Toqusut uumappat? Inuit qanoq oqartarpat?

ARNAQ utoqqasaaq qernertormioq assut napparsimarpasippoq. Isikkani annereqigamigit pisussinnaanngingajappoq. Eqqumiitsumik isikkoqarpoq — nujai marrarmik aappalaartumik tanissimapput, qaleriinnik arlalinnik nasartaateqarpoq, assammini isikkaminilu aarnuarpassuaqarpoq. Soormi? Ukiut 50 sinnerlugit upperisaqarami siuaasami anersaavinit pulaneqarsimalluni. Angakkut marraap, nasartaatit aarnussallu atorneqarnissaat inassutigaat arnap „ajorunnaarniarnissaanut“.

Taama upperisaqarneq qaqutigoorpa? Qaqutiguunngilaq. Atuakkami African Heritage-imi (Afrikamiut kingornussaat) allassimavoq, nunat allat eqqarsaatiginagit, Afrikaannarmi inuppassuit inooriaasiisa qiterigaat upperisaq siuaasaat toqungasut pissaaneqartut „kinguaassatik sernissussallugit imaluunniit ajunaartitsinikkut napparsimalaartitsinikkulluunniit pillassallugit“. Nunani arlalippassuarni tamatumunnga assingusumik siuaasaminnik pallorfiginnittarput. Tupinnaraluartumilli, siuaasanik pallorfiginninnerup aamma nunami illit najukkanni upperisarineqartut aallaaveqatigiinnissaat ilimanarpoq. Qanoq ililluni taamaassinnaava?

Hinduit allarpassuillu upperisaqarput inuit uumasullu toqunermik kingornagut nutaamik timeqalersartut. Anersaalerisut upperisaqarput qaneritittut aqqutigalugit toqusimasut attavigineqarsinnaasut. Katuullini ajoqersuutigineqarpoq inuit toqugaangamik amerlanersaat eqqiarfimmi ajortaajarneqareeraangamik aatsaat qilaliartartut, naalasseriitsulli iluarsivissaqanngitsut anniarfimmut ikualasumukartartut. Ilagiit naaggaartut amerlanersaasa ajoqersuutigaat inuit ajunngitsut qilaliassasut ajortulli anniarfimmi anniartitaassasut, ilarpassuisalu qularinngilaat tamanna Bibelimi ajoqersuutigineqartoq. Toqungajavillutik misigisaqarsimasut ilaasa qularinngivippaat timip toquneratigut suna arlaat uumajuartartoq.

Uppeqatigiit assigiinngitsut inuunerup aappaani suut pissusiunersut naak isumaqatigiissutiginngikkaluarlugit, tamangajammik eqqarsaat ataaseq una isumaqatigiissutigisarpaat — toqusut uumajuartut.

Toqu ilumut qinngarsuisuuvoq amiilaarnartoq, inunnik naggueqatigiinneersunik tamanik, pisuunik piitsunillu, inuusuttunik utoqqarnillu, nalaatsisartoq. Soorlu Bibelimi allassimasoq: ’Inuunersimi qanoq-ippa? Pujoruna sivikitsumik ersersinnarluni aanngariartortoq.’ (Jâko 4:14) Ullut tamaasa inupparujussuit asasanik toqukkut annaasaqartarput.

Taamaattumik inuit uku eqqarsaatigisarpaat: ’Toqusut sumiippat? Ilumut toquvissimappat, imaluunniit sumi arlaani suli uumappat? Qaquguluunniit takoqqissanerpavut? Tutsuiginartumik akissutissat sumi nassaassaappat? (wD 1/8 86)