Johannesip iivangkiiliua sunik ilinniarfigisinnaagipput
JEHOVAP anersaavata apustili utoqqarsuanngorsimasoq Johannes isumassarsisippaa Jesus Kristusip inuunera ajoqersuineralu pillugit oqaluttuaq killinnartoq allaatigeqqullugu. Iivangkiiliu tamanna ukiup 98-ip missaani Efesusimiunngikkuni Efesusip eqqaani allanneqarsimavoq. Oqaluttuaq qanoq oqaatigineqarsinnaava sunillu ilinniarfigineqarsinnaalluni?
Ilassutaaneruvoq
Johannesip aalajangersimasuinnaat oqaluttuarai, Mattæusip, Markusip Lukasillu allaatigereersimasaasa ilaannamininngui uteramigit. Takunnittutut oqaluttuarisai ilassutaannaanerupput, 90 procentiimi iivangkiiliuni allani oqaluttuarineqarsimanngillat. Jesusip nunami inunngunngikkallarami piunera ’Oqaaserlu uininngornera’ taassuma kisimi oqaluttuarai. (1:1-14) Iivangkiiliumik allattut allat oqarput Jesusip nunami kiffartornermi naalernerani naalaffik minguiaraa, Johannes allappoq aallartilerneranissaaq taamaaliorsimasoq. (2:13-17) Apustilip utoqqarsuanngortup kisimi Jesusip tupinnartuliaasa ilaat aalajangersimasut oqaluttuarai, soorlu imermik viinninngortitsinera, Lazarusimik toqusunit makititsinera kiisalu nammineq makinnerata kingornagut tupinnartuliornikkut aalisakkanik pisaqarneq. — 2:1-11; 11:38-44; 21:4-14.
Jesusip toqunissaminik eqqaaniaanermik pilersitsisimanera iivangkiiliumik allattut tamarmik oqaluttuaraat, Johannesilli kisimi oqaluttuaraa unnummi tassani Jesusip apustilimi isigaannik uffaanermigut maniguunnermik ilinniartissimagai. Aammalu Jesusip apustilini uummataasigut killinniarlugit taakkuninnga oqaluussineri taakkuninngalu qinnussinera Johannesip kisimi allaatigai. — 13:1–17:26.
Iivangkiiliumi tassani „Johannes“ atermigut eqqartorneqaraangami pineqartoq tassaasarpoq Johannes Kuisisoq, allattorli imminut taasarpoq ’ajoqersugaq Jesusip asasaa’. (13:23) Apustilip taassuma Jesus asangaarpaa, uagullu Kristusimik asanninnitta Johannesip taassuminnga eqqartuinera manna allissutigaa: Oqaaseq, neqissaq inuussutaasoq, silamiunut qaammaqqut, Paarsisoq Ajunngitsoq, aqqut, sallusuissut inuussullu. (1:1-3, 14; 6:35; 8:12; 10:11; 14:6) Tamanna Johannesip siunertarisaanut naapertuuppoq, allakkami: ’Tamakku allassimapput uppeqqullusi Jesus taannaasoq Kristus Guutip ernera, aqqagullu inuussuteqaqqullusi ilissi uppertusi.’ — 20:31.
Maniguunneq nuannaarnerlu
Johannesip iivangkiiliuani Jesus ilisaritinneqarpoq Oqaaseq-tut aamma Savaaraq ajortaajaasoq-tut, tupinnartuliallu taassuma ’Guutip illernartua’-aneranut uppernarsaataasut oqaluttuarineqarput. (1:1–9:41) Aammattaaq Johannes Kuisisup maniguuttuunera nuannaartuuneralu erseqqissarneqarput. Taanna Kristusip siuleraa, imali oqarpoq: ’Taassuma singii qilerussaassallugit qinngaqquteqaanga.’ (1:27) Aloqutit singeqartarput. Inuup allap aloqutaasa singiinik inussiap qilerussaarinera aloqutaanillu tigumiarnera suliaavoq nikanaataasoq. Taama oqarnermigut Johannes Kuisisup maniguunnini Naalakkaminullu naleqqiulluni pingaannginnerunerminik akuersinini ersersippai. Tamanna ilinniagassaalluarpoq, tassami maniguuttut kisimik Jehovamut kunngiutitaanullu Messiasiusumut kiffartortussaapput! — Tussiaat 138:6; ússatit 21:4.
Johannes Kuisisoq pingaarniarluni Jesusimik assortuinngilaq, imali oqarluni: ’Nuliassamik piginnittoq uissaavoq, uissalli ikinngutaata taassuminnga tusarnaartup uissap nipaa tipaatsuutigillaaraa. Tipaatsuutiga tamanna maanna naammassisimavoq.’ (3:29) Uissap ikinngutaa uissamut sinniisuulluni aappassiariissitsisarpoq, ilaatigut katinnissamik aaqqissuilluni aammalu nuliassamut tunissutinik nuliassallu akianik taassuma ataataanut aatsisarluni. Pisussaassutsi tamanna naammassereeruniuk sinniisoq taanna nuannaarnissaminut pissutissaqarluarpoq. Taamatut Johannes nuannaarpoq nuliassaanut ilaasortat siulliit Jesusimut aggiussinnaagamigit. (sarĸúmersitat 21:2, 9) Soorlu uissap ikinngutaata kiffartornera sivikitsuinnaasartoq, taamatut Johannesip suliassai naammassinasuarput. Taanna milliartorpoq, Jesusili alliartorpoq. — 3:30.
Jesusip inunnik soqutiginninnera
Illoqarfiup Sykarip ungasinngitsuani puilasuliap eqqaani Jesusip imermik assersuutaasumik naassaanngitsumik inuunartuusumik arnaq Samariamiu oqaluttuuppaa. Ajoqersugaasa tikiukkamik ’tupigusuutigaat arnaq oqaloqatigimmagu’. (4:27) Sooq taama qisuarpat? Juutit Samariamiunik asissuisuupput taakkuninngalu susassarinninngitsutut isiginnillutik. (4:9; 8:48) Aammattaaq ajoqersuisup juutiusup inunnut isertuarani arnamik oqaloqateqarnera nalinginnaasuunngilaq. Inunnilli misiginneqataasumik soqutiginninnini killinneqaatigalugu Jesus taamani nalunaajaajumallerpoq, tamatumalu kingunerisaanik illoqarfimmi tassani najugaqartut ’ornippaat’. — 4:28-30.
Inunnik soqutiginninnini killinneqaatigalugu Jesus ima oqarpoq: ’Imerusuttoq uannut pili imerlunilu.’ (7:37) Taama oqarnermigut ileqqoq nalliussivimmut tupiusaliorfimmut ullunik arfineq-pingasunik sivisussusiliusumut ilanngussaasoq pinnguatsiarpaa. Ulluni arfineq-marlunni ullaat tamaasa Siloamimi tasiliaq palasip imertarfigisarpaa imerlu naalaffiup tunisivittaanut kuisarlugu. Taamaaliornera ilaatigut anersaap kuineqarneranut assersuutaatinneqarpoq. Ukiumi 33-mi piinsi aallarnerfigalugu Guutip anersaavata Jesusip ajoqersugai killittalerpai imermik inuussutaasumik inunnut nunarsuarmi sumi tamaani najugaqartunut aatseqqullugit. Jehova, ’imermik uumasumik puilasoq’, taamaallaat Kristus aqqutigalugu inuunermik naassaanngitsumik piffigineqarsinnaavoq. — Jerimia 2:13, NV; Isaia 12:3; Juánase 17:3.
Paarsisoq Ajunngitsoq isumassuivoq!
Jesusip inunnik soqutiginninnera Paarsisutut Ajunngitsutut malitsigisaminik isumassuineratigut erserpoq. Allaat toqunissaa qanilliartortillugu Jesusip ajoqersukkani asannittumik unnersuuttarpai qinnuttarlugillu. (10:1–17:26) Tillittutut piiaasutulluunniit pinnani taanna matukkut savat inaannut iserpoq. (10:1-5) Savat inaat ungaluugaavoq savat unnuisarfigisaat tillittunit nersutinillu kiisortunit sernissorneqarfigisaat. Qarmai ujaqqanit sanaajusut avalequtinik kapinartulinnik qallerneqartarsimannguatsiarput, isertarfianilu paarsisoqartarpoq.
Paarsisut arlaqartut savaataat savat inaanneeqatigiittarput, savalli namminneq paarsisimik nipaa kisiat qisuariarfigisarpaat. Atuakkiamini Manners and Customs of Bible Lands-imi (Nunani Bibelip allanneqarfiini ileqquusut) Fred H. Wight ima allappoq: „Savarpaat arlaqartut immikkoortiterneqartariaqaleraangata paarsisut tulleriiaarlutik nikuiasarput ataasiakkaarlutillu nilliasarlutik: ’Tahhoo! Tahhoo!’ imaluunniit aggeqqussut alla namminneq aalajangersimasartik suaartaatigisarlugu. Taava savat niaqqutik makitittarpaat ularussillutillu ataatsikkut aniariarlutik tamarmik immikkut paarsisertik malilersarlugu. Tamarmik immikkut paarsisimik nipaata erinaa ilisarisarpaat. Takornartat aggeqqussut taannaasoq atorniartaraluarpaat, savanilli qarmaanerigalui iluatsinngitsoortarput.“ Soqutiginartumik Jesus oqarsimavoq: ’Savaatima nipiga tusararaat, uangalu ilisaraakka, taakkualu malittarpaannga. Inuunermillu naassaanngitsumik tunisaraakka.’ (10:27, 28) ’Savarpannguit’ aammalu ’savat allat’ Jesusip nipaa tusartarpaat, siulersuinera malillugu taassumanngalu qajassuussisumik isumassorneqarlutik. — Lúkarse 12:32; Juánase 10:16.
Guutip ernera aalajaatsoq
Kristus Guutimut aalajaatsuujuarpoq nunamilu inuugallarami paarsisutut asannittutut maligassaalluarluni. Makinnermi kingornagut takutittaraangamissaaq isumassuisuunini ersersittarpaa. Allanik isumassuilluni soqutiginninnini killinneqaatigalugu Jesusip Peter kajumissaarpaa savaataanik nerisitseqqullugu. — 18:1–21:25.
Qisummut kikiattugaanermigut toqu tikillugu aalajaatsuunermik Jesusip pitsaanerpaamik maligassippaatigut. Siulittuutip eqquunneratigut kanngunarsagaavoq sakkutuut ’atisai imminnut agguarmatigik’. (Tussiaat 22:19) Iluatiguua pitsaasoq taanna (grækerisut: khitonʹ), mersugaanani tamarmi ikaartitigaasoq kimit pineqarnissaa aalajangerniarlugu immeraatigaat. (19:23, 24) Iluatigooq savap meqquinik imaluunniit ilupaassiamik tamarmi ikaartitigaasinnaavoq, qaqortumillu imaluunniit arlaqartunik qalipaateqarsinnaalluni. Aaqanngitsuusarpoq, seeqqullu singernerilluunniit tikillugit takissuseqartarluni. Jesus soorunami pigisalerituujunngilaq, pitsaasumilli, iluatiguumik mersugaanngitsumik, atisaqarpoq.
Makinnermi kingornagut ilaanni takutikkami Jesusip ajoqersukkani ilassivai oqarluni: ’Eqqissigitsi.’ (20:19) Juutit akornanni tamanna ilassinnissutaavoq nalinginnaasoq. (Matîuse 10:12, 13) Inuppassuit oqaaseq tamanna itinerusumik isumaqartinnavianngilaat. Jesusilli itinerusumik isumaqartippaa, siusinnerusukkummi ajoqersukkani ima oqarfigisimavai: ’Eqqississummik qimatsivigaassi; eqqississummik uanga pinnik tunivassi.’ (14:27) Eqqississut Jesusip ajoqersukkaminut tunniussaa taakkua Guutip erneratut imminut uppernerannik tunngaveqarpoq uummataannut isumaannullu eqqissisaataalluni.
Uaguttaaq ’eqqissineq Guutip pia’ pisinnaavarput. Ernera asanartoq aqqutigalugu Jehovamut qanimut attaveqarnitta kingunerisaanik eqqissineq asseqanngitsoq tamanna qanortoq erligilarput. — Filípimiut 4:6, 7. (wD 15/3 90)
[Qupp.23-mi suminngaanneernera]
Pictorial Archive (Near Eastern History) Est.