Jiisusip peroriar­tornera

Juuserfip Mariiallu Jiisusi meeqqatillu allat Naazaratsimi najugaqatigaat. Ilaquttani pilersor­niarlugit Juuserfi sanasutut sulisarpoq, aamma ilaquttani Jehova inatsisaalu pillugit ilinniar­tittarpai. Ilaqutariiullutik synagogiliakulasarput ukiullu tamaasa Jerusalem­miliartarlutik qaangiiffik nallius­siartorlugu.

Jiisusi aqqaneq-marlunnik ukioqartoq ilaqutariit pisarnermissut Jerusalem­miliarput. Illoqarfik inuppas­suarnik qaangiiffimmik nallius­siartortunik ulikkaarpoq. Nallius­sereeramik Juuserfi Mariialu angerlamut aallarput isumaqarlutik Jiisusi angalaqatigiinnut ilaasoq. Ilaquttamilli akornanni ujaraluaramikku naninngilaat.

Jerusalemmimut uterput ullunilu pingasuni ernertik ujarlugu. Kiisami guutisiorfim­mukaramik Jiisusi nanivaat. Ilinniar­titsisut akornanni issiavoq tusarnaarlunilu apeqquteqar­tarluni. Ilinniar­titsisut Jiisusi tupigusuutigingaaramikku apersulerpaat akissutigisar­tagaalu tupigusuutigiuarlugit. Takusin­naavaat Jehovap inatsisaanik paasisimasaqarluartoq.

Juuserfi Mariialu ernumasorujus­suusimapput. Mariia oqarpoq: ‘Ernik, sumi tamaani ujaraluarpatsigit! Sumiikkavit?’ Jiisusi akivoq: ‘Nalugassiuk Ataatama illuaniittunga?’

Jiisusip angajoqqaani Naazaratsimut angerlaqatigai. Juuserfip Jiisusi sanasutut ilinniartippaa. Jiisusi inuusuttutut qanoq ittuusimas­sasoraajuk? Peroriar­tortilluni Jiisusi ilisimasaqar­neruleriartorpoq, Guutimillu inunnillu nuannarineqaleralut­tuinnarluni.