Sorsuttoqarunnaassaaq

SUMI TAMAANI inuit qangarsuarli silarsuaq sorsuttoqarfiunngitsoq sinnattorisarsimavaat. Sinnattorli tamanna piviusunngorsimanngilaq. Soorlu allaaserisap siuliani eqqaaneqartoq inuppassuit isumaqarput nunarsuarmut tamarmut naalakkersuisut ataatsit kinaassusersiornatik inuiaqatigiinnut tamanut sinniisut aqqutigalugit aatsaat nunarsuaq tamakkerlugu eqqissineq pilersissinnaagaat. Amerlanersaasali paasisimavaat nunarsuup naalakkersuisui kajumillutik oqartussaassusertik naalakkersuisunut nunarsuarmiunut tamanut sinniisunut tunniukkumanavianngikkaat. Ima paasisariaqarpa silarsuarmut tamarmut naalakkersuisut ataatsit pilersinneqarsinnaanngitsut?

Taamaappasikkaluarpoq. Kisianni Biibilip siulittuutaasa takutippaat silarsuarmut tamarmut naalakkersuisut qanittukkut nunarsuarmi eqqissineq atuutilersissagaat. Inuit oqaloqatigiinnerat isumaqatigiinneralluunniit pissutigalugu taamaalinavianngilaq, kisianni, soorlu pruffiiti Daniel isumassarsisitaalluni allassimasoq, „Guutip qilammiusup naalagaaffik qaqugumulluunniit atasussaq pilersikkumaarpaa“. — Daniel 2:44.

Naalagaaffik tamanna tassaavoq Jesusip qinnummi inuit millionilippassuit ’Ataatarpooq’-mik taasartagaanni ajoqersukkaminut ajoqersuutigisaa. Qularnanngitsumik qinnut tamanna, Biibilimi îvangkîlio Matîusip agdlagâ-ni 6:9, 10-mi allassimasoq, ilisimavat. Qinnut tamanna naapertorlugu Guuti ima qinnuigineqarpoq: ’Naalagaaffiit tikiulli; peqqusat qilammisut nunamissaaq pili.’ Guutip qinnut tamanna akissavaa. Qanittukkut naalagaaffik tamanna ’tikiutissaaq’ Guutip piumasaa nunarsuarmi atuutilersinniarlugu. Guutip ilaatigut piumasaraa nunarsuup paratiisinngornissaa eqqissisimaffiusoq.

Nunarsuaq tamakkerlugu eqqissisoqarnissaanik takorruugaq piviusorsiortoq

Pissutissaqarnerpugut isumaqassalluta Guutip naalagaaffia nunarsuarmi naalagaaffiit naammassisinnaanngisaannik naammassisaqarsinnaasoq? Guutip naalagaaffianut tunngatillugu assigiinngitsut arfineq-pingasut nunarsuarmut ataavartumik eqqissisoqarnissaanut qulakkeerisussat misissoriartigik.

1. Naalagaaffimmi kunngiusoq tassaavoq Jesus Kristus, „Naalagaq eqqissisitsisoq“, Guutip toqqagaa. (Jesaja 9:6) Nunamiikkallarami Jesusip kiffani takutippai timikkut sakkuaattariaqanngitsut. Peter ima oqarfigaa: ’Panat inaanut mangunniaruk, pannamik tigusisut nungullutik pannamik toqunneqassammata.’ — Matîuse 26:52.

2. Naalagaaffik nunarsuarmut tamarmut naalakkersuissaaq. Jesusip oqartussaassusia pillugu Daniel ima siulittuisimavoq: „Pissaanermik naalannaammillu naalagaassutsimillu tunineqarpoq; inuiaat, naggueqatigiit immikkullu oqaasillit tamarmik kiffartorfigissavaat.“ — Daniel 7:14.

3. Naalagaaffik inuiaqatigiinnut tamanut sinniisuussaaq. Jesusip naalakkersueqatai tassaapput ’inuit immikkut naggueqatigiissunit immikkullu oqaasilinnit immikkullu inuiaasunit inuiaqatigiinnillu tamanit’ tigusaasut, taakkulu ’nunamut kunngiussapput’. — Sarĸúmersitat 5:9, 10.

4. Guutip naalagaaffiata nunarsuarmi naalagaaffiit tamaasa oqartussaanerminut assortuisut nungutissavai. „Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ — Daniel 2:44.

5. Nunarsuarmiut inatsisit nunarsuarmut tamarmut atuuttut ataanniissapput. Esajas piffissaq tamanna pillugu ima siulittuivoq: „Tassami piumaarpoq Sionimit Guutip ajoqersuutiginiagaa, Jerusalaamillu [Jehovap] oqaasia. [Jehova] eqqartuussiumaarpoq inuiaat akornanni.“ — Jesaja 2:3, 4.

6. Naalagaaffiup innuttai eqqissinerup aqqutaatigoornissaannik ajoqersorneqassapput. Esajas ima nangippoq: „Saffiussavaat panatik assallatserummut savissaliaralugit, qalugiusatillu saviliaralugit, viinnequtilerissutit; inuiaat panamik imminnut silugutissaassapput, sakkunik atuinissamut sungiusarunnaassallutik.“ — Jesaja 2:4.

7. Nakuusernermik nuannarisaqartut nungutinneqassapput. „[Jehovap] iluartoq guutiitsorlu misissuiffigai, nakuusernermillu nuannarisaqartoq uumigaa. Guutiitsut siallersitsivigai aamanik innerusunik. Ikuallassaat anorilu uunaannaasoq pisassamittut pissavaat.“ — Tussiaat 11:5, 6.

8. Sakkut atorunnaassapput. „Qaallusi takuniarsigik [Jehovap] suliai, aseruinersuit nunami pilersitai. Nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.“ — Tussiaat 46:9, 10.

Sooq Guutip neriorsuutai upperisinnaagivut, aamma qanoq ililluta upperneq taamaattoq ineriartortissinnaagipput

Biibilimi Guutip naalagaaffia pillugu erseqqinnerusumik allassimasoqarpoq. Assersuutigalugu eqqartorpaa kikkut Jesus Kristus peqatigalugu nunarsuarmut tunngassuteqartut isumagissagaat. Nassuiarneqarpoq taakku qanoq toqqarneqartut, sunillu piukkunnaateqartariaqartut. Biibilimi allaatigineqarportaaq Naalagaaffiup qanoq ililluni nunarsuup pisuussutai aqussagai nunarsuarmiut tamarmik siumukarsinnaaqqullugit pilluarsinnaaqqullugillu, taamaalillutik sinnganeq piumatuunerlu pissutigalugit akiuunnerit soraarsillugit.

Siulittuutit tamakku upperisinnaavavut? Jehova ima oqarsimavoq: „Taama ippoq oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“ (Jesaja 55:11) Oqaatsit taakkua takutiinnanngilaat Guutip neriorsuutini eqquutitittarai. Jehova Ajugaqanngitsuugami, silarsuaq eqqissisimaffiusoq pinngortinneq sapinngilaa. Allanit tamanit silassorinneruvoq, taamaattumik eqqissineq pilersissallugu naammattumik ilisimassuseqarpoq. (Jesaja 40:13, 14) Aammattaaq Jehova ’asassutaavoq’ — silarsuarmi taassumanngaanngitsumik allamik eqqissinermik pilersitserusussuseqarnerusoqanngilaq. — 1 Juánase 4:8.

Soorunami Guutip neriorsuutai tatigissagaanni uppissuseqartariaqarpoq. Uppissuseq ilisarsinermik tunngaveqarpoq Guutillu oqaasianik, Biibilimik, atuaqqissaarnikkut ineriartortinneqartarluni. (Filípimiut 1:9, 10) Guutip kinaassusia siunertaalu ilisimanerujartortillugit paasinerussavarput Guutip naalagaaffiata piviusuunera. Sorsunnerit soraarsinneqassapput, inuit noqqaassuteqarneri aqqutiginagit, silarsuarmulli tamarmut naalagaaffik qilammiusoq — Guutip naalagaaffia — aqqutigalugu. (gE 22/9 99)

[Qupp. 8, 9-mi assiliartat]

Guutip naalagaaffianut innuttaasut eqqissinermik ajoqersorneqassapput, sakkullu atorunnaarlutik