Iikkami allannerit

Piffissap ingerlanerani Belshassari Babylonnimi kunngin­ngorpoq. Unnuit ilaanni inuit nuimasut tuusintit unnussiuaaqatigiumallugit qaaqquai. Kiffani peqquai imerfiit kuultiusut Nebukadnesarip Jehovap guutisiorfianiit tigusimasai aassagaat. Belshassarip qaaqqusaasalu imerfiit atorpaat guutitillu unnersiutigalugit. Tassangaannaq inuup assaa nueriasaarpoq oqaatsinillu eqqumiitsunik iikkamut allalluni.

Belshassari ersisorujus­suanngorpoq. Angakkuar­tartuni qaaqquai imalu neriorsorlugit: ‘Kialuunniit oqaatsit uku nassuiarsin­naappagit taanna Babylonnimi pissaanerpaanut pingajuulersissavara.’ Misiliigaluarput, kisianni kialuunniit nassuiarsin­naanngilai. Taava dronningi iserpoq oqarlunilu: ‘Anguteqarpoq Daanialimik atilimmik Nebukadnesarimut nassuiaas­sisarsimasumik. Oqaatsit uku ilinnut nassuiarsin­naassavai.’

Daaniali kunngimut sassartitaavoq. Belshassarip oqarfigaa: ‘Oqaatsit uku atuarlugillu nassuiarsin­naagukkit kuultiusunik ujamiler­neqassaatit, Babylonnimilu pissaanerpaanut pingajuulissaatit.’ Daaniali oqarpoq: ‘Tunissutiginiakkatit perusun­ngilakka, kisianni oqaatsit ilinnut nassuias­savakka. Ataatat Nebukadnesari anneruniar­tuunikuuvoq. Jehovallu naqqippaa. Suneqarsimanersoq nalunngik­kaluarlugu Jehovamut ataqqin­ninngitsuliorlutit imerfiit kuultiusut guutisiorfianin­ngaanneersut viinnisorfigivatit. Taamaattumik Guutip oqaatsit uku allappai: Mené, mené, teqél aamma ufarsín. Oqaatsit isumaqarput mederit perserillu Babylonni ajugaaf­figiumaaraat illillu kunngiujun­naarumaartutit.’

Babylonni illersuutaasunik qarmarsuaqarami itisuumillu kuussuaqarluni ajugaaf­figineqarsin­naanngitsutut isikkoqarpoq. Unnuarli taannarpiaq mederit perserillu saassussipput. Perserit kunngiata Kyrosip kuussuup kuunnera allamut saatsippaa sakkutuuni isaaffim­mukarsin­naanias­sammata. Apuummata isaaffiit ammaannarput! Sakkutuut isaapput illoqarfillu tiguarlugu kunngilu Belshassari toqullugu. Taava Kyrosi Babylonnimi kunngin­ngorpoq.

Ukioq ataaseq qaangiutin­ngitsoq Kyrosi ima nalunaarpoq: ‘Jehovap peqquaanga guutisiorfini Jerusalem­mimiittoq sanaqqissagiga. Innuttai kikkulluunniit ikiuukkiar­torusuttut ikiuukkiar­torsinnaapput.’ Taamaalillutik Jehovap neriorsuisimaneratut juuterpassuit Jerusalemmip suujunnaarsin­neqareernerata kingorna ukiut 70-it qaangiuttut utersin­naanngorput. Kyrosip imerfiit kuultiusut sølviusullu atortullu allat Nebukadnesarip guutisiorfimmiit tigusimasai utertippai. Takusin­naaviuk qanoq Jehovap innuttani Kyrosi aqqutigalugu ikiorsimanerai?