Jiisusip guutisiorfik minguiaraa

Ukiumi 30-mi upernaakkut Jiisusi Jerusalem­miliarpoq. Inuppassuit qaangiiffik nallius­siartorlugu uumasunillu pilliiar­torlutik Jerusalem­miliarput. Ilaasa uumasut pilliutissatik nassarpaat, ilaasali Jerusalemmimi pisiaraat.

Jiisusi guutisiorfimmut apuukkami inuit uumasunik tuniniaasut takuai. Guutisiorfimmi Jehovap pigisaani namminis­sarsiorlutik aningaasarsiorput. Jiisusi qanoq qisuariarpa? Allunaasanik iperaatsioriarluni savat nersussuillu guutisiorfimmiit aniatippai. Aningaasanillu taarsiisartut nerrivii uppitippai aningaasaataallu eqqarlugit. Jiisusip tuinik tuniniaasut oqarfigai: ‘Makku tigoriarlugit annissigit. Ataatama illua niuertarfittut atorunnaar­niarsiuk!’

Inuit guutisiorfim­miittut Jiisusip iliuusai tupaallaatigaat. Ilinniar­titaasa Missiarsi pillugu siulittuut una eqqaavaat: ‘Jehovap illuanut tunniusimanera ilunni ikualasutut issaaq.’

Kingusin­nerusukkut, ukiumi 33-mi, Jiisusip guutisiorfik minguiaqqippaa. Kissaatigaa Ataatami illuani ataqqin­ninngitsulior­toqassan­ngitsoq.