaamiittut atuaqqissaaqateqarnermik tamatuminnga nangitsinissaat isumagineqarpoq. Maannalu specialpionerinik taavunnartitsisoqarsimavoq inuit eqqortuliorusuttut taakku ikiorniarlugit.
□ Avinngarusimasumi allami pionerip arnap illumiit illumut angalaartilluni angut ukiut qulit tamatuma siorna atuakkamik sagdlusuíssut inûnigssamut nâgssáungitsumut sangmissoĸ-mik pissarsisimasoq naapissimavaa. Angutip taassuma Jehovap Nalunaajaasuinik attaveqarnera unissimavoq. Nalunngilaali Jehova, katersaarsuit Jehovaannik taagukkani, tassaasoq Guuti ilumoortutuaq kisimilu pallorfigisassaasoq. Jehova pillugu ilisimasani tamaasa nammineerluni allanut oqaluttuarisarsimavai. Sapaatit-akunneri tamaasa kilometerit pingasut pisuttarsimavai soqutiginnittut aappariit Guuti pillugu oqaluttuukkiartorlugit, tassami soorlu oqartoq: ’Pulaartarunnaaraluarukkit Jehova puioqinavaat.’ Aappariit taakku saniatigut qulit Biibilimik atuaqqissaaqatigineqarusupput — tamarmik angummit soqutiginnittumit taassumannga oqaluussiffigineqarsimanerat pissutaalluni.
Malugissallugu soqutiginarpoq angutip taassuma, pionerimit pulaarneqarnini ullualunnik sioqqullugu, najukkaminni palasi malittaalu niviarsiap Mariap assinganik nassarlutik iserniaraluartut itigartissimammagit, oqarsimalluni nammineq assilissanik pallorfiginnittuunani. Palasi kamattorujussuusimavoq. Unnummat angut Jehovamut ikioqqulluni qinusimavoq. Takorluussallugu ajornakusuunngilaq pionerimit pulaarneqarami qanoq nuannaartigisimassasoq. Erniinnaq aalajangersimasumik Biibilimik atuaqqissaaqatigineqartalerpoq, Guutillu peqatigiissortai teokratiimik aqunneqartut peqatigalugit siumukartuarpoq.
Paraguayimi katersuineq ilumut Jehovamit pilluaqqusaavoq, qatanngutivullu nunap avinngarusimasortaani peqqissaartumik nalunaajaaniarlutik suliniartuarput. — Matîuse 24:14. (wD 1/4 92)