Orpissuaq pillugu sinnattoq

Unnuit ilaanni Nebukadnesari annilaas­sutigisaminik sinnattorpoq. Ilisimasortani aggeqquai qanorlu isumaqar­neranik nassuiaateq­qulluni. Arlaannaataluunniilli nassuiaas­sinnaanngilaa. Naggataatigut kunngip Daaniali oqaloqatigaa.

Nebukadnesarip Daaniali oqaluttuuppaa: ‘Orpik sinnattorivara. Alliartorluni orperujus­suanngorpoq, portungaaramilu qilak allaat tikillugu. Nunarsuarmi sumiikkaluaraan­niluunniit takuneqarsinnaavoq. Kusanartunik pilutaqarpoq naatitarpas­suaqarlunilu. Uumasut alanngumeerujoorfigisarpaat timmissallu avalequtaani ineqarlutik. Taava inngili qilammiit aqqarpoq nipituumillu suaarluni: “Orpik kipillugu uppitissiuk, avalequtaalu killorsigit. Sorlaali kippakoq nunami ataannarli, kalunnernillu saviminiusunik kanngus­saasunillu qilersorlugu. Orpiup uummataa allanngussaaq nersutip uummataanik tunineqas­salluni piffissarititani arfineq-marlunni. Kikkut tamarmik paasissavaat Guuti aqutsisuusoq kunngeqarfillu piumasaminut tunnius­sinnaallugu.”’

Sinnattup qanoq isumaqarnera Jehovap Daanialimut oqaluttuaraa. Daanialillu suna pineqartoq paasigamiuk annilaangasorujus­suanngorpoq. Kunngimut oqarpoq: ‘Neriukkaluarpunga sinnattunni akeqqatit pineqartut. Illilli pineqarputit. Orperujussuaq kipineqartoq tassaavoq illit. Naalagaaffiit annaajumaarpat, nersutitullu nujuartatut ivigartorumaarputit. Inngilili oqarmat sorlaa kippakoq nunami ataannassasoq isumaqarpoq kunngin­ngoqqis­sasutit.’

Ukioq ataaseq qaangiummat Nebukadnesarip Babylonni alutoralugu illussaarsuarmi qaavaniit qimerloorpaa. Oqarpoq: ‘Takuuk illoqarfik kusanarluinnartoq uanga pilersitara. Tassa taamak kakkatsigaanga!’ Oqaatsinilu suli naanngikkai nipi qilammiit tutsiuppoq: ‘Nebukadnesari! Maanna naalagaaffiit annaavat!’

Taava ingerlaannaq Nebukadnesari niaqulaar­tunngorpoq uumasutullu nujuartatut pissuseqalerluni. Illussaarsuarminiik­kunnaarluni narsaatini uumasut akornan­niilerpoq. Nujai nattorallip meqquisut takitigilerput kukiilu timmissap kukiitut takitigilerlutik.

Ukiut arfineq-marluk ingerlareermata Nebukadnesari silattoqqippoq, Jehovallu Babylonimi kunngin­ngorteqqippaa. Taava Nebukadnesari oqarpoq: ‘Jehova qutsinnerus­saartoq unnersiutigaara. Maanna paasivara Jehova aqutsisuusoq. Inuit anneruniartut naqqittarpai, kinaluunniillu toqqakkani pissaaneqalersis­sinnaavaa.’