KAPITALI 68
Elizabetti ernertaartoq
Jerusalemmip qarmarsuisa sanaqqinneqarnerisa kingorna ukiut 400-t sinnerlugit qaangiuttut palaseqarpoq Zakkariamik atilimmik. Zakkaria nulianilu Elizabetti Jerusalemmip qanittuani najugaqarput. Ukiorpassuarni aappariissimagaluarlutik meeraqanngillat. Ullut ilaanni Zakkaria guutisiorfimmi tipigissaammik ikumatitsisussanngormat inngilip Gaabrialip saqqummerfigaa. Zakkaria ersilerpoq. Gaabrialilli oqarfigaa: ‘Annilaangassanngilatit. Jehovamit nuannersumik tusagassaqartippakkit. Nuliat Elizabetti ernertaassaaq, taannalu Johannesimik atserneqassaaq. Jehovap Johannesi immikkut suliassikkumaarpaa.’ Zakkaria aperivoq: ‘Ilumut taama pisoqarsinnaagami? Nuliaralu meerartaarnissatsinnut utoqqaavallaarpugut.’ Gaabriali oqarpoq: ‘Guutimuna oqariartortikkaanga. Kisianni upperiumannginnamma ernertaarnissavit tungaanut oqalussinnaajunnaassaatit.’
Zakkaria pisarnerminit sivisunerusumik guutisiorfimmiimmat silataani utaqqisut susoqarsimaneranik alapernaapput. Zakkariali kiisami anillakkami oqalussinnaanngilaq. Taamaallaat ussersorsinnaavoq. Inuillu paasivaat Zakkaria Guutimit tusarlerneqarsimasoq.
Kingusinnerusukkut inngilip oqarsimaneratut Elizabetti naartulerpoq ernertaarlunilu. Ikinngutaasa ilaqutaasalu ernertaavat alakkarpaat nuannaaqatigisorujussuullugillu. Elizabetti oqarpoq: ‘Johannesimik ateqassaaq.’ Oqarfigaalli: ‘Ilaquttanni taama ateqartoqanngilaq. Ataataa atsiullugu Zakkariamik atserniarsiuk.’ Zakkariali allappoq: ‘Johannesimik ateqassaaq.’ Ingerlaannarlu Zakkaria oqalussinnaaleqqippoq! Ernertaarnerat Judiiami tamarmi tusarneqarpoq, inuillu isumaliuutigaat: ‘Nukappiarannguarmita sunngussava?’
Taava Zakkaria anersaamit illernartumit sunnerneqangaarluni siulittuivoq: ‘Jehova unnersiutigineqarli. Jehovap Aaperaat neriorsorpaa uagutsinnik aniguisitsisussaq, Missiarsi, aallartikkumaarlugu. Johannesi pruffiitinngussaaq Missiarsillu tikiunnissaa piareersarumaarlugu.’
Aamma Elizabettip ilaqutaanut Mariiamut immikkut ittumik pisoqarpoq. Tamanna kapitalip tulliani paasisaqarfiginerussavarput.
“Tamanna inunnut ajornarpoq, Guutimulli suulluunniit ajornanngillat.” – Matiusi 19:26