Gaabriali Mariiamut oqariartortoq

Elizabetti inuusuttumik ilaqutaqarpoq Mariiamik atilimmik. Mariia Naazaratsimi Galiliiamiittumi najugaqarpoq, Juuserfilu sanasoq aappassiarivaa. Elizabetti naartulluni qaammatit arfinilinngormagit inngilip Gaabrialip Mariia saqqummerfigaa. Ilasseriarlugu oqarfigaa: ‘Mariia, Jehovamit iluarisaangaarputit.’ Gaabrialip suna pineraa Mariiap paasinngilaa. Taava nangilluni oqarpoq: ‘Naartulerumaarputit ernertaassallutillu, taannalu Jiisusimik atsissavat. Kunnginngorumaarpoq, kunngeqarfialu naassaanngitsumik atassaaq.’

Mariia oqarpoq: ‘Kisianni atoqateqarsimanngisaannarpunga. Qanoq ilillunga meerartaassagama?’ Gaabrialip akivaa: ‘Jehovamut ajornartoqanngilaq. Anersaap illernartup qulangerumaarpaatit, taava ernertaassaatit. Aamma eqqarlit Elizabetti naartuvoq.’ Taava Mariia oqarpoq: ‘Jehovap inussiaatigaanga. Oqarnittut pineqarlanga.’

Mariiap Elizabetti nunamut qaqqartuumut illoqarfimmut tikeraarpaa. Mariiap ilassimmagu Elizabettip naarmiua pikeriarpoq. Elizabettilu anersaamit illernartumit sunnerneqangaarluni oqarpoq: ‘Mariia, Jehovap pilluaqqusimavaatit. Naalakkama anaanaanit tikeraarneqarnera immikkut pisinnaatitaaffigaara!’ Mariiap akivaa: ‘Uummammit qamannga pisumik Jehova unnersiutigaara.’ Mariialu qaammatini pingasuni Elizabettimeereerluni Naazaratsimut angerlarpoq.

Juuserfip paasigamiuk Mariia naartusoq aappassiarerusukkunnaaraluarpaa. Inngililli sinnattukkut saqqummerfigaa oqarfigalugulu: ‘Mariiap nuliartaarinissaa annilaanngatigeqinagu. Ajortuliornikuunngilaq.’ Taava katipput Juuserfillu illuani najugaqalerlutik.