Qanorluunniit Bibeli nassuiarneqarsinnaava?

„SUKKUT TAMAANA Bibeli quppertarpat, allassimaffiillu illit nammineq nassuiaatinnut naleqquttut toqqartarlugit,“ Jehovap Nalunaajaasuanit pulaarneqarami arnaq paamisuppasilluni taama oqarsimavoq.

Kisianni Bibelimi allassimaffinnik assigiinngitsunik unnersuussineq ima isigisariaqarpa nammineq isummamut naleqquttunngorsarniarneqartut? Taamaassimappat taava imaappa Bibeli qanorluunniit piumasamik nassuiarneqarsinnaasoq, nassuiaanerillu tamarmik ajunngitsuusut?

Atuakkiortoq qanoq isumaqarpa?

Naak Bibeli amerlasuunit allanneqarsimagaluarluni taamaattoq ataasiinnarmik Atuakkiortoqarpoq, tassa Jehova Guuti. Bibelimik allattut 40-t missaanniittut imminnut akerleriissunik allanngisaannarput — tamannalu uppernarsaataavoq Guutip taassumunnga atuakkiortuuneranik — kisianni arlaannaataluunniit oqaluuserisaq aalajangersimasoq tamakkiisumik allaaserisimanngilaa. Taamaattumik oqaluuserisaq aalajangersimasoq pillugu Atuakkiortoq qanoq isumaqarnersoq paaserusukkaanni, allassimaffiit assigiinngitsut oqaluuserisamut taassumunnga aalajangersimasumut tunngasut misissortariaqarput. Tamannaavoq oqaluussisartup siuliani eqqartorneqartup iliuuseriniagaa.

Periaaseq tamanna Bibelimut naapertuuttuusoq Rûmamiunut agdlagkat kapitali 9-mi nalunarunnaarpoq. Tassani pitsaalluartumik takutinneqarpoq qanoq ililluni Paulusip, kristumiu aalajaatsuusimasup, periaaseq tamanna atoraa. Kapitalimi tassaniinnaq aqqanileriarluni Paulus Bibelimi immikkoortut ilaannik issuagaqarpoq. Isornartorsiuisartut ilaasa immaqa allaat Paulus uparuassagaluarpaat oqarlutik Bibeli sukkut tamaana atoraa. Siullermik Bibelip atuagartaasa siullersaannut unnersuussivoq, taava atuagartaasa 39-ssaannut, taavalu nangilluni atuagartaasa aappaannut, 28-ssaannut naggataagullu 23-ssaannut unnersuussilluni.a

Allassimaffiit ataqatigisaannit peerlugillu nammineq isummaminut naleqquttunngorsarlugit eqqunngitsumik issuarsimagaluarunigit soorunami Paulus eqqunngitsumik iliorsimassagaluarpoq. Paulusili taamaaliunngilaq. Qularnanngitsumilli kristumiut siulliit akornanni taamaaliortoqarsimavoq, tassami apustili Peterip oqaluuserimmagu ’taakku paasineq ajornartunik ilaqartartut, ilinniarsimanngitsut aalajangersimanngitsullu mumitaannik allassimasoqataallu tappullugit namminneq aseruutissaminnik’. — 2 Pîtruse 3:16.

’Paasineq ajornartut’ paasinerlunneqarsinnaapput. Allaat atuakkiortut tusaamasaasut, soorlu Shakespearep, allataat assigiinngitsunik nassuiarneqarniartarput, qularnanngitsumillu eqqortuinnaaneq ajortunik. Taamaattumik tupinnarpallaassanngilaq Bibeli taamatut pineqaraluarpat. Shakespeare suli inuusuuppat aperiinnarneqarsinnaassagaluarpoq allakkamini suna isumagineraa. Tamannali ajornaqaaq. Aammattaaq Bibeli eqqarsaatigalugu periarfissaqanngilagut taassuminnga allattunik apersuinissatsinnut. Kisianni Bibelimik Atuakkiortoq aperisinnaavarput, taannami toqunganngilaq! (Tussiaat 90:1, 2) Taanna neriorsuisimavoq upperlutik anersaakkut ilitsersorneqarnissaminnik qinusut ikiorumaarlugit. — Lúkarse 11:9-13; Jâko 1:5, 6.

Guutip kiffaata aalajaatsup, Josefip, Ægyptenimiitilluni Ægyptenip naalagarsuata sinnattua Guutimeersoq nassuiariartoqqullugu qinnuigineqarami paasivaa Guutimut ikioqqulluni qinunissaq qanoq pingaaruteqartigisoq. Sinnattut taama ittut pillugit siornatigut taanna ima oqareersimavoq: „Guuti nassuiaasussaannginnerpa?“ (NV). Sinnattuni Josefip eqqortumik nassuiareermagu, Farao ima oqarpoq: ’Nassaassanerpugut angummik uuma assinganik, Guutip anerneranik ilumiulimmik?’ Josefimut saalluni ima oqarpoq: ’Guutip makku tamaasa ilinnut nalunaarmagit, tamanna pillugu ilittut siuneqartigisumik ilisimasoqanngilaq.’ — 1 Môrsase 40:8; 41:38, 39.

Kristumiuunerartut akornanni Bibeli pillugu nassuiaatinik imminnut akerleriissunik nassaassaqarnera pillugu Bibelimik Atuakkiortoq taassuminngaluunniit allattut avoqqaarineqarsinnaanngillat. Bibelimik allattut tassaasimapput Guutip pruffiitii, taakkulu ’anersaap illernartup pisimmatik Guutimit oqalupput’. (2 Pîtruse 1:20, 21) Kisianni avoqqaarineqarsinnaapput Bibelimik atuartut Guutip anersaakkut siulersuineranik malinninngitsut aammalu Guutip nammineq oqaatsiminik nassuiaanissaanik akuersiumanngitsut. Taakkua Bibelip Atuakkiortuata oqaasiinut isumaqarfiginninnertik isummanik aalajangiuteriigaasunik isummersornermikkut paatsiveerussarsimavaat. Atagu assersuutit marluk sammeriartigik.

Ajortuliornermut suna pillaatissaava?

Inuit ilaat isumaqarput anniarfimmi ilisimalluni naassaanngitsumik anniartitaaneq ajortuliornermut pillaatissaasoq. Isumartik tamanna tunngavilerniarlugu immaqa sarĸúmersitat 20:10 unnersuussutigisarpaat, tassani allassimammat Diaavulu ’tatsimut innerusumut ikuallassaataasumut’ iginneqarumaartoq. Tamannali akugdlîssup oĸausê 9:5-imut naapertuutinngilaq, tassani allassimagami ’toqusut sunnguamilluunniit ilisimanngitsut’, imaluunniit Rûmamiunut agdlagkat 6:23-mut, tassani allassimagami ’ajortip akissarsiarititaa tassa toqu’, tassaanngitsoq ilisimalluni naassaanngitsumik anniartitaaneq. Tamatumani immaqa inuit ilaat akerliliissapput oqarlutik sarĸúmersitat 20:10-mi oqaatigineqartoq Satan (qularnanngitsumillu taassumannga tammartitaasut) ’ullukkullu unnuakkullu naassaanngilluinnartumik anniartitaassasut’.

Oqaluut grækerisooq Johannesip allassimaffimmi tassani „anniartitaaneq“-mut atugaa, basaniʹzō, ukiuni hundredelinni siullerni immikkut ittumik isumaqartinneqarpoq. Tassami taggit taassumunnga assingusoq, basanistēsʹ, parnaarussanik paarsisunut atorneqartarsimavoq, tassa ilaannikkut parnaarussat anniartinneqartarsimammata (naak tamanna Guutip inatsisaanut akerliugaluartoq).

Assersuutigalugu îvangkîlio Matîusip agdlagâ-ni eqqartorneqarpoq kiffaq ajortoq naalakkaminit ’anniartitsisunut [tois basanistaisʹ] pisinneqartoq akiligassani tamaasa akilerserlugit’. (Matîuse 18:34) The International Standard Bible Encyclopedia-mi allassimaffik taanna ima oqaaseqarfigineqarpoq: „Qularnanngitsumik parnaarussivimmiinneq ’anniarnertut’ isigineqartarsimavoq (tamaassimanera qularutissaanngilaq), aammalu ’anniartitsisut’ [imaluunniit pinerluttunik toqutassanik toqutsisartut] taaneqaraangamik pineqaannartannguatsiarput parnaarussanik paarsisut.“

Tassuuna erserpoq allassimaffiit imminnut naleqqiunnerisigut aammalu Bibelip allassimaqqaataanik misissuinikkut, nassuiaammik Bibelimut tamarmut naapertuuttumik nassaartoqarsinnaasoq. Isummanik aalajangiuteriigaasunik niaqormioqarnani sarĸúmersitat 20:10 atuaraanni, paasineqarsinnaavoq allassimaffik taanna naassaanngitsumik ikualasumik anniarfeqarneranut uppernarsaatitut atorneqarsinnaanngitsoq. Oqaatigineqarmat Diaavulu allallu Guutimut pikitsitsisimasut naassaanngitsumik anniartitaajumaartut, ima paasisariaqanngilaq ilisimallutik anniartitaajumaartut, kisianni toqunissaminnit aniguisinneqanngisaannassasut; toqumit naassaanngitsumik tigusaaqqajumaarput. Tatsimut innerusumut piviusumut iginneqaraluarunik aamma taamatut nungutitaalluinnartigissagaluarput.

Nunarsuaq innermik aserorneqassava?

Pîtrusip agdlagaisa áipait 3:10-mi oqaatigineqarpoq ’nuna tassanilu suliarisaasut ikikkarumaartut’. Inuit ilaat isumaqarput tamanna ima paasisariaqartoq nunarsuaq nungutitaajumaartoq, immaqa atomi sakkugalugu sorsuunnikkut. Kisianni Bibelimik Atuakkiortup tamanna pillugu oqaasiinut allanut qanoq ililluni tamanna naapertuuppa? Guutip sunniineratigut isumassarsisitaalluni tussiaasiortoq Tussiaat 104:5-imi oqarpoq Guutip ’nunarsuaq aalajaatsumik tunngavilersimagaa’ aammalu ’naassaanngitsumut patajaatsuussasoq’. Kunngi silatooq, Salomon, aammattaaq sunnerneqarnermigut isumassarsisitaalluni akugdlîssup oĸausê 1:4-mi oqarpoq ’eqqarleriit arlaat peersut arlaat nalliuttartut, nunalu naassaanngitsumik taamaaginnartoq’.

Tamanna imminut akerliusumik oqalunnerua? Naamik, Bibelimik Atuakkiortoq Guutiuvoq ilumoortumik oqaluttartoq, taannalu imminut akerliusunik oqalussinnaanngilaq. Allassimaffiilli taakku imminnut naapertuuppat? Atagu Pîtrusip agdlagaisa áipait 3:10-p ataqatigisai sammeriartigik.

Versini 5-imi aamma 6-imi Noap nalaani ulersuaqarsimanera Peterip eqqartorpaa, versimilu 7-imi tamanna assersuuppaa ’ullormut inuit iluaatsut eqqartuutiffissaannut aserorfissaannullu’. Ulersuaqarneragut sunaana nungutitaasoq? Versi 6-imi allassimavoq ’silarsuaq taamani ittoq aserortoq’. Tassani erserpoq aserorneqartoq tassaasimanngitsoq nunarsuaq, kisianni inuit silamiut ajortut. Môrsasip agdlagai sujugdlît 9:11-mi Guutip Noa neriorsoramiuk ’kingorna ulersuaqassanngitsoq nuna aserussallugu’, qularnanngitsumik pinngilaa Nunarsuaq, tassami taanna taamani aserorneqanngimmat. ’Nuna’ Pîtrusip agdlagaisa áipait 3:10 naapertorlugu aserorneqartussaq, tassaavoq ’nuna’ taannaasoq ulersuaqarneragut aserorneqartoq — tassaanani Nunarsuaq, kisianni inuiaat ajortut nunarsuarmiittut. — Oqaaseq hebræerisooq ’nuna’-mik nutserneqartartoq aammattaaq ’nunamiut’-nik nutserneqarsinnaavoq, soorlu Môrsasip agdlagai sujugdlît 11:1-imi taamaattoq.

Nassuiaammut tamatumunnga akerliusumik Bibelimi allassimaffimmik nassaassaqanngilaq. Taava Bibelimik Atuakkiortup taamatut paasineqarnissaa kissaatigisimassavaa.

Nassuiaat ataasiinnaq ilumoorsinnaavoq

Atuagaq iganermik ilitsersuut piumasamik nassuiarneqarsinnaasoq illumi ningiuusup qanormitaava isumaqarfigissagaluarpaa? Imaluunniit sumut iluaqutaassagaluarpa aningaasat ordbogimut oqaatsit isumaannik nassuiaasimanngitsumut inuullu nammineq isummersugassaanut atussallugit? Eqqarsaatigineqarsinnaava Guutip pinngortitani ilitsersuutinik taamatut ilusilinnik tuniumassagai? Taamaassimassappat, taava oqartoqarsinnaava tamanna ilitsersuussinerusoq?

Inuit peqqusersuitsut Guutimullu mianerinnittut Bibelimik eqqunngitsumik nassuiaajumanngillat ’namminneq aseruutissaminnik’. (2 Pîtruse 3:16) Taamaaliortoornissartik pinngitsoorniarlugu kissaatigivaat allassimaffiit aalajangersimasumut paasiniakkaminnut tunngasut tamaasa misissornissaat. Allassimaffiit siornatigut paasinnittaaserisaminnut ersarissumik akerliusut naammattooraangamikkik, paasinnittaasitoqqaminnik sallusuissummut naapertuutinngitsumik taamaatitsinissaminnut piumassuseqartarput.

Inuit millionilikkuutaat siornatigut upperisarsiornerup tungaatigut assigiinngitsunik paasinnittaaseqarsimagaluartut, maanna upperisarsiornikkut ataasiussuseq Jehovap Nalunaajaasuini angusimavaat, maniguuttuunertik pissutigalugu. Namminneq iluarisaminnik Bibelimik nassuiaanissaminnut taarsiullugu, Bibelimik Atuakkiortup nammineq nassuiaataanik maleruaanissamut piumassuseqarput.

Toqqissiallannarpoq paasillugu Bibeli nammineq iluarisaannarmik nassuiarneqarsinnaanngitsoq. Bibelimik Atuakkiortoq nammineq taassuminnga nassuiaatikkutsigu, paasinarsissaaq Bibeli ’ajoqersuutaalluni inerteqqutaallunilu iluarsiartuutaallunilu iluarnermullu perorsaataalluni’ iluaqutaasoq. Taamatut aatsaat Bibelip ’ajunngitsuliornernut tamanut piginnaanngorsassavaatigut’. — 2 Timûtiuse 3:16, 17. (wD 15/12 88)

[Quppernerup ataani ilanngussaq]