Inuiaat tamarmik atuagassaat suna najoqqutaralugu qinissagaluarpiuk?
ULLUT tamaasa sammisartagarpassuavit saniatigut piffissaqarniarsinnaagaluaruit sapaatip akunneranut atuagaq ataaseq atuartassallugu, inuunerpit nalaani atuakkat 3000-init amerlanerusut atuarsinaassagaluarpatit. Amerlangaartutut isumaqarfigineqarsinnaagaluarput, amerlasuujunngivippulli eqqarsaatigigutsigu USA-mi ukiut tamaasa atuakkat saqqummeqqaartut tamakkua quleriaataannit amerlanerusartut. Tamakkuali ilaginngilaat atuakkat qangarnisaanerulaartut pitsaalluartut tuusintikkuutaat inuit ilinniagaqarsimasut tamarmik atuarsimasussaagunagaat.
Nalunanngitsumik, atuakkat eqqarsaatigigaanni, paasisaq ukiut 3000-it matuma siornagut eqqartugaq suli ilumoorpoq: ’Atuagassiarpassuit amerlalluinnarput, isumasiuiniarpallaarlunilu timimut qasunallaaraaq.’ — akugdlîssup oĸausê 12:12.
Atuakkalli amerliartuinnarasuartut akornanni atuagaqarnerpa ima naleqartigisumik pingaaruteqartigisumillu allanit tamanit immikkoorluni inunnit tamanit atuarneqartussaasumik? Atuagaqarpa inuiaqatigiiussutsikkut, kulturikkut oqaatsitigullu akornutaasut uniffiginagit inuiaat tamarmik atuagassaannik taaneqarsinnaasumik?
Apeqqut atuakkat suut atuartussaanerivut ilinniartitaanermuinnaq tunnganngilaq, ungasinnerusormi eqqarsaatigalugu atuakkatta isumaliortaaserput, sunik pingaartitsinerput naliliinerpullu sunnertarpaat. Apeqqut taanna perorsaanermik atuartitsinermillu ilinniarluarsimasut, angajoqqaat allallu qanga maannalu eqqarsaatigeqqissaartarpaat. Atuakkat suut atuagassaanerusut aalajangerniarlugit amerlasuunik misissuisitsineqartarsimavoq, inernerilu paasissutissaalluarput.
Immikkut ilisimasallit qinigaat
1890-imi atuakkianik naqiterisitsisartup taamani atuakkanik ilisimasaqarnerusut ilarpassui apersorlugit apeqqut tamanna apeqqutigisimavaa. Qinnuigai atuakkat pingaaruteqarnerutitatik taaqqullugit. Apersuinerata suna inerneraa? Qinerlerfissiat ilaanni allassimavoq: „Ukiut 1900-ssaanni annerusumik ilinniagaqartut amerlanerungaartut Bibeli, Shakespeare Homerilu pingaartinneruvaat,“ nangillunilu allassimavoq: „Ullumikkut pingaarnerutinneqartutut qinikkat aamma taakkuussagaluarput.“
Inunnik isumasiuinerit nutaanerusut inerneri tamatumunnga assingusarput. Assersuutigalugu, 1982-imi septemberimi, professorit, historiamik ilisimatuut bibliotekimilu pisortaasut nuimanerusut arfineq-pingasut apeqqummik uuminnga: „Atuakkat tallimat suut inuit ilinniagaqartut tamarmik atuarsimasariaqarpaat?“ aperineqarnermikkut akissutaat atuagassiami Time-imi saqqummersinneqarput. Naak immikkut ilisimasallit tamatigut isumaqatigiinngikkaluarlutik, arfineq-pingasut ilaasa tallimat — tassa amerlanerusortaasa — siunnersuutiminnut Bibeli ilaatippaat. Inunnik isumasiuineq tamatumunnga assingusoq atuagassiami Psychology Today-mi nalunaarutigineqarpoq: „Atuakkani pingaarnerutitani 165-iusuni, Bibeli amerlanerpaamik taasissutigineqarpoq: 15-inik. Allanik taama taagorneqartigisoqanngilaq.“
Koreami kristumiuunngitsut kristumiut ilagiissaannik qanoq isumaqarfiginninnerat paasiniarlugu aviisip The Korea Times-ip tamanik apersuisitsinerata inerneri immikkut soqutiginarput. „Tamanik apersuineq tunngavigalugu nalunaarutigineqarpoq kristumiuunngitsunut naleqqiutissagaanni kristumiut namminiinnarsiornerusut, aningaaseritunerusut ilumooqqissaannginnerullutillu,“ aviisimi allassimavoq. Nalunaarusiarli imannak ilaneqarpoq: „Naak uppinngitsuugaluarlutik, apersorneqartut 70 procentiisa Bibelip iluatinnassusia assut pingaartippaat.“
Pingaartitaanerpaaq
Inunnik apersuisitsinerit isumasiuisitsinerillu arlalippassuit assersuutigineqarsinnaagaluarput takutinniarlugu Bibeli atuakkanit allanit tamanit pingaarnerungaartutut taasissutigineqartuartartoq. Assigiinngitsut pissutigalugit, qanga maannalu, nunani kangillerni killernilu, Bibeli atuakkani pingaartitaanerpaasarpoq.
Unali pingaarneruvoq: Illit qanoq isumaqarfigaajuk? Killerni najugaqaruit, isumaqarpit Bibeli silarsuatsinni nutaanerusunik ilisimatusaatinillu atugaqarfiusumi pisoqalisoorsimasoq, ajornartorsiutillu ullumikkut naammattoortakkavut anigorniarlugit nalikitsuusoq? Bibeli isigaajuk ilinnut naleqarpianngitsutut? Imaluunniit Bibeli tusarliussassaqarpa inuit tamavimmik ullumikkut tusartariaqagaannik? Ajornartorsiutinut ullumikkut inuit sumiikkaluartulluunniit ajornartorsiutigisartagaannut aaqqiissutissaqarpa? Ilumut tassaava atuagaq inuiaat tamarmik atuagassaat? (wD 15/4 86)