Jehovap kiffaanut assuarnaatsunut ilanngunniarneq

„Saqivungami assuarnaallunga, . . . katisimasuni unnersiutigissavara [Jehova].“ — Tussiaat 26:11, 12.

1, 2. (a) Kristumiuuneraqatigiit iluanni uppeqatigiit ilaat suut periaaseralugit ilassarsiortarpat? (b) Jesus qanoq ajoqersueriaaseqarpa? (Matîuse 11:28-30)

1985-IMI inuit 189.800-t kuisipput Jehova kiffartuukkumallugu taassumunnga tunniulluinnarnertik takutikkumallugu, taassumunnga nalunaajaasuugamik kristumiuusut. Agguaqatigiissillugit ullormut 520-t kuisipput. Inuppassuit taakku qanoq ilillutik aalajangerpat kuisikkumallutik? Inuppassuit eqeersaalluni ataatsimiinnerannut najuuppat, oqaluussisartoq misigissusitooq tusarnaarlugu taavalu misigissutsiminnit sunnigaallutik aalajangerpat Kristusimut ilanngukkumallutik? Upperisarsioqatigiit naaggaartut iivangkiiliulerisullu ilaasa tamanna periaaseraat. Kristusili tamanna periaaseralugu ilassarsiortarpa?

² Jesusip inunnut tamanut oqaluusseriaasia misissussagutsigu paasissavarput inuit misigissusii ingasattumik iluaqutiginiarneq ajorai. Erinarsoqatigiit erinarsoqatigiinneri kajumissaarutitut ilannguttarpai? Imaluunniit tarnip pissusiinik immikkut ilisimasaqarnini iluatsillugu tusarnaartini ilerasuuteqalersinniartarpai taavalu aningaasanik tuniseqataasinniarlugit? Naaggarluinnaq. Ajoqersuisaatsimigulli inuit eqqarsartinniartarpai tunngaveqartumillu qarasarsortinniarlugit. Tusartaasa amerlanersaat juutiugamik, Allakkanik hebræerisuunik ilisimasaqangaatsiareerput. Ilisimasaat tunngavigalugit eqqarsartissinnaavai, tassuunalu paasitissinnaallugit Messiasiulluni. — Matîuse, kapitalit 5-7; Lúkarse 13:10-21.

3. Paulusip ajoqersuinermigut tusarnaartimi misigissusii atornerlunniarneq ajorai qanoq nalunngissinnaavarput?

³ Taassumatut Paulusip tusarnaartiminut tunngaveqartumik eqqarsarsinnaassusiat atoqquaa — naak isumaqartoqaraluartoq oqallarippallaanngitsoq. (apustilit suliait 20:7-9; 2 Korintumiut 10:10; 11:6) Allassimavoq: ’Oqaaqqissaarpassi, qatanngutikka, Guutip nallittuissusia pillugu timisi tunniuteqqullusigit pilliutitut uumasutut iluartutut Guutip iluarisassaatut, tassaassammat siuneqartutut Guutimut kiffartuutersi. . . . Allanngoritsili isumassigut nutaanngorlusi [„eqqarsartaasersi nutaanngortilluinnarlugu“, Phillips], sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ — Rûmamiut 12:1, 2.

4. Jehovamut Nalunaajaasunngorluni kuisissinnaatinnani, inuk qanoq ilioqqaartariaqarpa?

⁴ Aamma ullumikkut: Allakkat Illernartut atuaqqissaareersimallugit tunngavigalugillu eqqarsaqqissaareersimallutik aatsaat pingaarutilimmik aalajangigaqarsinnaapput imermut morsutsitaallutik kuisinnerminnik. (apustilit suliait 17:11, 12) Eqqarsaqqissaaqqaarnatik ingasattumik misigissuseqarpaluttumik aalajangernianngillat. Kisiannili kuisikkumasut akuerineqannginnerminni kristumiut ataatsimiitsitsinerinut najuuttarput Jehova Guutimik aamma Kristus Jesus aqqutigalugu taassuma siunertarisaanik ilisarserusullutik. (Eprîarit 10:25) Aammalu kristumiut oqaluussinerannut peqataasarput, Naalagaaffik pillugu tusagassamik nuannersumik inuit allat aveqatigisarlugit. (apustilit suliait 5:42; 1 Korintumiut 9:16) Taava, kuisinnissamik siornatigut sapaatit akunnerini kingullerni ilagiinni utoqqaanertat assigiinngitsut oqaloqatigisarlugit kristumiut ajoqersuutaat ileqqussaasullu pillugit apeqqutit 120-t sinnerlugit oqaloqatigiissutigisarpaat, Bibelimilu allassimaffiit hundredikkuutaat ajoqersuutinut uppernarsaataasut eqqarsaatigalugit. Tamakku naammassisarpaat suli kuisinngikkallarnerminni allaat Jehovamut kiffaajumagamik iluarisaasut assuarnaatsullu. — apustilit suliait 8:34-36.a

Kuisinnerup pingaaruteqarnera

5. Kuisinnermigut inuk kimut ilanngutissava?

⁵ Inuup kuisinnermigut suut naammassivai? Siullerpaamik pingaarnerpaamillu, assuarnaassutsiminnik aalajangiussisut inuusimasut pingaarnersaannut, Kristus Jesusimut, ilannguppoq. Taanna nammineq maligassiuivoq 30-t missiliorlugit ukioqarami kuisikkami. (Lúkarse 3:21-23) Tamatuma kingornatigut malitsigisani peqquai silarsuarmi tamarmi ajoqersueqqullugit uppertunngortullu kueqqullugit. (Matîuse 28:19, 20) Kisiannili isumaqarpa ajoqersugaasa kikkulluunniit, ileqqui soqutiginagit, kuisissagaat?

6, 7. (a) Kristusimik malinnittoq ilumoortoq sumik piumaffigineqarpa? (b) Iluartuuneq qanoq isumaqarpa?

⁶ Apustili Peterip eqqortumik isumaqarneq nassuiarpaa ima allakkami: ’Qanoq iliornissigut tamatigut iluartunngoritsi, allassimammat: Iluartuussaasi, uanga illernartuugama.’ (1 Pîtruse 1:15, 16) Kristumioq tunniulluinnarsimasoq qanoq ililluni ’iluartuu’sinnaava?

⁷ W. E. Vinep atuakkiaa Expository Dictionary of New Testament Words naapertorlugu oqaaseq grækerisooq haʹgios (kalaallisuunngorlugu „iluartoq, illernartoq“) tunngavimmigut isumaqarpoq „immikkoortitaq . . . Bibelimilu ileqqussatigut anersaakkullu isumaqartinneqarnermigut, ajortimit immikkoortitaq taamaattumillu Guutimut tunniulluinnartoq“. Grækerit oqaasiinik ilisimatooq alla oqarpoq isumaqartoq „Guutimut erseqqissumik assinguneq“. Taamaammat, kristumiunngorniarlutik kuisikkumasut maligassaq qutsissoq anguniartariaqarpaat. Assuarnaassuseq maligassaavoq, assuarnaassuserlu tassaavoq ’ileqqussanut tunngasutigut najoqqutassanut aalajangersimasunut ilumooqqissaarneq’ — kristumioq pillugu Kristusip najoqqutassiai pineqassapput. — Juánase 17:17-19; 18:36, 37.

8. (a) Kristumiut siullerpaat ilagiissaanni ileqqussatigut suut najoqqutassaappat? (b) Kristumiuuneraqatigiit ilagiissortaanni najoqqutassat tamakku najoqqutarineqarpat? Illoqarfimmi nammineq najukkanni pisimasunik taasaqarlutit erseqqinnerusumik nassuiaruk.

⁸ Ilagiinni kristumiuni ilumoortuni assuarnaassuseq, peqatigiiffiup mingutsaaliorneqarnissaa, pingaartinneqartuarsimavoq. Paulusip kristumiut siullerpaat allaffigai ’imaattut ilagisaqqunagit: Qatanngummik taaneqartoq kanngunartuliortuuppalluunniit piumatuuppalluunniit guutipilussiortuuppalluunniit, oqarnittuuppalluunniit imerajuttuuppalluunnit arsaarisuuppalluunniit, taama ittoq nereqatigissanngilarsiluunniit. . . . Ajortoq taanna ilissinnit peersissiuk’. (1 Korintumiut 5:9-13; 2 Juánase 10, 11) Kristumiuuneraqatigiit ilagiissortaanni palasit qutsissumik najoqqutassaralugu assuarnaassusermik ilaasortatik piumaffiginerpaat? Kristumiuuneraqatigiit ilagiissortaanni inuit sualuttumik qanoq-ittumilluunniit ajortuliortartut unioqqutitsisartullu suleqataasutut suleqataanngitsutulluunniit ilaasortaatinneqartarput. Bibelimi najoqqutarineqartut malissagaanni taamatut ilaginnaafissaqanngilaq. — Naleqqiuguk Jerimia 8:5, 6, 10.

9. Inuppassuit tunniulluinnarumallutillu kuisikkumanerminnut suna kajumissutigaat?

⁹ Najoqqutassanik qutsissunik pingaartitsineq Jehovap Nalunaajaasuisa akornanni atortuusoq tamannarpiaq kajunngutigalugu, inuit ilumoorsusermik assuarnaassusermillu nuannarisaqartut qilammi nunamilu kisimi oqartussaalluni Naalakkamut, Jehova Guutimut, tunniulluinnarusupput. (Hâpakuk 3:18, 19) Upperisarsiortut silamiorpaluttut ileqquisa aamma Jehovap Nalunaajaasuisa ileqquisa erseqqissumik assigiinngissuteqarneri takusinnaavaat. Inuit amerlanersaasa minguitsumik guutisiorneq nikagigaluarpaat. (1 Pîtruse 4:3, 4) Assuarnaassusermilli nuannarisaqartut tuusintikkuutaat sallusuissummut saassimapput. Guutimik asanninnertik taassumalu najoqqutassiaanik nuannarisaqarnertik imermut kuisinnermikkut takutippaat. — Naleqqiukkit Mákorse 1:10; Juánase 3:23; apustilit suliait 8:36.

Assuarnaassutsip asanninneq aalajaatsuunerlu tunngavigai

10. Kristumiup assuarnaassutsi aalajangiussinnaassaguniuk suna pissariaqartippaa?

¹⁰ Assuarnaassuseq akeqarpoq. Jesusip tamanna erseqqissarpaa inuit kajumissaaramigit imminut ajoqersuganngoqqullugit. ’Uannik malinnikkumasoq imminik isumakkiissaaq, sanningasulinilu ersullugu malissavaanga [malittuassavaanga, NW].’ (Mákorse 8:34) Kristumiutut assuarnaalluni inuujumasut misilinneqartassapput assigiinngitsunillu taamaatitsisariaqarlutik, soorlu Kristus aamma taamaaliortoq. Tamatumunngalu pissutaasoq aamma taannaavoq: Ataaseq akeraraarput, Satan. (Evfisumiut 6:11, 12) Aalajaatsuusariaqarpugut Jesus „malittuassa“gutsigu. Tamanna pissutigalugu Guutimut tunniulluinnarumalluni aalajangigassaavoq imaannaanngeqisoq; isumakkut maannakkorpiaq iluarusunneq malinneqassanngilaq taamaassuseq allanngujaqimmat. Inuillumi ataasiakkaat qaammaterpaalunnguit ukiorpaalunnguilluunniit kuisinnermik kingornagut sallusuissut tunuttarpaat. Tamatumunnga suna pissutaasinnaava?

11. Immaqaa suut pissutigalugit ilaat assuarnaatsuujuarsimanngillat?

¹¹ Inuit ilaasa kuisikkumallutik aalajangeramik silatusaarneq pinnagu misigissutsitik pissutiginerusimagunarpaat. Allat immaqa erniinnavik kinguneqarnissaa ilimagigamikku namminissarsiorlutik, pilertortumik pisussanik anguniagaqarlutik, tunniulluinnarput. Suna pissutaagaluarpalluunniit, Jehovamut aalajaatsuugaluartumik pissusertik tammarpaat. Maligassartik, Jesus Kristus, ’aarlorfigiuaanna’nngilaat. (Eprîarit 12:1, 2) Tamatuma kingunerisaanik Guutimut asanninnerat nillertunngorpoq assuarnaassusialu sivikippoq. Suna pillugu asanninneq taama pingaartigaa? Asanninneq kisimi Jehovamut ataavartumik tunniulluinnarnermut tunngavissaalluarpoq. — Mákorse 12:30, 31; 1 Juánase 4:7, 8, 16; 5:3.

Assuarnaatsuujuarnissap akissaa naatsorsoruk

12. Kuisinnginnermini inuup suut naatsorsoqqaartariaqarpai?

¹² Jesusip ajoqersukkani kajumissaanngilai maliinnaqqulluni akissaa naatsorsoqqaarnagu. Imaattumik unnersuussuteqarpoq: ’Kinami ilarsi qaqiffiliorumaguni ingikkallassannginnerpa akissaa naatsorsorlugu, inernissaanut atortussat piginerini?’ Aap, silatusaartup siumut qanoq iliornissani peqqissaartumik nalilerniartarpai. Suna pissutiginerini qulakkeersimasariaqarpaa kristumiutut tunniulluinnarnerup kuisinnerullu akisussaaffittaa tamaat tigutinnagu. Tamatumalu sumik nassataqarsinnaanissaa Jesusip takutippaa, oqaatsini ima naggaseramigit: ’Taamattaaq ilarsi kinaluunniit pigisaminik tamanik isumakkiinngitsoq ajoqersugarisinnaanngilara.’ — Lúkarse 14:28-33.

13. Jesusip ajoqersuutigisaasa asanninneq pingaartortarimmassuk, qanoq isumaqarpa oqarami inuup ilaquttani ’uumigissagai’? (Matîuse 22:37-40)

¹³ Jehovamut tunniulluinnassagutta taassuma peqqusaanik iliornitsinni tarnitsigut iluunngarluta assuarnaatsuusariaqarpugut. Inuk kinaluunniit pigisavullu suulluunniit Guutimut asanninnitsinni pingaarnerutissanngilavut. Tamanna eqqarsaatigalugu Jesus oqarsimavoq: ’Uannut pisup angunni arnilu nuliilu qitornanilu qatanngutinilu namminerlu inuunini uumiginngikkuniuk uannut ajoqersugaasinnaanngilaq.’ (Lúkarse 14:26) Inuup ilaquttani namminerlu inuunini uumigissagai oqarami, Jesus qanoq isumaqarpa? Allatigut malitsigisani ajoqersoramigit qinngarsortitik asaniassagaat, oqaaseq ’uumigissagaat’ uani qanoq paasisariaqartippaa? (Lúkarse 6:27, 35) Uani uumiginninneq tassaavoq minnerusumik asanninneq. — Naleqqiuguk Matîuse 12:46-50.

14. Inuup Jehovamut Nalunaajaasunngornerani ikinngutaasa eqqarliisalu ilaat qanoq periaaseqartarpat? (Juánase 15:18, 19)

¹⁴ Inuk kristumiuulluni Jehovamut Nalunaajaasunngoriaruni ikinngutimi ilaat kikkorpiaat ikinngutaalluartut paasinasuartarpai. Ilaasa immaqa tunutissavaat akornusersussalluguluunniit upperisarigaluani taamaatimmagit, uffa namminneq iluamik upperisarsiortuunngikkaluarlutik. Jesusili neriorsuivoq tamakkunuuna annaasaqassagaluarutta annaasamut taartissarsisinneqassasugut, oqarami: ’Inuup kialuunniit illuni qatanngutiniluunniit angutit qatanngutiniluunniit arnat arniluunniit angunniluunniit qitornaniluunniit nunaatiniluunniit qimakkaluarunigit uanga iivangkiiliulu pilluta, untritileriarlugit maanna matumani pisaassaaq . . . silallu [aaqqissuussinerullu, NW] aappaani inuuneq naassaanngitsoq pissavaa.’ — Mákorse 10:29, 30.

15. Suut pissutigalugit inuit ilaasa Jehovap Nalunaajaasui ataqqinartikkumanngilaat?

¹⁵ Inuit ilaat tunniulluinnaramik assuarnaatsumillu inuuleramik inoqatiminnit ataqqineqarunnaartarput. (1 Korintumiut 4:12, 13) Suna pissutaasinnaava? „Ataqqinartinneqanngitsumik“ upperisarsiulersimagamik. (Naleqqiuguk Mákorse 2:15, 16.) ’Illumit illumut angalaarluni upperisaminik inuit allat kipiluttorfigalugit’ ataqqinartuliornerunnginnami, ilaa? Aamma ataqqinartuliornerunngilaq parnaarussaanikkut pillagaalluni inuiaqatigiissutsimik pingaartitsinermut nunagisamillu asannilluarnermut tunngasutigut ilanngunnaveersaarumanini pissutigalugu. (Juánase 18:36) Aamma ataqqinartuliornerunngilaq Bibelimit ajoqersorneqarsimanini tunngavigalugu tarnimigut nalunngeqatiginnissutsi pissutigalugu aalersortikkumassanani — taamaakkaluartorli AIDS-imik nappaalanersuaqalermalli aalersortinnerup silatusaarnerussusia inuit ilaasa apersuusertalersimavaat. — Naleqqiukkit apustilit suliait 15:28, 29; 17:6, 7; 24:5.

16. Suut pissatsissutigalugit assuarnaatsuujuarsinnaavugut?

¹⁶ Kristumiutut assuarnaalluni inuuneq nerukikkaluarpoq misilinneqarnangaarlunilu, tassuunakkulli ingerlasut tamatigut ikioriarfissaqarput. (Matîuse 7:13, 14) Taamaattumik Paulus oqarsinnaasimavoq: ’Tamaasa pissatsitsisikkut sapinngilakka.’ (Filípimiut 4:13) Pissassagaasinnaavugut qinnuttuinnarutta, Guutip oqaasia atuaqqissaartarutsigu ilagiinnillu kristumiunik naapeqatiginnittarutta. Assuarnaatsutut kuisimasutut ilumoortuujuarsinnaassaagut unneqqarissinnaassallutalu Guutip pissatsitsineratigut. — Evfisumiut 4:11-13; 6:18; Tussiaat 119:105.

Assuarnaalluni inuunerup iluaqutissartai

17. Pilluaqqussutissat suut kuisinnerup kingornatigut tiguneqarsinnaalissappat?

¹⁷ Tunniulluinnarnerup kuisinnerullu kingornisigut pilluaqqussutissarpassuit tiguneqarsinnaalissapput. Annertunerusumik tulluusimaarnarnerusumillu kiffartuuteqarsinnaatitaanermik kinguneqarsinnaapput. Kuisimasut ikiortaallutik pionerinngorsinnaatitaapput, tamatumalu kingunerisaanik ilaat pioneritut nalinginnartut, pioneritut atorfinitsitatut, ajoqersuiartortitatut, ilageeqatigiinnut nakkutilliisutut imaluunniit nunap immikkoortoqarfianut nakkutilliisutut, aamma Betelimi sulisutut kiffartuuteqarnissamut periarfissaqassapput. Qatanngutit angutit kuisimasut periarfissaqarsinnaajumaarput ilagiinni kiffartortutut kingusinnerusukkullu utoqqaanertatut kiffartuuteqarnissaminnut. Pilluaqqussutissalli tamakkua arlaannaalluunniit angujumagaanni pinngitsoorani piumasaq tunngaviusoq naammassineqartariaqarpoq: Assuarnaatsuusariaqarput. — 1 Timûtiuse 3:1-10.

18. Tunniulluinnarsimanerput inunnut ilagisartakkatsinnut qanoq sunniuteqassava?

¹⁸ Tunniulluinnarluni assuarnaatsuullunilu inuunerup iluaqutissartai siaruarlutik inunnut allanuttaaq annguttarput. Kristusip maligassiaanik peqqissaartumik malinninniartut uiusutut nuliaasutulluunniit, ataatatut anaanatulluunniit pitsaanerujuartarput. (1 Pîtruse 2:21; Evfisumiut 5:21-33; 6:4) Inuusuttut angajoqqaaminnut, ilinniartitsisiminnut, ilagiinnilu utoqqaanertanut ineriartornartumik pissuseqaleriartortarput. (Títuse 2:6, 7) Kristumiut kuisimasut nalinginnaat inoqatitut, sulisitsisutut sulisitatulluunniit pitsaanerulersarput. (Matîuse 22:39; Evfisumiut 6:5-9; Títuse 2:9, 10) Kristumiullu tamarmik imminnut kajumissaartuartariaqarput qiimmassarlutik, soorlu Jesus oqarsimasoq: ’Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi.’ — Matîuse 11:29.

19. Tunniulluinnarnerup kingunerisaanik aamma suna pingaartorujussuusoq anguneqarsinnaava?

¹⁹ Tunniulluinnarnerup kuisinnerullu iluaqutissartaasa ilaat pingaarneq tassaavoq Pinngortitsisumut eqqissinartumik pissuseqalerneq. Tamanna isummakkut eqqissinarpoq. Soorlu Paulus oqaaqqissaarisoq: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigit torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ — Filípimiut 4:6, 7.

20. (a) ’Eqqissinerup Guutip piata’ suna tunngavigaa? (b) Kuisittoq aamma sumik periarfissaqalissava?

²⁰ ’Eqqissinerup Guutip piata’ Jesusip maligassiaanik pilliutaaneranillu paasisimasaqarluarneq tunngavigaa. Tamakkununnga tunngatillugit Kristusimik ilisarsigamik inuppassuit ilumooqqissaarlutik allamik isumataarsimapput piviusumillu ileqqorigaluatik allanngortissimallugit, ajortimit allamut saallutik. (apustilit suliait 3:19, 20) Tamatuma kingunerisaanik tunniulluinnartut oqartalerput, tussiaasiortutut: „Saqivungami assuarnaallunga, . . . katisimasuni unnersiutigissavara [Jehova].“ (Tussiaat 26:11, 12) Guutimut tunniulluinnarsimanini takutikkumallugu imermut morsutsitaalluni kuisittup Jehovap kiffai assuarnaatsut silarsuarmi tamarmi ittut iligilerpai. (1 Pîtruse 2:17) Aammalu ’inuuneq piviusoq’ tiguaa, tassaasoq inuuneq naassaanngitsoq Jehovap Kristus Jesus aqqutigalugu neriorsuutigisaa. — 1 Timûtiuse 6:19; Títuse 1:2. (wD 1/7 86)

[Quppernerup ataani ilanngussaq]

[Qupp. 14-mi assiliartaq]

Kuisinneq periarfissiivoq . . .

[Qupp. 15-mi assiliartaq]

. . . assuarnaalluni kiffartuuteqarnissamut