Toqusut uumappat? Guuti qanoq oqarpa?

TIMMISARTUARAQ Afrikami Kujallermi illoqarfimmit tingivoq illoqarfimmut 400 kilometerinik ungasitsigisumut timmissalluni. Timmisartumiipput ingerlatitsisua panialu 12-inik ukiulik. Allatut sapilerlutik nunninniaraluarmata timmisartoq nunamut nakkarpoq, issimasullu tamarmik ajunaarput.

„Aliasuuteqarnera annaasamalu qanoq annertutiginera, aammalu imminut napatinniarlunga qanoq ilungersortigisariaqarnera Jehova Guutip kisimi ilisimavai,“ Betty, ajunaartunut nuliaasoq anaanaasorlu, oqarpoq. „Tamatigut qinuttuinnarpunga isumalluaqqullunga pissatseqqullungalu imminut napatissinnaaqqullunga, inunnik allanik ikiuisinnaaqqullunga.“ Aammattaaq Bettyp tuppalliutigeqai toqusut pissusiat pillugu Guutip oqaaserisai aammalu makinnissamik neriugisaq.

Toqusut pillugit Guuti qanoq oqaaseqarpa? Bibelimi akissuteqarpoq: ’Toqungasut sunnguamilluunniit ilisimanngillat.’ (akugdlîssup oĸausê 9:5) Tassami, toqusut ilisimassuseqanngillat. Tassa. Taava suna pissutigalugu inuit amerlanersaat tamatuma akerlerluinnaanik upperisaqarnerpat? Salloqittagaagamik salloqittaammit annertoorujussuarmit, itsarujussuaq aallartinneqartumit silarsuarlu tamakkerlugu atuuttumit!

Nunarsuaq tamakkerlugu salloqittagaaneq

Sallu siullerpaaq aallaqqaataavoq. Bibelip atuagartaasa ilaanni, Môrsasip agdlagaine sujugdlerne, pisimasuiusut erseqqinnerusumik oqaluttuarineqarput. Tassani allassimavoq: ’Kisianni orpik ajunngitsumillu ajortumillu sianinartoq neriffigissanngilat; massa neriffigigaluarukku toqumik toqujumaarputit.’ (1 Môrsase 2:17) Tassaaku Jehova Guutip oqaasii inuk siulleq, Adam, oqaluffigigamiuk. Oqaatsit taakku Môrsasip agdlagaine sujugdlît 3:1-4-mi allassimasunut sanilliutikkit, tassani oqaluttuarineqarmat qanoq Satanip, pulateriaarsuk oqalutsigalugu, Eva Guutimut naalanngitsuliortikkaa, oqarami: ’Naami toqussanngilasi.’ Guutip oqaaserisimasai Satanip assortorpai. Tassuuna sallu siulleq anippaa, ’sallunernut ataatanngorluni’. — Juánase 8:44; sarĸúmersitat 12:9.

Kisiannili, Adam Evalu ilumut toqupput, inuillu kisissaanngitsumik millionillit allat toqusimapput. Sallusup Satanip ilumut pisimasoq tamanna qanoq ilillugu saneqqunniarpaa? Saneqqunniarpaa kingusinnerusukkut eqqarsaatissiigami naak timi toqugaluartoq suna arlaat uumajuartartoq. Itsarsuaq upperisarsiortut eqqarsaat tamanna ajoqersuutigilerpaat, grækeritoqqallu ilisimaqqissaarniat ilisimatusaatiminnut ilanngutippaat. Taamaattumik silarsuarmi tamangajammi upperisarsiortut tamangajammik upperisaqarput tarnip toqusuitsuuneranik. Asasat toqungasut sumiluunniit uumajuarnerannik eqqarsaat inuppassuit tuppalliutigaat. Apeqqulli pingaaruteqartoq imaappoq: Tamanna ilumoorpa?

Tarnit toqusuitsuua?

Oqaaseq „toqusuissut“ Bibelimi pingasoriarluni pisarpoq, pineri tamarmik Kristumiut Allagaataanni grækerisut allagaasuni pillutik. Atorneqarneri misissoraanni ataaseq paasineqassaaq: Inuup toqusuissut inunnguutiginngilaa.

Apustili Paulusip oqaasii Timûtiusimut agdlagkane sujugdlît 6:15, 16-imi allassimasut misissoriartigit. Tassani Jesus Kristus eqqartorneqarpoq, tassaasoq ’kunngit kunngiat naalakkallu naalagaat, kisimi toqusuissummik piginnittoq’. Jesusip ’kunnginit’ ’naalakkanillu’ allanit tamanit suna allaassutigaa? Toqusuissutsi; taanna toqusuissummik piginnippoq, taakkuli naamik.

Ilumoorpoq Kristusip malittai taanna qilammi naalakkersueqatigissallugu qaaqqusaasut neriorsorneqartut toqusuissummik tunineqassallutik. (1 Pîtruse 1:3, 4) Taamaattumik, Korintumiunut agdlagkane sujugdlît 15:53, 54-imi atuarpugut: ’Toqujasoq manna toqusuissummik atitittariaqarpoq . . . toqujasulli matuma toqusuissut atippagu, taava eqquukkumaarpoq oqaaseq allassimasoq: Toqu ajugaanermut nungutitaavoq.’ Maluginiarulli toqusuissut ’atineqartoq’. Kristumiunut ilumoortunut, qinigaasunut akissarsiarititaavoq. Tassaanngilaq inuit tamarmik inunnguutigisaat.

Aammattaaq, Bibelimi allassimanngilaq inuk tarniliusoq imaluunniit tarniligaasoq. Kisiannili, New World-nutsigaq naapertorlugu allassimavoq: „Jehovallu Guutip inuk issumit nunap ilaanit sanavaa sulluarlugulu sorluisigut anersaarnermik uumassutaasumik, inullu tarninngorpoq uumasoq.“ (1 Môrsase 2:7; naleqqiuguk Korintumiunut agdlagkat sujugdlît 15:45.) Piulluni pigisaqarnermit allaalluinnarpoq. Kialuunniit miserratiginavianngilaa qimmiulluni qimmeqarnermit allaalluinnartuusoq! Taamatullu, tarniulluni tarneqarnermit allaavoq.

Inuit tamakkeratik toqusuissummik tunineqarumaartut erseqqissumik paasineqarsinnaavoq Bibelimi arlaleriarluni allassimammat tarneq toqusinnaasoq. Soorlu imaattoq: „Tarneq ajortuliortoq toqussaaq.“ (Hisĩkiale 18:4, NW) „Tarneq kinaluunniit pruffiitimut taassumunnga naalanngitsoq inunnit piiarneqassaaq.“ — apustilit suliait 3:23, NW.

Taava, toqusuitsumik tarneqannginnatta, inuk toqugaangat sumik pisoqartarpa? ’Sinippaarput,’ Kristusip utertitsissummik pilliutaanera tunngavigalugu makiffissamik neriugisaqaramik. (1 Korintumiut 15:22) Lazarus toqummat Jesus oqarsimavoq: ’Lazarus ikinnguterput sinippoq, tassa itersariartussavara.’ Taava nassuiaalluni oqarpoq: ’Lazarus toquvoq.’ (Juánase 11:11-14) Aamma Paulusip eqqartorpai ’sinippaartut’. (1 Tásalûníkamiut 4:13, 14; 1 Korintumiut 15:20) Taava, toqusut sinippaaramik . . .

Uummartinneqassappat?

Pisimasoq tupaallannartoq una takorlooriaruk: Betaniami Jerusalemip ungasinngitsuaniittumi inuit eqimattat qaarusuup eqqaaniipput. Jesus Maria Martalu ilagalugit tassaniippoq. Arnat taakkua qatanngutigaat Lazarus toqoqqammersoq, taassumalu timaa toqungasoq ujaqqamik matusimasumi qaarusummiippoq. ’Ujarak peersiuk,’ Jesus peqqusivoq. Martap tamanna akueriumanngilaa: ’Naalagaq, tippalereerpoq, ullummi sisammileramigit.’ Qinutsiareerlunili Jesus nillerpoq: ’Lazarus, aniit.’ Angullu Lazarus anivoq! (Juánase 11:38-44) Inuit eqimattat — ingammik Mariap Martallu — tupaallassusiat nuannaajallassusiallu takorloorsinnaanngiliuk?

Ulluni sisamani toqungaffimmini uumasimagaluaruni, Lazarusip inunnut tamanut tamanna oqaluttuarisimassannginnerpaa? Kisiannili, toqungalluni misigisaqarsimanerluni oqaluuserinninneranik allassimasoqanngilaq, aamma toqungasut misigisaqarsinnaannginnerat uppernarsarneqarpoq Bibelimi allassimasumit uumannga: ’Toqungasut sunnguamilluunniit ilisimanngillat.’ — akugdlîssup oĸausê 9:5.

Lazarusimut pisimasumut assingusumik pisimasoqarpoq. Illoqarfimmi Nainimik atilimmi Jesusip angummik inuusuttumik ilisiartortut naapippai. Jesus oqarpoq: ’Inuusuttoq uumaa, oqarfigaakkit: Makigit.’ Sunaana pisimasoq? ’Toqusoq taava ingippoq oqalulerlunilu.’ (Lúkarse 7:11-17) Makereerami angutip inuusuttup taassuma inuit toqugaangamik sumunnarfissaat oqaluuserilerpaa? Naagga, toqusimaannarami, sumilluunniit ilisimanani.

Jesus, Paulus, Peter, Elias aamma Elisa tamarmik toqungasunik makititsipput. Toqusimasut taakkua arlaannaalluunniit toqup kingornagut uummassuseqarnermik oqaaseqanngilaq.

Tupinnartuliornerit nuanningaartut tamakkua nalunarunnaarsippaat sunatuaq aqqutigalugu toqungasut amerlanerpaartaat uummaqqissinnaassasut — Guutip naalagaaffiata ataani nunami inuunissamut makititaanissaq. Jesus oqarsimavoq: ’Tamanna tupigusuutigissanngilarsi, ullut nalliukkumaarmata, taava iliverniittut tamarmik nipiga tusarumaarpaat; anillutillu makissapput.’ (Juánase 5:28, 29) Tassaajumaarpoq misigisaq pissanganaqisoq Kristusip naalagaaffimmi naalakkersuinerata ukiunik tuusintinik sivisussusillup ungasikkunnaarsimasup ataani inuunissamik immikkut pisinnaatitaaffeqartut pissaat. (sarĸúmersitat 20:4, 6) Makinnissamik neriugisaq nammineq uppernarsaataavoq toqungasut uumassuseqarsinnaannginnerannut. Inuit makitinneqassagunik, uumassuseeruteqqaartariaqarput.

Aperiumasoqarsinnaavoq . . .

Qanormitaava anersaarsiortuni qaneritittut allallu oqartartut toqungasunit tusagassarsisarlutik? Misigisimasaat uppernarsaataannginnerpat toqungasut uumassuseqartuarnerannut? Naagga. Satan poqeqaaq, salloqittaasorsuullunilu ’qaamasup inngiliatut pissuseqartuusaartartoq’. (2 Korintumiut 11:14) Taanna inngilipiluilu toqunikunut anersaajusaarsinnaapput, anersaajusaartarlutillu! Taamaattumik Jehovap Israelikkunnut una erseqqissumik inassutigaa: ’Timaajagarsiortumik siunersiuisut . . . toqusunillu apersuisut . . . Jehovap maajugai.’ (5 Môrsase 18:10-12) Jehova oqarsimavortaaq anersaalerisut „Guutip naalagaaffia kingornussarissanngikkaat“ aserorumaartulli. — Galâsiamiut 5:19-21, NW; sarĸúmersitat 21:8.

Inuimmi toqungajavillutik misigisaqarsimanerartut? Misigisat taamaattut uppernarsannginnerpaat toqunikkut anersaap tarnilluunniit timi qimattaraa? George Gallupip, inuusunnerup, USA-mi inunnik isumasiuisitsisartup, sammisaq tamanna misissorsimavaa inernerilu atuakkami Adventures in Immortality-mi (Toqusuissutsimut tungaatigut misigisat) nalunaarusiuutigalugit. Nakorsat ilisimatuullu apersorneqartut toqungajavillutik misigisaqarsimanerartut nalunaarutigisaasa ilumoorsinnaanerat qularaat. Biofysikeriusoq Marylandimeersoq oqarpoq: „Misigisat taamaattut isummami isummap sulisaasiatigut pissusissamisut inngitsumi pinngortarput . . . Qarasaq assigiinngitsorparujussuarnik paasiuminaaqisunik katitigaavoq atornerlunneqaruni inumminik assigiinngitsunik uatsisinnaasoq — assersuutigalugit ikiaroornartutortup takorroorneri tusarroornerilu.“ Tarnip nappaataanik ilisimatooq Ohiomeersoq oqarpoq: „Eqqumiitsunik misigisat takorroornerinnaapput tusarroornerinnaallutillu.“ Ilisimatoorlu Michiganimeersoq oqarpoq: „Takorroornerupput timikkut tarnikkulluunniit ajoqusigaanermik pissuteqartut.“

George Gallupip misigisimasani tunngavigalugit paasivaa toqungajavillutik misigisimasaminnik nalunaarutaat „toqusuitsuunermut imaluunniit toqup kingornagut uumassuseqartuarnermut uppernarsaatitut isigineqarsinnaanngivissut“. Nangilluni oqarpoq: „Tassaannaannguatsiarput ilorlikkut pisimasut pissanganartut timimikkut ajoqusigaasut qaratsamikkut taamaallaat isiginnaagaat.“ Aammattaaq oqarpoq upperisarsiornermik eqqarsartartut ilaasa misigisat taamaattut nassuiarniarlugit oqassasut „inngilipiluit inunnik uatsiniarnermikkut periaasiisa ilagigaat“. Jehova Guutip itsarujussuaq oqaatigisimasaa suli ilumoorpoq: ’Toqungasut sunnguamilluunniit ilisimanngillat.’ — akugdlîssup oĸausê 9:5.

Illit qanoq iliortariaqarpit?

Eqqarsaatit ajoqersuutillu Satanip salluliaanik siullermik — ’naami toqussanngilasi’ — tunngaveqartut mianersuutigikkit. (1 Môrsase 3:1-5) Guutip oqaasiani ajoqersuutigisaq, tassaasoq inuk toqugaangami ’pilersaarutai ulloq taanna maangaannassasut’, akueriuk. (Tussiaat 146:4) Aammattaaq akueriuk toqungasut sinippaartut Guutip naalagaaffiata, inuppassuit tikiuteqqusaata, aqutsinissaata nuanningaartup ataani makikkumaartut, taamanikkussami ’toqusut makikkumaarmata, iluartullu iluaatsullu’. — apustilit suliait 24:15; Matîuse 6:9, 10.

Arnap napparsimarpasittup ilanngutassiami siullermi eqqartorneqartup tipaatsuutigaa oqaluttuunneqarami Guutip oqaasiinik toqungasut pillugit inngilipiluillu anersaajusut salloqittaasartut pillugit. Aarnuaatini pigisanilu anersaalerissutaasut allat aserorpai ullullu ikittut qaangiummata assut peqqissisimasutut misigaluni. Maanna inuit allat ikiorniarpai inngilipilussiorunnaarniarneranni.

Uillarnerup timmisartup nakkarneratigut asasaminik annaasaqartup eqqarsaat una tuppalliutigaa: Toqungasut sunnguamilluunniit ilisimannginnamik, piffiup qaangiussorneranik misigisaqanngillat. Taamaattumik, namminneq misigisatik naapertorlugit, uisorernerinnaap tulliani Guutip naalagaaffiata ataani nunami paratiisiusumi iterumaarput! Taassuma nuannaarutigalugu inuit allat ikiorniarpai nalujunnaarsinniarlugit ungasinngitsukkut ’Jehovap qulliit kiinnani tamani ittut allarterumaarai’. (Isaia 25:8) Ullussaq asasami makititaaneratigut takoqqinnissaat qilanaarutigaa. (wD 1/8 86)