Jojada sapiitsuliortoq

Jeezabeeli paneqarpoq Ataljamik atilimmik, anaanamisulli ajortigisumik. Ataljap Juudami kunngi uigivaa. Uia toqummat ernera kunngin­ngorpoq. Ernerali toqummat Atalja Juudami imminut dronningin­ngortippoq. Taava taarser­neqanngin­niassagami kunngip kinguaavi, allaat aamma ernuttani, toquppai. Atalja kikkunnit tamanit ersigineqarpoq.

Palasiunerup Jojadap nuliatalu, Joshebap, nalunngilaat Ataljap iliuusii ajortorujussuusut. Inuunertik navianar­torsior­tillugu Ataljap ernutaasa ilaat, nuunuaraq Joashimik atilik, toqqorpaat guutisiorfimmilu perorsarlugu.

Joashi arfineq-marlunnik ukioqartoq Jojadap naalakkat tamaasa Levikkullu katersortippai oqarfigalugillu: ‘Isertoqan­nginniassammat guutisiorfiup matorsui paarisigit.’ Taava Jojadap Joashi Juudami kunngin­ngortippaa niaqoruserlugulu. Juudakkut nipituumik oqarput: ‘Kunngi inuummersorli!’

Inuppassuit suaartarnerat tusaaleramiuk Dronningi Atalja guutisiorfim­mukapallappoq. Kunngin­ngorsimasoq takugamiuk nilliavoq: “Pikitsitsileqaat! Pikitsitsileqaat!” Taava naalakkat dronningi tiguaat, allamukaateriarlugulu toqullugu. Ataljalli inuiannut ajortumik sunniuteqarsimanera aaqqinneqar­tariaqarpoq, qanoq?

Jojadap inuiaat Jehovamik isumaqatigiis­suteqar­nissaannik ikiorpai neriorsuisillugit Jehova kisiat guutisiorfigissagaat. Jojadap peqquai Baalimut guutisiorfik aserortissagaat guutiliallu sequmil­luinnarlugit. Inuit Jehovamik guutisioriar­tortaleq­qinnias­sammata palasit Levikkullu guutisiorfimmi sulilersippai. Guutip isaani minguttunik guutisiorfimmut isertoqan­nginniassammat paarsisoqar­tilerpaa. Taava Jojadap naalakkallu Joashi illussaarsuarmukaappaat kunngillu issiavis­saarsuanut ingitillugu. Juudami inuit nuannaaqaat. Maanna Ataljamit Baalisior­nermillu akornusersor­neqarun­naarlutik Jehova guutisiorfigisin­naalerpaat. Jojadap sapiitsuliornera ilaa torrak! Inuppas­suarnik qanoq ikiuisimanera takusin­naaviuk?