Jehovap oĸausianik tusardlîníkut atausiússuseĸartut

„Kristuse Jîsuse maligdlugo, isumaĸ-atigîgdluse ĸanermik atautsimigdlusôĸ Gûte Nâlagkavta Jîsusip Kristusip atâtâ únersiutigerĸuvdlusiuk.“ — Rûmamiut 15:5, 6.

1. (a) ínugtane atausíngortíkumavdlugit Jehovap suna periauserâ? (b) atausíngortitsinerup tugdlerîârnera pivdlugo bîbilip suna takutípâ?

JEHOVAP nalunaiaissune silarssuarme tamarme erdlingnangârtumik atausíngortísimavai. tamatuma nâpertorpâ Gûtip inoĸutigîgsoĸartitsinera apustile Paulusip Evfisumiunut agdlagkamine 1:10-me agdlautigissâ: „uvdlut nãmagtivfigssãne inoĸutigîgsoĸartitsiumavdlune ĸilangmĩtutdlo nunamĩtutdlo tamaisa Kristusime atausíngortíkumavdlugit.“ atausíngortitaorĸârtut tássáuput ’savarpánguit’, tássa kristumiut tanitaussut, ĸilangme inûnermik neriugissaĸartut, tugdliútumigdlo „amerdlangârtut . . . inuiaĸatigît . . . tamarmik ilait“ amiákûvdlutik inûnigssamik neriugissaĸartut ’nunagssame nutâme’ Gûtip neriorssûtigissâne inũsavdlutik. — Lúkarse 12:32; sarĸúmersitat 7:3, 4, 9, 13-17; 21:1, 5.

2. Jehovap nalunaiaissuisa ’isumaĸatigîgdlutik’ oĸalungnerat sûp ajornarungnaersípâ?

² ’isumaĸatigîgdlutik’ — taimailivdlutik Jehovamut nalunaiaissut táukua nâlagauvfingmik tusardliússaĸ oĸalûtigissarpât. suna pivdlugo taimailiorsínáupat? silarssuarmime sume najugaĸaraluarunigdlũnît Kristus Jesus nunamĩkatdlarame isumâgut maligkamíko. táussuma silamiut angneruniartut ilagíngilai. nikanartípordle Gûtip perĸussânik iliordlune ajoĸersugkanilo nãkigtartumik asangnigtumigdlo atausíngortíniardlugit. tamatumûna silarssuarme tamarme atausíngortitauneĸ autdlartípoĸ ukiune untritilingne tugdliútune kristumiut ilumôrtut ilisarnautigissagssât. — Filípimiut 2:5-8; Juánase 13:34, 35; 17:14.

3. (a) uvdlumíkut nunarssuarme sunik ássigĩngingârtunik píssuseĸarpa? (b) nunarssuarme tamarme kristumiut ilumôrtut peĸatigîgfiánut suna ilisarnautaussoĸ bîbilime agdlagsimava?

³ peĸatigîgfigpalârtumik atausiússuseĸ tamána ’uvdlune kingugdlerne’ atugkavtíne nuáningârtumik malungnauteĸalersimavoĸ, isumaĸatigĩngínermit Satanip píssutsinik ârĸigssũssinerane, ûmigssuineĸangârfiussume inatsisáissuseĸangârfiussumilo, atugaungârtumit avdlauvdluínardlune. (2 Timûtiuse 3:1-5, 13; Matîuse 24:3, 12) inuiait oĸalugtuarissauneráne aitsât uvdluvtíne nunarssuarme tamarme, nunane 203-ne peĸatigîgfeĸalerpoĸ ajoĸersûtitigut, sujunertákut suliagssatigutdlo ârĸiagîgdluínartunik. Jesusip ajoĸersugaisa silarssuarme tamarme peĸatigîgfiat inerititamigut ilisarineĸarsínauvoĸ. — Juánase 15:8; Eprîarit 13:15; Galâsiamiut 5:22, 23.

suliatigut atausiússuseĸ

4. (a) ukiune untritilingne sujugdlerne ilagîngne aperĸut suna akerdlerĩssutigineĸalerpa? (b) apustilit suliáinik agdlagkane 15:1-6-ime agdlagsimassoĸ nâpertordlugo, Gûtip nâlagkersuineratigut ĸanoĸ suliarineĸalerpa?

⁴ Jehovap peĸatigîgfiane suliatigut atausiússuseĸ apustilit suliáinik agdlagkane kapitale 15-ime ássersûtitut oĸalugtuarineĸarpoĸ. takordlôriákit Jehovamut nalunaiaissut inersimavdluartut katerssũtut — apustilit arĸaneĸ mardlûssut, ilagîngne Jerusalemime utorĸaunertat avdlat tauvalo Paulus Barnabasilo, Antiokiame ilagîngne utorĸaunertaussutut sulissut. Antiokiame Jerusalemísaoĸ jûtit kristumiúngortut ilaisa aulajangiúpât inuit inuiaĸatigîngnêrsut kipineĸartítariaĸartut Mosesivdlo inatsisai maleruartariaĸarait ánásagunik. taimáitumik apustilit utorĸaunertatdlo „tamána isumaliutigiumavdlugo atautsimut píput“. — apustilit suliait 15:1-6.

5-7. (a) ’sivisûmik saĸitsautigigât’ ĸanoĸ pâsissariaĸarpa? (b) nalunaiautit sût sarĸúmiúneĸarpat? (c) oĸalûserissame bîbile ĸanoĸ atorneĸarpa? (d) inersimavdluartutut erĸarsardlune Jakobip isuma túngaveĸardluartoĸ suna sarĸúmiúpâ, tamánalo túngavigalugo aulajangigaĸ inârutaussoĸ suna aulajangerpât? (e) tauvalo utorĸaunertat ĸanoĸ iliorpat?

⁵ isumaĸatigĩngíssut issertuángitsumik oĸaloĸatigĩssutigineĸalerpoĸ, angutit ilungersortut táukua sujúnersûtigissap ajúngeĸutai ajoĸutailo oĸautigalugit. aulajangigagssartik sujumut aulajangiuterêrsimángilât. oĸalûserissagssaĸ tamanit issigalugo misigssorumavât. ’tamána sivisûmik saĸitsautigât,’ nalunángilardle perĸigsârtuartut atarĸingnigdlutigdlo atautsimêĸatimik isumait tusarnârtardlugit. apustile Peterip nalunaiáussutigâ Gûtip anersâmik ivdlernartumik inuit inuiaĸatigîngnêrsut kipineĸartísimángitsut tunisimagai — ersserĸigsumik nalunaiautaussoĸ sákortôĸ timíkut kipineĸartínigssap ánagkumârtunut piumassarineĸarungnaersimaneranut. Barnabasip Paulusivdlo nalunaiaut tamána ilavât, inuiaĸatigîngne oĸalũssissarnermíkut nuáningârtorpagssuit Gûtip nãmagsisimassai oĸalugtuaralugit. — apustilit suliait 15:7-12.

⁶ tugdliutdlugo, píssutiginiagkap taineĸarĸámersup igdlersornigssânut Jakobip bîbilime agdlagsimavfît íssuarpai. navsuiaivoĸ Aamorsip agdlagaine 9:11, 12-ime agdlagsimassup sujumut uparuarâ Davidip angnerussup, tássa Jesus Kristusip, atâne Gûtip kingumut sáimáussiumârnigssâ, Jehovavdlo ’inuiait tamaisa aterminik taisimassut’ pissagssaríngisaraluánik sáimáukumârai. Jakobip pissariaĸartíngilâ inuiaĸatigîngnêrsut kristumiúngortut pissaríssersúsavdlugit kipineĸartínigssãnik Mosesivdlo inatsisaine perĸússutigineĸartunik tamanik maleruainigssãnik piumavfigalugit. pissariaĸartoĸarpordle: gûtipilugsiornavêrsârtariaĸarput, aungmik ĸanoĸ ítumigdlũnît nerinavêrsârtariaĸarput kinguâgssiûtitigutdlo kángunartuliornavêrsârtariaĸardlutik. — apustilit suliait 15:13-21.

⁷ Jerusalemime sujulerssuissoĸatigît isumaĸatigîgdlutik aulajangigaĸarput. Antiokiame ilagîngnut autdlartitsíput, agdlagkatdlo nagsataisa kajumigsârutigssaĸ una naggasiutigât: „tamákunúnga mianerssoruvse iluanãsause. inûvdluaritse.“ — apustilit suliait 15:22-29.

Gûtimit nâlagkersorneĸarníkut periauseĸ

8. (a) uvdluvtíne sujulerssuissoĸatigît aulajangigagssanik aulajangîniarnermingne sût najorĸutarissarpait? (b) ungasíngitsúkut aperĸutit nalorninartut sût ersserĸigsarneĸarpat?

⁸ uvdluvtíne Jehovap nalunaiaissuine sujulerssuissoĸatigît, nuname Nâlagkap ’kivfânut ilumôrdlunilo silatûmut’ sivnîssûssut, apustilit maligagssiât tamána maligpât. (Matîuse 24:45-47, NW) nalunaiaissut tanitaussut ingmíkôĸatigît táuko aperĸutit ilagîngnut pingârutiligssuit pivdlugit Gûtimit nâlagkersorneĸarnermíkut aulajangigagssaĸarângamik, Jehovap anersâva, bîbilime najorĸutagssat kristumiûnermíkutdlo misiligtagkatik najorĸutarissarpait. ássersûtitut taineĸarsínauvoĸ ukiune kingugdlerne sujulerssuissoĸatigît periauseĸ bîbilime maleruarĸussaussoĸ tamána periauserissarpât ássigĩngitsut, sôrdlo „oĸautsimik kivfartûtilik“, toĸússutaussunik sákulissarneĸ, nalúngeĸatigingníssuseĸ Gûtip túniússâ, Esajasivdlo sujuligtûtâta ingmíkôrtuisa ilait aulajangersimassut ĸanoĸ angnertutigissumik nuname pâratîsigssamut atortûnersut, bîbilime ĸanorpiaĸ ajoĸersûtigineĸarnerat ersserĸingnerussumik pâsiniardlugo. — nalerĸiuguk Juánase 14:26; 1 Korintumiut 2:10.

9. uvdlumíkut ajornartorsiutinik oĸalûseringningnermingne utorĸaunertat suna periauserísavât?

⁹ periauseĸ apustilit suliáinik agdlagkane kapitale 15-ime agdlauserineĸartoĸ uvdlumíkut periauserineĸartariaĸarpoĸ ilagîngnut utorĸaunertat ajornartorsiutit oĸalûserigângatigik. sujugdlermik ajornartorsiut pâsíssutigssatdlo tássunga túngassut ersserĸigsumik pâsiuminartumigdlo sarĸúmiúneĸásáput. tugdliutdlugo ilisimangnigtut tutsuviginartut oĸalûserissagssaĸ navsuitsumik piviussorsiortumik nalunaiautigísavât. utorĸaunertat bîbilime agdlagsimavfingnik ujardlísáput Jehovap ĸanoĸ issigingningnera pâsiniardlugo, ãmátaoĸ Vagttårnip peĸatigîgfiata naĸitertitaine agdlagsimassut pâsíssutigssarsiorfigalugit. ĸinoĸatigîngníkut suleĸatigĩsáput isumaĸatigîgdlutik aulajangigaĸarniardlutik, Jehovap oĸausiane ajoĸersûtigineĸartut nâpertordlugit, ilagît iluaĸutigssãnut. — Isaia 48:17; 1 Korintumiut 14:33.

tipaitsungneĸ — ĸanga mãnákutdlo

10. (a) sôrdlo ukiune untritilingne sujugdlerne ilagîngne pisimassoĸ, Gûtimit nâlagkersorneĸarníkut aulajangerneĸartut ĸanoĸ isumaĸarfigísavavut? (b) Gûtip ínugtaisa ukiune kingugdlerne sujuariarnerit nutaunerussut ĸanoĸ nakússagtíssutigalugitdlo amerdlíssutigait?

¹⁰ sujulerssuissoĸatigît aulajangigât tusaramíko Antiokiame ilagîngnut ilaussortaussut „tipaitsûtigât“. ãmátaoĸ uvdlumíkut Jehovap nalunaiaissuisa tipaitsûtigissarpait tusarângamíkik peĸatigîgfigtigut aulajangigkat ajoĸersûtitdlo ersserĸigsarneĸarnere Gûtip ínugtaisa anersãkut perĸigsarnigssãnut Jehovavdlo suliarerĸussâta angnertusarnigssânut. (nalerĸiuguk Títuse 2:1.) sujulerssuissoĸatigîtdle agssangnik agdlangníkut únersũssinigssât ilagîtdlo nalunaeriartortunik pisuínartunik autdlartitsivfigalugit tusardlînigssât pissariaerúpoĸ. silarssuarme tamarme Vagttårnip peĸatigîgfiata ingmíkôrtoĸarfîsa iláine 30-nit amerdlanerussune naĸiterivît átaveĸautitdlo nutaunerussut iluaĸutigalugit ajornarungnaersimavoĸ „tusagagssaĸ nuánersoĸ Jehovap oĸausianêrsoĸ“ (NW) Gûtip ínugtainut milliûnilingnut pivfigssaĸ sapíngisamik sivikitsoĸ atordlugo tusardliúsavdlugo. tamána pingârtumik atuagagssiákut Napassuliaĸ Alapernaerssuivfik-kut nãmagsineĸartarpoĸ. taimáitumik silarssuarme tamarme ilagît „ugperníkut nakússagtíneĸarput, uvdlutdlo tamaisa amerdliartorput“. — apustilit suliait 15:30-mît 16:5 ilángutdlugo.

11. Isaia 30:18-21-me agdlagsimassoĸ erĸûtitdlugo Jehovap Napassuliaĸ Alapernaerssuivfik ĸanoĸ sákugâ?

¹¹ ukiut ardlagdlit Napassuliaĸ Alapernaerssuivfik-mik atuartartut nuánârutigalugo malugisimásavât atuagagssiap amerdliartuínartumik naĸitigaussalernera. ukiut 106-it matuma sujornagut atuagagssiaĸ tulugtut sarĸúmerĸârnermine ĸáumámut 6000-it naĸíneĸartarput, mãnákutdle oĸautsinut 102-nut 11.150.000-íngortarput. oĸautsine amerdlanerussunik atuarneĸarfiussune atuagagssiaĸ ĸáumámut mardloriardlune sarĸúmersarpoĸ. ĸularutigssáungitsumik ajoĸersuissorssuavta, Jehova Gûtip, Napassuliaĸ Alapernaerssuivfik atortarpâ neriorssûtiminik ûmínga erĸortitsinigssaminut: „pivdluarput tamarmik táussumínga utarĸissut. . . . siutivitdlo tusarumârpât oĸauseĸ kingorĸangnit, talerpiuvdlũnît tungânut sâmiuvdlũnît tungânut pilerângavse oĸartoĸ: auna avĸut, tássûna ingerdlagitse.“ — Isaia 30:18-21.

12. (a) mãna sumik nutâmik tipaitsûtigssaĸalerpa? (b) ârĸigssugaĸ nutâĸ tamána ĸanoĸ iluaĸutigisínauvarput?

¹² mãna sule nutâmik tipaitsûtigssaĸalerpoĸ. ukiup 1985-ip autdlarĸautâ autdlarnerfigalugo Napassuliaĸ Alapernaerssuivfik-me ilángutagssiat ilait oĸautsinut 23-nut atautsíkut sarĸúmertalerput!a oĸautsine táukunane sarĸúmersut tamarmik ĸúperneráne sujugdlerme ássigîgsumik ássiliaĸartásáput. ilángutagssiat autdlarĸautaussut atuarĸigsâĸatigĩssutigssaussutdlo ássigîgtásáput. tássûna Jehovap ínugtai atautsíkut nerisíneĸartásáput, tamánalo atausíngûtigísavât anersãkut ineriartordlutik, „tamavta apûtserdluta atausiússusigssamut, ugpeĸatigîgdluta“. tamána sule angnerussumik nakússagtíssutigísavarput ’isumaĸatigîgdluta ĸanermik atautsimigdlusôĸ Gûte Nâlagkavta Jesusip Kristusip atâtâ únersiutigisínaorĸuvdlugo’. — Evfisumiut 4:13; Rûmamiut 15:6.

13. (a) ârĸigssugaĸ nutâĸ tamána ĸanoĸ angnertutigâ? (b) tauva Korintumiunut agdlagkane sujugdlerne 1:10-me agdlagsimassoĸ ĸanoĸ atúsavarput?

¹³ oĸautsit 23-ussut táuko atordlugit atuartartut ilagîngne Napassuliaĸ Alapernaerssuivfik atordlugo atuarĸigsâĸatigîngnermingne písangatigalugo erĸarsautigisínauvât silarssuarme tamarme ĸatángutimik amerdlanerssaisa uvdlorme tássanerpiaĸ anersãkut inũssutigssat táukûssut ilángîvfigigait. Amerikame avangnardlerme kujatdlermilo tamarme, Europap tamarssuane, Japanime Afrikamilo kujatdlerme nunat ilarpagssuine ássigîgsumik atuarĸigsâĸatigĩssuteĸartásáput! nunarssuarme tamarme Napassuliaĸ Alapernaerssuivfik atordlugo atuarĸigsâĸatigêĸataussartut 90 procentê sivnerdlugit — sapâtip akúnere tamaisa inuit 2.500.000-it migssinge — atautsíkut „nerisitaunermut“ peĸataulerêrsimáput. taimailivdlutik táuko ’nãmagtúngoriartorput ássigîgsumik erĸarsardlutik ássigîgsumigdlo isumaliordlutik’. (1 Korintumiut 1:10) ajornarungnaerpat oĸautsit avdlátaoĸ ilángúneĸariartúsáput.

14. ilaĸutarît súkut iluaĸutigísavât?

¹⁴ mána tikitdlugo, ássigĩngitsunik oĸauseĸarneĸ píssutigalugo, ilaĸutarîngnut atautsinut ilaussortaussut Napassuliaĸ Alapernaerssuivfik-me ilángutagssianik aulajangersimassunik atuarĸigsâĸatigîngnermingne ímaĸa ĸáumatit ardlalialuit nikíssutigigaluarpait. mãnákutdle tamatumûna atausíngorsínaulerput. sôrdlo ilaĸutarît nunasissut, angajorĸât nunagigaluamik oĸausînik pâsingningnerussut mêrĸatdle nunap mãna najugarissamik oĸausînik pâsingningnerussut, mãna Napassuliaĸ Alapernaerssuivfik atordlugo sapâtip akúneranut atuarĸigsâĸatigîngnigssamut tamarmik atautsíkut piarêrsarsínãngorput. ilaĸutarîngne mardlungnik oĸauseĸarfiussune angajorĸât mãna pitsaunerussumik pilersugáuput únersũssúmik Evfisumiunut agdlagkane 6:4-me ãma Timûtiusimut agdlagkat áipáine 3:14, 15-ime agdlagsimassumik maleruainigssamingnut.

15. (a) inungnut tamanut nalunaiainivtíne ĸanoĸ iliorsínaulerpugut Isaia 52:8, 9 maligdlugo? (b) 1985-ip ĸáumataine sujugdlerne sujunigssamilo suna ajornarungnáisava?

¹⁵ erĸarsautigeriarugtaoĸ atuagagssiat atordlugit inungnut tamalânut oĸalũssissarnerput. tamánátaoĸ periauseralugo nâlagauvfingmik tusardlîssut nunarssuarme tamarme ’atautsíkut ĸĩmagtarsínaulerput’ pâsíssutigssat ássigît silarssuarme tamarmut atuartugssanut atautsíkut sarĸúmiutísavdlugit. (Isaia 52:8, 9) nunane igdloĸarfingnilũnît ardlalingnik oĸauseĸarfiussune atuagagssiat atordlugit avĸusinerne nalunaiaititdlutik, oĸalũssissartut atuagagssiat oĸautsinut mardlungnut ardlalingnutdlũnît agdlagsimassut ĸúpernerme sujugdlerme ássigîgsumik ássiliartagdlit nivtarsínaulerpait. erĸarsautigeriaruk! 1985-ip ĸáumataine sujugdlerne, nunarssuarme tamarme nâlagauvfingmik tusardlîssut atausiuvdlutik eĸêrsautaussumik nalunaiaisínaulerput Harmagedon pivdlugo! sujunigssame Jehovap ínugtane ímaĸa inákumârpai silarssuarme tamarme atautsíkut kimigtûnik nalunaeruteĸarĸuvdlugit ’agsorôĸatigîgdlutik îvangkîliumut ugperneĸ pivdlugo’ kivfartũssivdlutik. (Filípimiut 1:27) Napassuliaĸ Alapernaerssuivfik-up oĸautsinut amerdlasûnut atautsíkut sarĸúmertarnerata taimatut tamanut nalunaeruteĸartarnigssaĸ ajornarungnaersípâ. — nalerĸiuguk Dâniale 11:44.

sujumut ĸiviarneĸ

16. (a) atuagagssiame uvane ĸúpernerne kisitseĸarfiussune atuagagssianik avguaineĸ pivdlugo suna takutíneĸarpa? (b) uvdlumíkut suna pivdlugo inuit atuagagssiautivut atorfigssaĸartípait?

¹⁶ ukiup 1984-ip ingerdlanerane Jehovap nalunaiaissuisa atuagagssiaĸ Napassuliaĸ Alapernaerssuivfik atuagagssiaĸatâlo Vågn op! amerdlangârtut avguáupait. sulineĸ tamána Jehovamit pivdluarĸuneĸangârpoĸ, sôrdlo atuagagssiame uvane ĸúpernerne kisitseĸarfiussune takuneĸarsínaussoĸ. silarssuarme tamarme 1984-ime atuagagssiautivtínik soĸutigingnigtunut avguaineĸ 11,1 procentimik ĸagfariarpoĸ 287.358.064-íngordlutik, atuagagssiamigdlo aulajangersumik pissartagaĸarnerit 3,2 procentimik ĸagfariarput 1.812.221-ngordlutik. ĸularnángilaĸ inuit amerdliartuínartut pâserusugkât suna píssutigalugo inuiaĸatigît ĸugsalassut ernumangârdlutigdlo aniguinigssaĸ naluvdlugo. (Lúkarse 21:25, 26) angajorĸât ĸitornatik kigsáupait sujunigssamik pivdluarnartumik — nuna atominik sákugssiat atordlugit sorssungníkut ikúmakuínaĸ kigsautiginago. atuagagssiautivta ûmassumik neriûtigssípait! — Matîuse 12:18, 21; Rûmamiut 15:4.

17. atuagagssiautivut iluaĸutigalugit ĸanoĸ Djævel akiorsínáusavarput?

¹⁷ 1985-imime? Napassuliaĸ Alapernaerssuivfik-me Vågn op!-imilo tusardliússaĸ kimigtusiartorpoĸ. tamána avdlatut ajornarpoĸ, Satanip silarssuâta uvdlue kingugdlît ikiliartuínarmata. (sarĸúmersitat 12:12) támarnavêrit! Jehovamik kivfartũssinerme peĸataussarnigssavtínut Djævelip akornuserniartarpâtigut. Gûtip ínugtainit peĸatigîussunit táukualo sulineránit Satanip avigsârtíkumagaluaĸâtigut îumavdluta. (1 Pîtruse 5:8) akiorsínauvarputdle atautsimêĸataussardluta erĸortumik ilisarssiniardluta, ilisarssíssutdlo angnerussoĸ táuna atortardlugo Jehovamik kivfartũssinivtíne. — Evfisumiut 6:11, 14-16; Kulorsamiut 1:9-11.

18. (a) nâlagauvfik pivdlugo oĸalũssissartûgavit ivdlit akissugssáussutsit ĸanoĸ angitigâ? (b) Rûmamiunut agdlagkane 12:10, 11-me ãma 15:5, 6-ime sujúnersûtit ĸanoĸ maligsínauvavut?

¹⁸ ivdlit nâlagauvfik pivdlugo oĸalũssissartûvit? taimaigpat, tauva uvdlumíkut peĸatigîgfingme Gûtimit nâlagkersugaussume pingârtumik inigssisimavutit. kristumiûgavit túniutdluínarsimavdlutit ímaĸa ilagîngne avdlanigtaoĸ akissugssauvfeĸarputit. Jehovavdle arĸata atarĸinautigssânut inûniaravit, soĸutigingnigtunut ilungersortumik oĸalũssissariaĸarputit. ĸatángutigîgsutut asangningneĸ atausiússutigalugo ungagîgdlutalo tamavta anersãkut ilungersorta, ’Jehova kivfartorfigalugo’. (Rûmamiut 12:10, 11) Satanimit silarssuânitdlo ĸanoĸ tatineĸaraluaruvtalũnît, timitut atautsitut ítuartariaĸarpugut, ’isumaĸatigîgdluta ĸanermik atautsimigdlusôĸ’, Jehovap nâlangnautigssânik nâlagauvfik sujunertarissailo nalunaiáissutigalugit.

19. (a) nauk malerssorneĸaraluardluta avdlanigdlo ajornartorsioraluardluta, ĸanoĸ aulajáisínauvugut? (b) Sivfânia 3:8, 9-me sumik únersũssuteĸarpa?

¹⁹ ilarpagssuavta malerssugauneĸ atortariaĸarpât, avdlatdlo nunane oĸalũssivfigiuminaeĸissunik inoĸarnerussune najugaĸarput. isumaĸartuartale isumákut píssusermik Kristus Jesusip pianik. (Juánase 16:33; 1 Pîtruse 4:1, 2) peĸatigîussutut piviussumik isumavdluarta — iluvtigut anersãkut píssauneĸardluta atajuartumik, tatineĸarníkut taimaitíneĸ ajortumik. (Tussiaat 27:14; Filípimiut 1:14) inungnik savatut ítunik ujardlernivtíne ĸasúkarneĸ ajorta. Jehova uvdlugssâlo erĸartûtivfigssaĸ utarĸiuartigik, ikioĸatigîgdluta táuna kivfartorfigalugo, táussuma arĸa tordlorfigititdlugo ’oĸautsitdlo minguitsut’ sagdlusuíssutip oĸausê oĸauseralugit. — Sivfânia 3:8, 9, NW.

20. (a) pivdluardluínarneĸ ĸanoĸ angusínauvarput? (b) Isaia 11:6-9-me agdlagsimassoĸ ĸanoĸ malungnartumik erĸũpa?

²⁰ Gûtip nâlangnautigssânik sulerusugtut tamarmik peĸatigîgdlutik ’inugtâĸ Gûte ássilivdlugo píngortitaĸ atísavât iluartitdlugo ivdlernartitdlugulo ilumôrníkut’. (Evfisumiut 4:24) píssusertârneĸ tamána pivdluardluínarnartûvoĸ. Isaia 11:6-9-me ássersûtitigut pâsinarsausersugauvoĸ, tássanime anersãkut pâratîse Jehovap ínugtaisa iluarsagaussut akornáne atũtoĸ agdlauserineĸarpoĸ. ilâ erĸigsisimássusiat atausiússusiatdlo! piumatûmik ajoĸusîumatûmigdlo inugtut píssuseĸángínerup nuáníssusia! pâratîsimik agdlautigingningnerup tamatuma oĸautsit uko naggatigai: „ajortumik iliortoĸarnanilo aseruissoĸásángilaĸ ĸáĸavne ivdlernartume ilânilũnît; Jehovamik ilisarssissut nuna tamákerumârmássuk, sôrdlo ervngit uligkât ímap narĸa.“ (NW) Jehovap ’ĸáĸâ ivdlernartoĸ’, tássa peĸatigîussunit patdlorfigineĸarnera, uvdlumíkut nunarssuarme tamarme aulajangersagauvoĸ. sôĸ? Jehovavme nalunaiaissune súnersimavai atine nâlangnarserĸuvdlugo ’isumaĸatigîgdlutik ĸanermik atautsimigdlusôĸ’. taimáitumik „nuna“, tássa Gûtip ínugtaisa anersãkut píssusiat, Jehovamik ilisarssissut tamákerpât.

21. suna pivdlugo atuagagssiautivut sapíngisamik angnertûmik avguásavavut?

²¹ uvagut Jehova nakússagtíssutigalugo Napassuliaĸ Alapernaerssuivfik atuagagssiaĸatâlo Vågn op! sapíngisamik amerdlasût siaruartigik. taimailiorta neriûtigalugo nunamiut tamarmik inuiaitdlo erĸardlerîgsortaisa tamarmik sivnîssoĸarníkutdlusôĸ Jehova erĸaimásagât táussumúngalo sângniardlutik. — Tussiaat 22:28; sarĸúmersitat 15:4.

[Quppernerup ataani ilanngussaq]

aperĸutit uterĸitagssat

□ ukiune untritilingne sujugdlerne ilagît ĸanoĸ suleriauseĸarpat?

□ Napassuliaĸ Alapernaerssuivfik-up oĸautsinut amerdlasûnut mãnákut atautsíkut sarĸúmersalernera uvagut sutigut iluaĸutigisínauvarput?

□ 1984-ime atuagagssiat atordlugit nalunaiainerme sutigut angussaĸardluarpa?

□ uvdlune misilingneĸarfiussune agdlât, ĸanoĸ anersãkut sujuariarsínauvugut?