nâlagkersuissut inuit sapigãnik nãmagsingnigtugssat
„Qaallusi takuniarsigit Guutip suliai, suliai inuit akornanni ersitsatsitsipput.“ — Tussiaat 66:5.
1, 2. (a) píngortitarssûp takugssaussup ĸanoĸ erssersípâ píngortitsissup pigínaunera kákaginaĸissoĸ? (b) uvagut nalerput pivdlugo Jehovap oĸausiane sujuligtûtaussume agdlagsimassut suna pivdlugo ugperísavavut?
JEHOVA pigínauneĸarpoĸ inuit sapigãnik nãmagsingnigsínaunigssaminut. ássersûtigitigo: atomip nukinga atordlugo sákugssiat ĸârtitsisínaunerat inuit kákagât; atomivdle nukinga angnikitsuínaralángûvoĸ seĸernup nukinganut nalerĸiutísagáine. seĸinerdle uvdloríssat 200 milliârtit migssiliordlugit ĸilaup sivdlianĩtut iláinarât. uvdloríssanik ilisimatût migssingerpât silarssûp avatâne tamarssuarme uvdloriaĸatigîgpagssuit atautsimôrtut ímaĸa 100 milliârtiussut, tamarmigdlo ingmíkut milliârtilingnik uvdloriartaĸarput. tamáko tamarmik píngortísavdlugit pigínauneĸangârneĸ nukingârnerdlo pissariaĸarsimásáput! (Isaia 40:26) píngortitsissup pigínauneranut kákaginaĸissumut tamatumúnga nalerĸiutdlugo inuit pigínaunerat sũngitdluínartutut isumaĸarfigineĸalersarpoĸ. — Isaia 40:15.
2 taimaingmat kialũnît ĸularisángilâ Jehovap nãmagsiumâgkane nãmagsiumârâ. (Isaia 46:9, 10; 55:11) ugperissariaĸarparput oĸausiane sujuligtûtaussume oĸalugtũneĸaravta inuit nangminerssortitauvdlutik ingerdlanigssãnut Gûtip pivfigssarititâta nâlernera ĸanigdligigput. inuiait ingerdlausiáne pisimassut nalunarungnaersípât inuit inugtut ũmássusilingnut, ûmassutut ũmássusilingnut nunarssuarmutdlo iliorsimanere kángunartûssut, Gûtip píngortitarssuanut takuvsunautaussut. taimáitumik Jehovap píssuteĸardluardlune takuvsunaut tamána ivitdlugo inerdlugo pêrsítugssauvâ. — Húsia 4:1-3; Jûtarse 14, 15.
3. ungasíngitsúkut piumârtugssat bîbilime ĸanoĸ sujuligtûtigineĸarpat?
3 uvdlumíkut silarssuarme pissartut nalunaiautauvdluarput píssutsit ârĸigssũssaunerata ’uvdlut kingugdlît’ Timûtiusimut agdlagkat áipãne kapitale 3-me sujuligtûtigineĸartut nâlerneránut pisimaneranut. ungasíngitsúkut Jehovap píssutsit ârĸigssũssaunerat tamána sûjungnaersíkumârpâ ĸutdlersartâlo, Satan Djævel, súnîsínaujungnaersitdlugo. tamatuma kingunerísavâ nuname píssutsinik ârĸigssũssineĸ nutauvdluínartoĸ nâlagkersuissunit ĸilangmĩtunit nákutigineĸartugssaĸ. nâlagkersuissut tássauko nâlagauvfik Jesusip ajoĸersugkaminut ĸínutigerĸussâ oĸarame ĸinussásassut: „nâlagauvfît tikiutdle; perĸussat ĸilangmisut nunamísaoĸ pile.“ — Matîuse 6:10; Dâniale 2:44; Rûmamiut 16:20.
akiliutdlugo utertitsinerup sujunertâ
4. itsarssuaĸ Israelíkúne akiliutdlugo utertitsinermik pissauseĸ Jehovap suna periauserâ?
4 nâlagkersuissut inûssut ajorte, nápautit toĸulo taimaititísínáungilait. Gûtivdle nâlagkersuissûtitaisa inuit sapigât nãmagsiumârpât. tamatuma ĸanoĸ ingerdláneĸarnigssâ ilâtigut pâsissaĸarfigisínauvarput Jehovap itsarssuaĸ ínugtaminut Israelíkúnut iliûserissartagai misigssoruvtigik. taimanerssuaĸ akiliutdlugo utertitsineĸ Gûtip periauserissarpâ. ásserssûtigalugo: Israelíkut ilât pîtsúngorune ímaĸa Israelíkũngitsunut inugsiángordlune pisiaritítariaĸarpoĸ. kisiáne erĸardlîsa ĸaningnerussut ilâta akiliutdlugo utertísínauvâ nãmagtumik akiliutigssaĸarune. — 3 Môrsase 25:47-49.
5, 6. (a) akiliutdlugo utertitsinermik pissauseĸ ĸanoĸ periauserineĸarpa inuiait ajortisiamik ajortaiarneĸarneráne? (b) inuit kíkut tamarmik ingerdláinartumik ajortimit aniguisíneĸarpat?
5 tamatumúnga ássingussumik inuiait ajortimut inugsiaunermit utertitausínaunigssât Gûtip isumagisimavâ. akiliutigssap utertitsíssutigssap ánaissaĸ naligissariaĸarpâ. (5 Môrsase 19:21) Adamip inugtut nãmagdluínartutut nâgssáungitsumik inûsínautitauneĸ ánaivâ. inuit ajortigdlit pigissaĸángínamik tamatuma naligssânik, ’kialũnît ĸatángúne akiliutdlugo aniguisísínáungilâ’. (Tussiaat 49:8) utertitsisínaussuvdle tikiúnigssâ bîbilime sujuligtûtigineĸarpoĸ. tássauvoĸ Jesus Kristus. nalunarungnaersíneĸarpoĸ Jesus inũngíkatdlarnermine ĸilangme ísimassoĸ. Jehovavdle píssauneratigut Jesusip ûmássutâ Mariap igdliânut nûgtíneĸarpoĸ. tássûna inugtut inúngorpoĸ. kisiánile Gûte atâtagigamiuk ajortiliússuseĸ inuiait avdlat tamarmik atugardliûtigissât kingornússaríngilâ. — Matîuse 1:18-21; Juánase 1:1, 14; 1 Pîtruse 2:22.
6 taimaingmat Jesusip pigâ inugtut nãmagdluínartutut inûnerup nalinga naligissatuâ — tássaussoĸ inugtut nãmagdluínartutut inûneĸ avdla. Adamile nâlángitsoĸ ássiginago, Jesus Gûtimut nâlagtuarpoĸ. inuitdlo pivdlugit inûnine túniungmago, Jehovap inûneĸ táuna akiliutigssatut nalerĸútutut akueralugo tiguvâ. (Galâsiamiut 1:4) imatutdle pâsissariaĸarpa kíkut tamarmik ingerdláinartumik ajortimit aniguisíneĸarumârtut nâlagauvfiuvdlo aĸutsinerata atâne nãmagdluínássuseĸ piumârdlugo? nâgga, Juánase 3:16-imime agdlagsimavoĸ: „silamiúme Gûtip ima asatigai ernitue túniutdlugo kinalũnît táussumúnga [suliaĸardlune, NW] ugpertoĸ támarĸunago, nâgssáungitsumigdle inũssuteĸarĸuvdlugo.“ utertitsíssúmik sulíssutigingningneĸ ilagsiguvtigo iliûseĸalerdlutalo aitsât misigiumârparput timivta isúmavtalo pâratîsime nãmagdluínartúngorsarneĸariartuârnigssât. — sarĸúmersitat 21:4.
ârĸigssũssaunigssame nutâme ilíniartitauneĸ
7, 8. inûp ĸarasâ sujunigssame ilíkagagssaminut ĸanoĸ amerdlatigissunut inigssaĸarpa?
7 inûp isumâ ilisimassanut amerdlangârtorujugssuarnut inigssaĸarpoĸ, uvfa mãna inuk nãmagdluínángíkaluartoĸ. ârĸigssũssaunigssamile nutâme, isumaliornerup ajorte akornutigiungnáisagamiuk, tamákunánga amerdlanerungârtunik ilisimassaĸarsínaulísaoĸ. ĸarasaĸ pivdlugo atuagkiortoĸ atuagkiamine agdlagpoĸ: „ârĸigssũssaunerit ássigĩngitsorpagssuarnik katitigaussut píngortitarssuarme tamarme ilisimaneĸartut pâsiumináinerpârtait niarĸuvtínĩput. sapíngíssutsimigut ássigĩngitsunigdlo suliaringnigsínáussutsimigut [inûp ĸarasâ] ĸarasaussiamit inungnit sananeĸartumit sumitdlũnît sapíngíneroĸaoĸ.“ nangitdlune agdlagpoĸ: „oĸartoĸarajugpoĸ ĸaratsavta imarisínaussaugaluata 10 procentĩnâ atorneĸartartoĸ. pâsineĸalersimavordle taimatut oĸarneĸ ingassáussinerussoĸ sualungâtsiartoĸ. procente atauserdlũnît atúngínguatsiarparput — ilimanarneruvoĸ procentip atautsip ĸulerarterutáinâ mingnerussordlũnît atorneĸartartoĸ.“
8 ârĸigssũssaunigssame nutâme inûp ĸarasâ pigínaunine tamákîssoĸ atordlugo atorneĸarsínaulerpat, inuit nãmagsisínaussagssait takordlôriákit. soĸutiginartorpagssuit ilíniarusungnaĸissut Jehovap nunamut matumúnga inigssisísimassai ilíniarfigisínaussavut erĸarsautigeriákit, sôrdlo ûmassut, imarmiut naussutdlo tamavîsa. ãmátaoĸ erĸarsautigeriaruk silarssûp avatânĩtut tupingnangârtut uvdloriaĸatigîgpagssuitdlo atautsimôrtut milliârtiligpagssuit ilíniarnigssap nuáníssusigssâ. erĸarsautigeriákit erĸumîtsuliorníkut, nipilerssorníkut, agssangnik suliníkut ássigĩngitsorpagssuatigutdlo pitdlarĸíssutsit pigínáussuseĸarfigisínaussavut.
9. ârĸigssũssaunigssame nutâme ilíniartitauneĸ ĸanoĸ ítoĸ angnerpâmik iluaĸutigssaĸarpa?
9 ârĸigssũssaunigssame nutâme avdlatut ítumik ilíniartitauneĸásaoĸ tamarmik angnerpâmik iluaĸutigissagssãnik. Jesus oĸarpoĸ: „tamarmigdlo Gûtimit [Jehovamit, NW] ajoĸersorneĸarsimásáput.“ (Juánase 6:45) tássáusaoĸ ilíniartitauneĸ ĸutsingnerpâĸ. Gûtivdlo nâlagauvfianut ínugtaussut tamarmik, ãmátaoĸ píssutsit ârĸigssũssaunerata matuma naggatigssâne amiákûvdlutik inûsimassugssat, tamána periarfigssarsivfigisínáusavât. (sarĸúmersitat 7:9, 14) Gûtip nâlagauvfianut ínugtaussugssat avdlat kíkûnere pâsineĸarsínáuput Jesusip oĸausînit Juánase 5:28, 29-me agdlagsimassunit: „uvdlut nagdliúkumârmata, tauva ilivernĩtut tamarmik táussuma nipâ tusarumârpât; anivdlutigdlo.“ toĸungassut milliârtigdlit makitíneĸarumârput — tássalo inuit nãmagsisínáungitdluínagât. tamarmik ajoĸersorneĸarnigssãnik ilíniartíneĸarnigssãnigdlo suliagssaĸ angnertôrujugssũsaoĸ!
10. ârĸigssũssaunigssame nutâme ilíniartitsineĸ ĸanoĸ ingerdláneĸásava?
10 uvdlumíkut ilíniartitsinermik ârĸigssũssinerit ássigĩngitdluínartut amerdlaĸaut. kisiánile ârĸigssũssaunigssame nutâme Gûtip nâlagkersuissûtitaisa ĸilangmĩtut pigssarsiaritísavât ilíniartitsinermik ârĸigssũssineĸ atausĩnaĸ silarssuarme tamarme atũtugssaĸ, tamatumûnalo inuit Jehova pivdlugo sagdlusuíssúmik ârĸiagîgdlutik ajoĸersorneĸarumârput. ilíniartitsinerup ilagísavâ inuit ingmingnut erĸortumik píssusigssãnik inuit ajoĸersorneĸarnigssât. ilíniartíneĸásángitdlat nagguveĸatimingnik, inuiaĸatigĩssutsimingnik imalũnît ínugtaoĸatigîngne sume inigssisimanermingnik pingârtitsiniarnigssamik. kisiánile nunap inuisa asaĸatigîngnigssartik ilíniásavât, inoĸatimik erianássusiánik ínimigingningneĸ sungiusardlugo. ilíniartitaunerup tamatuma kingunerísavâ inuit píssutsimíkut nutãngorsagaunigssât, Jehovap píssusînik ĸutsigsunik erssersitsisínaulernigssât. — apustilit suliait 10:34, 35; Kulorsamiut 3:9-12.
11, 12. suna píssutigalugo ĸularísángilarput ârĸigssũssaunigssame nutâme ilíniartitauneĸ taimáitoĸ kinguneĸardluásassoĸ?
11 ilíniartitauneĸ taimáitoĸ ilumut kinguneĸardluásava? kinguneĸardluarsínauvoĸ kinguneĸardluásavdlunilo. tamána ĸularíngilarput ilâtigut píssutigalugo Jehova, sagdlusuitsoĸ, oĸarmat kinguneĸardluarumârtoĸ. (Títuse 1:2) ãmátaoĸ, ilíniartitauneĸ taimáitoĸ mãnákut agdlât kinguneĸardluarpoĸ! Jehovap pilerserêrsimavai peĸatigît ajoĸersuissûssut silarssuaĸ tamákerdlugo ingerdlassut inungnik milliûnilingnik Gûtip nâlagauvfiagut nâlagkersuineĸ pivdlugo táussumalo nãmagserĸussai pivdlugit ajoĸersuissut. tamána ingerdláneĸalersimavoĸ ’uvdlut kingugdlît’ 1914-ime autdlartíneránîtdle Gûtip nâlagauvfiagut nâlagkersuineĸ autdlartingmat.
12 taimanernîtdle sujuligtût Matîuse kapitale 25-me agdlagsimassoĸ erĸũpoĸ. tássane takutíneĸarpoĸ Gûtip akerai sule nunamîtitdlugit Jesusip nâlagauvfingme pigínaunine atulerâ. verse 32-me agdlagsimavoĸ: „inuiaĸatigîtdlo tamarssuarmik sânut katerssúsáput, avigsârtísavailo sôrdlo savanik pârssissup savat savaussanit avigsârtítarai.“ (NW) inuit savatut ítut mãna Jehovamit ajoĸersorneĸarput peĸatigîgsortaisigut takugssaussutigut agdliartuínartutigut. ilíkagkatik pingârtíkamíkik, ilungersorput píssutsitik nutãngorsarniardlugit, Gûtip píssusê malingniardlugit. ilíniartitsinerup tamatuma mãnákut inungnik milliûnilingnik iluaĸutigssãnut súnîlersimanera ugpernarsautauvdluarpoĸ ârĸigssũssaunigssame nutâme Gûtip atûtilersíkumâgagssâne angnertunerungârtumik súnîsínaunigssânut.
pâratîsiliornigssaĸ
13. nâlagauvfiup aĸutsinerata atâne sût sanaortortíneĸásápat?
13 nâlagauvfiup aĸutsinerata atâne suliagssaĸ avdla tássáusaoĸ nunap pâratîsíngortíneĸarnigssâ. pâratîsime inipalâĸarsínáungilaĸ pîtsoĸarsínaunanilo. inuit nalerĸutdluartumik angerdlarsimavfeĸarusugput nunauteĸarusugdlutigdlo orpilingmik, naussulingmik nautsîvilingmigdlo. Gûtimit ajoĸersortítut tamákorpiait piumârpait. Isaia 65:21, 22-milo oĸalugtũneĸarpugut: „igdluliorumârput inigalugitdlo; vĩneĸutinik íkússuiumârput paormaitdlo nerivdlugit. igdluliúsángitdlat avdlap inigssânik, íkússuísángitdlatdlo avdlap nerissagssânik. . . . [agssangmik] suliait nungutdlartísavait ĸinigkama.“
14, 15. suna pivdlugo ĸularísángilarput Jehovap kivfai pâratîsiliorsínáusassut?
14 ârĸigssũssaunigssame nutâme ínugtane kajumingârtut suliumangârtutdlo kivfaralugit Jehovap nãmagsiumâgagssai ĸularísángilavut. uvdlumíkut agdlât sanaortortitsissut tupigusûtigissarpait Jehovap nalunaiaissuisa igdluliornermingne nãmagsissait, sôrdlo rigssalit uvdlut mardlugsuit ingerdlaneráne sanassarait. rigssalit táukua ilâta USA-me sananeĸarnerata kingornagut, avîsime agdlauserissame pingârtume agdlagsimavoĸ: ’kajumingnermit sulissut 2000-it igdluliáinarmit naleĸarnerussoĸ sanavât. arfiníngormat sapâtiungmatdlo sananeĸartoĸ kommunime atorfigdlit perĸigsârneruvdlutik misigssortugssaugaluarpât. suliumangârneĸ, túniutdluínarneĸ anguniagkamigdlo angussiumássuseĸ píssuserineĸarput tupingnangârtumik kinguneĸartumik. igdloĸarfivtíne suleĸatigît tamákorpiait píssuserilersínaugaluaruníkik anguniagkat sûtdlũnît — atornikunik atuerĸigsitsineĸ, pinerdlugtuliornernik pitsailîniarneĸ, imalũnît ínugtaoĸatigîngnik sujuarsaineĸ — angusínáusagaluarpait. suleĸatigîgpagssuit takutípât tarníkut ilũngardlutik sulissut suna angusínaussât suleĸatigîgdluaráine. neriugpugut ilagît nalunaiaissut rigssaleĸarfik isumagssarsivfigísagât. uvagut ĸanoĸ iliornigssamut pigssarsivfigerêrsimavarput.’
15 Jehovap kivfaisa suliumangârnerat píkorigsiartuínarneratdlo Gûtip píssutsinik ârĸigssũssinigssâne nutâme atorneĸarumârput sule angnerussumik iluaĸutigssauvdlutik. nuánârnássusigssâlo najugkat takuvsunartut alianartutdlo tamaisa taorsísavdlugit kussanartumik igdlulersordlugit alianaitsúngorsardlugitdlo! tugdlûsimârnássusigssâ ilisimavdlugo uvdlut tamaisa suliatit nunarssûp tamákerdlune pâratîsíngornigssânut uvdlormik atautsimik sujuarsautaussásassut!
silarssuaĸ tamákerdlugo ilaĸutarît atausiússuseĸartut
16. suna píssutigalugo ârĸigssũssaunerup nutâp inuisa nakûserneĸ ârdlerĸutigineĸ ajúsavât?
16 ârĸigssũssaunigssame nutâme inuit pinerdlugtuliornerit, erĸigsivîtdliornerit sorssungneritdlũnît ârdlerĸutigiungnáisavait. Tussiaat 46:9-me agdlagsimavoĸ: Gûtip „nunarsuarmi tamarmi sorsunnerit soraarsippai“. „erĸigsinermut Nâlagaĸ,“ Jesus Kristus, silarssuaĸ tamákerdlugo atauartugssamik erĸigsisitsiumârpoĸ, „nâlagáussusiata agdliartornera erĸigsinerdlo soraerfeĸáng“ínamik. (Isaia 9:6, 7) erĸigsineĸ piviúsangmat, nunarssuarmiutdlo tamavingmik ilaĸutarîgtut atautsitut maligagssiat ĸutsigsut ássigît ajoĸersorneĸautigisimásagamíkik, tamarmik asangningneĸ nimiussoĸ kipisuitsoĸ ârĸiagĩssutigalugo atausiússuseĸásáput. taimáitumik nunat akornáne kigdleĸásáisaoĸ avigsârutaussunik.
17. erĸigsineĸ atausiússuserdlo Gûtip kivfaisa akornáne mãnákut agdlât atũtut ĸanoĸ angnertutigípat?
17 neriorssûtit tamáko tássaunerpat asule pututitsiniutáinarssuit sagdluliûtit? nâgga, nâlagauvfiup aĸutsineranut ilumôrtumik nâlagtigitítut akornáne erĸigsineĸ atausiússuserdlo piviussúngorêrsimáput! una erĸarsautigeriaruk: Jehovap nalunaiaissue milliûnit mardluk agfardlo sivnerdlugit nunarssuarme tamarme siámarsimavdlutik najugaĸarput. mãnákutdle agdlât sujuligtût Isaia 2:4-me agdlagsimassoĸ erĸûtitilerêrsimavât, agdlagsimangmat: „panatik káukumârpait ivssumut sîtsisíngordlugit, ĸalugiussatigdlo ivigkanut kivdlûtigssángordlugit; panamik silugfigeĸatigĩsángitdlat inuiait, sorssungnermigdlo ilíniásángitdlat kingorna.“ ĸanoĸ pissoĸaraluarpatdlũnît Jehovap nalunaiaissuisa nuname sumilũnît ĸatángutitik, ãmalo inuit kíkutdlũnît, piâralutik toĸutísángilait. sôrdlo Italiame naĸitertitame Il Corriere di Trieste-me agdlagsimassoĸ: „toĸujumanerúput inássut túngaviussoĸ uniorĸutíkumanago . . . INUÁSÁNGILATIT!“ Gûtip najorĸutagssiai najorĸutaralugit inûgamik, Jehovap nalunaiaissue piviussumik erĸigsineĸardlutigdlo atausiússuseĸarput, silarssuarmiut angusínáungisáinik. milliûnilingnigdlo amerdlássusiliuvdlutik silarssuarme akerdlerĩssuteĸangârfiussume píssuseĸ tamána nuánârutigigamíko, ugpernarsautauvdluarpoĸ atũkumârtugssanut Gûtip nâlagauvfia nunamut agtûmássuteĸartunik tamanik aĸutsilerpat. — Juánase 13:34, 35; 1 Juánase 3:10-12.
18, 19. Gûtip najorĸutagssiainik ĸutsigsunik maleruaissut ãma sût iluaĸutigissarpait?
18 Gûtip najorĸutagssiainik avdlanit ĸutsingnerussunik maleruainerup pilersĩnángilâ nunane tamalâne najugaĸartut erĸigseĸatigîngnerat atausioĸatigîngneratdlo, ãmátaordle inoĸatimingnik asangnilersípai inoĸatimigdlo pigissáinik ínimigingnilersitdlugit. taimáitumik „tamatigut agssuarnaitsutut iliorniar“put. (Eprîarit 13:18) tamána erĸarsautigalugo avîsiliortoĸ franskimik canadamiumigdlo angajorĸâlik Le Journal de Montreal-ime agdlagdlune Jehovap nalunaiaissue pivdlugit imáitumik agdlauserissaĸarpoĸ: „táukuínait silarssuarmĩkaluarpata únuákut matut parnaertariaĸásángíkaluarpavut tigdligtoĸalernermilo kalerrisârut ikítariaĸásángíkaluardlugo.“
19 Gûtip nâlagkersuissûtitainut ínugtaussut ilumôrtut akúnermingne pinerdlugtuliortoĸángitdlat, avatãnile silarssuarme pinerdlugtuliorneĸ sualugtingâleriartorpoĸ. ãmátaoĸ bîbilip ilerĸugssanik najorĸutagssiai najorĸutaralugit inûgamik kinguâgssiûtitigut nápautipiluit nârtuersitsineritdlo nunane tamane nápâlanerssuartut ingajagtumik atugaungârtut nâgdliûtigíngilait. Jehovavdlo kivfaisa áiparîngneĸ atarĸingârpât, silamiunit áiparîngnermik aulajangersumik pissauseĸángitsumik isumaĸarneratigut avdlauvdluínardlutik. suna píssutigalugo Jehovap nalunaiaissuisa najorĸutagssat taimáitut maleruarsínauvait? Jehovap patdlorfigissine sujulerssormagit, ’Gûtimilo ajornartoĸángilaĸ’. — Matîuse 19:26.
erĸortumik gûtisiornermut katerssoritse
20. ukiune mákunane pisimassut suna pingâruteĸarnerpârtarât?
20 inuit pâsigaluarnerdlugo pâsíngíkaluarnerdlugulũnît, silarssuarme tamarme inuit savatut ítut Jehovap peĸatigîgsortainut katerssorneĸariartornerat pisimassûvoĸ ukiune mákunane pingâruteĸarnerpâĸ. tássûna sujuligtût malugissariaĸartoĸ Isaia 2:2, 3-me agdlagsimassoĸ erĸũpoĸ: „piumârpoĸ uvdlugssane kingugdlerne, tauva [Jehovap] igdluata ĸáĸâ [tássa erĸortumik gûtisiorneĸ ĸutsigsisimassoĸ] aulajangersitáusavoĸ ĸáĸasingnerssauvdlune, ĸáĸánguanit ĸutsingneruvdlune, akimángitsutdlo tamarmik tássunga ĸerdlerautilerumârput. aggerumârputdlo inuiaĸatigît amerdlasût oĸardlutik: ĸâ, majuarta [Jehovap] ĸáĸânut, . . . avĸutigerĸussaminik ajoĸersorĸuvdluta, avĸusernisigutdlo ingerdlarĸuvdluta.“
21. inuit perĸusersuitsumik ũmatigdlit ĸanoĸ iliorĸuvdlugit kajumigsârneĸarpat?
21 inuit perĸusersuitsumik ũmatigdlit tamaisa kajumigsârpavut erĸortumik gûtisiornermut nâpertuivdluartumigdlo nâlagkersuinigssamut silarssuarme tamarme ĸerdleráutunut ilánguterĸuvdlugit. inuiait Gûtip inatsisainik najorĸutagssiainigdlo ajoĸersorneĸartut nâpeĸatigissardlugit pivdluarĸussauneĸ mãnákut agdlât misigineĸarsínauvoĸ. nâlagauvfiup aĸutsineranut ungasíngitsúkut nunamik pâratîsíngortitsilerumârtugssamut ilumôrtumik nâlagtigitigit. silamiut pilerssârusiait tunârinagit nâlagauvfik táuna tunâriuk, imáikame sôrdlo Tussiaat 127:1-ime agdlagsimassoĸ: „[Jehovap] illu qarmanngippagu illuliortut sulilussinnassapput.“ ĸaerĸussíssut Tussiaat 66:5-ime agdlagsimassoĸ ilagsiuk: „Qaallusi takuniarsigit Guutip suliai, suliai inuit akornanni ersitsatsitsipput.“ taimáitumik ornigugitse Gûtimut neriorssuerĸigsârtumut erĸúkumâramiuk nâlagkersuineĸ inungnut iluaĸutaunerpâĸ, nâlagkersuineĸ inuit sapigãnik nãmagsingnigkumârtoĸ, nâlagkersuineĸ ungasíngitsúkut nuname nâlagkersuinertuáusassoĸ. (wD 15/1 85)
ivdlit ĸanoĸ akísavigit?
□ suna pivdlugo ĸularísángilarput Jehovap sujunertane nãmagsiumârai?
□ akiliutdlugo aniguisitsinermik pissauseĸ ajortaiainerme ĸanoĸ periauserineĸarsínauva?
□ ârĸigssũssaunigssame nutâme ilíniartitsineĸ sanaortortitsinerdlo angnertungârtut sût ingerdláneĸásápat?
□ ârĸigssũssaunigssame nutâme erĸigsinerup, atausiússutsip asangningneruvdlo nunarssuarme tamarme atũkumârnigssãnut mãnákut sunik ugpernarsautigssaĸarpa?
[Qupp. 12-mi assiliartaq]
nâlagauvfiup aĸutsinerata atâne inuit sagdlusuíssúmik nuánarissaĸartut ’Jehovamit ajoĸer-sorneĸarsimásáput’
[Qupp. 14-mi assiliartaq]
nâlagauvfiup aĸutsineranut mãnákut nâlagtut akornáne erĸigsineĸ atausiússuserdlo atûtilerêrsimáput