Jiisusi Missiarsin­ngortoq

Johannesip oqaatigisimavaa imminit pingaar­nerusoq tikiukkumaartoq. Jiisusi 30-t missaannik ukioqarluni Galiliiamiit kuussuarmut Jordanimukarpoq Johannesip morsutsitsisarfianut. Jiisusip kissaatigaa Johannesip imermut morsutsis­sagaani. Johannesili oqarpoq: ‘Uanga imermut morsutsit­tussaan­ngilakkit, illinuna uanga imermut morsutsit­tussaagimma.’ Taava Jiisusip Johannesi oqarfigaa: ‘Jehovap kissaatigaa imermut morsutsis­sagimma.’ Taava kuussuarmut Jordanimukarput, Johannesillu Jiisusi imermut morsutsippaa.

Jiisusi imermut morsutsitaareerami qinuvoq. Qinutillugu qilak ammarpoq, anersaarlu illernartoq tuisut isikkoqarluni qulaanut pivoq. Taava Jehova qilammiit ima oqarpoq: “Illit tassaavutit Ernera, asasara. Akuerisaraakkit.”

Jiisusi Jehovap anersaavanik tunineqarami Kristusin­ngorpoq, tassa Missiarsin­ngorpoq. Taamaalilluni Jehovap suliakkiissutaa nunarsuarmi aallartis­sinnaan­ngorpaa.

Jiisusi imermut morsutsitaaq­qammerluni inoqajuitsumukarpoq ullunilu 40-ni taakaniilluni. Uterami Johannesimukarpoq. Johannesip Jiisusi aggertoq takugamiuk oqarpoq: ‘Aana Guutip savaaraa inuit ajortiliunerannik peersisussaq.’ Taamatut oqarnermigut Johannesip inuit paasitippai Jiisusi Missiarsiusoq. Nalunngiliuk Jiisusip inoqajuitsumiinnerani susoqarnersoq? Paaseriartigu.