Paratiisi pilerseqqitaq Guutimut naalannaataassaaq
’Alutornarsisikkumaarpara isikkama inaat.’ — Isaia 60:13.
1, 2. (a) Pruffiitini Esajas aqqutigalugu Guuti nuna pillugu qanoq siulittuisimava? (b) Ukiunik tuusintinik siumut qiviaraanni suut takuneqarsinnaappat?
JEHOVAP nuna pinngortissimavaa isikkami ataaniitillugu, assersuutikkut isikkaminut tummarfissanngortillugu. Pruffiitini Esajas aqqutigalugu Guutip siumut oqaatigaa ’isikkami inaat alutornarsisikkumaarlugu’. (Isaia 60:13) Bibeli Guutip sunniineratigut isumassarsiarititaasoq qinngussuartut sakkortoqisutut atorlugu ukiut 1000-it qaangiuppata inuiaat atugassaat qimerloorsinnaavavut. Takusap ila alutornassusia! Qilammi nunamilu tamarsuarmi Naatsiivilerillaqqissup nuna tamarmi alianaalluinnartunngorsarsimavaa. Nunarsuaq tamarmi inuit najugassaattut paratiisinngorteqqinneqarsimavoq!
2 Aap, Guutip inunnik siullernik paratiisimut inissiisimasup inuit pilluarluinnarnissaat kissaatigaa. Pinngortitsisitta ila asannissusia! Ingasaassinerunngilaq taanna pillugu oqassalluni ima: ’Guuti asassutaavoq.’ (1 Juánase 4:8, 16) Angutit arnallu inersimalluartut inuttut naammalluinnartunngorsimasut Paratiisimi pilerseqqinneqartumi qatanngutitut asannittutut inooqatigiipput. (Isaia 9:6) Asanninneq killinneqaatigalugu qilammik nunamillu Pinngortitsisumut, Jehova Guutimut, maleruulluinnalersimapput.
3, 4. (a) Qilak nunalu sutigut imminnut naleqqutissappat? (b) Paratiisi nunami pilerseqqinneqarpat inngilit qanoq qisuariarnissaat ilimagisinnaavarput?
3 Ukiut tuusintillit arlaqartut tamatuma siornagut, anersaami sunniineratigut naalagaaffigisaminik eqqartuinermini, Guutip innuttani qinikkat oqaatsinik tusarnersunik ukuninnga oqaluffigai: ’Qilak issiaffigaara, nunalu isikkama tummarfigaat.’ (Isaia 66:1) ’Isigaasa tummarfiat’, nuna paratiisiusoq, tamanna naalannassutsimigut Guutip issiavissaarsuanut qilammi takussaanngitsumiittumut naleqquttussaavoq.
4 Guutip issiavissaarsuata qilammiittup eqqaani kiffartortut nuna pinngortinneqarmat isiginnaartuusimapput. Alianaassusia isiginnaarlugu killitsissutigisimassaqaat! Tipaatsuummik erinalersornissamut nillernissamullu nunusinnaasimanavianngillat. (Naleqqiutikkit Sivfânia 3:17; Tussiaat 100:2.) Pinngortitsisup pilluartup allatsini nunamiu isumassarsisippaa qilammi pisimasup eqqorluartumik allaatiginissaanik: ’Taamani qaasiutit qiimmattaqatigiimmata, Guutillu erneri tamarmik tipaatsungaarmata.’ (Jûpe 38:7) Guutip ataqqinaatissaanut Paratiisi pilerseqqinneqarpat Guutip erneri anersaajusut suli annerungaartumik tipaatsullutillu nillingaassannginnerpat?
5. Nunarsuaq pillugu Guutip aallaqqaammulli siunertarisaanik naammassinninnissaq qanoq isigisariaqarparput?
5 Allakkani Illernartuni Guutip sunniineratigut allagaasuni nuanneqisumik neriorsoqqissaarneqarpugut, tassa: nunap paratiisinngornissaa aallaqqaataaniilli Guutip siunertarigaa. Guutip nunamik siunertarisaata nuanneqisumik naammassinneqarnissaa taassumunnga unnersiutissaassaaq, Guutillu naalannarsigaluttuinnartup akimorneqarsimanngisaannarlunilu akimorneqarsinnaanngitsup tamatuminnga naammassinnissinnaanissaa tupinnanngilaq. Aap, taassuma tamakkiisumik unnersiutiginissaanut ataqqinissaanullu pissutissaqarluarpoq! — Tussiaat 150:1, 2; Isaia 45:18; sarĸúmersitat 21:3-5.
Makittut Paratiisimik pilersitseqqe- qataassapput
6. Harmagedonip kingorna nunarsuaq qanoq inulersorneqassava?
6 Harmagedonimit aniguisut amerlavallaarnavianngillat, taakkualu meeqqiornissaatiguinnaanngitsoq nuna ulikkaarneqassaaq. Kristusip pilliutaata utertitsissutaasup nalinganik iluaqutiginnissinnaatitaasut iliverni eqqaassutissaasuniittut makitinneratiguttaaq Jehovap ’isikkami inaat alutornarsisissavaa’. Taakkuattaaq nunap alianaaqisumik paratiisinngorsagaanissaanik suliassamut nuannersumut peqataanissartik immikkut pisinnaatitaaffigissavaat. — apustilit suliait 24:15.
7. Jesusip oqaaserisimasai suut Harmagedonimit aniguisut eqqaamassavaat?
7 Harmagedonimit aniguisut Naalakkap Jesus Kristusip oqaasii killinnaqisut uku puiunngisaannassavaat: ’Tamanna tupigusuutigissanngilarsi, ullut nalliukkumaarmata, taava iliverniittut [iliverni eqqaassutissaasuniittut, NV] tamarmik taassuma nipaa tusarumaarpaat, anillutillu makissapput.’ (Juánase 5:28, 29) Ullut pissanganassusissaat toqusut iliverminni eqqaassutissaasuniittut tusalerunikku Guutip ernerata nipaa Lazarusimut toqungasumut Betaniami ilivermiittumut oqaasiinut assingusumik oqartoq: ’Lazarus, aniit!’ — Juánase 11:43.
8, 9. Kikkut siulliullutik nunamut inuunermut makitinneqassagunarpat, soorlu tamanna Harmagedonimit aniguisunut nuannaarutaassava?
8 Jesus Kristusip naalagaaffiani ukiunik tuusintinik sivisussusiliusumi taassuma peqqusineratigut nunami inooqqinnissaminnut siulliullutik makitinneqartussat kikkuussagunarpat? Tassaassagunarput ’savat allat’ ullut kingulliit ingerlaneranni, pissutsit maannakkut atuuttut aaqqissuussaanerata naggatissaata nalliutinngitsiarnerani, toqusimasut. Taakku piaarnerusumik makitinneqassapput. (Juánase 10:16) Taakkua silarsuarmi nutaami inuunermut sungiussiaarnerunissaat ilimanarpoq. — Naleqqiutikkit Matîuse 25:34; Juánase 6:53, 54.
9 Makittut ’savat allat’-nut ilaasut kinguaariit ’annikilliornartoq angisooq’ sioqqullugu inuusut nalaanni toqusimasut takulerunikkik Harmagedonimit aniguisimasut nuannaassaqaat! (Matîuse 24:21) Aniguisimasut taakku makittunik ilisarsissapput, tikilluaqqusissallutik ataasiussuseqarlutillu Guutimik qutsinnerussaartumik kiffartuusseqatiginnittuassallutik.
10. Harmagedonimit aniguissaguit sumik takunneqataasinnaassavit?
10 Illit Harmagedonimit aniguisunut ilaaguit siuaasavit nunamiut makittut siulliit makititaanerannik takunnissinnaassaatit. Qularnanngilaq angajoqqaat panimminnik 12-inik ukiulimmik Naalakkap Jesusip makititsineranik takunnittut qisuariarnerattut qisuariassaatit: „Taakku erniinnaq assut qiimmatsangaarnermit paatsiveerupput.“ (Mákorse 5:42, NV) Aap, toqusut Hadesimit immamillu makitinneqalerpata illit nuannaarnerit oqaluttuarineqarsinnaanavianngilaq. (sarĸúmersitat 20:13) Ila nuanningaassusissaa! Guutillu oqaasiani neriorsuutigineqarpoq ullussaq tamanna ungasikkunnaartoq!
’Nunami tamarmi naalagarsuit’
11, 12. (a) Tussiaat 45:17-imi suna erseqqissaqqinneqarpa? (b) ’Nunami tamarmi naalagarsuassanik’ kikkut akornanni Jesus Kristus toqqaassava?
11 Jesusip inuttut naammalluinnartutut inuunini ajortit matoorneqaatissaattut tunniussimavaa utertinneqarsinnaasut pillugit. Toqusunik taakkuninnga makititsisinnaassutsimi atorneratigut Jesusip oqaatsit Tussiaat 45:17-imiittut eqquutikkumaarpai. Tussiaat tamanna Jesus Kristus, kunngitut ivertitaasutut, pillugu siulittuutaavoq: „Siuaasavit [nunamiut] inigigaluanni ernitit ineqassapput; naalagarsuanngortissavatit nunarsuarmi tamarmi.“ (versi 16, NV) Tussiaammi tassani erseqqissarneqarpoq Jesus Kristus qitornanut maani nunami najugaqartunut ataataalerumaartoq qilammiusoq, aammalu ernermi taakkua ilaat ’naalagarsuanngortissagai nunarsuarmi tamarmi’. ’Davidip erneratut’ arnallu Judakkunnersup angummit attorneqarsimanngitsup Mariap angajulliliaatut, Jesusip siuaasaasa nunamiut kikkuussusii, inuk siulleq Adam tikivillugu, taagorneqarsinnaapput. — Lúkarse 3:23-38.
12 Oqaatsit Tussiaat 45:17-imiittut ima paasisariaqarpat Jesusip uinikkut siuaasarisimasani toqusunit makitinnerisigut ernerilissagai? Aap. Aammattaaq versi tamanna ima paasisariaqarpa Jesusip taakku eqqarlerigamigit kunngitut immikkut ajunngisaarfigissagai taakkulu kisiisa nunami paratiisinngorsimasumi „naalagarsua“nngortissallugit? Naagga. Siulittuut tamanna taama isumaqartillugu eqquutinneqassagaluarpat nunami ’naalagarsuit’ killilimmik amerlassuseqassagaluarput. Aammattaaq Jesus Kristusip siuaasaasa ilaannaat ima pingaaruteqarsimatigaat taassuma naalagaassusiata ukiunik 1000-inik sivisussusillip ataani nunami nuimanerusumik atorfeqartitaasinnaassallutik. Siuaasaasa nunamiut saniatigut allarpassuaqassaaq kunngip Jesus Kristusip „naalagarsuanngortis“sinnaasaanik. Taaneqarsinnaapput Harmagedonimit aniguisut aamma ’savat allat’ makittut, soorlu upperluartut kristumiut nalaata siornatigut inuusimasut, akornanni piukkunnaateqartut. Taakkua tamarmik akornanni naalagarsuartut kiffartornissaminnut piukkunnartut nunami imminut sinniisunngortissinnaassavai.
13, 14. Makittut ilaat kikkut Harmagedonimit aniguisut immikkut pisinnaatitaaffigalugu namminneq isiminnik takusinnaassavaat?
13 Naalagaaffiup Messiasikkoortup ataani toqusunit makitinneqarumaartut kikkuussanersut takorlooriartigik. Ilumoorpa? Takusavut uppernarpat? Aap, ilumut tassaavoq Abel, nunami uppernini pissutigalugu toqutaasoq siulleq; aajunalu Enok, Guutimik ilumoortumik saqeqatiginnittuarsimasoq. Taaka Noa, umiarsualiorsimasoq. Aammattaaq Abraham, Isak Jakobilu, Israelikkut siuaasaat, taakaniipput. Aajunalu Moses (naggueqatigiinnit palasikkunnit Levikkunneersoq), aamma David, Naalagaaffimmik angeruseq naassaanngitsuusoq pillugu angerfigeqatigineqarsimasoq. Takusatsinnut ilaapputtaaq Esajas, Jeremias, Ezekiel, Daniel aammalu pruffiitit Bibelimillu allaqataasut hebræeriusut allat tamarmik, kingullersaat Malakias ilanngullugu. Soorunamilu Johannes Kuisisoq kiisalu Josef, Jesusip ataatassaa.
14 Ilaanni Jesusip juutit oqarfigai takussagaat ’Abraham Isakilu Jakobilu pruffiitillu tamaasa Guutip naalagaaffianiittut namminnerli silataanut ajattugaallutik’. (Lúkarse 13:28) ’Sorsunnermit Guutip ajugaqanngitsup ullorsuani pisumit’ aniguisut nunamiittut ’amerlangaartut’ immikkut pisinnaatitaaffigissavaat ’Abrahamip Isakillu Jakobillu pruffiitillu tamarmik’ namminneq isiminnik takunissaat. Tamanna piumaarpoq taakku nunami paratiisiusumi makitinneqarpata Guutillu naalagaaffiata, Jesus Kristusip „Ataataq Naassaanngitsoq“-mik taaneqartup kunngiuffigisaata, ataani kunngimut kiffartuuteqarpata. — sarĸúmersitat 7:9, 14; 16:14; Isaia 9:6, NV.
15. Harmagedonimit aniguisut sumik angingaartumik immikkut pisinnaatitaaffeqassappat?
15 Pissanganassusissaa illit pissutsit aaqqissuussaanerata maannakkut atuuttup ajortup naggatissaanit aniguisitaassaguit Noalu taassumalu ilai, ’tarnit arfineq-pingasut’, silarsuup siulliup ukiumi 2370-imi u.n.a.s. ulersuakkut naggaserneqarneranit aniguisimasut, misilittagalikkersaaqatigilerukkit! Tamakkununnga assingusunik misigisaqartoqaqqinnavianngilaq taakkunatullu asseqanngilluinnartumik Jehova Guutimut nalunaajaasuusinnaasoqaqqinnaviarani. — 1 Pîtruse 3:20; Mákorse 13:19; 2 Pîtruse 3:5-7.
Pinerluttoq misiginneqataasoq eqqaamaneqartoq
16, 17. (a) Jesusip pinerluttoq misiginneqataasoq eqqaappagu Harmagedonimit aniguisut taamanikkussamullu inuusussat allat suna immikkut pisinnaatitaaffigissavaat? (b) Pinerluttup makititaasup suna neriuutigisinnaassavaa?
16 Qularnanngitsumik tamanna pilerpat nunap Paratiisinngorsarneqarnera aallartilluareersimassaaq. Pinerluttoq Golgatami Jesusip saniani qisummut kikiattugaasoq oqaatsillu allagartami Jesusip niaquata qulaaniittumiittut akueralugit oqartoq: ’Jesus, naalagaallutit tikiukkuit eqqaaginga,’ Paratiisimi nunamiittumi makititaalluni inooqqilersinneqarumaarpoq. (Lúkarse 23:42) Harmagedonimit aniguisimasut taamanikkussarlu inuusut allat taassuma toqusunit tikilluaqqunissaa immikkut pisinnaatitaaffigissavaat. Kunngi naalakkersuisoq, Jesus Kristus, ukiumi 33-mi nisanip ulluisa 14-ianni taassuma misiginneqatigingaarsimasaa, pillugu tamakkiisumik ajoqersussavaat.
17 Naalakkap Jesus Kristusip naalakkersuinermi ukiunik tuusintinik sivisussusillip ingerlanerani taanna eqqaamajumaarpaa. Qularutissaanngitsumik pinerluttuusimasup misiginneqataasup makititaasup kunngimik naalakkersuisuusumik, Jesus Kristusimik, makititsisiminik, pingaartitsinini ersersissavaa qilammi nunamilu kisimi Oqartussaasumut, Jehova Guutimut, ilumoornerminik ersersitsinermigut. Taava silarsuarmi nutaami Paratiisiusumi inuiaat naalattut iluarsaqqitat allat ilagalugit naassaanngitsumik inuunissamut naleqqulluartutut naatsorsuutigineqalissaaq.
Edenip naatsiiviani nunarsuarmi tamarmi pilerseqqinneqartumi inuuneq
18. Paratiisimi pilerseqqitami inuuneq qanoq issava?
18 Paratiisimi pilerseqqinneqarsimasumi inuit tamarmik ikinngutigiipput. Silarsuarmi tamarmi ilaqutariissutsimik pingaartitsinerup nimia tamarmik immikkut qamuuna misigaat. Tamarmik paaseqatigiipput. Tamarmik oqaatsit ataatsit atorpaat. Qularnanngitsumik oqaatsit inuiaat aallaqqaataani atorsimasaat atorpaat, inuiaat piunerata ukiuini siullerni 1800-ni — Adamip ukiumi 4026-mi u.n.a.s. pinngortinneqarneraniit Pelegip nalaa (2269-imiit 2030-mut u.n.a.s.) tikillugu — inuit tamarmik atorsimasaat. Tassami Pelegip nalaani ’nuna avippoq’, imaappoq: nunamiut avissaartiterneqarput. (1 Môrsase 10:25; 11:1) Inuunerup immikkut pisinnaatitaaffiunera tamarmik nuannaarutigaat, ullullu tamaasa iteraangamik inuujuarnerminnik qujassutiginnittarput. Ukiut ingerlatillugit timikkut sanngiilliartunngillat. Timimikkut nukittoriartorput, timaasalu avataat nungullariartunngillat. — Naleqqiuguk Jûpe 33:25.
19. Innarluuteqarsimagaluartut qanoq pineqassappat?
19 Takuallu! Tusiassimagaluartut pisupput — aap, nuannaarnermit pisseqattaarput. Taleerussimagaluartut niuerussimagaluartullu tupinnartuliornikkut iluarsisinneqarsimapput. Tappiitsuusimagaluartut takusaqarsinnaalersimapput; tusilartuusimagaluartut tusaasinnaapput, oqajuitsuusimagaluartut oqalupput, tipaatsunnermillu erinarsorput. (Naleqqiuguk Isaia 35:5, 6.) Timikkut pinniissutsit tamarmik peerukkiartuaarput. Anguterpalussutsip arnarpalussutsillu oqimaaqatigiilluarnerat kusanaqaaq. (1 Môrsase 2:18) Inuit naammalluinnassusiat Jehova Guutimut, inuup timaanik naammalluinnartumik pinngortitsisimasumut, ataqqinaataavoq.
20. Pinngortitap nukii, inuussutissanik pilersuineq, uumasut nunallu atorneqarnissaa taamanikkussamut qanoq oqaatigisariaqassappat?
20 Nunarsuaq silaannarsuarmi kusanartortaaleriartuaarpoq. Nunarsuup ilaani sumiluunniit panernersuaqartanngilaq imaluunniit aseruisumik sialussuartarani, ulussaarsuarnillu aseruisunik, anorersuarujussuarnik, anoraasuarsuarnik anoraasuarsuarnillu kaavittuliortunik nalunaaruteqartoqarneq ajorpoq. (Naleqqiuguk Mákorse 4:37-41.) Pinngortitarsuup nukii tamarmik oqimaaqatigiilluinnartunngorsarneqariartuaarput nunarsuup inuuffigiuminarluinnaleriartussutigisaanik. Inuussutissaaleqisoqanngilaq nuna naammangaartunik inerititaqartarmat. (Tussiaat 72:16) Sumi tamaani inuit akornanni uumasullu akornanni eqqissineqarlunilu isumannaassuseq atuuppoq, soorlumi Jehova oqarsimasoq: ’Ajortumik iliortoqarnanilu aseruisoqassanngilaq qaqqanni illernartumi ilaaniluunniit naami.’ (Isaia 11:9; takukkittaaq versit 6-imit 8 ilanngullugu.) Taamaalilluni nunarsuaq najugaqarfigiuminartunngussaaq, Jehova Guutimik, nunarsuup Pinngortitsisaanik Piginnittaanillu, kiffartuussiffiusoq pallorfiginniffiusorlu nuannersoq. Taassuma pigisaraa pinngortikkamiuk, taamaattumillu taassumunnga nuannaarutissaasumik naalannaataasumillu atorneqartariaqarpoq. — Naleqqiuguk Isaia 35:1, 2, 6, 7.
21. Nunarsuarmiittut tamarmik inuiannit utertitaasimasunit qanoq isigineqassappat, nipilersuullu suna tutsiutissava?
21 Nutaannguallannaq — inuit utertitaasimasut inuiaat naammalluinnartumik aallarnerfigisimasaanni Edenip naatsiiviani paratiisiusumiissimanngitsut taama misigissapput. (sarĸúmersitat 21:5) Nipi nipilersuutillu atorlugit nipilersorneq tusarnersoq Jehovamik unnersiutiginnissutaasoq tusarsaassaaq. — 1 nalunaerssûtigdlit 23:4, 5; Tussiaat 150:3-6.
22. Silarsuassami nutaami paratiisiusumi inuulluni qanoq misigisimanassava?
22 Ila nuannerluinnassaaq nunarsuarmi inuit inuunerminni tamakkiisumik pissarsiffigisinnaasaanni Adamillu ajortuliorsimanera pissutigalugu toqujartortarnerup malunnaataasa tamarmik unitsinneqarfigisimasaanni inuulluni! (Naleqqiuguk Juánase 10:10.) Aap, nunarsuussaaq inuit akuerisaasut tamarmik Adamip pinngortinneqarami iliorsimaneratut Guutip assinganik malinnilluinnarfigisaat. (1 Môrsase 1:26, 27) Serafinut, kerubinut qilammilu inngilinut nunarsuaq takussunarunnaassaaq. Nunarsuaq qiviaraangamikku paratiisiussusialu kusanangaartoq isiginnaarlugu Jehova Guuti, qilammi nunamilu kisimi Naalagaasoq — pisinnaatitaaffigalugu kiinaatigut toqqaannartumik isigisartik — qutsavigalugulu unnersiutigisassavaat. — Matîuse 18:10.
Siunissaq pilluarnarlunilu naassaanngitsoq
23. Kristumiut tanitaasut aqqi eqqarsaatigalugit suna ilimanarpa, nunamilu paratiisiusumi inuusunut tamanna qanoq sunniuteqassava?
23 Kristumiut tanitaasut qilammi naalagaaffimmut ’qaaqqusimassutsiminnik qinigaassutsiminnillu’ aalajangiussisimasut qilammullu makititaanermik pilluaqqusaasimasut aqqi inuiannut nunarsuarmi paratiisiusumiittunut siunissami nalunaarutigineqarnissaat ilimanarpoq. (2 Pîtruse 1:10; Tussiaat 87:5, 6) Taamaattumik tamarmik paasissavaat sooq Jesus Kristusip ajoqersugai 144.000-iusut anersaakkut-kinguaassiarititaasut anersaamillu tanitaasut nunami paratiisiusumiinngitsut, qamuunalu nuannaarutigissavaat ilisimallugu qilammi inuunermut makititaasimasut.
24. (a) ’Isikkami tummarfiat’ eqqarsaatigalugu Jehovap taamanikkussamut suna naammassisimassavaa? (b) Qanoq ililluta nalunngissinnaavarput silarsuaq nutaaq naassaanngitsumik atassasoq, erinarsuullu siulittuutaasoq suna naammassineqassava?
24 Jehovamut, qilammi nunamilu kisimi oqartussaalluni Naalagaasumut maligassaalluartumut, tunniusimanerminnik killissaanngitsumik attassiinnartut siunissaq pilluarnartoq naassaanngitsorlu tamarmik qilanaarisinnaavaat. Nunarsuaq Paratiisiusoq amerlavallaartunik inoqarani ulikkaarsimasorli tassaassaaq Guutip ’isigaasa tummarfiat’ naleqquttoq kusanartorlu isigaasa assersuutikkut tummarfigisinnaasaat. Aap, Jehovap ’isikkamik tummarfiat’ naassaanngitsumik naalannarsisissavaa, inuiaallu tamarmik taassumunnga maleruulluinnassapput. (Matîuse 5:34, 35; apustilit suliait 7:49) Silarsuassaq nutaaq naaffeqarnavianngilaq, tassami ’naalagaassusiata alliartornera eqqissinerlu soraarfeqassanngillat’. (Isaia 9:7) Taava inngilit ukiumi 2-mi u.n.a.s. Betlehemimi Judæamiittumi Jesusip inunngornerani erinarsuutigisimasaat siulittuutaasoq eqquutissaaq: „Naalannarsili Guuti qutsinnermi, nunamilu inuit Guutip iluarisaasa akornanni eqqissineqarli.“ — Lúkarse 2:13, 14, NV.
25. (a) ’Savat allat’-nut ilaasunit ’amerlangaartunit’ suna maannakkut pingaartinneqarpa? (b) Suna qamuuna kissaatigisariaqarparput?
25 Savanik paarsisup eqqortup ’savaataasa allat’ ilaannut ’amerlangaartunut’ ilaasut Paratiisip pilerseqqinneqarnissaanik neriorsuut nuanningaartoq pingaartippaat. Guutip peqatigiissortaanut ilaanertik suliamullu Naalakkap Jesus Kristusip siulittuutigisimasaanut, tassa nalunaajaatitut kingullertut tusagassamik Guutip naalagaaffianut tunngasumik oqaluussissutiginninnermut, aallussilluarlutik suleqataanertik immikkut pisinnaatitaaffigaat. (Matîuse 24:14; Mákorse 13:10) Uagut Jehovap Nalunaajaasuisut ilumoorluta qamuuna kissaatigaarput assuarnaassutsitta naassaanngitsumik attattuarnissaa, qilammi nunamilu kisimi Naalagaasumut, Jehova Guutimut, naassaanngitsumik ataqqinaataallunilu naalannaataasumik, ernituatalu, Jesus Kristusip, kunngiulluni naalakkersuinerata ataani. ’Aliiluujaa!’ — sarĸúmersitat 19:1, 3, 4, 6; ússatit 10:9. (wD 15/8 89)
Qanoq akissavit?
□ ’Isikkami tummarfiat’ assersuutaasoq, nuna, pillugu Jehova qanoq neriorsuisimava?
□ Kikkut nunarsuarmi Paratiisimik pilersitseqqinnermut peqataassappat?
□ Kikkut akornanni Jesus Kristusip ’nunami tamarmi naalagarsuassat’ toqqassavai?
□ Makititsiortorneqalerpat misigisaq suna misigisinnaassaviuk?
□ Jehovamut tunniusimanerminnik killissaanngitsumik attassiuaannartut qanoq ittumik siunissaqarpat?