KAPITALI 73
Johannesi Missiarsip tikiunnissaanut aqqutissiuisoq
Johannesi, Zakkariap Elizabettillu ernerat, inersimasunngorami pruffiitinngorpoq. Jehovap Johannesi aqqutigalugu inuit paasitippai Missiarsi tikiutingajalersoq. Johannesili synagogini illoqarfinnilu ilinniartitsinani inoqajuitsumi ilinniartitsivoq. Inuit Jerusalemmimiut Judiiamiillu tamarmeersut Johannesi tusarnaariartortarpaat. Ilinniartippai Guuti nuannaartissagunikku ajortuliortarunnaartariaqartut. Amerlasuut Johannesi tusarnaareerlugu ajortuliatik peqqissimissutigaat kuussuarmilu Jordanimi Johannesimit imermut morsutsitaallutik.
Johannesi pilimanianngitsumik inooriaaseqarpoq. Qatigattuup meqquinik sanaanik atisaqarpoq pillertanillu igutsaallu nujuartat tungusunnitsuutaannik nerisarluni. Inuit paaserusuppaat Johannesi kinaanersoq. Allaat farisiiarit sadukiiarillu makitasuut ornippaat. Johannesip oqarfigai: ‘Peqqissimisariaqarpusi allannguillusilu. Isumaqassanngilasi Aaperaamit kinguaajunerarnersi piinnarlugu Guutip qitornamisut isigiumaaraasi.’
Amerlasuut Johannesimukarput aperalutik: ‘Guuti nuannaartinniarlugu qanoq iliussaagut?’ Johannesip juutit oqarfigai: ‘Marlunnik kavaajaateqaruit aappaa pisariaqartitsisumut tunniutissavat.’ Nalunngiliuk sooq taama oqarnersoq? Ilinniartitani paasitikkusuppai Guuti nuannaartissagunikku inoqatitik asasariaqaraat.
Johannesip akileraartitsisartut oqarfigai: ‘Unneqqarissuussaasi sianiinaariniartarnasilu.’ Sakkutuut oqarfigai: ‘Pinngitsaaliillusi akiliisitsisassanngilasi, aamma sallusassanngilasi.’
Palasit Levikkullu aamma Johannesimukarput aperalugu: ‘Kinaavit? Kikkut tamarmik paaserusuppaat.’ Johannesip akivai: ‘Uanga tassaavunga inoqajuitsumi suaartartoq Iisaajap siulittuineratut Jehovamut aqqutissiuisoq.’
Inuit Johannesip ilinniartitsinera nuannaraat. Amerlasuut eqqarsaatigaat Missiarsiunersoq, kisianni akivai: ‘Uannit pingaaruteqarnerusoq tikiutissaaq. Taassumalu aloqutaasa singiisa qilerussaarnissaannut ajukkuppunga. Uanga imermut morsutsitsisarpunga, taannali anersaamut illernartumut morsutsitsissaaq.’
“Taanna inuit tamalaat uppertunngoqqullugit qaamaneq pillugu ilisimannittutut uppernarsaasussatut tikiuppoq.” – Johannesi 1:7