Jehovap Jiisusi illersoraa

Israalip kangiani nunami ungasissumi inuit upperaat ullorissanit siulersor­neqarsin­naallutik. Unnuit ilaanni Kangiamiut qaamasoq ullorissatut isikkulik ingerlasoq takuaat malilerlugulu. Taamaalillutik Jerusalemmimut apuupput. Angutit inuit apersulerpaat: ‘Naak taanna meeraq juutinut kunngiusussaq? Ataqqin­nittuliorfiginiarlugu tikippugut.’

Herodasi, Jerusalemmimi kunngi, kunngin­ngortussaq pillugu tusarami ernumalerpoq. Palasit aperai: ‘Taanna juutinut kunngin­ngortussaq sumiippa?’ Akivaat: ‘Pruffiitit oqarsimapput Betlehemmimi inunngussasoq.’ Taava Herodasi angutit Kangiamiut aggeqquai oqarfigalugillu: ‘Betlehem­mimukarlusi nukappiarannguaq ujariar­torsiuk. Uannullu utissaasi paasitil­lungalu sumiittoq. Taamaalillunga orneriarlugu ataqqin­nittuliorfiginias­sagakku.’ Salluliorporli.

Taava “ulloriaq” ingerlaaq­qilerpoq. Angutit Betlehemmip tungaanut malippaat. “Ulloriaq” illup qulaanut unimmat angutit illu iserfigaat. Tassani Jiisusi Mariiami anaanaminiittoq nanivaat. Nukappiarannguaq seeqqum­merfigaat tunissutis­sanillu kuultinik, pujoortit­takkanik tipigissunik tarngummillu myrramik tunillugu. Ilumut Jehovap angutit taakku Jiisusimik ujarlertippai? Naamik.

Unnuaq taanna Jehovap Juuserfi sinnattukkut oqarfigaa: ‘Herodasip Jiisusi toqunniarpaa. Nuliat ernerillu ilagalugit Egyptenimut qimaassaatit. Uannillu uteqquneqar­nissassi tungaanut Egyptenimiissaasi.’ Ingerlaannarlu Juuserfi ilaquttanilu Egypteniliarput.

Jehovap angutit Kangiamiut oqarfigisimavai Herodasimut utissan­ngitsut. Herodasip tamanna paasigamiuk kamattorsuan­ngorpoq. Jiisusilu nanisin­naanngeriaramiuk peqqusivoq Betlehemmimi nukappiaqqat mikisut tamarmik Jiisusip ukioqatai toqunneqassasut. Jiisusili Egyptenimi ungasis­sorsuarmiippoq.

Kingusin­nerusukkut Herodasi toquvoq. Jehovap Juuserfi oqarfigaa: ‘Maanna utersin­naanngorpusi.’ Taava Juuserfi, Mariia Jiisusilu Israalimut uterput Naazaratsimilu najugaqalerlutik.