Kikkut iivangkiiliumik oqaluussissutiginnittuuppat ilumoortut?

SUMILUUNNIIT najugaqaraluaruit oqaluussissutiginninnermik Jesus Kristusip aallarnersimasaanik inuunerit attuallanneqarsimassaaq. Kristusimulli sinniisuunerartut tamakkeratik sallusuissut Guutip oqaasianinngaaneersoq oqaluussissutigisimavaat. Iivangkiiliumik oqaluussissutiginnittut tamakkeratik — qanga ullumikkulluunniit — anersaamik ajoqersuiartortitap pigisariaqagaanik, ukiunilu hundredilinni siullerni Kristusip ajoqersugaasa pigisaattut ittumik, pigisaqarput.

Oqaatigineqartarpoq kristumiuuneraqatigiit silarsuaq tamakkerlugu 220.000-inik ajoqersuiartortitaqartut, tamakkuli ajoqersuiartortitat iivangkiiliumik oqaluutiginnittunut ilumoortunut Bibelimi piumasarineqartut naapertorlugit ingerlappat? Siunertaanngilaq kristumiutut oqaluussineq anersaakkut pissaaneqarniarneq atorlugu nunasiaatitaartornermut sangutinneqassasoq, oqaluussisullu silamiut naalagaaffiinut nunasiaateqarnikkut pissaanilinnut illersuisuussasut. (Naleqqiuguk Jâko 4:4.) Aammattaaq oqaluussisartut kristumiut ilumoortut upperisarsiorneq iluatsillugu aniguisitsiniarnermik taaneqartartumik siaruarterisussaanngillat aammalu naalakkersuinermut inunnillu isumaginninnermut tunngasunik allannguinernut peqataasussaanatik. Jesusillu eqqarsaatiginngilaa ajoqersukkani oqaluussisartutut Bibelimi allassimaffinnik issuaallutik suaartaatigalutik namminneq isummatik atorlugit Bibelimik nassuiaallutik TV-kkut radiokkullu saqqummertassasut. (Juánase 17:16; Matîuse 6:24) Qanorliuna iivangkiiliumik oqaluussissutiginnittoq ilumoortoq paasisariaqartoq?

Iivangkiiliumik oqaluussissutiginnittoq ilumoortoq sunaana?

Bibelip oqaatsit allanneqaqqaatigisai, hebræerit grækerillu oqaasii, naapertorlugit iivangkiiliumik oqaluussissutiginnittoq tassaavoq tusagassamik nuannersumik ingerlateqqitsisoq.a Tassa imaappoq tusagassaq nuannersoq annassummut, naalagaassusermut naapertuilluartumut eqqissinermullu tunngasoq. Soorlu Isaia 52:7-imi (NW) ima allassimasoqartoq: „Qaqqani ila takorannersusia: pisuinnarluni aggerpoq nuannersumik tusarliisoq, eqqissinissamik oqaluussissutiginnittoq, pitsaanerusoq pillugu nuannersumik tusarliisoq, annassummik oqaluussissutiginnittoq, Zionimut oqartoq: ’Guutit kunnginngorpoq!’“

Guutip ernera nunami inunngormat inngilip savanik paarsisut ima nalunaarfigai: ’Erseqinasi; ata, tipaatsunnartumik tusarlissavassi tipaatsungaarutissassinnik inuit tamarmik pissaannik; ilissinnummi ullumi erniuvoq annaassisoq, tassa Kristus Naalagaq.’ (Lúkarse 2:10, 11) Tassa tusagassaq nuannersoq Jesus Kristusimut tunngavoq.

Ukiut 30-t missaanniittut ingerlareersullu sapaammi Jesus naalagiartarfimmut Nazaretimiittumut iserpoq, tassanilu nikuippoq atuffassilerlunilu. ’Tunivaallu pruffiitip Esajasip allagaanik, mapperamigillu ima allassimasoq eqqorpaa: Jehovap anersaata qulangerpaanga, taamaattumik tanippaanga iivangkiiliu piitsunut oqaluutigeqqullugu.’ Atuarunnaarami ’mappersakkat matuai kiffamullu tunniullugit ingillunilu. Naalagiartarfimmiittullu tamarmik isikkuppaat. Taava pilerpoq oqarfigalugit: Ullumi allakkat tamakku tusaatillusi eqquupput.’ Tassa Jesus tusagassamik nuannersumik oqaluussissutiginnittuusimavoq, taannalu tusagassaq nuannersoq Guutip naalagaaffianut tunngavoq. — Lúkarse 4:17-21; 8:1.

Jesusip oqaluussinini katersuinermut assersuuppaa oqarlunilu ’katersugassat amerlaqisut, sulisussalli ikeqisut’. (Matîuse 9:36-38) Taamaattumik ajoqersukkani iivangkiiliumik oqaluussissutiginnittussatut ilinniartippai aallartillugillu. (Matîuse, kapitali 10; Lúkarse, kapitali 10) Oqaluussinerata qitigisaat tassaavoq ’qilammiup naalagaaffia’. (Matîuse 10:7) Imaanngilarli Jesusip apustilii kisimik Naalagaaffimmik oqaluussissutiginnittussaasut.

Jerusalemimi kristumiunut ilagiinnut pilersinneqaqqammersumut malersuineq aallartimmat ’tamarmik Judæap Samariallu ilaannut siammarput, apustilit kisimik pinnatik’, soorlu apustilit suliáinik agdlagkane 8:1-imi oqaluttuarineqartoq. Ajoqersukkammi siammaramik suppat? Siooranermik toqqorsimappat? Naamik, tassami kapitalimi tassani versi 4-mi ima oqaluttuarineqarput: ’Siammartitaasut taava angalallutik oqaaseq iivangkiiliu oqaluutigaat.’ Taamatut ukiuni hundredilinni siullerni iivangkiiliumik oqaluussissutiginninnermi annertuumik katersuineqarpoq.

Atuagaq qinerlerfissiaq A Theological Word Book of the Bible soqutiginartumik ima nalunaaruteqarpoq: „Testamentitaami oqaluussineq eqqartorneqaraangami isumataarsimasunut oqalugiarneq pineqarneq ajorpoq, soorlu ullumikkut taama isumaqartoqartartoq; pineqartarlunili kristumiuunngitsunut ’tusagassamik nuannersumik Guutimeersumik’ nalunaarutiginninneq.“ Tassa imaappoq kristumiut tamarmik iivangkiiliumik oqaluussissutiginnittuusariaqarput, oqaluussinerallu uppeqatiminnut oqaluussinerinnaanani.

Ullumikkulli iivangkiiliumik oqaluussissutiginninneq tamanna sumik siunertaqarpa? Jesus siulittuisimavoq ’naalagaaffimmik tusagassaq nuannersoq tamanna oqaluussissutigineqassasoq nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliutissaaq’. (Matîuse 24:14, NW) Jesusillu qilalialernerminik takunnittut kisiisa tamatuminnga peqqunngilai aammali ajoqersuganngorumaartussat tamaasa peqqullugit ’nalunaajaatigiumaaqqulluni Jerusalemimi Judæamilu tamarsuarmi Samariamilu nunallu isuanut allaat’. — apustilit suliait 1:8; aamma takuuk Matîuse 28:19, 20.

Tusarliussap iivangkiiliumik oqaluutiginnittup kialuunniit nalunaarutigisassaata qiterisaa tassaavoq tusagassaq nuannersoq Jehova Guutip naalagaaffianut, qinikkaminit Jesus Kristusimit, Eqqissinermut Naalakkamit, siulersorneqartumut tunngasoq. (Isaia 9:6) Tusagassamut nuannersumut ilaapputtaaq ajoqersuutit ilumoortut Jesusip saqqummiussimasai ajoqersugaasalu allassimasaat. Taamaattumik ullumikkut iivangkiiliumik oqaluussissutiginnittut ilumoortut tamanna najoqqutarivaat.

Iivangkiiliumik oqaluussissutiginninnermut ilumoortumut kina pisortaava?

Iivangkiiliumik oqaluussissutiginnittut ilumoortut Jehova Guutimittut pallorfigaat. Taanna tassaavoq Iivangkiiliumik Oqaluussissutiginnittoq Anneq, tusagassamik nuannersumik oqaluussissutiginninnermut pisortaasoq. (Galâsiamiut 3:8; sarĸúmersitat 10:7) Jehovap kissaatigaa inuit tamarmik tusarliussamut oqaluussissutigititaminut tusarnissaminnut qisuariarnissaminnullu periarfissinneqassasut, tassami, soorlu apustili Peterip inuppaalunnut illoqarfimmi umiarsualiveqarfiusumi Cæsareami oqartoq: ’Ilumut paasilerpara inuup kinaassusia Guutip pinngikkaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannarigaa. Tassaavoq oqaaseq Israelip kinguaanut aallartitaa, eqqissineq Jesus-Kristusikkut oqaluutigitikkamiuk; taanna tamarmik naalagaraat.’ — apustilit suliait 10:34-36.

Bibelimi siulittuutigineqarsimavoq ullumikkut katersuinersuaqaqqikkumaartoq. (sarĸúmersitat 14:15, 16) Allaaserisami tulliuttumi Jehovamut Nalunaajaasut katersuinerminni misigisalikkersaarutaat atuarsinnaavatit. Malugiuttaaq silarsuaq tamakkerlugu oqaluussinerminni nalunaarsuusiaat, qupperneq 12-imiit 15-imut uani atuagassiami, tullianillu Jehovamut Nalunaajaasut kasuttorfigippatsit oqaloqatiginiarigit. Taava nammineq paasiniarsinnaavat ilumut taakku tassaanersut ullumikkut iivangkiiliumik oqaluussissutiginnittut ilumoortut. (wD 1/1 88)

[Quppernerup ataani ilanngussaq]