Jehovap sakkutoorpassui

Aramimi kunngi, Ben-Hadadi, Israalimut saassus­sisaqat­taarpoq. Saassus­sigaangat pruffiitip Eliisap Israalimi kunngi mianersoq­qusarpaa. Taamaattumik Ben-Hadadi aalajangerpoq Eliisa aallarun­niarlugu. Eliisa illoqarfimmi Dotanimiittoq paasigamiuk tigusariniarlugu sakkutoorpassuit Aramæerit aallartippai.

Aramæerit unnuakkut Dotanimut apuupput. Aqaguani ullaakkut Eliisap kiffaata anigami takulerpaa illoqarfik sakkutoorpas­suarnit unguneqarsimasoq. Annilaangalerpoq suaarlunilu: ‘Eliisa, qanoq iliussaagut?’ Eliisap akivaa: ‘Uagut ilivut akeqqatta iliinit amerlanerupput!’ Taava Jehovap Eliisap kiffaanut takutippaa qaqqat illoqarfiup eqqaaniittut hestinik qamutinillu innerusunik ulikkaartut.

Aramæerit sakkutuuisa ornilermanni Eliisa Jehovamut ikioqquvoq. Taava Jehovap sakkutuut paatsiveerutsippai. Eliisap sakkutuut oqarfigai: ‘Illoqarfik una tassaanngilaq orninniagarsi. Malissinga, angummut ujakkassinnut ingerlatis­savassi.’ Taava Israalimi kunngip najugaqarfigisaanut Samaaria tikivillugu malippaat.

Aramæerit sumiinnerlutik kingusinaarlutik paasivaat. Israalimi kunngip Eliisa aperaa: ‘Toqussavakka?’ Eliisa akeqqaminut akiniaarusulerpa? Naamik. Eliisa oqarpoq: ‘Toqoqinagit. Nerisas­seriarlugit ingerlateq­qiinnakkit.’ Taava kunngip nerersuar­teriarlugit angerlar­teqqippai.