Tamanut naapertuilluartumik iliorneq — Piviusunngorumaarpa?

LONDONIMI illut pingaartumik pisimasoqarfiusimasut ilaat, Old Bailey, qitiusumik pinerluttunik eqqartuussisarfiuvoq. Illorsuup qaavaniippoq inuusaliaq arnaq naapertuilluassutsimut assersuutaasoq. Assammi illuani oqimaaluttamik tigumiaqarpoq nalunaarumallugu uppernarsaatit saqqummiussassat peqqissaartumik nalilerneqartarnissaat. Assammi illuani pana tigumiarpaa pisuusut pillarsinnaajumallugit pisuunngitsullu illersorsinnaajumallugit. Naapertuilluassutsimut assersuusiaq taama ittoq ilisimaneqarluarpoq, ilaatigullu sattaateqartinneqartarpoq kinaassusersiorneq ajornera ersersikkumallugu.a

Naapertuilluassuseq taamatut ersersinneqartoq takugaanni pissusissamisoorpoq aperissalluni nunaqarnersoq naapertuilluassutsimik taama ittumik, tassa tamanut naapertuilluartumik iliornermik, tamakkiisumik atuiffiusumik. Soorunami nunani tamani inatsiseqarpoq aamma inatsisinik unioqqutitsaalisitsisoqarluni. Aammattaaq eqqartuussisarnermi periaaseqarpoq, eqqartuussisartoqarluni eqqartuussiveqarlunilu. Inuppassuaqarsimavorlu peqqusersuitsunik inuit pisinnaatitaaffiinik tunngaviunerusunik aalajangiussiniartunik inuillu tamarmik assigiimmik naapertuilluartumik iliorfigineqarnissaannik qularnaallisaaniartunik. Noqqaaniarnerisali annertunerusutigut iluatsinngitsoorsimanerat erseqqilluinnarpoq. Peqquserluttuliornerit, inunnik nakerisarsiornerit naapertuilluanngitsuliornerillu ullut tamangajaasa takusarlugillu, tusaamasarlugillu atuartarpavut.

Arnamut eqqartuussivimmut sassaqquneqartumut pisimasoq una eqqarsaatigeriaruk. Pisuunerata pisuunnginnerataluunniit aalajangerneqarnissaa sioqqullugu eqqartuussisup arnaq taanna paasitippaa taassumunnga unnerluutit „aaqqissorumaarlugit“ akunnittarfimmi moteliusumi naapeqatigissappani, kinguaassiuutitigut atoqatiginissaa piumasarinnguatsiarlugu. Eqqortumik iliornermik naapertuilluarnermillu qulakkeerisussatut isigineqartuugaluit paasineqartarput eqqortumik oqaatigalugit peqquserluttuusut imaluunniit naammattumik piginnaassuseqanngitsuusut. Atuagassiami Time-imi oqaluttuarineqarpoq USA-p naalagaaffiisa ilaanni eqqartuussisuunerit ilaat tallimaagaangamik pingasut eqqartuussisoqatimik ilaannik ikiuinerminni assuarnartuliornerminnik unnerluutigineqarsimasut.

Pinerluttut pillarneqanngitsoortut tusaamagaangamikkik inuppassuit peqqarniitsunngortarput, namminnerlu inatsisinik unioqqutitsigajuttunngortarlutik. (akugdlîssup oĸausê 8:11) Hollandimi pissutsit ima allaatigineqarput: „Hollandimiut ilarpassuisa politikkerit maleruutiassutsimut pinerlunnernik siuarsaataasumut kajumissaarisuunerarpaat. Ilaasalu eqqartuussisoqatigiit pisuunerarpaat, ingammik eqqartuussisut . . . annikitsuinnarmik, ilaatigut ingasattumik qajassuussisumik, pillagassanngortitsisutut pisuunerarlugit.“ Naapertuilluassutsimilli annertunerusumik pisariaqartitsingaarneq tassaaginnanngilaq eqqartuussisarnermi periaatsip pitsanngorsarnissaa inatsisinillu pitsaanerusumik unioqqutitsaalisitsineqarnissaq.

Soorlu naluneqanngitsoq piitsorpassuit aningaasatigut naapertuilluanngitsumik iliorfigisaatillugit nunarpassuarni amerlanngitsunik pisoorsuaqarpoq pisuunngoriartuinnartunik. Inuit inuunermi atukkaminnik pitsanngorsaaniarnissaminnut imaluunniit allaat ullormut pisariaqavissunik pissarsiniarnissaminnut ammip qalipaataa, nagguigisaq, oqaatsit, angutaaneq arnaanerluunniit, imaluunniit upperisaq pissutigiinnarlugit periarfissaqartinneqarneq ajornerat naapertuilluanngitsuliorneruvoq. Tamatuma kingunerisaanik inuit millionilikkuutaat piitsuuneq, kaanneq napparsimanerlu atugarliuutigeqaat. Nunat pisuut nutaalianik atortorissaarusersorluagaasunik napparsimmaveqarfeqarput, nunanili piitsuusuni inuit millionilippassuit naalliullutillu toqusarput imermut minguitsumut nakorsaatinullu nalinginnaanerusunulluunniit akissaqannginnamik. Taakku naapertuilluassutsimik annikitsumilluunniit misigisimasaqarpat? Inunngornerminniilli toqunertik tikillugu misigisaat tassaavoq naapertuilluanngissuseq! — akugdlîssup oĸausê 8:9.

Naggataatigut taaneqarsinnaapput atugarliornerit inunnit pilersitaanngikkaluartut naapertuilluanngitsutulli misigisaasut. Eqqarsaatigeriakkit meeqqat inunnguutsiminnik innarluutillit — tappiitsut, eqqarsartaatsimikkut amigaateqartut imaluunniit iloqiaasut. Arnap meeqqamik innarluutilimmik erninini imaluunniit meerartaami inunngornermigut toqunera naapertuilluanngitsutut misigissannginnerpaa arnat allat naalungiarsuutitik peqqissut innarluuteqanngitsullu suliarerujooraat takullugit? Naapertuilluanngitsumik iliorfigineqarnerit taama ittut aaqqissorneqarumaarnissaat tulliuttuni sammissavarput.

Pissutsilli maannakkut atuukkallartut eqqarsaatigalugit akugdlîssup oĸausê 1:15-imi allassimasoq isumaqatiginnginnerpiuk? Tassani kunngip silatuup misilittagartuullu inuit isiginnittaasiat naapertorlugu pissusiusoq oqaaseqaatigaa: ’Sangungasut narlorsinnaanngillat, amigarnerillu kisissaanngillat.’

Angut taassumannga suli tusaamasaanerusoq tassaavoq Jesus Kristus. Lúkarse 18:1-5-imi eqqartuussisoq ’Guutimik mianerinninngitsoq inummillu ittoorisaqanngitsoq’ pillugu taassuma assersuusiaa atuarsinnaavarput. Assersuusiaani eqqartorneqarpoq uillarneq eqqartuussisumik kimigiiserfiginnittuartoq inatsisit naapertorlugit pisinnaatitaaffigisaminik pisinnaateqqulluni. Jesusili oqarpoq eqqartuussisup ajortup taassuma arnaq taanna ikioraa kimigiisertuaannarneranik kipiluttuginninnini pissutigiinnarlugu. Tassa naapertuilluanngitsuliornerit amerlaqisut Jesusip arajutsisimanngilai. Aap, kingornagut nammineq naalliutsitaavoq naakkittaatsumillu toqunneqarluni sallusumik unnerluutigisaasimanini pissutigalugu; taamaalilluni ingasattumik inatsisinik unioqqutitsisumik naapertuilluanngitsumillu nammineq iliorfigineqarpoq!

Inuppassuit upperisaqarput Guuteqartoq naapertuilluanngitsuliortoqarneranik sianiginnittumik. Nunat Amerika Qiterlermiittut ilaanni naalagiartitsilluni paavi Johannes Paul ima oqarsimavoq: „Inummik soqutigittaatsuliorfiginninneq, inuup pisinnaatitaaffiinik unioqqutitsineq, ingasattumik naapertuilluanngitsumik iliorfiginninneq, naalliutsitsineq, innimiillisaarluni angerlarsimaffia iserfigalugu inummik aallarussineq imaluunniit inuusinnaatitaaneranik arsaarineq, Guutimut pinerluttuliorneruvoq ajortuliungaarnerullunilu.“ Tamakku oqaasiupput tusarneqisut. Taamaakkaluartorli naapertuilluanngitsuliornerit piuaannarput. Nunami tassani meeqqat tallimat inorlugit ukiullit quliugaangamik arfineq-pingasut timip pisariaqagai inorlugit nerisaqarsimapput. Nunap taassuma inuisa 2 procentiisa nunaatit 80 procentii pigaat.

Ilumut Guuteqarnerpa ingasattumik naapertuilluanngitsuliornernik sianiginnilluartumik, illit naapertuilluanngitsuliorfigineqarninnik nallittuilluni nakkutiginnittumik? Naapertuilluarnerup atuutilersinneqarnissaa qaquguluunniit taassuma isumagiumaarnerpaa? (wD 15/2 89)

[Quppernerup ataani ilanngussaq]