Jehovap inngiliata Hizkia illersoraa

Assyriap naggueqatigiit qulit kunngeqarfiat, Israali, tigusarisimavaa. Maannalu Assyriami kunngip Sankeribip naggueqatigiit marluk kunngeqarfiat, Juuda, tigusarerusuppaa. Juudami illoqarfiit tulleriiaarlugit tigusarisalerpai. Kisianni illoqarfik tigusarerusun­nerpaasaa tassaavoq Jerusalemmi. Sankeribilli naluaa Jerusalemmi Jehovamit illersor­neqartoq.

Jerusalemmi saassun­neqanngin­niassammat Hizkiap, Juudami kunngip, Sankeribi aningaasarpas­suarnik akilerpaa. Sankeribilli aningaasarpassuit tigoriarlugit sakkutoorpassuit Jerusalemmimut saassutsik­kiartorpai. Assyriamiut qanilliar­tuinnarmata inuit illoqarfim­miittut annilaangalerput. Taava Hizkiap oqarfigai: ‘Erseqinasi. Assyriamiut nukittoqaat, Jehovalli taakkunanit nukittunerutik­kumaarpaatigut.’

Sankeribip oqariar­tortitani Jerusalemmimut aallartippaa illaruaatiginias­sammagit. Oqariar­tortitaq illoqarfiup silataanut pivoq suaartarlunilu: ‘Jehovap ikiorsin­naanngilaasi. Hizkiamit sianiinaar­teqinasi. Guutip kialluunniit illersorsin­naanngilaasi.’

Hizkiap qanoq iliussanerluni nalugamiuk Jehova aperaa. Jehovap akivaa: Sankeribip oqariar­tortitaata oqaasii annilaangas­sutigeqinasigit. Sankeribip Jerusalemmi tigusarinavianngilaa.’ Taava Hizkia Sankeribimit allagarsivoq. Allakkani allassimavoq: ‘Tunniutiinnarit. Jehovap annaannavian­ngilaasi.’ Hizkia qinuvoq: ‘Jehova, annaatsigut kikkut tamarmik paasinias­sammassuk illit kisivit Guutiusutit ilumoortoq.’ Jehovap akivaa: ‘Assyriami kunngi Jerusalemmimut isernavianngilaq, uanga illoqarfiga illersorumaarakku.’

Sankeribi isumaqarpoq Jerusalemmi tigusaringajalerlugu. Unnuakkulli Jehovap inngilini sakkutuunut Assyriamiunut aallartippaa. Inngilip sakkutuut 185.000-t toquppai! Kunngip Sankeribip sakkutuuni pitsaanerpaat annaavai. Ajorsaramilu angerlamut utiinnar­tariaqarpoq. Jehovap neriorsuinermisut Hizkia Jerusalemmilu illersorpai. Illit Jerusalem­mimiissimasuuguit Jehova tatigisimas­sagaluarpiuk?