Nalitsinni Satanisiorneq

QULARNANNGILLUINNARPOQ Satanip pallorfigineqarnissani kissaatigigaa. Jesusip ’nunamut pallorfigippani’ akilingaarnissaanik Satanip neqeroorfigisimagaluarpaa. (Matîuse 4:9) Soorunami Jesus taamaaliorumasimanngilaq, maligassiaali tamanna inuit tamakkeratik malissimavaat. Satanisiorneq allaat nalitsinni atugaaqaaq.

Assersuutigalugu, Canadami aviisit ilaat The Calgary Herald nangeqattaartunik „Diaavulup ajoqersugai“-nik qulequtalinnik ilanngutassiisimavoq. Aviisimi pinerluttut pillugit ilanngutassiisartoq ima issuarneqarpoq: „Apersuisarnikkut paasisimavara Satanisiorneq inuiaqatigiit iluanni immikkooqatigiinni aalajangersimasuniinnaanngitsoq atuuttuusoq. Calgarymi politiit aammalu Royal Canadian Mounted Police-ip pisimasunik nalunaarusiaasa ersersippaat Calgaryginnarmi inunnik 5000-it missaanniittunik Satanisiortartoqartoq.“

Tusagassiuutinut nalunaarutitigut allatigut erserpoq Amerika Avannarlermi tamarmi Europamilu Satanisioqatigiit assigiinngitsut saqqummeralersimasut. Aammattaaq politiit Satanisiornermut soqutiginninnermik ersersitsisimapput. Sooq? Arlalippassuartigut paasisimagamikku pinerluttuliornerit Satanisiornerillu imminnut attuumassuteqartuusut. Pinerluttorsiortoq ungasinngitsukkut ima oqarsimavoq: „Suliarisarput tassaavoq upperisarsiorneq inuit ilaannit aallunneqartoq, soorluttaaq inuit ilaasa kristumiussuseq, juutiussuseq imaluunniit muuamaakkuussuseq upperigaat. Pisut tassaanngillat pinerluttuliorniaannarluni pinerlunnerit, tassaallutilli upperisarsiorneq piinnarlugu pinerlunnerit.“

1969-imi Californiami Mansonikkut toqoraaneri tamatumunnga assersuutissaalluarput malunnartut. Oqaluttuarisaanermik ilisimatuup Jeffrey Russellip oqarnera naapertorlugu „Manson oqarsimavoq Diaavuluullunilu Kristusiulluni . . . Mansonip ajoqersugaata, Tex Watsonip, Sharon Tate toqussallugu tikiukkami ima oqarsimavoq: ’Diaavuluuvunga; Diaavulup suliaa naammassiartorlugu tikiuppunga.’“ Tamatiguunngitsorli Satanisiorneq taama saqqumilaartigisarpoq.

Ilisiinniarneq, angakkuarniarneq anersaarsiornerlu

Satanisiorneq tassaaginnanngilaq toqqaannartumik Satanimik pallorfiginninneq. Apustili Paulus ima mianersoqqusisimavoq: ’Guutimik nalusut pilliutitik anersaapilunnut pilliutigisarpaat.’ (1 Korintumiut 10:20) Aap, iluamik oqaatigalugu anersaapilussiorneq tassaavoq Satanisiorneq, tassami Satan taaneqarpoq ’anersaapiluit naalagaat’. (Mákorse 3:22) ’Guutimik nalusulli,’ imaluunniit „inuiaat“, iliuusii suut anersaapilussiornertut Satanisiornertulluunniit taaneqarsinnaappat? Guutip Israelikkunnut oqaasiini tamatumunnga assersuutissaqarpoq: ’Ilinni eqquiniartoqassananilu toornisoqassananilu serrasoqassananilu angakkoqassananilu qilasartoqassananilu timaajagarsiortumillu siunersiuisoqassanani nalunaaqqutinillu sukuiaasoqassanani toqusunillu apersuisoqassanani. Massa taamaaliortut tamaasa Jehovap maajugai.’ — 5 Môrsase 18:10-12.

Tassa Brasiliami voodoosiortut palasiisa imaluunniit hougan-ikkut mambo-kkullu Haitimiittut aattalimmik pilliisarnerinut anersaanillu torlorfiginnittarnerinut mianersoqquneqarpugut. Aammattaaq angakkunut inunnik ersilersitsiniaallutik toqusut anersaavinik atassuteqarfiginninnerartartunut, aammalu immiartorfik atorlugu anersaarsiornermik ’pinnguarnermut’ mianersoqquneqarpugut. — Naleqqiuguk Sâmualip agdlagai sujugdlît 28:3-20.

Aammattaaq Afrikami sumiiffinni assigiinngitsuni ilisiinniarneq atugaaqaaq. Assersuutigalugu, Afrika Kujallermi anersaarsiornikkut katsorsaaniartartut pissaaneqaqaat inunnillu upperineqartorujussuullutik. Ungasinngitsukkut aviisini atuarneqarsinnaavoq inuppaaluit inuppassuarnit uumisoqisunit uumatillugit ikuallanneqarsimasut, nunaqarfimmiut ilaasa kallerup inneranik eqqortissimanerannut pisuusutut pasineqarmata! Inuit pisuussuteqanngitsut taakku „pissusissamisuunngitsumik“ pisoqarsimaneranut pisuusutut anersaarsiornikkut katsorsaaniartartunit unnerluutigineqarput, taavalu orpimmut qilersuunneqarlutik ikuallanneqarlutillu. Angakkuarniarnermut imaluunniit ilisiinniarnermut upperinninneq taama ittoq aammattaaq anersaapilussiorneruvoq.

Afrikamiinnaanngitsorli ilisiinniarneq aallunneqarpoq. 1985-imi Herbert D. Dettmer, Virginiami USA-miittumi parnaarussivimmi pinngitsaalisaalluni sulisitaasarfimmiittussanngortitaalluni pillagaasoq, eqqartuussisunit akuerineqarpoq annoraaminernik atortussanillu allanik, parnaarussivimmi upperisaminik aallussinissaminut atortussaminik, tigummisaqarnissaminik. Suna upperisarigamiuk? Eqqartuussisut allattugaat naapertorlugit ilaasortaaffigaa „Church of Wicca (taamaalilluni imaappoq ilisiinniartartuusoq)“. Tamatuma kingunerisaanik Herbert Dettmer pallorfiginninnermini ikuallassaatip, immap tarajuata imaluunniit taratsup jodertaqanngitsup, naneruutit, tipigissaatip pujoortittakkap, nalunaaquttap itersaasartup atisallu qaqortup takisuup atornissaanik akuerineqarpoq.

Taamaalilluni malunnartorujussuuvoq aammattaaq Kitaani ilisiinniarnerup atugaanera. Aviisimi Tuluit Nunaanni saqqummersartumi Manchester Guardian Weekly-mi ima allassimasoqarpoq: „Ukiut tallimat matuma siorna isumaqartoqarpoq Tuluit Nunaanni 60.000-it missaanni ilisiitsoqartoq. Ullumikkut [1985-imi] kisitsit tamanna 80.000-imut qaffariarsimasutut nalilerneqarpoq. Atuagassiaq qaammammut saqqummersartoq Prediction, ullorissat najoqqutaralugit siulittuiniartarnermik angakkuarnerninnillu sammisaqartuusoq, 32.000-inngorlugu naqiterneqartarpoq.“

Satanisiorneq nipilersornerlu

Atuakkiamini Mephistopheles — The Devil in the Modern World-imi professori Russellip ilisimatinniarpaatigut Satanip siunertaanut siuarsaataasumik allamik. Taanna ima allappoq: „Toqqaannartumik Satanisiorneq 1970-ikkunni atorneerukkiartorasuarsimavoq, Satanisiornermulli tunngasortai 1980-ikkunni ingerlaqqissimapput nipilersorneq ’heavy-metal’-imik taaneqartartoq atorlugu Diaavulumik aqqagut torlorfiginnittarlunilu pissutsinik Satanerpaluttunik soorlu naakkittaassutsimik, ikiaroornartunik atornerluinermik, amiilaarnassutsimik, isumatsangaartarnermik, inuulluapilukkumassutsimik, peqqarniisaarnermik, nipiliornermik, paatsiveerunnermik nuannaanngissutsimillu ingasattumik malunnartitsiniaasarnikkut.“ — Uagut allanneri uingasunngorlugit erseqqissarpavut.

Nipilersortartut nipilersornerminnik Satanerpaluttunngorsaasimasut taamaaliornertik immaqa ilumoorutinngikkaluarpaat. Taamaaliorsimapput immaqa uissuummisitsiniaannarlutik imaluunniit eqqumiigineqarniaannarlutik. Taamaakkaluartorli inunnut sunnertiasunut tamanna sakkortuumik sunniuteqartarpoq. Professori Russellip maluginiarsimasaa naapertorlugu „naak annerusumik minnerusumilluunniit ilumoorutinngikkaluarlugu isummanik ajortunik siaruarterineq inunnut sanngiitsunut maleruutiasunullu aserorsaataasumik sunniuteqarsimavoq. Tamatuma ilaatigut kingunerisimavai uissuumminaqisumik kanngunartunik pinerluttuliornerit, soorlu meeqqanik pinngitsaaliilluni atoqateqartarnerit aamma uumasunik naalliutsitsilluni aqqunartiterisarnerit.“

Ungasinngitsukkut New Yorkermiut uissuummerujussuarput aviisimi atuaramikku nukappiaqqap 14-inik ukiullip, „Satanisiornermik pulaneqarsimasup“, arni kapillugu toqussimagaa kingornalu imminorluni. Atuagassiaq Maclean’s naapertorlugu ilaqutariinnik siunnersuisartoq Canadamiu oqarsimavoq inuusuttuaqqat ajornartorsiuteqartut amerliartuinnartut nassuerutigisimagaat „Satanisiornermik aallutaqartuullutik, taamaaliornerminnilu ikiaroornartunik nipilersornermillu sakkortoqisumik ’heavy-metal’-imik sunnertisimagajuttarlutik“.

Tassaanngilaq aliikkutaq ajoqutaanngitsoq

„Kanaalinik“ taaneqartartut, imaluunniit anersaarsiortut, arnaagajunnerusut, aqqutigalugit toqungasut anersaavinik atassuteqarfiginninniartarneq ullumikkut USA-mi ornigineqartorujussuuvoq. Anersaarsiortut anersaalerinerinut taama ittunut ilaajumallutik inuit dollarinik hundredenik arlalinnik akiliigajuttarput. Aviisini eqqartorneqarsimavoq „kanaalip“ aalajangersimasup ataatsip anersaalerineri „tv-kkut qaammataasakkoortutigut aallakaatinneqarajuttartuusut, taamaalilluni inunnit tuusintilikkuutaanit illoqarfinni qulini assigiinngitsuniittunit toqqaannartumik isiginnaarneqarsinnaasarlutik“. Taamaaliortarneq Bibelip anersaarsiortut imaluunniit siulittuiniartartut ingalassimaqqullugit peqqusineranut ersarissumik akerliuvoq. Taamaaliorneq aammattaaq anersaapilussiornertut taaneqarsinnaavoq, aammalu anersaarsiornertut allatulli Satanip sallulluni inuup toqusuitsumik tarneqarneraaneranik tunaarinnitsigaaq. — akugdlîssup oĸausê 9:5; Hisĩkiale 18:4, 20.

Silarsuarmi uumissuiffioqisumi Diaavulup sunniinera

Ukiuni 1900-kkunni makkunani pissutsit uissuumminartut inuiaat atugarisaat pissutigalugit inuppassuit imminut aperisarput inuit ilimagisaannit annerungaartumik Satan sunniuteqannginnersoq. Professori Russellip tamanna tikippaa ima oqarami: „Atomimik sakkussianik massakkut ima peqartigaagut allaat missiliuunneqarluni uumassusillit tamaviisa 70-eriaammik toqussinnaagaat. Taamaakkaluartoq sorsunnissamut, inummut kimulluunniit, nunamut sumulluunniit imaluunniit eqqarsartaatsimut sumulluunniit iluaqutaanavianngitsumut, piareersartuarsinnarpugut. Millionilippassuit amiilaarnangaartumik toqunerannik tamanna kinguneqaannassaaq. Pissaanerup suup-una aqqummut, ullut tamaviisa navianarsiartuinnartumut, pinngitsaalilluta ingerlatikkaatigut? Atomimik sakkoqarluni sorsunnikkut nunarsuup aserorneqarnera kia iluaqutissarsiffigisinnaavaa? Iluaqutissarsisinnaasutuaq tassaavoq pissaanilik aallaqqaataaniilli naakkittaaqaluni ajoqusiiumatoqalunilu silarsuup aaqqissuussaasup suujunnaarnissaanik kissaateqarsimasoq.“

Pissaanilik taanna kinaava, imaluunniit suua? Professori nammineq ima akivoq: „Diaavulu tassaanerarneqarsimavoq anersaaq sapinngisamik annertuumik Guutip silarsuaanik aaqqissuussaasumik aseruiniarlunilu piuneerutitsiniartoq. Pissaaneq atomimik sakkussiornitsinnik aqutsisoq tassaannginnerpa pissaaneq taannaasoq nammineq piunerminik miserratiginninniartuarsimasoq? Nunarsuarput taamatut navianartorsiorluinnaqqissaartillugu taamaassinnaanera assortorsinnaanngilarput.“ Taamaassinnaanera kristumiunit assortorneqanngilluinnarpoq! Silarsuarmi matumani Satanip sunniuteqarnerujussua Jesusip eqqaavaa taanna taagamiuk: ’silarsuup matuma naalagaa.’ (Juánase 12:31) Satanip ullumikkut qanoq innera Bibelimi sarĸúmersitat-ni ima oqaatigineqarpoq: ’Diaavulu kamattorsuuvoq, piffissakissutsi nalunnginnamiuk.’ (sarĸúmersitat 12:12) Tassani aammattaaq oqaluttuarineqarpoq Satanip, anersaapiluit ikiortigalugit ilissarsiornermigut, silarsuup matuma pissaanilissui ’sorsunnissamut Guutip ajugaqanngitsup ullussarsuani piumaartumut katersorniarai’. (sarĸúmersitat 16:14) Aap, inuiaat ajorluinnartumik imminnullu aseroqqajaallutik ingerlanerat paasiniassagutsigu Satan Diaavulup sunniinera qaangiinnarsinnaanngilarput.

Apustili Paulusip Satan taavaa ’silaannarmut anersaamullu naalasseriinnerup qitornaani maanna sunniisumut naalagaasoq’, aamma ’silap matuma guutia’. (Evfisumiut 2:2; 2 Korintumiut 4:4) Tupinnarpallaanngilaq inuppassuit imminut aperisarmata ukiuni „qaammarsagaaffiusuni“ ilisimatuussuseqarfiusunilu makkunani pinerluttuliaasut — sorsunnersuit marluk, Europami Kampucheamilu inunnik toqoraanersuit, Afrikami kaannersuaq naalakkersuinermik pissuteqartoq, upperisaq ammillu qalipaataa pissutigalugit silarsuarmi sumiluunniit avissaartuunnersuaq, uumissuineq, inuarnerit, aaqqissuussaasumik naalliutsitsinerit, aammalu ikiaroornartunik atornerluinerup inuiaqatigiinnut sunniutai aserorsaataasut, ilaannaat taassagaanni — tassaasinnaannginnersut anersaap ajoqusiiumatuup pissaaneqangaartullu inuiaat Guutimit avissaartinniarlugit immaqalu nunarsuaq tamakkerlugu imminortinniarlugit pilersaarutaasa kinguneri. (wD 1/9 88)

[Qupp. 7-mi assiliartaq]

Guutip innuttaasa aliikkusersoqatigiinnerit peqqinnartut piumaneruaat nipilersornerillu Satanerpalaartut piumanagit