Iivangkiiliumik oqaluussissutiginninneq ’nunap isuanut allaat’

„Harmagedonimut ammut kisitsineq suli ingerlatillugu, Jehovamut Nalunaajaasut sapinngisamik amerlanersagut piuneerussinissarsuarmit amiilaarnartumit annaanniarlugit suliniaqqissaarnertik annertusiartorpaat.“ — Taama pingaarnerutillugu Ian Boyne allassimavoq aviisimi „The Sunday Gleaner“ 15. martsi 1987-imeersumi, Kingstonimi, Jamaicamiittumi.

PINGAARNERUTILLUGU allaatiginnissimasoq qulaani issuarneqartoq ilumoorluinnartumik oqarpoq. Jehovamut Nalunaajaasut qularinngivippaat Harmagedon qanillisoq, aap, ungasinngitsukkut Guuti akuliukkumaartoq ajortullu piiarlugit, aammattaaq qularinngivippaat inuiaat piffissami eqqartuutiffissamiittut. (sarĸúmersitat 14:6, 7) Taamaattumik pingaaruteqartorujussuuvoq inuit tusagassamik nuannersumik misissuinissaat. Jesus Kristus, iivangkiiliumik nalunaajaatiginnittut maani nunami inuusimasut annersaat, ukiuni hundredilinni siullerni peqatigiiffimmik, ’nunap isuanut allaat’ nalunaajaasussamik, pilersitsivoq. (apustilit suliait 1:8; Kulorsamiut 1:23) Siulittuivoq nalunaajaanermik taama ittumik uagut nalitsinni ingerlatsisoqarumaartoq. (Matîuse 24:14) Peqatigiiffik taamatut sulissutiginnittoq tassaavoq Jehovamut Nalunaajaasut, nunani nunallu immikkoortortaanni 210-ni Guutip naalagaaffianik tusagassamik nuannersumik ilungersuussillutik oqaluussissutiginnittut.

Jehovamut Nalunaajaasut peqatigiiffiat oqaluussinissaannaq pillugu pilersinneqanngilaq, aammali ajoqersuinissaq siunertarineqarpoq. Jesusip kiffani ima peqqusimavai: ’Inuit inuiaqatigiinnit tamaneersut ajoqersuganngortissigik ajoqersorsigillu peqqusakka tamaasa maleruaqqullugit.’ (Matîuse 28:19, 20) Oqaluussinermik tamatuminnga ajoqersuinermillu iluaqutiginnissimasut maanna ilisaritilaarniarpavut.

Mexico

Atagu siullermik Virginia ilassilaariartigu. Taanna 110-nik ukioqarpoq, erseqqissarusuppaalu „Jehovap ilinniarnissaanut kiffartuunnissaanullu kingusippallaalinngisaannarmat“. Inuusukkallarami ukiuni sisamani immikkut ittumik atisaqarsimavoq Guutimut mianerinninnini ersersinniarlugu. „Kisianni arlaannik amigaateqarpunga,“ oqarpoq. Sumulluunniit saaffiginnikkaluaraangami Bibelimut tunngatillugu apeqqutigisartagai naammaginartumik akineqanngisaannarput. Soorlu oqaluffimmi ajoqersuisartut ima aperigaluarmagit: „Guutip aqqa sunaava?“ akiinnarsimapput: „Guuti ateqarpoq Guuti.“

Taamaaginnanngilarli. 1983-imi paniata pania Jehovamut Nalunaajaasunit Bibelimik atuaqqissaaqatigineqartalerpoq. Erngutaata taassuma apeqqutigisartagaanik akissutissarsisippaa oqaluttuukkamiuk Guuti Jehovamik ateqartoq. (Tussiaat 83:18, Wolf) Taamaalillunilu Virginia aamma nammineq Jehovamut Nalunaajaasut ilagalugit Bibelimik atuaqqissaartalerumavoq. Ukiut marluk qaangiummata, 2. juni 1985, kuisippoq 108-nik ukioqarluni.

„Kingumut ulloq taanna eqqaasarpara qamuuna nuannaangaarlunga,“ oqarpoq, „ullormi taanna aallarniutigalugu inuulerpunga. Naak taama utoqqaatigigaluarlunga nalunaaquttap akunneri tallimat arfinillilluunniit qaammammut atortarpakka oqaluussinermut, ajaappiarali ikiortigisariaqartarpara [illumiit illumut] angalaaraangama. Biilernanga pisukkusunnerusarpunga. Tamannalu timigissaatigisarpara.“

India

„Najukkama eqqaani perulluliortitsiumatuusimavunga eqiasoqalungalu,“ taama oqaluttuarpoq angut siornatigut ileqqupilunnut inussiaasimasoq. „Anngiortumik ikiaroornartumik eqqussisarpunga, mutka-mut (iluanaarniapilulluni pinnguarnermut) ilaasarlunga aammalu akeqanngitsunik sikaritsitortarlunga isertortumik niueqatigisartakkannit pissarsiarisartakkannik, aammattaaq imerajullunga. Taamaakkaluartoq suliniartuullunga ilagiinnut nalinginnaasunut ilaasortaavunga.“ Taavali Jehovamut Nalunaajaasunit pulaarneqarpoq, Bibelimillu atuaqatigisalerpai, Bibelimilu unnersuussutigisat malerualerlugit. Inuuneralu allanngorluinnarpoq. (ússatit 2:1-22; 2 Timûtiuse 3:16) Maanna nuliani panitillu marluk ilagalugit allat ikiorniarlugit sulipput ileqqupilunnit aniguisinnaaqqullugit.

Belgia

Aappariit inuusuttunnguit Guuti uumitsaattorujussuanngorpaat. Meerartaaqqaataat, niviarsiaraq, ullut qulit inunngornermi kingorna toquvoq. Tullianik meerartaavaat iloqiaalluni inunngorpoq. Pingajussaannillu meerartaavaat, peqqippasillunilu nukittorpasikkaluarluni, tallimanik qaammateqarluni tassanngaannartumik toquvoq. Inuppassuit naak inuunerlukkaluartut peqqissunik meerartaartarmata, anaanap inuusuttunnguup upperisinnaanngivippaa Guutip asannittup taama nalaataqartissinnaammatik.

Kingunerileraa Jehovamut Nalunaajaasut ilaannit, aamma saniliminni illumiit illumut angalaartumit, pulaarneqarpoq. Arnaq inuusuttunnguaq Guutip neriorsuutigisaanik siunissamik pilluarnartumik Nalunaajaasup oqaluttuutilermani, eqqarsaat Guutimut asannittumut qilammiusumut Ataataasumullu tunngasoq saapiloorpaa. (Tussiaat 37:10, 11) Atuagassiamilli Bibelimut tunngasumik tuniniarmani akuersivoq. Arriitsumik, oqaluussisartup arlaleriarluni pulaartareeraanilu, uummataa Bibelip tusarliussaasa nuannersut aqilisilerpaat Guutimullu tatiginninnera nakussatsillugu. Maanna uinilu ersarissumik neriuuteqarput nunami paratiisiusumi atulersussami Jehovap ernertik innarluutilik ajorunnaarsiinnarnagu aammattaaq meeqqatik allat marluk toqusunit makitikkumaarai. — Juánase 5:28, 29; sarĸúmersitat 21:1-4.

Portugal

Sapaatiugaa ullaatungaa arnaq pisiat puuannik ulikkaartumik nassarluni angerlamut ingerlavoq. Unikkallarporli aappariillu naapitani oqaloqatigilerlugit. Aatsaat siullermik kingullermeeratilli naapipput. Aappariit Jehovamut Nalunaajaasutut oqaluussiartorlutik angalaarput. Taassuma arnap ilaquttami atortussanik pisariaqartitaat naammassiniarlugit sulineranik aappariit nersualaarpaat. Kisianni, kiaana inuit tamarmik pisariaqartitaannik tunisinnaagai? aperipput. Tamannalu namminneq akivaat, qularutiginagu taamaaliorsinnaasoq tassaasoq Guuti. (Tussiaat 107:8, 9; Isaia 33:24) „Aamma uanga ajornartorsiutigisannik taassuma ikiorsinnaavaanga?“ arnaq pilerpoq. Tamannalu oqaluussisartut qulareqqunngilaat, taavalu arnap imminut qaaqquai. Bibelimik atuaqqissaaqatigineqartalerpoq, uiatalu takusinnaaleramiuk tamanna nuliaminut ajunngitsumik allannguisitsisoq, taava aamma nammineq Bibelimik atuaqqissaartalerpoq, sivitsunngitsorlu inooriaatsiminik allannguilluni.

Kingornagut arnap taassuma Nalunaajaasut oqaluttuuppai sapaat taanna naapiffitsik sioqqullugu marloriarluni imminoriartarsimagaluarluni. Taamani isumatsangaaqqasimavoq tassami uinilu aalajangersimagamik avinniarlutik. Massakkut imminnut attaveqarnerat allarluinnaavoq, tassami uinilu meeqqatillu pingasut ataatsimoorlutik tusagassap nuannersup ilinniarluarniarnerani siumukarput.

Thailand

Arnaq Thailandip avannarpasissuani najugaqartoq inuunermi annersaani anersaapilunnit naalliutsitaajuarsimavoq. Jehovamut Nalunaajaasut ilaat oqaluussilluni angalaartoq naapikkamiuk atuagassianik Bibelimut tunngasunik pivoq akuersillunilu angerlarsimaffimmini Bibelimik atuaqqissaaqatiginissaanut. Qaammatini marlunni atuareerluni paasiartulerpaa Bibelimi tunngavissaqartoq guutipilussiornermut atortut suulluunniit tamaasa, soorlu guutipiluit assingi, illuminit peertariaqarnerannut, aammalu illuaraq anersaarsiorfini erligingaakkani, ilaquttani anersaapilunnut illersorniarniarlugit sanatissimasani, aserortertariaqarlugu. (apustilit suliait 19:19; 1 Korintumiut 10:21; 1 Juánase 5:21) Maanna anersaapilunnit saassutarineqarunnaarpoq taamaattumillu inuit allat Guutimik ilumoortumik, Jehovamik, ilinniartinnissaat kisiat eqqarsaatigisinnaallugu.

Kenya

Pinerlunniartartunut siulersortip tusaramiuk ima ulorianartigisutut isigineqalersimalluni, allaat politiit takugunikku erniinnarluinnaq aallaanissaanut peqquneqarsimallutik, illarasaaginnarpoq tuinilu kivitsiaannarlugit. Kingunerileraa ujajaariarnerat iluatsinngitsoorpoq. Kisimiileriasaarpoq, inuppaalunnit kamassimaqisunit imminillu nivinngaagaluttualersunit unguneqarsimalluni. Politiilli takkupput ikioriartorlugu, taavalu aallaruppaat eqqartuunneqarnissaatalu tungaanut parnaarussivimmut inissillugu.

Eqqartuussissuserisup illersuisussap siunnersorpaa assigiinngitsutigut sukkulluunniit pisuunini misiutigissagaa. Parnaarussiviup isertitsisarfittaaniitilluni eqqaalerpai ukiorpaaluit matuma siornagut Jehovamut Nalunaajaasumik pulaartiminik oqaloqatiginnittarsimanini. Taava inatsisaatsuliortuunini peqqissimissutigingaalerpaa Guutimullu qinulluni ikioqqulluni. Aap, Jehovap aqqa taallugu taanna qinnuigaa. (Naleqqiuguk apustilit suliáinik agdlagkat 10:1, 2.) Eqqartuussivimmi sassartinneqarami eqqartuussisup tupaallaatigeqisaanik pisuunini nassuerutigaa. Taamaattumillu saamakannersumik pineqaatissinneqarpoq — tassa toqumut eqqartuunneqarnissaraluanut taarsiullugu ukiut qulit sianigeqqissaarneqartumi parnaarussaasussanngormat.

Parnaarussivimmiitilluni atuagassiat Bibelimut tunngasut atuaqqissaartarpai Guutimullu qinujuartarluni ajornanngippat parnaarussaanini sivikilleqqullugu kiffartuunniassagamiuk. Ilimaginngivillugu kingusinnerusukkut tusalerpaa pineqaatissinneqarnera affaannanngortinneqarsimasoq. Ukiut tallimat parnaarussaaqqareerluni iperagaavoq, ingerlaannarlu Jehovamut Nalunaajaasut Bibelimik atuaqqissaaqatigisalerlugit. Sivitsunngitsoq kuisippoq maannalu allamik atorfeqarani oqaluussisartunngornissani siunniussimallugu.

Jehovamut Nalunaajaasut misigisartagaasa ilaannamininnguisa siuliini atuakkatta takutippaat qanoq suliassatik suliarigaat aammalu ’nunap isuanut allaat’ nalunaajaanissamut pisussaanertik qanoq ingerlakkaat. Misigisartakkat tuusintilikkuutaat tamakkununnga assingusut suli eqqartorneqarsinnaagaluarput. Jehovamut Nalunaajaasut tassaasut nalitsinni iivangkiiliumik oqaluussissutiginnittut ilumoortut maanna qularutigaajuk? (wD 1/1 88)