Josiia Guutip inatsisaanik nuannarinnittoq

Josiia arfineq-pingasunik ukioqarluni Juudami kunngin­ngorpoq. Taamani inuit angakkuar­niartarput guutilianillu guutisior­tarlutik. Josiiap 16-inik ukioqarluni Jehova qanoq eqqortumik guutisiorfigineqarsin­naanersoq paasinialerpaa. Taava 20-nik ukioqarluni nunami tamarmi guutiliat pilliiviillu aserorterlugit piialerpai. Josiialu 26-nik ukioqarluni aalajangerpoq Jehovamut guutisiorfik iluarsaan­neqassasoq.

Guutisiorfimmi palasiunerup Hilkijap Jehovap inatsisai assaannarmik allatat imusat nassaarai – immaqa taakkorpiaat Moorsisimit allanneqarsimasut. Kunngip allattuata Shafanip imusat Josiiamukaappai inatsisillu nipituumik atualerlugit. Tusarnaar­tilluni Josiiap paasilerpaa inuit ukiorpassuarni Jehovamut naalassiman­ngitsut. Kunngip Hilkija oqarfigaa: ‘Jehovap kamaattorujus­suuaatigut. Oqaloqatigiartoruk. Qanoq iliussanerluta paasinias­savarput, oqaluttuutis­saqqaarpaatigut.’ Jehovap pruffiiti Hulda aqqutigalugu ima akivai: ‘Juudamiut naalakkun­naarsimavaannga. Pillarneqassapput. Josiiali kunngiutillugu pillarneqas­sanngillat, taannami maniguulluni inatsisit naapertorlugit allannguerusummat.’

Josiiap tamanna tusaramiuk guutisiorfim­mukarpoq Juudamiullu aggeqqullugit. Taava Jehovap inatsisaanik atuffappai. Josiia inuillu aalajangerput Jehova uummammit qamannga pisumit naalanniarlugu.

Juudamiut ukiorpassuarni ulloq qaangiiffik nallius­sisarsiman­ngilaat. Josiialli inatsisini atuarpaa ukiut tamaasa nallius­sineqar­tariaqartoq, taava inuiannut oqarpoq: ‘Ulloq qaangiiffik Jehovap ataqqinaatissaanik nalliut­torsiutigis­savarput.’ Josiiap pilliutis­sarpassuit piareersarpai guutisiorfimmilu erinarsoqatigiit­toqarnissaa isumagalugu. Taava ulloq qaangiiffik nallius­sineqarpoq aqaguanilu ullut iffiamik-qaqortumik seernarsaateqan­ngitsumik neriffiusartut ulluni arfineq-marlunni nallius­sineqarlutik. Saamualip nalaaniilli ulloq qaangiiffik taamarsuaq nalliut­torsiutigineqarsimanngilaq. Josiiap ilumut Guutip inatsisai nuannarai. Illit Jehova pillugu ilikkagaqaraangavit nuannarisarpiuk?