Bibelimik atuarnermi pingaarnersat: Sivfânia 1:1–3:20
Jehova ujaruk kiffartuullugulu uummatikkut iluunngarlutit
BABYLONIMIUT Judamik tunussisimasumik piuneerussinerat ukiunik 50-it missaannik sioqqullugu, Jehova pruffiitini Zefanias aqqutigalugu ima nalunaarpoq: ’Tamarluinnaasa nunap qaanit katersorumaarpakka [nungutikkumaarpakka, NV].’ (1:1, 2) Aammattaarli Guutip innuttani annaanneqarnissaannik aqqutissiuuppai. (2:3; 3:9) Tamanna eqqarsaatigalugu Sivfâniap agdlagai ’sorsunnissamit Guutip ajugaqanngitsup ullussarsuani piumaartumit’ nalaanneqartussanut tamanut iluaqutaaqisunik ilinniagassartaqarput. — sarĸúmersitat 16:14.
Jehovap ullussaa qaneqaaq
Jehovap ullussaa taama qanitsigimmat Guutimit avissaarsimasut taanna uterfiginasuartariaqarpaat. Guutip nungutikkumaagassaanut ’Jehovamit tunuariartut’ ilaapput. Tunuarsimapput Guutillu piumasaanik soqutiginnikkunnaarlutik. Taamaaliorsimanerata ila navianassusia! Tamanna iluarsineqarasuartariaqarpoq. — Sivfânia 1:3-11.
Timip piinik peqangaarneq Jehovap ullussaani illersuutaanavianngilaq. Jehovamik kiffartuussinerartut ilaasa timip piinik piniarneq ulapputigaat, inuulluataarnartumik inississimallutik. Ilali tamatuma imminut salloqittarnerussusia! Ullormi tamatumani timip pii pigisatik illersuutigisinnaanavianngilaat. — Sivfânia 1:12-18.
Annattoqarsinnaavoq
Jehovap ullussaani isertorneqarumagaanni Allakkanik qarsupiinnartumik ilisimasaqarneq naammanngilaq. ’Ilalaartut Jehovap ileqqoreqqusaanik maleruaasut’ oqaaqqissaarneqarput ’taanna ujaqqullugu, iluarnissaq ilungersuutigeqqullugu, ilalaarnissaq ilungersuutigeqqullugu’. ’Naggatissamut aalajangersut’ kisimik annakkumaarput. — Sivfânia 2:1-3; Matîuse 24:13.
Inuiaat Jehovap innuttaanik ullumikkut naqisimannittut nungutinneqassapput. Moabip, Ammonip, Assyriap inuiaallu Judap eqqaaniittut allat atugarisimasaattut atugaqassapput. Aammattaaq Babylon Angisooq aserorneqassaaq. (sarĸúmersitat 18:4-8) Tamatuma kajumissaarpaatigut Guutip eqqartuussutaanik tusarliussiuarnissatsinnik! — Sivfânia 2:4-15.
Innuttat makiteqqitat
Maannakkut Jehovap innuttani aniguiumaarnissaannut piareersarpai. Illit eqqarsaatersuutit Babylonerpaluttut iperarsimavigit ’oqaatsit minguitsut’ (3:9, NV), tassa ajoqersuutit ilumoortut erlinnartut Bibelimeersut, atulersimallugit? Jehovamut tunniulluinnarnikkut ’taassuma aqqa torlorfigilersimaviuk’? ’Pajuttarpit’ ’qarlut taassuma aqqanik nassuerutiginnittut anitaannik’? Aniguissaguit Jehovap innuttai tunniulluinnarsimasut ’ersuttut ataasiullutillusooq’ kiffartoqatigisariaqarpatit. — Sivfânia 3:1-10; Rûmamiut 10:13-15; Eprîarit 13:15.
Annakkumagutta Jehova ujartariaqarparput aqqalu illernartoq qutsissisittariaqarlugu. Makitassuseq, naapertuilluanngissuseq sallunerillu taassuma innuttaani atortussaanngillat. (Evfisumiut 4:25-32) Aqqi illernartikkuniuk ’qanilaartut nikanartullu’ taamaallaat amiakkuutikkumaarpai. — Sivfânia 3:11-20.
Bibelimik atuarnermi pingaarnersat: Haggai 1:1–2:23
HAGGAIP agdlagai-ni ukiumi 520-mi u.n.a.s., juutit sinneruttut Jehovap naalaffiutaanik qarmaaqqikkiartorlutik Jerusalemimut uternerata ukiut 17-it kingornagut, pisimasut oqaluttuarineqarput. (Haggai 1:1) Taamani inuit tamarmik Guutip suliassarititaa ilungersuutigisariaqarsimagaluarpaat. Taamaakkaluartorli Jehovap pruffiitini Haggaj juutinut aallartittariaqarpaa pisussaaffiinik eqqaasitsiartortillugu. Uagut tamanna ilinniarfigisinnaavarput?
Jehovap suliassarititaa salliuguk
Timip piinik soqutigisat anersaakkut pisussaaffinnit pingaarnerutinnaveersaakkit. Aningaasatigut isumanerlunnissaminnut, eqqaamiuminnut akeqqersimasunut taamaaqataanullu ernumassutiginninnissaminnut juutit nunavimminnut utersimasut pissutissaqarput. Inuulluataarneralli eqqarsaatigigaanni, tamakku pisussaaffimminnik sumiginnaanerannut pissutaasimanavianngillat. Aatsaat Haggajip kajumissaarmatik naalaffik sulissutigilerpaat. Ullumikkuttaaq uagut ’ingerlavigisavut uummammiuginiartariaqarpavut’ Guutip suliassarititaanik sapinngisarput tamakkerlugu tapersersuinngitsoornaveersaarluta. — Haggai 1:2-15.
Suliassarititaminik uummatikkut iluunngarlutik sulissutiginnittut ilungersorneri Jehovap pilluaqqusarpai. Zerubbabelip juutillu allat naalaffimmik inaariniarnerat Guutip pilluaqqujumaarpaa, naalaffimmillu siullermit naalannarnerungaassaaq. Ullumikkut ’amerlangaartut’ Naalagaaffik pillugu tusarliussaq ilassimmassuk, ’inuiaat tamarmik erlinnangaartortaat’ (NV) Jehovap anersaakkut naalaffiutaanut aggiapput, taassumalu illuni tamakkerlugu naalannarsisippaa. — Haggai 2:1-9; sarĸúmersitat 7:9.
Uummatikkut iluunngarluni kiffartortariaqarpoq
Aatsaat minguitsuugutta, minguitsumik periaaseqarutta, Jehovalu uummatitsigut iluunngarluta kiffartuukkutsigu pallorfiginninnerput naleqarluassaaq. Guutip illua sumiginnaramikku juutit minguttunngorsimapput, naalaffiliulerpatali pilluaqqujumaarpai. Uaguttaaq Jehovamit pilluaqquneqassagutta iluarsartariaqartut iluarsartariaqarpavut taassumalu suliassarititaa uummatitsigut iluunngarluta sulissutigisariaqarlugu. (Naleqqiuguk Môrsasip agdlagaisa sisamait 19:11-13.) Guutip qilannik nunamillu sajungaartitsinissaa naalagaaffinnillu uppititsinissaa utaqqiitigalugit, Zerubbabel pingaarneq, Jesus Kristus, malitsigu Jehovallu suliassarititaanut uummatitsigut iluunngarluta suleqataasa. — Haggai 2:10-23. (wD 1/6 89)
[Qupp. 30-mi ungalusaq]
ALLASSIMAFFIIT PILLUGIT OQAASEQAATIT
○ Sivfânia 1:5 — Malkam (Milkomimik, Molekimik kiisalu Molokimik aamma taagorneqartuunnguatsiartoq) tassaavoq Ammonikkut guutipiluat pingaarneq. (1 kúngit 11:5, 7) Meeqqanik pilliisarneq maajunnartoq Mosesip inatsisaani inerteqqutigineqartoq Molekisiornermut ilaavoq. — 3 Môrsase 20:2-5; apustilit suliait 7:42, 43.
○ Sivfânia 2:14 — Soorlu siulittuutigineqarsimasoq, Ninevep sukarsuartai sukkallu qulequtaat uppikaasimasut timmissat nersutillu najugarilerpaat. Timmissat immaqalu anori ’igalassatigut qarlorpalupput’. Illussaarsuit matui peerneqarsimapput initaasalu salliligartaat qisuusut piiagaallutik.
○ Sivfânia 3:9 — Inuit ataatsimik oqaaseqaraluarunilluunniit tamanna ataasiussuseqarnissamut qularnaveeqqutiginavianngilaat, soorlu inuit assigiissunik oqaasillit imminnut sorsuunnerinit takuneqarsinnaasoq. ’Oqaatsit minguitsut’ tassaapput ajoqersuutit ilumoortut Bibelimeersut, ’oqaatsit peqqissinartut’. (2 Timûtiuse 1:13) ’Oqaatsit peqqissinartut’ tamakkua pingaarniarneq ajugaaffigisarpaat, Guutimut naalannaataallutik atuisunillu tamanik ataasiussuseqalersitsisuullutik.
○ Haggai 1:6 — Jehovap naalaffiutaa sumiginnaramikku juutit taassumannga pilluaqquneqanngillat. Taamaattumik naak amerlasuunik siaruarterigaluarlutik katersugakittarput, naammattunillu nerisassaqarnatillu imigassaqanngillat. Naammattunik atisassaqanngillat, imaluunniit atisaat pitsaajunnaarsimagamik oqunngillat, akissarsiortullu misigipput soorlu aningaasarsiatik aningaasivimmut putoorsimasumut ilisaritik. Juutit taakku assiginagit Guutip pingaarnerutitaanik sumiginnaanngitsoornaveerta. — ússatit 10:22; Nĩmia 10:39.
○ Haggai 2:9 — Naalaffik ’siulleq’ Salomonip sanatitaa ukiuni 420-ni issimavoq, kisianni ’illu kingulleq’ ukiuni 584-ini (515 u.n.a.s.-70 u.n.a.k.) atorneqarsimavoq. Taamaalilluni naalaffiup aappaa sivisunerusumik atasimavoq. Amerlanerusut tassunga pallorfiginnikkiartortarput, soorlu piinsimi ukiumi 33-mi u.n.a.k. juutit juutinngorsimasullu nunarpassuarnit Judæap avataaneersut aggiammata. Aammattaaq Messias, Jesus Kristus, ’illumi kingullermi’ ajoqersuisarsimavoq. Tamakku illup upperisarsiornikkut alutornarnerussutigai.