Satan kinaassusiliviua?
SATANIP piunera upperaajuk? Upperigukku, ikinnerussuteqariartuinnartut ilagaatsit. „1980-ikkunni Diaavulu upperineeruppoq. Taamaallaat katuullinit naaggaartunillu talerpilliunianit, karismalerisunit [tupinnartulianik upperisallit], muuamaakkuusunit græsk-ortodoksenillu aammalu angakkuarniartartunit amerlanngitsunit suli upperineqarpoq,“ atuakkami Mephistopheles — The Devil in the Modern World-imi (Mephistopheles — Diaavulu silarsuarmi nutaanerusumi), Jeffrey Burton Russellimit allanneqarsimasumi, taama oqaatigineqarpoq.
Kikkulli tamakkeratik Satanip piuneranik upperinnikkunnaarsimapput. „Diaavulu uumavoq sulilu silarsuarmi sunniuteqartarluni,“ ungasinngitsukkut Italiami oqalugiarnermini paavi Johannes Paul II taama oqarpoq.
Paavi eqqortumik oqarsimappat, taava Satan silarsuarmi piumasaminik iliornissaminut periarfissaqarluarsimassaaq. Piunerami inuit upperinngikkunikku soorunami taava aammattaaq sunniineri akiorsinnaanavianngilaat. Kardinali Ratzinger, Vatikanimi ajoqersuutinut tunngasunut oqartussaanerit ilaat, ima oqarsimavoq: „Diaavulup inissisimaffinnaani — kinaassutsimik isertuineq — qimarnguffigisinnaavaa.“
Ilumulli taama ittumik Diaavuloqarpa? Bibeli upperigutsigu apeqqummut tamatumunnga angertariaqarpugut! Atuakkami isumassarsisitaanikkut allanneqarsimasumi tassani Diaavulu — imaluunniit Satan — atermigut taaneqarluni arlaleriarluni eqqartorneqartarpoq. Bibelimi allattut ilaata, Paulusip, ilaanni ’apustilioqqusersut’ aammalu ’peqquserluttulillutik sulisut’ kristumiut ilagiissaasa iluanniittut mianersoqqussutigigamigit ima allappoq: ’Tupinnanngillammi, Satan nammineq qaamasup inngiliatut pissuseqartuusaartarmat.’ Tassa Paulusip Satan kinaassusilivittut, silassorissutut salloqittaagajuttutullu isigaa. — 2 Korintumiut 11:13, 14.
Sunaliuna ullumikkut inuit Satanimik piviusutut isiginninnginnerannut pissutaasoq? Taamatut isumaqarnerat tassaaginnarunarpoq ullumikkut isummap saqqumilaartup ersernera. Piffissami, inuit ilaannit ’kristumiussutsip kingorna ukiut’-nik taaneqarsimasumi, guutiitsuunerup, inuulluataarnermik pingaartitsivallaarnerup, timip piinik pingaartitsivallaarnerup aammalu kommunistiussutsip inuiaqatigiippassuarni upperisarsiornermik inangiiffigisimasaani, inuuvugut. Inuit millionilippassuit Guuteqarneranik upperinnikkunnaarsimapput inuunermillu namminneq isumaliutersuutiginninnerminni taassuma piunera pisariaarutsissimallugu. Guutimik miserratiginniitigalutik Satan miserratigisimavaat. Kristumiuuneraqatigiinnut ilaasortaasut ilaat oqartaraluarput Guutimut uppertuullutik, kisianni isumaqanngillat Satanimik upperinninneq ukiuni hundredelinni maanna atukkatsinni pisariaqartoq.
Guutimulli upperinninnermik ajattuineq nutaajunngilaq. Ukiut 3000-it matuma siorna tussiaasiortoq hebræeriusoq David ima allappoq: „Silaatsut uummatimikkut oqartarput: ’Guuteqanngilaq!’ Ajortumik maajunnartumillu iliorput.“ (Tussiaat 14:1; 53:2) Allami ima allappoq: „Guutiitsoq anneruniarluni isumaliorpoq: ’Pillarumanavianngilaanga, naami guuteqanngilaq!“ (Tussiaat 10:4) Tassa aammattaaq taamanikkut inuit Guuteqanngitsutut iliortarsimapput. Guutillu piunera upperinngikkaangamikku soorunami aammattaaq Satanip piunera upperineq ajorpaat.
Satanip piuneranik suli upperinnittualuit
Soorlu takoreeripput Diaavulup piuneranik suli upperinnittoqarpoq. Tamakkununnga ilaatigut ilaapput Zarathustrap pissutsit marluk imminnut akerleriilluinnartut pillugit ajoqersuutaanik, tassa ajunngitsup ajortullu, Guutip Diaavulullu, piujuarsimasariaqarnerannik ajoqersuummik, upperinnittut. Inuit ilaat allaat isumaqarput ajunngitsoq ajortorlu tassaasut Guutip pissusii ersarinnerit marluk. Aammattaaq kristumiuuneraqatigiit muuamaakkuusullu iluanni suli amerlasuunit Satanip piunera upperineqarpoq. Titartaasartup franskiusup ilisimaneqarluartup, Gustave Dorép, titartakkamini takutittagaasut, Satan anersaatut sululittut nassoqarlunilu pamiulittut „tarninik toqusuitsunik“ „anniarfiup inneraniittunik“ nakkutiginnittutut takorloorneqartarpoq.
Inuilli allat Satanimik upperinninnerat suli itinerusarpoq. Allaat pallorfigisarpaat — toqqaannartumik torlorfigineratigut imaluunniit ileqqulersuutit satanerpaluttut imaluunniit anersaapiluppaluttut ikiortigalugit. Ukiuni tuusintilinni ilisiinniutit angakkuarniutillu Satanisiornermut attuumassuteqartutut isigineqarsimapput. Allaat ukiuni moderniusuni qularajuttoqarfiusuni uagut atukkatsinni Satanisiorneq atugaaqaaq. Nalitsinni Satanisiornerup ilisarnaataasa ilaat maanna sammeriartigik. (wD 1/9 88)
[Qupp. 3-mi assiliartaq]
„Anniarfimmik“ Satanerpaluttumik Buddhasiortut eqqarsaatersuutaat