Guutimut kiffartornissaannik nutaat ikiorneqarput
’Uppinngitsumilluunniit ilisimanninngitsumilluunniit isertoqaruni, uummataata isertugai erserumaarput, kiinnaminillu palloqqajaqaaq Guuti pallorfigalugu’. — 1 KORINTUMIUT 14:24, 25.
1-3. Korinthimiut ilarpassui Guutimit iluarisaalernissaminnut qanoq ililluni ikiorneqarpat?
AJOQERSUIARTORTITATUT angalanermi aappaani apustili Paulus ukioq ataaseq affarlu illoqarfimmi Korinthimiippoq, ’oqaaseq ilungersuutigalugu, nalunaajaassutigalugu’. Tamatuma kingunerisaanik ’Korinthimiut ilarpassui tusarnaarlutik uppertunngorput kuisillutillu’. (apustilit suliait 18:5-11) Tassaalerput ’iluartitaasut, iluartunut qaaqqusimasut’. — 1 Korintumiut 1:2.
2 Kingorna Apollos illoqarfimmut Korinthimut tikeraarpoq. Taanna siusinnerusukkut Priskillamit Akvilamillu ’Guutip aqqutigeqqusaanik’, ilaatigut kuisinnermut tunngasumik, paasinninnissaminut ikiorneqarsimavoq. Taamaalilluni kristumiunngorsimavoq Guutimit iluarisaasoq imaluunniit akuerisaasoq. (apustilit suliait 18:24–19:7) Taava Apollos nammineq inunnut allanut ikiuutaalerpoq, Korinthimiut, ’guutipilunnut oqajuitsunut ingerlatitaasimasut’, oqaluussiffigalugit. (1 Korintumiut 12:2) Korinthimiut taakku qularnanngitsumik angerlarsimaffimminni Allakkanik Illernartunik ilinniartinneqartarsimapput; aammattaarli kristumiut ataatsimiinnerini ajoqersorneqartarsimallutik. — apustilit suliait 20:20; 1 Korintumiut 14:22-24.
3 Ilinniartitsinerup tamatuma kinguneraa inuppassuit ’uppinngitsuullutillu ilisimanninngitsuusimagaluartut’ eqqortumik pallorfiginninnermut kajungerinnillutik ilanngussornerat. Angutit arnallu kuisinnissaminnut Guutimillu iluarisaanissaminnut siumukartut isigalugit nuannersimassaqaaq. Sulimi ullumikkut taama ippoq.
’Uppinngitsut ilisimanninngitsullu’ qanoq ikiorneqartut
4. Ullumikkut inuppassuit qanoq ikiorneqartarpat, soorlu Korinthimi pisimasoq?
4 Aammattaaq ullumikkut Jehovap Nalunaajaasuisa Jesusip peqqussutaa manna naalappaat: „Inunnik inuiannit tamaneersunik ajoqersuganngortitsigitsi, kuillugillu.“ (Matîuse 28:19, 20, NV) Sallusuissutip naatsiiassartaa inuit tusarumasut uummataannut nakkalatsersimagaangamikku ’imerterniarlugu’ orneqqittarpaat. (1 Korintumiut 3:5-9; Matîuse 13:19, 23) Jehovap Nalunaajaasuisa inuit soqutiginnittut neqeroorfigisarpaat ornillugit sapaatip-akunneranoortumik akeqanngitsumik Bibelimik atuaqqissaaqatiginissaannik, taamaalillutik apeqqutissatik akissutissarsiniassammatigik Bibelimilu ajoqersuutigineqartut ilinniarniassammatigik. Taamatut atuaqqissaaqatigineqartartut aammattaaq Jehovap Nalunaajaasuisa ilagiivisa najukkaminniittut ataatsimiinnerinut qaaqquneqartarput, soorlu ukiuni hundredelinni siullerni ’uppinngitsut’ ilagiinnut kristumiunut Korinthimiittunut orniguttarsimasut. Kisianni Bibelimik ilinnialerlaat ilagiillu ataatsimiinnerinut ilaasalerlaat taakku Jehovap Nalunaajaasuinit qanoq isigineqartariaqarpat?
5. Inuit ilaannut mianersorfiginnittariaqarnerput qanoq Bibelimi ersersinneqarpa?
5 Nuannaarnartuuvoq takullugit taakku Guutimut qanilliartortut. Eqqarsaatigisariaqarparpulli suli tassaalinngimmata uppertut kuisimasut. Aammattaaq uku marluk eqqaamasariaqarpavut: (1) Nunasisut takornartat Israelikkunnit mianersorfigineqartarsimapput; naak taakku Guutip innuttaanut ingerlaqataagaluarlutik inatsisaasalu ilaannut naalattuugaluarlutik suli kipineqarlutik juutinut ilanngussimanngikkunik Israelikkunnut qatanngutitut taaneqarsinnaaneq ajorput. (2) Kristumiut Korinthimiittut ’uppinngitsunik ilisimanninngitsunillu’ ilaqartarnerminnik mianersuussisarsimapput. Taakku Paulusimit ima mianersoqquneqarsimapput: ’Uppinngitsut uniaammik allanertamik uniaqatiginiaqinasigik. Iluarnerummi iluaanneq sukkut peqatiginerpaa?’ — 2 Korintumiut 6:14.
6. Ataatsimiinnernut najuuttarnermigut ’uppinngitsut’ qanoq ililluni ’ilitsersorneqarsinnaappat’, ’ilitsersorneqarnerlu’ taama ittoq qanoq pisarpa?
6 Tassa ’uppinngitsut ilisimanninngitsullu’ tikilluaqquavut, kisianni Guutip najoqqutassiaanik suli maleruaalinnginnerat arajutsisimanngilarput. Korintumiunut agdlagkat sujugdlît 14:24, 25 naapertussagaanni ’pissusersiorneqarluassapput’, imaluunniit allaat Bibelimi ilikkakkatik tunngavigalugit ’ilitsersorneqassapput’. Ilitsersorneqarneq taama ittoq tassaanngilaq ilagiinni eqqartuussinermik piginnaaneqartitaasunut sassartinneqarneq, tassami suli kuisimasutut ilagiinnut ilaasortanngunngillat. Aap, ilitsersorneqarneq taama ittoq tassaavoq pilerlaat namminneerlutik, ilikkakkatik tunngavigalugit, iliuutsinut namminissarsiortunut kanngunartunullu tamanut Guutip iluarinninnginneranik paasinninnerat.
7. Atuaqqissaaqatigineqartartut ilarpassuisa suna kissaatigilissavaat? Sooq?
7 Kuisimanngitsut ataatsimiinnernut najuuttartut ilarpassuisa piffissap ingerlanerani kissaatigiartuaassavaat isiginnaartuuinnarunnaarnissartik imaluunniit ilinniartuinnaajunnaarnissartik. Jesusip oqarneratut ippoq: ’Ajoqersugaq ajoqersortiminit annerunngilaq. Kinaluunniit ajoqersorluagaasoq ajoqersortimisut ikkumaarpoq.’ (Lúkarse 6:40) Bibelimik atuaqqissaaqatigineqartartup takusinnaalissavaa ilinniartitsisimi tamanut oqaluussineq pisariaqartutut nuannaarutissarsiffiusutullu isigigaa. (Matîuse 24:14) Sallusuissummik Bibelimiittumik ilinniartinneqarlunilu ataatsimiinnernut najuuttartup uppernera alliartortillugu oqaatsit uku uummataata killissutigiartussavai: „Qaqqani takusap ila takorannersusia: pisuinnarluni aggerpoq nutaarsiassanik nuannersunik tusarliisoq, eqqissinermik oqaluussisoq, ajunnginnerusut pillugit nutaarsiassanik nuannersunik tusarliisoq, annassummik oqaluussissutiginnittoq.“ (Isaia 52:7, NV; Rûmamiut 10:13-15) Naak Bibelimik atuaqqissaaqatigineqartartoq suli kuisimanngikkaluarluni Naalagaaffimmik oqaluussissutiginnittutut Jehovap Nalunaajaasuisa ilagiissaannut atanissani kissaatigilissavaa.
8, 9. (a) Bibelimik atuaqqissaaqatigineqartartup tamanut oqaluussinermut peqataalernissani kissaatigippagu qanoq iliortoqassava? (b) Utoqqaanertat marluk oqaluussisartunngortussamik atuaqqissaaqatiginnittaanillu sunik oqaloqatigiissutiginnissappat? (c) Oqaluussisartunngorlaap suut kuerissavai?
8 Bibelimik atuaqqissaaqatiginnittup, Jehovap Nalunaajaasuata, qulakkeersimaguniuk atuaqqissaaqatigisartakkami oqaluussinermut peqataalernissani kissaatigigaa, taava ilagiinni nakkutilliisut siulittaasuannut tamanna nalunaarutigissavaa, taassumalu utoqqaanertat marluk, atuaqqissaaqatigineqartartup atuaqqissaaqatiginnittullu akornanni oqaloqatigiinneqarnissaa aaqqissuutissavaa. Nutaat Guutimut kiffartornissartik kissaatigigaangassuk utoqqaanertanut nuannersuusarpoq. Taakkua naatsorsuutigineq ajorpaat atuaqqissaaqatigineqartartup kuisimasutulli ilisimasaqartiginissaa; kuisimasut sallusuissutip aqqutaasigut sivisunerusumik ingerlareersimasuummata annertunerusumik piumaffigineqarput. Atuaqqissaaqatigineqartartulli oqaluussinermi peqataalinnginnerani utoqqaanertat qulakkeerumasarpaat Bibelimi ajoqersuutigineqartunik ilisimasaqangaatsiareernersoq aammalu inuunini Guutip najoqqutassiaanut naapertuuttunngortissimaneraa. Taamaattumik utoqqaanertat marluk oqaluussisartunngorusuttumik taassuminngalu atuaqqissaaqatiginnittartumik ataatsimeeqatiginnikkumasarnerat pissutissaqarluarpoq.a
9 Oqaluussisartuunissamut piumasarisaasut atuaqqissaaqatigineqartartup naammassisimappagit utoqqaanertanit taakkunannga marlunnit nalunnaarfigineqassaaq oqaluussinermut peqataasimanermini nalunaarsuutini tunniuttalersinnaagai, nalunaarsuutaalu ilagiit oqaluussinermi nalunaarsuutaannut ilanngunneqartassasut. Tamanna ersiutaassaaq Jehovap Nalunaajaasuisa ilagiittut aaqqissuussaanerannut oqaluussisartunngorlaap ilanngunneranut aammalu tamatuma oqartussaassusianik akuerinninneranut (soorlu oqaluussinermi nalunaarsuutiminnik tunniussisartut tamarmik taama pisut). Oqaloqatigiinnerup ingerlanerani Bibelimi unnersuussutigineqartut atuakkami Organiseret til at fuldføre vor tjenesteb-mi (Kiffartuussinitsinnik naammassinninniarnitsinni aaqqissuussaavugut-mi) quppernerni 94-96-imiittut saqqummiunneqassapput. Taamaalillunilu piffissami tamatumani pissusissamisuussaaq oqaluussisartunngorlaaq atuakkamik taama ittumik nammineq pigisaqalissappat.
10. (a) Oqaluussisartoq kuisimanngitsoq qanoq ililluni siumukartuaannarsinnaava, sunalu anguniassavaa? (b) Sooq taaguut „akuerisaalluni ilaasoq“ atorunnaarparput? (Ataani ilanngussaq takujuk.)
10 Tusagassamik nuannersumik oqaluussisartumut kuisimanngitsumut piumasarisaasunik naammassinnittoq ’inunnut Guutip iluarisaanut’ ilanngukkiartuaartarpoq.c (Lúkarse 2:14, NV) Suli tunniulluinnarsimananilu kuisimanngilaq, taamaakkaluartorli oqaluussinermik suliaqarnerminik nalunaarsuutini, allat millionilikkuutaat silarsuarmi sumi tamaaniittut ’Guutip oqaasianik oqaluutiginnittut’ assigalugit, nalunaarutigisinnaavai. (apustilit suliait 13:5; 17:3; 26:22, 23) Taava oqaluussisartutut kuisimanngitsutut maanna isigineqarsinnaalernera ilagiinnut nalunaarutigineqarsinnaalissaaq. Bibelimik atuaqqissaartarnini ingerlattuaannartariaqarpaa, ataatsimiinnernut peqataajuaannarluni, ilikkakkani maleruartariaqarlugit, ilikkakkanilu inunnut allanut ingerlateqqittariaqarlugit. Taava sivitsunngitsoq kristumiutut kuisinnissani kissaatigilissavaa, taamaalillunilu Guutimit iluarisaalerluni imaluunniit akuerisaalluni aammalu annaanneqarnissamut pisariaqartumik ’nalunaaqqutserneqarluni’. — Hisĩkiale 9:4-6.
Kuisimanngitsunik assuarnartuliortunik ikiuineq
11. Ilagiinnut ilaasortaasoq kuisimasoq ajortuliorpat ilagiit qanoq iliuuseqassappat?
11 Kristumiut kuisimasut ajortuliorsimasut ilagiinnit ikiorneqartariaqarput. (Eprîarit 12:9-13) Kuisimasup ajortuliorsimasup tamatuminngalu peqqissiminnissutiginninngitsup ilagiinnut ilaasortaajunnaarsinneqarnissaata, tamatumalu kingorna taassuminnga sutigulluunniit peqateqanngilluinnarnissap, pisariaqalersinnaanera Bibelimut naapertuuttuuvoq. (1 Korintumiut 5:11-13; 2 Juánase 9-11; 2 Tásalûníkamiut 2:11, 12) Taavami oqaluussisartoq kuisimanngitsoq assuarnartuliorsimappat imaluunniit ajortuliorsimappat ilagiit qanoq iliussappat?
12. (a) Sooq aammattaaq oqaluussisartoq kuisimanngitsoq unioqqutitsisoq naakkinnittumik ikiorneqassava? (b) Lúkarse 12:48-mi allassimasoq unioqqutitsinernut naliliiniarnermi qanoq ililluni atorneqarsinnaava?
12 Judas kajumissaarivoq kristumiut tanitaasut ilaannik qulalersimasunik imaluunniit timip sanngiissutaanut nakkartoorsimasunik naakkinninnissamik — peqqissiminerminnik ersersitsisimappata. (Jûtarse 22, 23; aammattaaq takujuk Korintumiunut agdlagkat áipait 7:10.) Sulili pissusissamisoornerussannginnerluni kuisimanngitsumut unioqqutitsisimasumut peqqissiminerminillu ersersitsisimasumut naakkinnissalluni? (apustilit suliait 3:19) Ilumut, taassumami anersaap tungaatigut tunngavia suli aalajaatsunngorsimanngilaq, aammalu kristumiutut inuunermik misilittagai suli killeqarput. Guutip qanoq isiginninnera arlalitsigut immaqa suli ilikkarsimanngilaa. Bibelimut tunngasunik utoqqaanertat kuisittussanut oqaloqatiginnittarneri suli aqqusaarsimanngilai, imermilu kuisinnissaminut suli piareersimanani. Jesus oqarpoq ’amerlasuunik tunineqartoq amerlasuunik piniarfigineqassasoq’. (Lúkarse 12:48) Taamaattumik kuisimasut annertunerusumik ilimasuffigineqarput; ilisimasaqarnerupput pilluaqqussutisisimanerullutillu — taamaattumillu annerusumik akisussaaffeqarlutik. — Jâko 4:17; Lúkarse 15:1-7; 1 Korintumiut 13:11.
13. Oqaluussisartoq kuisimanngitsoq unioqqutitsisoq ikiorniarlugu utoqqaanertat qanoq iliussappat?
13 Paulusip unnersuussutaa naapertorlugu qatanngutit anersaakkut piukkunnaateqartut tamarmik oqaluussisartunik kuisimanngitsunik assuarnartuliortoorsimasunik ikiuiumassapput. (Naleqqiuguk Galâsiamiut 6:1) Utoqqaanertat ilaminnut marlunnut (immaqa utoqqaanertanut marlunnut siornatigut pineqartumik oqaloqatiginnereersimasunut) ajortuliortoorsimasoq ikiortinniarsinnaavaat. Saaffigissanngilaat sukangallutik naveerniarlugu, kisianni naakkinnittumik saamasumillu. (Tussiaat 130:3) Amerlanertigut Bibelimi oqaaqqissaarutit siunnersuutillu naleqquttut ajortuliortoorsimasup peqqissiminissaanut ajunngitsumillu ingerlaqqilernissaanut iluaqutaasarput.
14, 15. (a) Unioqqutitsisimasoq peqqissimilluinnarpat utoqqaanertat qanoq iliorsinnaappat? (b) Nalunaarut naatsunnguaq suna ilaatigut nalunaarutigineqartarpa?
14 Kuisimanngitsoq unioqqutitsisimaneranut naleqquttumik utoqqaanertat marluk taakkua unnersuukkumassavaat. Ilaatigut aalajangerneqarsinnaasarpoq unioqqutitsisup teokratiimik ilinniarfimmi peqataasarunnaarallarnissaa imaluunniit ataatsimiinnerni oqaaseqartarunnaarallarnissaa. Imaluunniit nalunaarfigineqarsinnaavoq anersaakkut siuariaateqaqqinnissami tungaanut tamanut oqaluussinermut peqataajunnaarallarnissaanik. Anersaakkut siuariaateqareerpat nalunaarfigineqarsinnaalissaaq oqaluussinermut peqataasinnaaleqqinneranik. Unioqqutitsineq tamanit ilisimaneqalersimanngippat ilagiillu minguissusiannut navianartorsiortitsinngippat, ilagiinnut nalunaarutiginissaa pisariaqanngilaq.
15 Utoqqaanertalli taakkua marluk paasigunikku unioqqutitsisoq unneqqarissumik peqqissimisoq, kisianni eqqunngitsumik iliorsimanera tamanit ilisimaneqalersimasoq imaluunniit kingusinnerusukkut ilisimaneqalerumaartoq, taava qanoq iliussappat? Taama pisoqartillugu ilagiinni oqaluussinermut ataatsimiititaq nalunaarfigisinnaavaat, tassanngaanniillu ilagiit nalunaarfigineqassapput ima oqaasertalimmik: „Ilagiinni utoqqaanertanit [pineqartup aqqa]-mut tunngasoq oqaluuserineqareersimavoq. Taanna ilagiinni oqaluussisartutut kuisimanngitsutut ingerlaannassaaq.“ Soorlu taamatut pisoqartillugu tamatigut taama pisartugut, utoqqaanertanit aalajangerneqarsinnaavoq Bibeli aallaavigalugu oqalugiaammik unioqqutitsinermut pineqartumut tunngasumik ilagiinnut unnersuussutaasumik kingusinnerusukkut saqqummiussisoqassanersoq.
16, 17. (a) Pissutsit marluk suut allatut oqaasertalimmik nalunaarutiginninnermik kinguneqartarpat? (b) Nalunaarut tamanna qanoq nipeqarpa?
16 Oqaluussisartulli kuisimanngitsut unioqqutitsisimasut ilaasa asannittumik ikiorneqarnissartik piumaneq ajorpaat. Aammattaaq oqaluussisartut kuisimanngitsut ilaat aalajangersinnaasarput kuisinnissamut ingerlaqqikkumanatik, oqaluussisartutullu isigineqarunnaarumanertik utoqqaanertanut nalunaarutigalugu. Taamaalisoqartillugu ilagiit qanoq iliussappat? Taama ittut suli Guutimit iluarisaasunngorsimannginnertik pissutigalugu ilagiinnut ilaasortaajunnaarsitaasutut oqaatigineqarsinnaanngillat. Unioqqutitsisimasunik unioqqutitsinerminnik peqqissimissutiginninngitsunik ilagiinnut ilaasortaajunnaarsitsisarneq taamaallaat ’qatanngummik taaneqartunut’, tassa kuisimasunut, atuuppoq. (1 Korintumiut 5:11) Taamaappat taava ima paasisariaqarpa unioqqutitsineq isiginngitsuusaaginnarneqassasoq? Naagga.
17 ’Guutip savaataanik paarsinissartik’ utoqqaanertat akisussaaffigaat. (1 Pîtruse 5:2) Utoqqaanertat marluk unioqqutitsisumik ikiuiniaraluartut paasigunikku unioqqutitsisoq peqqissiminngitsoq aammalu oqaluussisartumut piumasarineqartut eqqortinngikkai, taava eqqortitsiunnaarsimaneranik nalunaarfigissavaat.d Kuisimanngitsullu oqaluussisartutut isigineqarunnaarusunnini utoqqaanertanut nalunaarutigippagu taakku tamanna ingerlateqqissavaat. Taamaalisoqartillugu eqqortuussaaq oqaluussinermut ataatsimiititaq piffissaasukkut ilagiinnut ima oqaasertalimmik nalunaarpat: „[Pineqartup aqqa] tusagassamik nuannersumik oqaluussisartuujunnaarpoq.“
18. (a) Taamatut nalunaartoqarpat taava ilagiit iluanni ataasiakkaat oqaluussisartuujunnaartumut qanoq pissuseqarnissamik aalajangerniarnerani suna eqqaamassavaat? (b) Kuisimanngitsut ajortuliorsimasut ilagisarunnaarluinnarnissaat pisariaqarpa?
18 Pineqartoq ilagiinnut ilaasortaasunit qanoq isigineqassava? Taanna tassaasimagaluarpoq ’uppinngitsoq’ ilagiit ataatsimiinnerinut aggertartoq. Taava tusagassamik nuannersumik oqaluussisartunngorusulersimavoq oqaluussisartunullu piumasarisaasut naammassisalersimallugit. Maannalu tamanna kissaatigiunnaarpaa, taamaattumik tassaaleqqippoq inuit silamiut ilaat. Bibelimi piumasarineqanngilaq pineqartup Jehovap Nalunaajaasuinit oqaloqatigiumaneerulluinnarnissaa, tassami ilagiinnut ilaasortaajunnaarsitaasutut pineqanngilaq.e Kristumiulli inuk taama ittoq silamiuusoq Jehovamillu pallorfiginninngitsoq soorunami mianersorfigissavaat, soorlu Israelikkut takornartanik kipineqanngitsunik akunnerminniittunik mianersorfiginnittarsimasut. Taamatut mianersorneq ilagiit ’seernarsaatimininnguamit’ ajortunngortinnaveersaarniarneranni pisariaqarpoq. (1 Korintumiut 5:6) Pineqartup Bibelimik atuaqqissaaqatigineqartaqqilernissani kingorna kissaatigilluinnalissappagu, utoqqaanertallu tamanna ajorinngippassuk, Guutip innuttai ilagalugit Jehovamik pallorfiginninnerup immikkut pisinnaatitaaffissuuneranik paasinninnissaanut immaqa tamanna iluaqutaassaaq. — Tussiaat 100.
19. Utoqqaanertat ataasiakkaat namminneq qanoq annerusumik aamma ikiuisinnaappat?
19 Utoqqaanertanit takuneqarsinnaaguni inuk taama ittoq ilagiinnut nalinginnaanngitsumik ulorianartorsiortitsisuusoq, inuit ataasiakkaat navianartorsiornerpaajusut saaffigalugit mianersoqqusinnaavaat. Oqaluussisartuusimasoq unioqqutitsisimasoq tassaasinnaavoq inuusuttoq aalakoortalersimasoq imaluunniit kanngunartuliortunngorsimasoq. Naak oqaluussisartutut kuisimanngitsutut isigineqarunnaarnera nalunaarutigineqareersimagaluartoq, imaassinnaavoq ilagiit iluanni inuusuttut ilaannik suli peqateqarniarsarisartoq. Taama pisoqartillugu inuusuttut navianartorsiorsinnaasut angajoqqaavi, immaqalu inuusuttut, utoqqaanertanit saaffigineqassapput. (Eprîarit 12:15, 16; apustilit suliait 20:28-30) Oqaluussisartuujunnaarsimasup nipiliorluni imaluunniit perulluliorluni ataatsimiinneq akornusersuleraluarpagu, (qaqutigorujussuaq tamanna pisinnaavoq), taava ataatsimiinnernut tikilluaqqusaannginneranik aammalu susassarinngisaminut innimiilliorluni isersimasutut isigineqarneranik nalunaarfigineqarsinnaavoq.
Meeqqanik mikinernik ikiuineq
20. Angajoqqaat kristumiut meeqqaminnik qanoq ikiuippat, qanorlu inerneqartarpa?
20 Meeqqat sallusuissutip Guutimeersup aqqutaanik ilinniartinnissaat Bibeli naapertussagaanni angajoqqaat pisussaaffigaat. (5 Môrsase 6:4-9; 31:12, 13) Taamaattumik Jehovap Nalunaajaasui kristumiunut ilaqutariinnut kajumissaariuarsimapput sapaatip-akunneranoortumik ilaqutariittut Bibelimik atuaqqissaartarnissamik. Angajoqqaat kristumiut meeqqatik kajumissaartariaqarpaat tunniulluinnarnissartik kuisinnissartillu anguniagareqqullugu, taamaalillutik Guutimit iluarisaalerneq angusinnaaniassammassuk. (ússatit 4:1-7) Tamatuma kusanartumik kingunerisaatut ilagiitsinni takusinnaavavut inuusuttut maligassaalluartut hundredetuusintilippassuit Jehovamik asannittut naassaanngitsumillu taassuminnga pallorfiginnikkusuttut.
21-23. (a) Meeraq unioqqutitsisimappat, kikkut siullermik tamatuminnga suliarinnittussaappat? (b) Taamatut pisoqartillugu ilagiinni utoqqaanertaasut qanoq iliuuseqartarpat?
21 Aammattaaq meeqqanik perorsaasussat siunnersuisussallu, aammalu pisariaqartoq naapertorlugu asannittumillu taakkuninnga killilersuillutillu pillaatissiisartussat siullerpaamik pingaarnerpaamillu tassaapput angajoqqaat. (Evfisumiut 6:4; Eprîarit 12:8, 9; ússatit 3:11, 12; 22:15) Kisianni meeraq oqaluussisartutut kuisimanngitsutut isigineqartoq annertuumik assuarnartuliorsimappat, suliarinnittussat tassaassapput utoqqaanertat, ilagiinnik paarsisutut ’piggassisutullu’ akisussaaffeqartut. — Eprîarit 13:17.
22 Unioqqutitsinerit taama ittut pingaarnerusutigut ilanngutassiami matumani siusinnerusukkut eqqartorneqareersutut iliuuseqarluni utoqqaanertanit suliarineqartariaqarput. Utoqqaanertat marluk suliassamik misissuinissaminnut piginnaatinneqarsinnaapput. Assersuutigalugu, siullermik qanoq pisoqarsimanera, meeqqap tamatuminnga isiginninnera, qanorlu ilitsersorneqarsimanera pillugit angajoqqaat oqaloqatigisinnaavaat. (Môrsasip agdlagaisa tatdlimait 21:18-21 takujuk.) Pissutsinik, meeqqap assuarnartuliornerata kingunerisaanik, atukkaminnik angajoqqaat kristumiut aqutsilluarsinnaappata, utoqqaanertat akuttunngitsumik taakkununnga saaffiginniinnartarsinnaapput unnersuussutinik siunnersuutinillu neqeroorfigisarlugit imaluunniit asannittumik qiimmassartarlugit.
23 Angajoqqaanik oqaloqatiginninnermi ilaatigooriarluni paasinarsisarpoq pitsaanerussasoq meeraq ajortumik ingerlalersimasoq, angajoqqaavi ilagalugit, utoqqaanertanit oqaloqatigineqaruni. Meeqqat qanoq kukkoriataarsinnaanerat aammalu paasisimasakinnerat misilittagakinnerallu ilagiinni nakkutilliisunit soorunami eqqaamaneqassapput. taamaattorli saamallutik meeraq kuisimanani oqaluussisartuusoq unnersuunniassavaat. (2 Timûtiuse 2:22-26) Ilaatigulli paasinarsisarpoq pineqartup oqaluussisartumut piumasarisat eqqortikkunnaarsimagai, taamaalippallu tamanna ilagiinnut nalunaarutigineqassaaq.
24. (a) Meeqqatik unioqqutitserujussuaraluarpataluunniit angajoqqaat taakkununnga sumik pisussaaffeqarpat, qanorlu ilillutik tamanna naammassiniassavaat? (b) Meeraq ilagiinnut ilaasortaajunnaarsitaappat qanoq pisoqassava?
24 Taava angajoqqaat ernerminnut imaluunniit panimminnut suli meeraasumut kukkuluttorsimasumut qanoq iliortariaqarpat? Naak qitornartik oqaluussisartutut kuisimanngitsutut isigineqarunnaareeraluartoq — immaqaluunniit ilagiinnut ilaasortaajunnaarsitaareeraluartoq (kuisimalluni ajortuliorsimaguni) — angajoqqaat suli taassumunnga akisussaassuseqarput. Soorlu nerisassaanik, atisassaanik ineqarneranillu pilersuinertik ingerlatiinnaritsik, taamatuttaaq Guutip oqaasia naapertorlugu ajoqersorlugulu perorsartuaannassavaat. (ússatit 6:20-22; 29:17) Angajoqqaat asannittut taamaalillutik qitornartik Bibelimik atuaqqissaaqatigisarsinnaavaat, aammattaaq ilagiinnut ilaasortaajunnaarsitaasimagaluarpalluunniit.f Meeraq kisimeeqatigalugu atuaqqissaaqatigineqartaruni immaqa ajunngitsumik ingerlaleqqiaarnerussaaq. Aammattaarli imaassinnaavoq ilaqutariit atuaqqissaaqatigiittarnerannut ilaasinnaatitaanera ingerlatiinnarneqartoq. Meeraq ajortumik ingerlalersimagaluarpoq, angajoqqaavisali kissaatigaat taassuma Jehovamut saaqqinnissaa, Jesusip assersuusiaani ernertut tammaraluartutut ililluni. — Lúkarse 15:11-24.
25. ’Uppinngitsunik’ ullumikkut isumassuillutalu ikiuinitsinni suna anguniagaraarput?
25 Oqaluussinitsinni ajoqersuinitsinnilu anguniagarput tassaavoq inuit allat pilluarlutik Guutimik ilumoortumik pallorfiginnittunngortinnissaat. Korinthimi ’uppinngitsut ilisimanninngitsullu kiinaminnik pallorlutik Guutimik pallorfiginninnissaminnut’ killitsipput ima oqarlutik: ’Guuti ilumut ilussinniippoq [akunnissinniippoq].’ (1 Korintumiut 14:25) Nuanneqaaq takullugit ullumikkut inuit amerliartuinnartut Guutimik pallorfiginnikkiartorlutik aggiasut! Inngilip oqaasiisa tamanna misinnangaartumik eqquunneraat: „Naalannarsili Guuti qutsinnermi, nunamilu inuit Guutip iluarisaasa [imaluunniit akuerisaasa] akornanni eqqissineqarli.“ — Lúkarse 2:14, NV. (wD 15/11 88)
[Quppernerup ataani ilanngussat]
a Utoqqaanertat taakku marluk arlaat tassaassaaq ilagiit oqaluussinermut ataatsimiititaannut ilaasortaq. Aappaa tassaassaaq atuaqqissaaqatigineqartartumik atuaqqissaaqatiginnittaanilluunniit ilisarisimanninnerusoq, soorlu ilagiit atuakkamik atuaqqissaaqatigiinneranni aqutsisuusartoq.
b Vagttårnip Peqatigiiffianit 1983-imi saqqummersinneqarsimasoq.
c Kuisimanngitsut oqaluussinermut peqataanissamut piumasarisaasunik naammassinnissimasut manna tikillugu ’akuerisaallutik ilaasut’-nik taasarsimagaluarpavut. Eqqornerussaarli taaguut „oqaluussisartoq kuisimanngitsoq“ atussallugu, pingaartumik eqqarsaatigalugu Guutip akuerinninnera imaluunniit iluarinninnera, Bibeli naapertorlugu, tunniulluinnarsimallutik kristumiunut kuisimasunut taamaallaat tunngammat.
d Aalajangiinermut tamatumunnga isumaqataanngikkuni, tamatuma isumaliutigineqaqqinnissaa (ullut arfineq-marluk qaangiutsinnagit) pineqartup piumasarisinnaavaa.
e Kuisimanngitsut ajortuliorsimasut ajortuliaminnillu peqqissiminnissutiginninngitsut siornatigut oqaloqatigiumajunnaarluinnartarsimagaluarpavut. Naak tamanna allanngorsimagaluartoq unnersuussut Korintumiunut agdlagkat sujugdlît 15:33-miittoq suli maleruarneqartariaqarpoq.
f Qanigisat ilagiinnut ilaasortaajunnaarsitaasimasut najugaqatiginngisat Bibelimi unnersuussutaasoq, Vagttårnet 15. aprili 1988-imi, qupp. 26-31-mi, aamma Vagttårnet 15. novemberi 1981-imi, qupp. 18-23-mi sammineqartoq, naapertorlugu pineqassapput.
Eqqaamavigit?
□ ’Uppinngitsoq’ ataatsimiinnernut najuuttartoq kristumiunit qanoq isigineqarpa?
□ Bibelimik atuaqqissaaqatigine- qartartup oqaluussinermut peqataalernissani kissaatigippagu, taava utoqqaanertat qanoq iliussappat, oqaluussisartunngoru- suttullu suut akuerissavai?
□ Oqaluussisartoq kuisimanngitsoq sualuttumik ajortuliorsimappat qanoq iliortoqassava?
□ Meeraq angajoqqaamini najugaqartoq assuarnartulior- simappat, taava angajoqqaaminit, utoqqaanertanillu, qanoq ikiorneqassava?
[Qupp. 11-mi assiliartaq]
Oqaluussisartunngorneq kuisinnissamut Guutimillu iluarisaasunngornissamut alloriarneruvoq pingaartoq