KAPITALI 70
Inngilit Jiisusip inunngornera nalunaarutigigaat
Romamiut naalagaaffissuanni aqutsisoq, kaasari Aggustusi, peqqusivoq juutit tamarmik illoqarfimmut inunngorfigisaminnut nalunaarsortikkiartussasut. Taamaattumik Juuserfi Mariialu Betlehemmimukarput, Juuserfip ilaqutaasa inunngorfigisaannut. Mariia ungasinngitsukkut ernisussaavoq.
Betlehemmimut apuukkamik allamik unnuiffissaqannginnamik nersutit inaanniipput. Tassani Mariia ernivoq. Ernertaani annoraaminernut amitsunut immuteriarlugu nersutit nerisarfiannut ilivaa.
Betlehemmip eqqaani savanik paarsisut unnuakkut narsaammiipput savaatitik nakkutigalugit. Inngilip saqqummerfigeriataarpai, Jehovallu alutornassusianik qinngorneqaramik ersingaalerput. Inngililli oqarfigai: ‘Annilaangassanngilasi. Nuannersumik tusagassaqartippassi. Ullumimi Missiarsi Betlehemmimi inunngorpoq.’ Tassanngaannaq inngilerpassuit qilammi saqqummerput oqarlutillu: ‘Guuti qilammiittoq ataqqisaali, nunarsuarmilu eqqissineqarli.’ Taava inngilit tammariataarput. Savanik paarsisut qanoq qisuariarpat?
Paarsisut imminnut oqarfigipput: ‘Betlehemmimukapallanniarta.’ Ingerlapallakkamik Juuserfi Mariialu inoorlaajutaallu nersutit inaanniittut nanivaat.
Kikkullu tamarmik inngilip savanik paarsisunut oqaasiinik tusartut tupigusupput. Mariiap inngilip oqaasii eqqarsaatigeqqissaarpai puiunngisaannarlugillu. Savanik paarsisut savaatiminnut uterput tusakkatillu takusatillu tamaasa pillugit Jehova qutsavigalugu.
“Aallartimmanga maanna maaniippunga. Tikiunnissara nammineq aalajangigarinngilara, Guutilli aalajangerpaa.” – Johannesi 8:42