KAPITALI 54
Jehovap Juuna naammagittarfigigaa
Assyriap illoqarfiani Niinivimi inuit ajortorujussuupput. Jehovap pruffiitini Juuna Niinivimukaqquaa tassani najugallit mianersoqquniassammagit allanngoqqullugillu. Juunali qimaalluni allamukarpoq. Umiarsuarmut Tarshishimukartumut ikivoq.
Umiarsuartillugit anorersuartorsuanngorpoq, umiartortullu annilaangalerput. Guutiminnut qinupput aperalutik: ‘Sooruna taamaattoqartoq?’ Naggataatigut Juunap oqarfigai: ‘Uanga pisuuvunga, Jehovap suliassikkaluarmanga qimaagama. Immamut naloriukkussinga qatsorumaarpoq.’ Umiartortut Juuna immamut naloriukkusunngikkaluarpaat, Juunalli uteriiserfigai. Immamullu naloriummassuk anorersuarunnaarpoq.
Juuna isumaqalerpoq toqusussanngorluni. Immami kiviartortilluni Jehovamut qinuvoq. Taava Jehovap aalisagarsuaq aggertippaa. Aalisagarsuup Juuna iivaa, kisianni toqunngilaq. Aalisagarsuup iluaninngaanniit Juuna Jehovamut qinuvoq: ‘Neriorsorpakkit naalattuaannassallutit.’ Jehovap Juuna ulluni pingasuni aalisagarsuup iluani uumaannartippaa. Naggataatigullu Juuna nunamut oriartillugu.
Taava Juuna Jehovamit annaanneqarami Niinivimukartariaqarunnaarpa? Naamik. Jehovap oqarfigeqqippaa Niinivimukassasoq. Tamatumuuna Juunap naalappaa. Aallarpoq Niinivimiullu ajortut oqarfigalugit: ‘Ullut 40-t qaangiuppata Niinivi piuneerunneqassaaq!’ Ilimananngilluinnartumillu pisoqarpoq – Niinivimiut tusarnaarput allanngorlutillu. Niinivimi kunngip innuttani oqarfigai: ‘Ilungersorlusi Guutimut qinugitsi peqqissimillusilu. Taava immaqa nungutinnata annaatissavaatigut.’ Jehovap inuit peqqissimisut takugamigit Niinivi suujunnaarsinngilaa.
Tamanna Juunap kamaatigaa. Eqqarsaatigeriaruk: Jehovap Juuna naammagittarfigalugulu misiginneqatigaa, Juunalli Niinivimiut misiginneqatiginngilai. Taava illoqarfiup avataanukariarluni isumalulluni naasup ataanut ingippoq. Naasorli toquvoq Juunalu alanngumiitikkunnaarlugu, Juunalu kamalerpoq. Taava Jehovap Juuna oqarfigaa: ‘Illit naasoq Niinivimiunit naakkigineruat. Uangali Niinivimiut naakkigigakkit annapput.’ Jehovamuna Juuna sumik paasitikkusukkaa? Niinivimiut naasumiit pingaarnerusut.
“Jehovap … [inuit] tamaasa suujunnaarsitaanatik peqqissiminissamut periarfissikkusukkamigit naammagittarfigaasi.” – Petrusimit 2. 3:9