Pallorfigin­ngilaat

Kunngi Nebukadnesari inuusaliarujussuaq pillugu sinnattoreernermi kingorna inuusaliamik kuultiusumik sanatitsivoq. Durap qooruani nappartippaa tassanilu Babylonnimi inuit pingaar­nerpaat katersor­teriarlugit inuusaliap saavanukaqquai. Shadraki, Meshaki Abed-Negolu aamma ilaapput. Kunngip peqquai: ‘Qarlortaatit, kukkilat­tarissat nipilersuutillu allat tusaalerussigit inuusaliaq pallorfigis­savarsi. Kinaluunniit taamaalioruman­ngitsoq ikuallagaassaaq.’ Hebræerit pingasut inuusaliaq pallorfigissavaat, imaluunniit Jehova kisiat guutisiorfigerusussavaat?

Taava kunngi nipilersoq­qusivoq. Kikkut tamarmik, Shadraki, Meshaki Abed-Negolu minillugit, pallorput inuusaliaq guutisiorfigalugu. Angutit ilaasa tamanna maluginiarpaat kunngilu oqarfigalugu: ‘Hebræerit pingasut ikku inuusaliat pallorfigiuman­ngilaat.’ Nebukadnesarip aggertippai oqarfigalugillu: ‘Periarfis­seqqissavassi. Inuusaliarli pallorfigiuman­ngikkussiuk ikuallaavimmut iginneqassaasi. Guuteqanngilaq ilissinnik aniguisitsisin­naasumik.’ Taava akipput: ‘Periarfis­sinneqaq­qittariaqan­ngilagut. Guutitta annaassin­naavaatigut. Kisianni aamma taamaaliun­ngikkaluarpat inuusaliaq guutisiorfiginavian­ngilarput.’

Nebukadnesari kamattorujus­suanngorpoq. Kiffaminut oqarpoq: ‘Ikuallaavik arfineq-marloriaataanik kissatsin­nerusiuk!’ Taava sakkutuuni peqquai: ‘Angutit uku qilersorsigit ikuallaavimmullu igillugit!’ Ikuallaavik kissangaarmat sakkutuut qanilligamikku toqupput, hebræerillu pingasut ikuallaavimmut nakkarput. Nebukadnesarilli alakkar­teramigit takuaa angutit pingasuunatik sisamat ikuallaavim­miittut. Annilaangasorujus­suanngorpoq kiffanilu aperalugit: ‘Ilaa angutit pingasut innermut igippagut? Sisamat takusin­naavakka, ataaserlu inngilitut isikkoqarpoq!’

Nebukadnesarip ikuallaavik qanillivaa suaarlunilu: ‘Guutip Qutsinnerus­saartup kiffai, anigitsi maannarlusilu!’ Kikkut tamarmik tupigusuutigaat Shadraki, Meshaki Abed-Negolu ajoratik anillammata. Amiat, nujaat atisaallu ikuallas­simanngillat, aamma qilussun­ninngil­lalluunniit!

Nebukadnesari oqarpoq: ‘Shadrakip, Meshakip Abed-Negollu Guutiat pissaaneqaqaaq! Inngilini aallartippaa annaallugillu. Allamik taamatut guuteqanngilaq!’

Hebræerit pingasut assigalugit aamma illit susoqaraluarpal­luunniit Jehovamut aalajaak­kusuppit?